Read Tase Naga EZEKIEL 42 Bible Online

EZEKIEL 42 - Tase Naga bible

EZEKIEL 42

¹Kvruex yimaq miq waz rueq ngaz kuex yuz phic wangx mungx kvyuq shvlx wvnc vtueq Shomc Yuimx ghaqkhux kox nuex httax yaq yuimx shvlx laq phuex, kvruex kuex Shomc Yuimx shalx nyuip kox tvsuip wawc yuimx maq mtanc muinz luz muq nuex rvtueq.

²Vruex yuimx kuex vloayc kox meter 50, vyungc kox meter 25 rvtueq.

³Samx kox kuex Shomc Yuimx rulc htvlx rvhumc tvmuiz ruiux vyungc kox meter 10 rvhvl yaq baung rvtueq, samx kox kuex yuz phic kox wangx lung vphawc shec kox nuex tvmuiz yaq. Kvruex yuimx kuex htvp thuimx guirx tueq, raungx htvp kuex ghaq htvp mac vruinx lanc rvtueq.

⁴Vruex yuimx maq ghaqkhux kox kuex vyungc kox meter 5 rvhvl vtueq, meter 50 luz yaq vhvlwvl lvmx httax yaq nuiyc kaluix lvmx htenc muinz kvkox nuex jvnc tvmuiz tueq.

⁵Kvruex yuimx raungx htvp wawc khok htenc kuex vhvl wvl htvp nuiyc ghaq htvp mac vruinx lanc rvtueq, yvmx khoc lac ngoz ruiux lec kvruex kuex yix kox nuex het vtueq vguirx ningkhvnc nuex rvtueq.

⁶Ghaq htvp thuimx wvtaungx nuex httax yaq khok htenc kuex ghaq htungx yoxphawc htauk nuex vguirx ningkhvnc nuex, kvruex kuex vtuk juing maq lvy vtueq vmungx kox nuex vganc yuimx htenc ikhoc htung kuex shungc muq doc.

⁷Ghaq htvp nuex vguirx jix kvruex yuz phic kox khoalx tuk kuex meter 25 luz vtueq, kholak kvjungx yaq meter 25 nuex khok htenc httax yaq. Raungx htvp nuex kuex khok toloc rvtueq.

⁹Yuimx shaldungc kox tvsuip wawc khok htenc khung nuex wangx khoalx tuk kvyuq yuz phic kox wangx nuex nyuip waungc juing kaluix lvmx vshiz httax yaq. Shomc Yuimx shalx nyuip kox tvsuip nuex httax yaq yuimx maq mtanc luz muq Shomc Yuimx maq ghaqyaz kox nuex rv-ngvlc yaq yuimx vshiz httax yaq.

¹¹Khok htenc kvlc nuex httax yaq vhvlwvl lvmx kuex ghaqkhux kox nuex httax yaq vhvlwvl lvmx rulc rv-ngvlc dvyx rvtueq. Kvruex htenc nuex httax yaq vhtvp vhtaz htenc, vshvmx vrvmx htenc nuiyc vnyuip juing lvmx htenc rv-ngvlc dvyx rvtueq.

¹²Kvruex yuimx ghaqyaz kox wawc khok htenc khung nuex khoalx tuk phaungc wvnc tueq shaldungc kox tvsuip nuex kaluix vshiz httax yaq.

¹³Miq waz kvraq ngaz muex, “Vruex yuimx nueyc kuex vsawc rvtueq. Yehowa httax yaq nuex kay jix shomc waz bix rueq vsawc pinhtumc shomc kuq yaq phuiuz svy kuex kvruex yuq phauk saq wuez yaq. Kvruex khok htenc kuex vsawc ningkhvnc nuex shomc waz bix rueq shomc nawk juing vruiy vwungx shomc kuy juing htenc, mvrax kvdawc shomc kuy juing htenc nuiyc vhtuimc kuy juing htenc shomc kuy juing ngoz yaq vsawc pinhtumc shomc kuy juing kuex taq yaq.

¹⁴Shomc waz bix kuex Shomc Yuimx mungx maq wangx phic kox nuex kay roc ruiux yuq, Yehowa yauk shuimc nuex shuimx yaq vsawc khoz vkhvy htenc kuex khok htenc kvyuq dvyx kvlayc shec rax yaq. Tsuingshiq kuex miq rvtuimx yaq kvyuq max dung kaz nuex, vganc khoz vkhvy kuex svmc wuez juing rvtueq,” ngoz tueq jungx phuex.

¹⁵Kvruex miq waz kvraq shomc yuimx vmungx kox htaz lot yix maq, shaldungc kox kaluix maq ngaz kuex tvdung shvlx laq vtueq, yuz phic kox htenc kuex htaz tueq.

¹⁶Piq rueq vhtaz juing kawz lvmz vtueq shaldungc kox kuex htaz tueq, kvruex kuex meter 250 rvtueq.

¹⁷Kvruex yimaq ghaqkhux kox kvmuinz, ghaqyaz kox kvmuinz, shalx nyuip kox kvmuinz, piq rueq htaz tueq, samx wvguip rv-ngvlc dvyx meter 250 phok rvtueq,

²⁰kvkhoc rvtueq ruk nuex httuiuc laz tvlomx ruiux yuq, samx tek kuex meter 250 phok httax yaq. Kvruex ruk kuex vsawc nuiyc sawc muq baung htenc tvrv-phvlc tvkoc vruk shec rvtueq.