Read Tase Naga EZEKIEL 31 Bible Online

EZEKIEL 31 - Tase Naga bible

EZEKIEL 31

¹Nuiyshiq thuq wvnc phuex maq wawc rokshiz rac wawc shiz yapix lex thuimx yac vphaungc raungnuiyq, Yehowa kuex ngaz rulc rvbomc phuex.

²Vpiq rueq, “Vthueyc rvyaq miq lex, Ejip hokhvmx nuiyc piq miq lotlaz muex jungx shuiuz: Mnoz kuex luimc vkawc mtanc lac yungx vtuiux! Mnoz kuex ngaz rueq ukhaq rulc tv-ngvlc juing lac?

³Mnoz kuex hungc vlaungc httaz hvlc Asiria mungx rulc rv-ngvlc yaq, kvruex kuex Lebanon nuex kemz yaq ruippulx rulc rv-ngvlc yaq, Kvruex kuex svp hvlc, vnoz vkanx htenc rueq buingc yaq, Pulx jungx kuex loayc hvlc, vlungc htenc rueq phuemx htanc yaq.

⁴Kvruex tvpeluz juing yuix httax yaq, Kvruex mac phuiuz vsvy thuiyc kuy jix ghaq mungx nuex yuix httax yaq. Tsuingshiq rueq pulx kemz yaq baung kvyuq yuix shvy wuez yaq Luingx wawc pulx htenc lotlaz nuex yuix saz ruilx tvkaz tueq.

⁵Kvruex pulx rueq yuix shvmhvlx lvp yaq ningkhvnc nuex, Kvruex pulx kuex vganc pulx htenc htauk nuex vluz rvtueq. Kvruex noz vkanx htenc kuex wvyungc wvloayc httax yaq.

⁶Kvruex noz vkanx htenc nuex wushawx ruip rawx rueq vjejez wuez yaq; Yaruix ngvmx saz htenc rueq pulx jungx khung nuex vsaz nyuiuz wuez yaq; Mungkawx miqphvnx htenc kvruex buingc khung nuex nyec tvkuiyq wuez shuex.

⁷Kvruex pulx kuex mtanc lac svp yaq nguinx, Vnox vkanx loayc kuex, loayc hvlc luz yaq. Kvruex ruingx htenc kuex ghaq warc thuiuz hvlc yuix saz ruilx nuex janc yaq.

⁸Tishox sunc nuex kemz yaq ruippulx doc muinz kvruex rulc rv-ngvlc lot muq. Namenc pulx nuex kvkhoc vnoz vkanx kuex mkaq muinz httax muq, Kvkhoc noz vkanx htenc tv-ngvlc juing pulx kuex kemz muq. Tishox sunc nuex kemz yaq pulx doc muinz kvkhoc svp rvp tuex rvmuq.

⁹Ngaz rueq vnoz vkanx htenc tvtak rak vtueq tvsvp rvp tauk. Kvruex kuex Tishox sunc ngoz yaq Eden nuex kemz yaq pulx ruip rawx rueq khvnnyvnx wuez yaq.

¹⁰“Kvkhoc rvtueq majuiuc ngaz, Johvlc Yehowa rueq phuemx[19] htanc laz yungx luz wvnc tueq pulx kvyuq yvmx lac yaungx wvnc tvnx kuex mnoz muex jungx kuq phaungx. Kvruex pulx jungx kuex loayc hvlc luz wvnc vngamc vngax muinz httaz hvlc rvwvnc dvyx rvtueq;

¹¹kvkhoc rvtueq ngaz rueq kvruex tvdux gay tauk pungnuk phvnx vyungx vlaungx washiz muex tvguimz lawc shaungx. Piq rueq kvruex layx vbac laung nuex lvp aungx yaq mvrax kuex pulx kvmac kuq shuex.

¹²Menjenc tuiuz muq pungnuk miqsaz htenc rueq muinz kvruex dauk tvrul vtueq taq gay shuex. Kvruex noz vkanx htenc nuiyc rul kvtawk wvnc tueq pulx phuinz vphux htenc kuex kanx ruip rawx nuex nuiyc mungtan wawc warc tvnx htenc, yuix ruilx htenc nuex dvy wvnc tuex. Kvruex khung nuex httax wvnc tueq miqphvnx htenc lotlaz yuz kaz wvnc wuez tuex.

¹³Wushawx htenc kuex kaz vtueq rul wvnc tueq pulx htauk kvyuq ngaungc wuez tuex, yaruix ngvmx saz htenc rueq vnoz vkanx htenc htauk maq yanz khuemx wvnc tuex.

¹⁴Kvkhoc rvtueq yuix phoay laz nuingx lvp yaq yvmx phvnx pulx muinz, johvlc wawc phuemx htenc kuex htanc laz juing tvpeluz kuq yaq pulx ruingx muinz, majuiuc vmaq kuex tvpeluz shuex rvmuq shex. Kvruex htenc lotlaz kuex vthueyc rvyaq miq ikhoc thueyc wvnc wuez vtueq, wulumx mungx nuex kay wvnc jix hez rulc vdvmz nuex vphoc rvhumc wuez yaq.”

¹⁵Vruex kuex Johvlc Yehowa rueq jungx yaq kvjaz rvtueq: “Pulx jungx kvruex wulumx mungx nuex kaz wvnc tuex raungnuiyq, mungkawx khung wawc yuix kvmaq tvbuk gay shaungx kvruex kuex vyonz vyex tvraung rvtueq. Ngaz rueq yuix ruilx htenc shuing gay ruiux, yuix saz ruilx htenc kuex tvkaz mauk rvshaungx. Kvruex pulx thueyc kaz shex ningkhvnc nuex ngaz rueq Lebanon Kanx htenc htauk nuex raungx tv-nyauk vtueq, yaruix luingx vlak wawc pulx lotlaz kuex tvyuiuq tvshanx gay shaungx.

¹⁶Ngaz rueq kvruex wulumx mungx nuex tvdvy gay ruiux yuq, kvruex rulc wvnc rv-nyawx tvruingc rueq miqphvnx htenc kuex buil shuex. Eden sunc nuex kemz yaq pulx lotlaz nuiyc mungkawx khung nuex kaz wvnc tueq yuix phoay laz nuingc jix Lebanon pulx htenc muinz dvy sumx wvnc tueq kvmac kokez wuez tueq.

¹⁷Kvruex kuex mvnnuex rul wvnc tueq pulx jungx htenc rulc rvromc kay tvkoc ruippulx jungx rulc vdvmz wulumx mungx nuex kaz wvnc tuex. Piq buingc khung nuex httaz wvnc tueq hez lotlaz kuex miqphvnx htenc hvlwvl nuex tvpanc nyanc gay rvhumc tuex.

¹⁸“Kvruex pulx kuex Ejip hokhvmx nuiyc piq miqsaz lotlaz rvtueq. Eden sunc nuex kemz yaq pulx htauk nuex muinz vluz maq kvpalx nalx yaq. Yuq muinz majuiuc kuex Eden sunc nuex kemz yaq pulx htenc ikhoc mnoz kuex wulumx mungx nuex kaz wvnc vtueq, kvmluimx muq jix nuiyc ralx nuex vthvt gay rvhumc jix htenc rulc vdvmz httaz ngaungc wuez tuex. Johvlc Yehowa ngaz rueq jungx vshaungx.”