Read Tase Naga EZEKIEL 45 Bible Online

EZEKIEL 45 - Tase Naga bible

EZEKIEL 45

¹Vphvnx tek muex ghaqphux phvlx kuq tueq nuex, ghaqphux shiz kuex Yehowa mvnjuz lekuq tueq. Kvruex kuex vloayc kox kilometer 12 rac vhtaq, vyungc kox kilometer 10 rvtueq. Kvruex baung htenc kuex vsawc muex yaungc tuex.

²Kvruex baung kvyuq Shomc Yuimx tvkoc samx bvlic ngvlc rv-ngvlc raz tueq, samx kox nuex meter 250 phok ruec rax, tvroz tuimz kvyuq vyungc kox meter 25 tvjvnc dvyx rax.

³Kvruex ghaqphux kholak nuex, vloayc kox nuex kilometer 12 rac vhtaq nuiyc vyungc kox nuex kilometer 5 kuex htaz vtueq, kvruex mungx baung kvyuq Shomc Yuimx ngoz yaq lotlaz htauk nuex vsawc pinhtumc baung yaungx tuex.

⁴Kvruex kuex mungtan nuex vsawc baung yaungx vtueq Yehowa vpiq Shomc Yuimx nuex shuimc kay jix shomc waz bix tvkoc rvtueq. Kvruex kuex tsuingshiq yuimx htenc nuiyc Shomc Yuimx tvkoc ghaqphux yaungx tuex.

⁵Kvruex wawc vganc kholak kuex Shomc Yuimx mungx nuex yauk shuimc jix Lewi miqsaz htenc rueq guimz tvy tvkoc vtvhungx taq muex yaungx tuex. Tsuingshiq httaz tvkoc kvyuq miqghaq htenc httax tuex.

⁶Vsawc baung rulc rvnvp shauk vganc baung kvyuq vloayc kox nuex kilometer 12 rac vhtaq, vyungc kox kilometer 2 rac vhtaq kuex Israel miqsaz ukhaq yuq muinz httaz mvy yaq ghaqyungx tvkoc taq shuinz.

⁷Mungtan guimz lawc hokhvmx waz tvkoc ghaqphux kuex tvhungx taq tueq. Kvruex kuex vsawc baung shalx nyuip kox ghaqruiy maq, shalx nyuip kox nuex httax yaq Svmuktvrax Mediteranean nuex httuiuc laz; vsawc baung shaldungc kox ghaqruiy maq, mungtan shaldungc kox wawc ghaqruiy nuex httuiuc laz yungx yaq, kvruex kuex Israel phvnx phvnshiz muex vphvlx kuq baung tanc khvnc rvtueq.

⁸Israel mungtan wawc kvruex baung kuex mungtan guimz lawc hokhvmx waz mvnz rvtueq, piq rueq mungx miqsaz kuex raungluingx muinz guirguenc mvy muq, kvmaq kvjungx yaq ghaqphux kvmuinz Israel phvnx htenc muex tvguimz lawc shuex.

⁹Johvlc Yehowa rueq, “Israel guimz lawc jix hez lex, nuimshiq rueq mvrax yaq vtuinx kuex loayc hvlc shex! Nuimshiq rueq yauk laungc yalawx nuiyc vtuing vhtuing ruez vshuinx kuex httvr shuinz. Vlvmz nuiyc tsuingrux kuex shuimx shuinz. Ngvy miqsaz htenc kuex tsuingshiq mungtan wawc mkaq muinz nauk yurc gay kaz. Ngaz, Johvlc Yehowa rueq vruex lvmz jungx vshaungx.

¹⁰“Miq tek vtueq tok poz rvkhauk nuiyc tawx rvkhauk htenc kuex shuimx shuinz.

¹¹“Vshanx shenc juing epha nuiyc vjuirx shenc juing bath kuex rv-ngvlc ruec rax. Vhtvp htaz juing kuex home rvtueq. Vjux httaz laz shuimc juing vhtvp vhtaz htenc kuex vkhoc rvtueq: home 1 == epha 10 == bath 10

¹²“Nuimshiq tok poz htenc kuex vkhoc rvtueq: 20 gera == 1 shekel 60 shekel == 1 mina

¹³“Nuimshiq rueq shomc kuy juing kuex vkhoc ruec rax: Khaqmvnc tsvmz: 1/60 lvp luz ruiux yuq mvnrok tvruk wawc mvnshiz Wanx tsvmz: 1/60 lvp luz ruiux yuq mvnrok tvruk wawc mvnshiz Olip puiz: 1/100 jungx wawc vdung mvnshac shiz wawc mvnshiz (Kvruex kuex bath maq shenc kuy rax, bath: 10 bath == 1 home == 1 kor.) Khelbuenx: Israel ngac remc juing wawc khelbuenx 200 htauk wawc vshiz kuy rax “Nuimshiq rueq vruiy vwungx shomc kuy htenc, wvpumz tuimz maq juiuz juing nyvmx saz htenc, luz rvyaungc shomc kuy juing nyvmx saz htenc lvmc lvy juing rvtueq, kvkhoc ngoz ruiux nuimshiq mvrax htenc dawc kuy rvhumc tuinx. Ngaz, Johvlc Yehowa rueq nvr vshaungx.

¹⁶“Mungx miqsaz lotlaz rueq Israel mungx guimz jix hokhvmx waz muex vruex htenc kuex shomc kuy juing rvtueq.

¹⁷Wvpumz tuimx shomc kuy juing nyvmx saz htenc muinz, vruiy vwungx shomc kuy juing htenc muinz, Yac Haungc Moalx htenc, Vguilc Raungnuiyq htenc nuiyc vganc moalx htenc nuex miqphvnx wvtaungx tvkoc kuy muex svpiq shomc kuy juing htenc tvdungc kuy kuex piq htauk nuex httax yaq. Israel miqsaz yaq tueq mvrax htenc lvmc gay tvkoc, mvrax kvdawc shomc kuy, vruiy vwungx shomc kuy, wvpumz tuimx jauk shomc kuy, nuiyc lux rvyaungc shomc kuy juing htenc kuex piq rueq tvdung shuex,” ngoz tueq jungx tueq.

¹⁸Johvlc Yehowa rueq, “Vphaungc yapix vphaungc raungnuiyq, vmac vtsac vguez manx pung saz maq shomc nawk kuq vtueq Shomc Yuimx kuex tvsawc nawc rax.

¹⁹Shomc waz rueq muinz mvrax kvdawc shomc kuy juing tvguiy wvyvmc lvmz vtueq Shomc Yuimx kaluix htungx htenc nuex muinz, shomrawx shuk bvlic nuex muinz, wangx mungx kox nuex nyuip waungc juing kaluix lvmx wawc htungx htenc kvyuq muinz nyvt juing rvtueq.

²⁰Yac nyalx raungx mvshix vngoz raungnuiyq, dvmx lvmlvmc maq rvmuq nuiyc tuiuz muq ningkhvnc nuex vyaq gay mvrax tvkoc kvrulc rv-ngvlc mnoz rueq shuimc juing rvtueq. Kvkhoc maq dvyx Shomc Yuimx kuex mnoz rueq tvsawc nawc juing rvtueq.

²¹“Vphaungc yapix raungx rokshiz rac raungx bvlic raungnuiyq nuimshiq rueq Tvlvy Wvnc Moalx kuex phaungc shuinz. Miq pumz tek vtueq raungx mvshix tup wisiz lomx muq wanx kuex phuiuz rax.

²²Moalx vphaungc raungnuiyq guimz lawc hokhvmx waz rueq piq mvrax htenc tvkoc nuiyc miq lotlaz tvkoc shomc nawk juing manx pung vshiz kuex shomc kuy rax.

²³Raungx mvshix tup moalx shuex kvkaq piq rueq vmac vtsac vguez manx pung mvshix nuiyc khelbuenx pung mvshix maq Yehowa muex shomc nawk kuq ruiux, wvpumz tuimx maq jauk shomc kuy rax. Piq rueq muinz mvrax kvdawc shomc kuy tvkoc wvraungx nuiyq tek khelkhix pung vshiz maq shomc kuy rax.

²⁴Shomc nawk kuq tueq manx pung tek nuiyc khelbuenx pung tek tvkoc nuex wungwanx khvyx shiz rac olip puiz liter 3 tauk tvdungc juing rvtueq.

²⁵“Yapix lex mvshix raungx rokshiz rac raungx bv-ngac raungnuiyq tvhungx tueq Bulax Tap Moalx tvkoc guimz lawc hokhvmx waz rueq raungx mvshix tup mvrax kvdawc shomc nawk kuy, wvpumz tuimx jauk shomc kuy, wungwanx nuiyc olip puiz shomc kuy htenc kuex mvrax kvdawc shomc kuy juing ikhoc shomc kuy rax,” ngoz tueq jungx tueq.