Read Tase Naga EZEKIEL 37 Bible Online

EZEKIEL 37 - Tase Naga bible

EZEKIEL 37

¹Yehowa luimc vkawc yunghvlc kuex ngaz nuex httax vtueq, vpiq siyac rueq ngaz kuex shvlx wvnc ruiux ruk vrawz mvrc yaq warc tvnx nuex taq phuex.

²Vpiq rueq warc tvnx tvroz lotlaz nuex ngaz kuex shvlx laq phuex, kvruex yuq ruk vrawz htenc paunghvlc kv-phungc vtueq kvruex shanc hvlc shex kuex ngaz rueq khiz tauk.

³Vpiq rueq ngaz muex, “Vthueyc rvyaq miq lex, vruex ruk vrawz htenc kuex yuing yek tuex haz?” ngoz tueq wiz phuex Ngaz rueq, “Johvlc Yehowa lex, kvruex kuex mnoz rueq dvyx tvralc lot shuiux!” ngoz tueq tvralc tauk.

⁴Vpiq rueq, “Vruex ruk vrawz htenc muex rawshvmx shvmx shuiuz. Ruk vrawz vshanx htenc rueq Yehowa kvjaz tay tvkoc jungx shuiuz.

⁵Ngaz, Johvlc Yehowa rueq ruk vrawz htenc muex jungx vshaungx kuex tsuingshiq muex jungx shuiuz: ngaz rueq nuimshiq muex thuiuzthuic htawc kuq yek phaungx, kvkaq nuimshiq thuiuzthuic tvraungx wvnc tuinx.

⁶Ngaz rueq nuimshiq thaq vruingx htenc kuex tvduiz vtueq vkhuix maq yop kuq phaungx. Ngaz rueq nuimshiq nuex thuiuzthuic htawc kuq vtueq nuimshiq kuex tvraungx wvnc yek tuinx. Kvkaq ngaz Yehowa rvtauk kuex nuimshiq rueq tuiuz wvnc wuez shuinx,” ngoz tueq jungx tueq.

⁷Kvkhoc rvtueq ngaz muex jungx phuex rulc rv-ngvlc rawshvmx shvmx tauk. Ngaz kvjak thuiyc yaq nuex, kvrik kvrok ngoz tueq tvruingc ngaz rueq tay tauk, kvkaq ruk vrawz htenc kuex rvjuy tuc wvnc tueq.

⁸Ngaz rueq lawc tvtsuingc koq tueq, vrawz htenc nuex vthaq vruingx htenc duiz wvnc vtueq vkhuix rueq yop wvnc tueq. Yuq muinz gvnngvmx mungx nuex thuiuzthuic max httaz shauk dvyx doc.

⁹Tishox rueq ngaz muex jungx phuex, “Vthueyc rvyaq miq lex, raungguil muex rawshvmx shvmx shuiuz. Raungguil kuex raungx tsec bvlic maq kaz vtueq vthueyc vmaungx mungx kvyuq thuiuzthuic htawc kuq ruiux, tsuingshiq rullungx mtvraungx wvnc yek kueq, Johvlc Yehowa rueq jungx yaq rulc rv-ngvlc raungguil muex jungx shuiuz,” ngoz tueq jungx tueq.

¹⁰Kvkhoc rvtueq ngaz muex jungx phuex rulc rv-ngvlc rawshvmx shvmx tauk. Kvkaq gvnz mungx nuex thuiuzthuic nyuip wvnc vtueq tsuingshiq tvraungx wvnc ruiux kvtenc jvp wvnc wuez tueq. Kvruex kuex nolaungx daungx yungx vshiz yaungx lot laz juing paunghvlc rvtueq.

¹¹Tishox rueq ngaz muex jungx phuex, “Vthueyc rvyaq miq lex, Israel miqsaz kuex vruex ruk vrawz htenc vkhoc rvtueq. Tsuingshiq rueq shanx wvnc vtix, max kox nuex thuinz tvluimc juing yvmx muinz vguez shex, ngoz tueq jungx wuez yaq.

¹²Kvkhoc rvtueq ngvy miqsaz Israel muex rawshvmx shvmx vtueq, ngaz Johvlc Yehowa rueq tsuingshiq luip khux htenc kuex lanx vtueq tvdung ruiux, Israel mungtan nuex shvlx wvnc yek shaungx lvmz tsuingshiq muex jungx shuiuz.

¹³Ngvy miqsaz htenc vluip taq baung htenc kuex lanx vtueq tsuingshiq kuex tvdung shaungx nuex, ngaz Yehowa rvtauk kuex tsuingshiq rueq tuiuz wvnc wuez shuex.

¹⁴Ngvy thuiuzthuic tsuingshiq muex htawc kuq shaungx rulc vdvmz tsuingshiq rullungx tvraungx wvnc yek vtueq, tsuingshiq mungtan nuex ngaz rueq tvhttax shaungx. Kvkaq ngaz Yehowa rvtauk kuex tsuingshiq rueq tuiuz wvnc wuez shuex. Ngaz rueq kvkhoc shuimx shaungx ngoz tueq bomkhvmc taq tauk rulc rv-ngvlc shuimx shaungx, Ngaz Yehowa rueq jungx vshaungx.

¹⁵Yehowa rueq ngaz muex jungx yek phuex.

¹⁶Vpiq rueq, “Vthueyc rvyaq miq lex, kankawz vshiz lvmz vtueq kvruex htauk kvyuq, ‘Yuda mungtan,’ ngoz tueq bomc poshiz wuiyq shuiuz. Kvruex yimaq vganc kankawz nuiyc piq kungjix Israel mungtan tvkoc, ngoz tueq bomc poz wuiyq shuiuz. Kvruex yimaq kankawz vshiz hulawx lvmz yek vtueq kvruex htauk kvyuq, ‘Israel mungtan,’ ngoz tueq bomc poz kuex wuiyq shuiuz.

¹⁷Kvruex yimaq kankawz nueyc httoarc kuex vshiz muex yaungx laz juing m-yauk nuex shuimx shuiuz.

¹⁸Mmiqsaz hez rueq kvruex vlvmz kuex yvmx khoc lac ngoz tueq mnoz muex wiz ruiux yuq,

¹⁹Johvlc Yehowa ngaz rueq Ephraim yauk nuex httax yaq Yosep kankawz nuiyc Israel phvnx nuiyc piq kung vkamz kuex lvmz vtueq, Yuda mungtan wawc kankawz rulc vdvmz taq ruiux, kankawz vshiz muex yaungx wvnc tueq kankawz kuex ngaz rueq shuimx shaungx lvmz tsuingshiq muex jungx shuiuz.

²⁰“Kankawz nueyc kuex m-yauk nuex shuimx shuiuz kvkaq miq htenc rueq kvruex khiz shuex.

²¹Kvruex yimaq ngaz, Johvlc Yehowa rueq miqphvnx htenc nuex rv-nyanc wvnc tueq ngvy miqsaz lotlaz kuex ngaz rueq tvdung vtueq, tsuingshiq rulc vdvmz tvtuimx ruiux tsuingshiq mungtan shauk nuex shvlx wvnc shaungx lvmx jungx shuiuz.

²²Ngaz rueq Israel kanx htenc htauk nuex tsuingshiq kuex mungtan vshiz dvyx tvyaungc shaungx. Tsuingshiq guimz lawc hokhvmx vshiz dvyx raz tueq, tsuingshiq kuex yix maq miqphvnx vnueyc muex yaungx tuex rvmuq shex, mungtan vnueyc ngoz tueq rv-phvlc kaz muq.

²³Tsuingshiq rueq miqsuirc vsac yac yuimx htenc maq tsuingshiq gvnz kuex mkaq muinz tvshuy shac shuex rvmuq. Tsuingshiq yaq tueq mvrax tsuingshiq pumz kuex tvbac gay shuex rvmuq. Tsuingshiq yaq wvnc tueq mvrax lotlaz wawc muinz, ngaz muex kvlauc lawc phuex kvwawc muinz tsuingshiq kuex tvdung wvnc shaungx. Ngaz rueq tsuingshiq kuex tvsawc nawc shaungx, tsuingshiq kuex ngvy miqsaz yaungx ruiux, ngaz kuex tsuingshiq Tishox yaungx taungx.

²⁴Ngvy nvrc waz Dawid ikhoc hokhvmx vshiz kuex tsuingshiq hokhvmx muex yaungx tuex. Tsuingshiq lotlaz guimz lawc jix vyungx washiz khung nuex httax vtueq, ngvy tvrac htenc kuex tvmtuing maq phvnx wuez shuex.

²⁵Ngvy nvrc waz Yaku muex ngaz rueq kuq tauk ghaq ngoz yaq tsuingshiq jix vwaz tamx httaz juing mungtan nuex tsuingshiq httax wuez tuex. Tsuingshiq kuex kvruex mungtan kvyuq pattup httax tuex, kvmaq tsuingshiq sahez nuiyc tsuingshiq suiuz hez lotlaz muinz kvruex mungtan kvyuq pattup pat-sac httax tuex. Ngvy nvrc waz Dawid rulc rv-ngvlc yaq hokhvmx waz rueq tsuingshiq kuex pattup pat-sac guimz shuex.

²⁶Tsuingshiq tvkoc pattup kvwungx juing bomkhvrc kuex ngaz rueq tvhungx tauk. Ngaz rueq tsuingshiq kuex tec taq vtueq tvpux paung shaungx, tsuingshiq mungtan nuex ngvy Shomc Yuimx kuex pattup tv-phaungx ngaungx shaungx.

²⁷Ngaz kuex kvyuq tsuingshiq rulc vdvmz httax vtueq; ngaz kuex tsuingshiq Tishox, tsuingshiq kuex ngvy miqsaz muex yaungx tuex.

²⁸Ngaz rueq ngvy Shomc Yuimx kuex tsuingshiq vmungx baung nuex pattup taq ruiux yuq, ngaz Yehowa rueq Israel miqsaz htenc kuex ngvy miqsaz yaungx laz thvl wvnc tauk lvmz kuex miqphvnx htenc rueq tuiuz wvnc wuez shuex,” ngoz tueq jungx tueq.