Read Tase Naga EZEKIEL 30 Bible Online

EZEKIEL 30 - Tase Naga bible

EZEKIEL 30

¹Yehowa kuex ngaz rulc rvbomc yek phuex.

²Vpiq rueq, “Vthueyc rvyaq miq lex, ngaz, Johvlc Yehowa rueq jungx vshaungx kuex rawshvmx shvmx vtueq jungx shuiuz. Mnoz rueq vruex kvjaz htenc kuex ramc jungx shuiux: Vhiz juing raungnuiyq kuex httuiuc wvnc yaq shex!

³Kvruex raungnuiyq kuex vnyek shex, Yehowa rueq yauk shuimx shuex raungnuiyq vnyek shex, Kvruex raungnuiyq kuex phuemx rueq puingc nuiyc miqphvnx htenc kuilc daz raungnuiyq vnyek shex rvtueq.

⁴Ejip mungx nuex ralx rvlungc wvnc tuex Ethiopi mungx nuex thuinbac juing yunghvlc dung tuex. Ejip mungx nuex paunghvlc thvy gay rvhumc tuex; Mungtan kuex vnyvlc gay nuiyc tvbac wvnc rvhumc tuex.

⁵“Kvruex ralx rvlungc kuex Ethiopi, Lidia, Libya, Arabia, Kub mungx wawc vnuic gvl nolaungx bix htenc nuiyc ngvy miqsaz htenc muinz thvt gay shuex.”

⁶Yehowa rueq, “Ghaqkhux kox Migdol maq ghaqyaz kox Aswan nuex httuiuc laz Ejip mungx muex tvkhup wungx jix htenc lotlaz ralx rvkhvt nuex thvt gay shuex. Ejip mungx wawc kvsomc parc juing nolaungx bix htenc kuex tvbac gay rvhumc tuex. Ngaz, Johvlc Yehowa rueq jungx vshaungx.

⁷Kvruex mungtan kuex mungkawx nuex kuiyqshuik kuiyqkhvmx mungx muex yaungx wvnc vtueq ghaqyungx htenc kuex tvsawc ric tvbac httak gay shuex.

⁸Ejip mungx nuex ngaz rueq wvr tvsauz ruiux yuq, kvruex mungx kuex tvkhup tvguing jix lotlaz thvy gay rvhumc tuex, kvruex yimaq tsuingshiq rueq ngaz Yehowa rvtauk kuex tuiuz wvnc wuez shuex.

⁹“Kvruex raungnuiyq httuiuc wvnc vtueq Ejip kuex tvbac gay rvhumc tuex nuex, ngaz rueq muktuk maktak httax yaq Ethiopi miqsaz kuex thuinz tv-phez tvkoc thaungc jungc jix htenc kuex svngpholix htenc maq tvkaz shaungx, tsuinghez kv-khuirc hiyaz wuez tuex. Kvruex raungnuiyq httuiuc wvnc yaq!”

¹⁰Johvlc Yehowa rueq, “Ngaz rueq Babelon Hokhvmx Nebukhadnezar kuex shuimx vtueq Ejip mungx wawc tsak vnyvmx kuex tvhtumx gay shaungx.

¹¹Piq nuiyc menjenc tuiuz muq nolaungx daungx kuex kaz vtueq kvruex mungx kuex tvbac gay shuex. Tsuinghez rueq Ejip mungx kuex yaung maq khvt yap vtueq miq maungx htenc mvrc tuex.

¹²Ngaz rueq Nile ruilx kuex tvruic gay ruiux Ejip mungx kuex layx bac miqsaz luimc vkawc khung nuex taq gay shaungx. Pungnuk miqsaz rueq wvmungx tuimx tvsuimz gay shuex. Ngaz, Yehowa rueq jungx vshaungx,” ngoz tueq jungx tueq.

¹³Johvlc Yehowa rueq, “Memphi ghaq wawc yac yuimx htenc nuiyc vrot vkaq tishox htenc kuex tvbac gay shaungx. Ejip mungx kuex vshiz raung rueq muinz guimz lvp shuex rvmuq, ngaz rueq miq lotlaz kuex tvhiz sungx shaungx.

¹⁴Ngaz rueq Ejip mungx ghaqyaz kox htenc kuex kuiyqshuik kuiyqkhvmx tvyaungc ruiux, ghaqkhux kox nuex httax yaq Zoan ghaqyungx kvmuinz wvr maq jauk gay shaungx. Ngaz rueq ghaqnyuiuz jungx rvtueq Thebe ghaqyungx muex murx tvgurc shaungx.

¹⁵Ngaz rueq ngvy thuinkhvy kuex Pelusium ghaqyungx nuex httax yaq Ejip mungx wawc vyungx pinhtumc nolaungx ghaqshungc muex tvrvhumc shaungx. Ngaz rueq Thebe ghaqyungx wawc tsak vnyvmx kuex tvbac gay shaungx.

¹⁶Ngaz rueq Ejip mungx kuex wvr maq jauk gay shaungx, Pelusium kuex songhvlc thuiuz sac tvrvhumc shaungx. Thebe palx ruk htenc tvrul rop gay ruiux, ghaqyungx kuex yuix rueq luimz gay shuex.

¹⁷Heliopoli nuiyc Bubasti ghaqyungx htenc wawc yalxrox bix kuex ralx rvlungc nuex thueyc mvy wvnc tuex, vganc miqsaz htenc kuex vthuq wvnc rvhumc tuex.

¹⁸Ngaz rueq Ejip mungx luimc vkawc kuex tvbunx gay ruiux tsuingshiq kvsomc parc ngamc ngax yaq hungc vlaungc kuex tvmaq gay shaungx nuex, Taphanhe ghaq htauk nuex raungnyauk suip yaungx wvnc tuex. Phuemx rueq Ejip mungx kuex puingc wvnc shuex, piq ghaqyungx htenc wawc miq htenc kuex vthuq wvnc rvhumc tuex.

¹⁹Ngaz rueq vkhoc maq Ejip muex murx tvgurc shaungx yuq, tsuingshiq rueq ngaz Yehowa rvtauk kuex tuiuz wvnc wuez shuex.”

²⁰Nuiyshiq thuq wvnc phuex maq wawc rokshiz rac wawc shiz vphaungc yapix raungx mvshix raungnuiyq, Yehowa kuex ngaz rulc rvbomc phuex.

²¹Vpiq rueq, “Vthueyc rvyaq miq lex, ngaz rueq Ejip hokhvmx waz yauk phumz kuex tv-ngawk gay tauk. Piq mac kuex uraq muinz yop kuq shuex rvmuq, yaung shuimc yek tvkoc hungc vlaungc httax wvnc laz yop kuq shuex rvmuq.

²²Kvkhoc rvtueq majuiuc vruex kuex ngaz, Johvlc Yehowa rueq jungx vshaungx: ngaz kuex Ejip hokhvmx ralx rvtauk. Ngaz rueq piq yauk phumz ngoz tueq vhvlx yauk phumz nuiyc vngawk kay wuez yauk phumz vnueyc wvtaungx tv-ngawk gay shaungx, kvkaq piq yauk wawc yaung kuex dvy wvnc tuex.

²³Ngaz rueq Ejip miqsaz kuex mungkawx nuex tvpanc nyanc gay shaungx.

²⁴Kvruex yimaq ngaz rueq Babelon hokhvmx waz yauk phumz kuex hunglaungc tvlvp vtueq, ngvy yaung kuex piq yauk nuex lekuq shaungx. Yuq muinz Ejip hokhvmx yauk phumz kuex tv-ngawk rvgay shaungx, piq kuex piq ralx hez khaungkac nuex kvbot nyvnx yaq lvmx maq thueyc wvnc tuex.

²⁵Rvtueq, ngaz rueq piq kuex hunglaungc tvnulx gay ruiux Babelon hokhvmx muex hunglaungc tvhungc shaungx. Ngaz rueq piq muex yaung kuq shaungx nuex piq rueq Ejip mungx nuex tvmuiz shuex kvkaq, ngaz Yehowa rvtauk lvmx miq tek vtueq tuiuz wvnc wuez shuex.

²⁶Ngaz rueq Ejip miqsaz kuex mungkawx nuex tvpanc nyanc gay shaungx. Kvkaq ngaz Yehowa rvtauk lvmx kuex tsuingshiq rueq tuiuz wvnc wuez shuex,” ngoz tueq.