Read Tase Naga EZEKIEL 47 Bible Online

EZEKIEL 47 - Tase Naga bible

EZEKIEL 47

¹Miq waz kvraq Shomc Yuimx kaluix daungx nuex ngaz kuex tvyez shvlx wvnc phuex. Yuix kuex kaluix daungx jungx yaz maq dung vtueq Shomc Yuimx htvlx tvmuiz yaq shaldungc kox nuex kaz yaq. Kvruex yuix kuex shomc yuimx ghaqyaz kox khung maq dung vtueq shomrawx maq ghaqyaz kox nuex kaz yaq.

²Piq rueq ghaqkhux kox kaluix lvmx maq Shomc Yuimx wawc tvdung shvlx laq vtueq shaldungc kox nuex tvmuiz yaq kaluix tvroz nuex ngaz kuex shvlx laq phuex. Kvruex yuq yuix ruilx saz vshiz kuex kaluix ghaqyaz kox maq dung kaz yaq.

³Miq waz kvraq vhtaz juing kawz maq shaldungc kox nuex kaz yaq yuix ruilx kuex meter 500 nuex httuiuc laz htaz vtueq, yuix ruilx saz kuex yanc wvnc tvkoc ngaz muex jungx phuex. Yuix kvruex kuex ngvy yaz muik nuex httuiuc laz dvyx rvtueq.

⁴Kvruex yimaq piq rueq meter 500 hulawx htaz yek tueq, kvkaq yuix kuex ngvy laungkuix nuex httuiuc tueq. Kvmaq meter 500 hulawx htaz yek koq tueq, yuix kuex ngvy khez nuex httuiuc tueq.

⁵Piq rueq meter 500 hulawx htaz yek koq tueq, yuix kuex thuiuz hvlc shex rvtueq ngaz rueq rvp lot mauk. Kvruex yuix kuex thuiuz hvlc ningkhvnc nuex yuix wvyc maq jix yanz lot tauk.

⁶Piq rueq ngaz muex, “Vthueyc rvyaq miq lex, vruex lvmz lotlaz tvtsuingc taq shuiux,” ngoz tueq jungx phuex. Kvruex yimaq miq waz kvraq ngaz kuex yuix kawx nuex shvlx wvnc yek vtueq,

⁷kvyuq ngaz httuiuc waung tauk nuex yuix ruilx samx wvguip nuex pulx paunghvlc kemz yaq kuex ngaz rueq khiz tauk.

⁸Piq rueq ngaz muex, “Vruex yuix kuex taung maq yanz vtueq shaldungc kox nuex kaz wvnc ruiux, Yodan Warc nuiyc yuix Maungx Jumx kox nuex kaz wvnc tueq. Yuix kvruex yuix Maungx Jumx nuex kaz wvnc koq tueq svmuktvrax shumz yuix kuex yuix hvlc muex yaungx wvnc tueq.

⁹Kvruex ruilx saz kaz yaq htenc nuex ngvmx saz phvnx ruip nuiyc ngaq ruip rawx lotlaz httax tuex. Yuix kvraq yuix Maungx Jumx kuex tvruimx ruiux, piq kaz yaq baung ruip saz nuex rullungx tvraungx kuq shuex.

¹⁰Engedi yuix dungc jungx htenc maq Eneglaim yuix dungc jungx lvmx wvlex, ngaq lvp jix miq htenc kuex yuix kawx nuex httax vtueq tsuingshiq jak htenc kuex tvparc noalx shuex. Kvruex yuq ngaq phvnx ruip saz paunghvlc kuex Svmuktvrax Mediteranean mungx nuex httax yaq ikhoc paung wvnc tuex.

¹¹Yuq muinz yuix kvruex hep wawc htvmx htenc nuiyc jumx htenc wawc yuix kuex sawc muq. Kvruex baung htenc kvyuq kuex shumz kvjumx juing yaungx tuex.

¹²Yuix ruilx saz kvruex kawx samx wvguip nuex vsvy mvy vthuey thueyc yaq pulx phvnx ruip saz kemz tuex. Vyauk htenc kuex mkaq muinz yuiuq muq, vthuey muinz htumx muq. Shomc Yuimx maq vkaz yuix saz ruilx lvp ningkhvnc nuex yapix lex tek vthuey vhvlx thuey yaq. Pulx htenc muinz vsvy juing pulx thuey tvthuey kuq ruiux, vyauk kuex miqthuiuz miqsac tvhvlc tvkoc shuimx yaq,” ngoz tueq jungx phuex.

¹³Johvlc Yehowa rueq, “Israel miqsaz phvnx rokshiz rac phvnx nueyc tvkoc ghaqphux ghaqruiy htvp htaz ruiy kuy rax. Ghaqruiy htenc kuex vkhoc rvtueq: Yosep phvnx vmaq rueq vganc phvnx vmaq ruip rawx htauk nuex muinz phvlc nueyc[22] vjvnc lvp shuex rvtueq.

¹⁴Ngaz rueq nuimshiq jix vwaz tamx muex bomkhvmc tuemc kuq tauk rulc rv-ngvlc, vruex mungtan kuex tsuingshiq muex kuq tauk, majuiuc kuex nuimshiq rueq phvlc rv-ngvlc phok rv-phvlc wuez kuinz.

¹⁵“Ghaqkhux kox wawc ghaqruiy kuex Svmuktvrax Mediteranean maq phaungc vtueq shaldungc kox Hetlon, Hamat kanx hvlx Lvmx maq Zedad ghaqyungx nuex httuiuc laz,

¹⁶kvruex kuex Berotha nuiyc Sibraim ghaqyungx htenc nuex tiq rvtueq (kvruex htenc kuex Damasku mungx nuiyc Hamat mungx hvlwvl nuex httax yaq ghaqyungx htenc rvtueq), kvmaq raz tueq Tikon ghaqyungx nuex tiq rvtueq (kvruex kuex Hauran hong ghaqruiy hep nuex httax yaq.)

¹⁷Kvkhoc rvtueq ghaqkhux kox wawc ghaqruiy kuex Mediteranean maq shaldungc kox Enon ghaqyungx nuex httuiuc laz, Damasku mungx ghaqruiy nuiyc kvmaq ghaqkhux kox nuex httax yaq Hamat ghaqyungx nuex httuiuc laz rvtueq.

¹⁸“Shaldungc kox wawc ghaqruiy kuex Damasku mungx nuiyc Hauran hong hvlwvl maq yuix Maungx Jumx kawx wawc Tama ghaq nuex httuiuc laz raz tueq, Yodan ruilx kuex shalx nyuip kox Israel mungx nuiyc shaldungc kox Gilead mungx kuex vtvrv-phvlc ghaqruiy rvtueq.

¹⁹“Ghaqyaz kox nuex wawc ghaqruiy kuex shalx nyuip ghaqyaz kox wawc Tama maq Kadesh Meriba yuix dungc jungx nuex httuiuc laz, kvruex yimaq shalx nyuip ghaqkhux kox kuex Ejip mungx ghaqruiy maq Svmuktvrax Mediteranean nuex httuiuc laz rvtueq.

²⁰“Shalx nyuip kox wawc ghaqruiy kuex Mediteranean nuiyc ghaqkhux kox Hamat kanx hvl Lvmx maq shalx nyuip shuk nuex httuiuc laz rvtueq.

²¹“Vruex ghaq kuex nuimshiq phvnx htenc rv-phvlc juing rvtueq;

²²kvruex kuex nuimshiq muex pattup seng yaq ghaqphux tsak rvtueq. Nuimshiq hvlwvl nuex kv-httvp httax tueq pungnuk miqsaz htenc nuiyc kvruex ghaq kvyuq vjawx suiuz vsaz hez rueq muinz, nuimshiq rueq ghaq rv-phvlc ruiux yuq, ghaqphux tsak lvp wuez shuex. Tsuingshiq kuex Israel miqsaz rulc rv-ngvlc dvyx phvlx vtueq, Israel phvnx htenc rulc vdvmz ghaqphux tsak kuex hangchac maq rv-phvlc wuez tuex.

²³Mungtan mungx nuex httax yaq pungnuk miqsaz htenc kuex miqmac httax yaq baung wawc Israel phvnx rulc vdvmz ghaqphux phvlc kuex lvp shuex. Ngaz, Johvlc Yehowa rueq jungx vshaungx.”