Read Tase Naga EZEKIEL 29 Bible Online

EZEKIEL 29 - Tase Naga bible

EZEKIEL 29

¹Nuiyshiq thuq wvnc phuex maq wawc rokshiz raungwawc, yapix lex rokshiz, raungx rokshiz rac raungnuiyq nueyc nuex Yehowa kuex ngaz rulc rvbomc phuex.

²Vpiq rueq, “Vthueyc rvyaq miq lex, Ejip hokhvmx kuex shummarc shuiux. Piq nuiyc Ejip mungtan lotlaz rueq mkhoc murx lac gurx shvnx lvmz kuex jungx shuiuz.

³Ejip hokhvmx nuex seng vtueq Johvlc Yehowa rueq vkhoc jungx yaq kvjaz kuex jungx shuiuz: yuix ruilx mungx nuex hunglaungc hvlc maq bumx vtuiux jvlvy lex, ngaz kuex mralx rvtauk. Nile ruilx kuex mnoz rueq guimz yaq, mnoz rueq tvdung sung toq ngoz vshuiux.

⁴Ngaz rueq mruiyx rawz kvyuq yanx khuiuq maq khuiuq vtueq m-yuix ruilx wawc ngaq htenc kuex m-gvnz nuex tvkop phaungx. Kvruex yimaq ngaz rueq mnoz rulc nongx m-gvnz nuex kop yaq ngaq htenc kvtauk Nile ruilx wawc het tvdung gay phaungx.

⁵Ngaz rueq mnoz rulc nongx ngaq htenc lotlaz kuex kumtsvy tvnx nuex tuip gay shaungx. Mshauk pumz kuex kvkhoc luip guez dvyx ghaq htauk nuex woalc tuex. Mnoz kuex wushawx htenc nuiyc ngvmx saz htenc rueq phuiuz svy tvkoc kuq gay shaungx.

⁶Kvruex yimaq ngaz Yehowa rvtauk kuex Ejip miqsaz lotlaz rueq tuiuz wvnc wuez shuex,” ngoz tueq jungx tueq. Yehowa rueq, “Israel miqsaz tsuingshiq muex romc kuy tvkoc mnoz Ejip waz kox nuex kvnanc rvwak tueq, yuq muinz mnoz kuex kankawz vnyenz htauk nuex muinz nyenc hvlc yaungx toq.

⁷Tsuingshiq mnoz nuex kvnanc rvwak kv-phux tueq, tsuingshiq phauk luimx htenc tvmac vtueq tv-ngawk gay toq, tsuingshiq khez htenc tv-nyiq gay toq.

⁸Kvkhoc rvtueq majuiuc ngaz, Johvlc Yehowa rueq jungx vshaungx ngaz rueq yaung shuimc jix bix muex mnoz kuex khvt tvkoc tvkaz shaungx, tsuingshiq rueq mmiqsaz htenc nuiyc mnyvmx saz htenc kuex thvt gay shuex.

⁹Ejip kuex kuiyqshuik kuiyqkhvmx baung muex yaungx wvnc tuex. Kvkaq ngaz Yehowa rvtauk kuex mnoz rueq tuiuz wvnc shuiux. “Nile ruilx kuex mnoz rueq guimz yaq mnoz rueq vtvdung ngoz tueq ngoz vshuiux,

¹⁰ngaz kuex mralx nuiyc m-Nile ruilx ralx rvtauk. Ngaz rueq Ejip mungx kuex ghaqkhux kox Migdol ghaqyungx maq ghaqyaz kox Asawan ghaqyungx nuex httuiuc laz nuiyc Ethiopi ghaqruiy lotlaz kuex tvsawc tvric nuiyc kuiyq shuik kuiyq shix tvyaungc gay shaungx.

¹¹Miqsaz muinz ngvmx saz muinz kvruex maq khuemx lvy tuex rvmuq. Kvruex yuq wawc rok bvlic tup ukhaq muinz httax muq.

¹²Ngaz rueq Ejip mungx kuex mungkawx vwawc kuiyqshuik kuiyqkhvmx baung tvyaungc gay shaungx. Ejip mungx wawc ghaqyungx htenc kuex vganc bac wvnc tueq ghaqyungx htenc htauk nuex wawc rok bvlic tup rvthuip rvkhvt bac wvnc tuex. Ngaz rueq Ejip miqsaz kuex muingluiuz jix muex tvyaungc shaungx. Tsuingshiq kuex mungtan ruip rawx nuex panx wvnc vtueq vganc miqsaz htenc hvl nuex kvhttvp httax wuez tuex.”

¹³Johvlc Yehowa rueq, “Wawc rok bvlic yix maq ngaz rueq miqphvnx htenc kox nuex tvpanc nyanc gay tauk Ejip miqsaz kuex tvyez shvlx wvnc yek shaungx,

¹⁴kvkaq ngaz rueq tsuingshiq ghaq vyuimx httax yaq Ejip mungx ghaqyaz kox kvyuq tsuingshiq kuex tvhttax shaungx. Kvyuq tsuingshiq kuex hunglaungc vnulx mungtan,

¹⁵lotlaz htauk nuex hunglaungc vyomx vnulx pinhtumc yaungx tuex, tsuingshiq rueq vganc miqphvnx htenc kuex mkaq muinz guimz yek shuex rvmuq. Tsuingshiq thuinroc vganc miqphvnx kuex guimz muq mruez shueq, ngaz rueq tsuingshiq kuex tvnulx gay shaungx.

¹⁶Israel kuex piq muex romc kuy tvkoc tsuingshiq muex mkaq muinz kvwungx kvguing yek tuex rvmuq. Ejip muex tvluimc wvnc tueq kuex mtanc khvnc lac yaq wvnc tvnx lvmz, tsuingshiq nuex yaungx wvnc tueq kuex lawc vtueq Israel muex thuinz tvsvmz kuq shuex. Ngaz Johvlc Yehowa rvtauk kuex Israel rueq tuiuz wvnc shuex,” ngoz tueq jungx tueq.

¹⁷Nuiyshiq thuq wvnc phuex maq wawc 27 vphaungc yapix vphaungc raungnuiyq, Yehowa kuex ngaz rulc rvbomc phuex.

¹⁸Vpiq rueq, “Vthueyc rvyaq miq lex, Babelon hokhvmx Nebukhadnezar rueq Tire ghaq kuex khvt gay tueq. Piq rueq nolaungx bix muex liz hvlc gurc tvgurc ningkhvnc nuex tsuinghez khux htenc sawc wvnc ruiux phauk luimx htenc tsuimx tsawk wuez vtuex, yuq muinz hokhvmx waz nuiyc piq nolaungx bix uraq muinz tsuinghez kuilc daz vtuex yauk mauk kuex yvmx muinz lvp wuez muq.

¹⁹Kvkhoc rvtueq vruex kuex majuiuc ngaz, Johvlc Yehowa rueq jungx vshaungx: ngaz rueq Ejip mungx kuex Hokhvmx Nebukhadnezar muex kuq gay shaungx. Piq rueq httak vtueq Ejip mungx wawc tsak vnyvmx lotlaz lvmz wvnc shuex, kvruex kuex piq nolaungx bix muex yauk mauk yaungx tuex.

²⁰Piq nolaungx bix htenc rueq ngvy tvkoc shuimx kaz kuq phuex ningkhvnc nuex ngaz rueq Ejip mungx kuex piq muex kuq vshaungx. Ngaz, Johvlc Yehowa rueq jungx vshaungx.

²¹“Kvkhoc yaungx wvnc tuex nuex, ngaz rueq Israel miqsaz muex hungc vlaungc tvhungc kuq vtueq mnoz Ezekiel muex muinz miq ruip rawx rueq mnoz rueq jungx shuiux kvjaz kuex tay laz juing tvbomc phaungx rvtueq, kvkaq tsuingshiq rueq ngaz Yehowa rvtauk kuex tuiuz wvnc wuez shuex.”