Read Tase Naga EZEKIEL 48 Bible Online

EZEKIEL 48 - Tase Naga bible

EZEKIEL 48

¹Ghaqkhux kox ghaqruiy kuex Svmuktvrax Mediteranean maq shaldungc kox wawc Hetlon ghaqyungx nuex, kvmaq raz tueq Hamat kanx hvl Lvmx nuiyc Enon ghaqyungx nuex tiq, Damasku mungx nuiyc Hamat mungx ghaqruiy htenc nuex httuiuc laz rvtueq. Vphvnx tek vtueq shaldungc ghaqruiy maq shalx nyuip kox Svmuktvrax Mediteranean nuex httuiuc laz, ghaqkhux maq ghaqyaz nuex httuiuc laz vkhoc jumz rv-phvlc tueq: Dan Asher Naphtali Manase Ephraim Ruben Yuda

⁸Kvmaq ghaqphux vganc baungshiz muinz htep baung muex ruiy taq tueq. Kvruex ghaqphux kuex vphvnx htenc muex phvlx kuq tueq ikhoc ghaqkhux maq ghaqyaz kox nuex tiq vyungc kox kilometer 12 rac vhtaq[23] raz tueq shaldungc kox maq shalx nyuip kox nuex httuiuc laz rv-ngvlc rvtueq. Shomc Yuimx muinz kvruex baung kvyuq rvtuex.

⁹Yehowa muex vlekuq vmungx baung wawc ghaqphux htep baung kuex vloayc kox meter 12 rac vhtaq, vyungc kox meter 10 rvtueq.[24]

¹⁰Shomc waz bix rueq vsawc ghaqphux baung kuex lvp tueq. Tsuingshiq ghaqphux kuex htaz koq tueq shaldungc kox maq shalx nyuip kox nuex httuiuc laz kilometer 12 rac vhtaq, ghaqkhux kox maq ghaqyaz kox nuex httuiuc laz kilometer 5 rvtueq. Yehowa Shomc Yuimx kuex kvruex wawc vmungx baung nuex rvtueq.

¹¹Vruex vsawc baung kuex Zadok suiuz vsaz shomc waz bix tvkoc rvtueq. Tsuingshiq rueq ngaz muex tvmtuing maq shuimx lvmz kuq yaq, vganc Lewi phvnx ikhoc vyaq yauk shuimc nuex Israel miqsaz rulc lomx naungx muq.

¹²Kvkhoc rvtueq tsuingshiq kuex Lewi miqsaz rueq guimz yaq hong hep wawc htep baung kuex lvp wuez tueq, kvruex kuex lotlaz htauk nuex vsawc baung rvtueq.

¹³Lewi miqsaz rueq muinz shomc waz bix httax yaq ghaqyaz kox htep baung kuex lvp shuex. Kvruex kuex shaldungc kox maq shalx nyuip kox nuex httuiuc laz kilometer 12 rac vhtaq, ghaqkhux kox maq ghaqyaz kox nuex httuiuc laz kilometer 5 rvtueq.

¹⁴Yehowa muex vlekuq baung kuex wvmungx tuimx wawc vhvlx pinhtumc baung rvtueq, vshiz raung rueq muinz kvruex ghaqphux kuex miq vshiz shiz muex shaungc gay, layc gay mvy muq. Kvruex kuex vsawc nuiyc Yehowa tvkoc rvtueq.

¹⁵Vloayc kox kilometer 12 rac vhtaq, vyungc kox kilometer 2 rac vhtaq httax yaq htep baung wawc baungshiz kvjungx yaq kuex sawc muq rvtueq, yuq muinz kvruex kuex mungx miqsaz rueq shuimc tvkoc rvtueq. Tsuingshiq kuex kvruex baung kvyuq httaz vtueq ghaqphux vjux vhttax tvyaungc shuex. Ghaqyungx kuex vmungx baung nuex tec shuex,

¹⁶kvruex kuex samx kox nuex meter 2,250 phok samx bvlic wvtaungx rv-ngvlc rvtueq.

¹⁷Ghaqyungx tvroz lotlaz kuex samx kox nuex meter 125 phok vwanc kvjungx yaq.

¹⁸Ghaqyungx tec yix maq vsawc baung maq ghaqyaz kox nuex rvnvp shauk ghaqphux kuex shaldungc kox nuex vloayc kilometer 5, vyungc kilometer 2 rac vhtaq, shalx nyuip kox nuex vloayc kilometer 5, vyungc kilometer 2 rac vhtaq httax yaq baung kvyuq ghaq miqsaz rueq shuimc saq yaq.

¹⁹Kvruex ghaqyungx kvyuq httaz jix ukhaq phvnx rueq yuq muinz, kvruex ghaqphux kvyuq shuimc svy mvy yaq.

²⁰Kvkhoc rvtueq ghaq mungx baung kvruex kuex vsamx raz ruik raz tueq samx kox nuex kilometer 12 rac vhtaq phok yungx yaq, kvruex baung kvyuq ghaqyungx nuex seng yaq ghaqphux muinz lomx tuex.

²¹Shaldungc kox maq shalx nyuip kox nuex httuiuc laz yungx yaq baung nuex Shomc Yuimx, shomc waz bix ghaqphux, Lewi miqsaz ghaqphux, ghaqyungx nuex seng yaq ghaqphux nuiyc kvjungx yaq ghaqphux htenc muinz guimz lawc hokhvmx waz rueq guimz yaq. Kvruex baung kuex shaldungc kox kuex shaldungc kox ghaqruiy nuex httuiuc laz, shalx nyuip kox kuex Svmuktvrax Mediteranean maq nvp shauk rvtueq, ghaqkhux kox kuex Yuda rueq guimz yaq ghaqruiy nuex nvp shauk, ghaqyaz kox kuex Benjamin ghaqruiy nuex httuiuc laz rvtueq.

²³Vruex htep ghaq hong maq ghaqyaz kox nuex kvjungx yaq miqphvnx htenc rueq shaldungc kox ghaqruiy maq shalx nyuip kox Svmuktvrax Mediteranean nuex httuiuc laz ghaqphux vphuq phok kuex ghaqkhux kox maq ghaqyaz kox nuex vkhoc tv-phvnc lvp wuez tueq: Benjamin Simeon Issakar Zebulun Gad

²⁸Gad phvnx muex kuq tueq ghaqyaz kox mungx kuex shalx nyuip ghaqyaz hong Tama maq Kadesh yuix dungc jungx nuex httuiuc laz, kvmaq shalx nyuip ghaqkhux kox kuex Ejip ghaqruiy maq Svmuktvrax Mediteranean nuex httuiuc laz rvtueq.

²⁹Johvlc Yehowa rueq, “Vruex kuex Israel phvnx htenc rueq mkhoc rv-phvlc vtueq guimz wuez juing lac ghaq hong htenc lvmz rvtueq,” ngoz tueq jungx tueq.

³⁰Vruex kuex Yerusalem nuex nyuip waungc juing kaluix rokshiz rac vnueyc rvtueq. Samx bvlic wawc palx ruk tek vtueq meter 2,250 phok luz ruiux, kaluix vthuimx phok httax yaq, kaluix tek vtueq Israel phvnx muingc htenc kuex wuiyq shec tueq. Ghaqkhux kox palx ruk wawc kaluix htenc nuex Ruben, Yuda nuiyc Lewi muingc, shaldungc kox palx ruk wawc kaluix htenc nuex Yosep, Benjamin nuiyc Dan hez muingc, ghaqyaz kox palx ruk wawc kaluix htenc nuex Simeon, Issakar nuiyc Zebulun hez muingc, shalx nyuip kox palx ruk wawc kaluix htenc nuex Gad, Asher nuiyc Naphtali hez ngoz tueq muingc shec tueq.

³⁵Ghaqyungx palx ruk samx bvlic wvtaungx lotlaz romshauk htaz koq tueq, meter 9,000 rvtueq. Kvruex raungnuiyq maq kvruex ghaqyungx muingc kuex, “Yehowa kuex Vyuq Httax Yaq!” ngoz tueq muingc shuex.