Read Tase Naga EZEKIEL 8 Bible Online

EZEKIEL 8 - Tase Naga bible

EZEKIEL 8

¹Naungshiq lvp thuq wvnc phuex wawc tvruk yapix lex tvruk raungx bv-ngac raungnuiyq, Yuda mungx wawc vthuq laq walaungx bix kuex ngaz rulc vdvmz ngvy yuimx nuex ngaungc wuez yaq. Johvlc Yehowa luimc vkawc kuex huingc rvhek laz maq ngvy htauk nuex httuiuc kaz tueq.

²Ngaz kvtenc lawc koq tueq wvrluic thuiyc yaq miq shvmx romzyac tvkhic kuex khiz tauk. Vkhez maq kaq kox kuex wvr ikhoc yaungx vtueq, khez maq htauk kox kuex vhttut thvy vruez nvyrvyx ikhoc phez yaq.

³Vpiq rueq yauk ikhoc kuex tvlanc vtueq ngvy khux mul maq shuimx tueq. Kvkaq vruex romzyac tvkhic nuex Tishox siyac rueq ngaz kuex raungx nuex tenz shvlx wvnc vtueq Yerusalem nuex shvlx wvnc phuex. Piq rueq ngaz kuex Shomc Yuimx ghaqkhux kox kaluix puc nuex shvlx wvnc phuex, kvruex baung kvyuq Tishox rueq lawc roc muq yac yuimx vshiz vtv-ngaungc taq rvtueq.

⁴Ngaz kuex Kebar Ruilx kox nuex rvtauk baunglaung ngaz rueq khiz tauk shex ikhoc Israel Tishox ngauz vngax tvkhic phelez yaq wuic kuex khiz tauk.

⁵Tishox rueq ngaz muex, “Vthueyc rvyaq miq lex, ghaqkhux kox kuex lawc shuiuz,” ngoz tueq jungx phuex. Kvkaq ngaz rueq kvruex kox kvyuq lawc koq tueq kaluix daungx hep shomrawx httoarc nuex Tishox rueq lawc roc muq yac yuimx vshiz httax yaq kuex ngaz rueq khiz tauk.

⁶Tishox rueq ngaz muex, “Vthueyc rvyaq miq lex, yvmx lac yaungx yaq nguinx khiz vshuiux haz? Ngaz kuex ngvy vsawc baung wawc vluz maq muinz vluz nuex yurc gay ruiux, Israel miqsaz htenc rueq vyuq shuimx yaq vshuy vshac yauk shuimc htenc kuex lawc shuiuz. Mnoz rueq vruex htauk nuex muinz jvnc vtueq miqsuirc vsac yunghvlc kuex khiz shuiuz,” ngoz tueq jungx phuex.

⁷Vpiq rueq ngaz kuex vtsec wawc ruk kaluix puc nuex shvlx laq vtueq palx ruk nuex vpuc vshiz httax yaq kuex tvkhic phuex.

⁸Vpiq rueq, “Vthueyc rvyaq miq lex, vruex palx ruk kuex tvpuc shuiuz,” ngoz tueq jungx phuex. Ngaz rueq tvpuc htuz koq tueq, kaluix vshiz khiz tauk.

⁹Vpiq rueq ngaz muex, “Nyuip kuiuz, kvyuq tsuingshiq rueq shuimx yaq layx bac miqsuirc vsac yauk shuimc kuex lawc shuiuz,” ngoz tueq jungx phuex.

¹⁰Kvkhoc rvtueq ngaz rueq vmungx nuex nyuip lawc tauk. Puiuc nuiyc vganc sawc muq phvnx ngvmx saz yac htenc, Israel miqsaz rueq nawk palx yaq vganc yac yuimx htenc kuex ruk htenc kvyuq wuiyq tvkop shec tueq kuex khiz tauk.

¹¹Kvruex yuq Shaphan saz Jaazania muinz vlomx Israel walaungx bix waz rok mvshix httax yaq. Miq pumz tek vtueq vhomc vtumc phvnx juiuz juing panx htenc shuimx wuez vtueq kvruex panx kvwawc wvr khuiuq htenc kvtenc wvnc tueq.

¹²Tishox rueq ngaz muex, “Vthueyc rvyaq miq lex, Israel walaungx bix rueq vyumx maq shuimx yaq yauk shuimc kuex khiz vshuiux haz? Tsuingshiq lotlaz kuex yac yuimx htenc mvrc yaq khok nuex nawk palx wuez yaq. Tsuingshiq mvrax kvhoalc bomc kuex, ‘Yehowa rueq naungshiq kuex khiz muq! Vpiq rueq mungtan kuex tuip gay shec tueq,’ ngoz tueq jungx wuez yaq,” ngoz tueq jungx phuex.

¹³Kvruex yimaq Yehowa rueq ngaz muex, “Mnoz kuex tsuinghez rueq shuimx yaq yunghvlc pinhtumc miqsuirc vsac yauk shuimc kuex khiz shuiux,” ngoz tueq jungx phuex.

¹⁴Kvkhoc rvtueq vpiq rueq ngaz kuex ghaqkhux kox nuex httax yaq Shomc Yuimx palx kaluix lvmx nuex shvlx wvnc vtueq, Tammuza tishox maungx kvruex huiuz jix yalxjuik rulx kuex tvkhic phuex.

¹⁵Vpiq rueq, “Vthueyc rvyaq miq lex, kvkhoc ruez yaq kuex khiz toq haz? Kvruex htauk nuex jvnc vtueq miqsuirc vsac kuex mnoz rueq khiz shuiux,” ngoz tueq jungx phuex.

¹⁶Kvkhoc rvtueq vpiq rueq ngaz kuex Shomc Yuimx ruk mungx kox nuex shvlx wvnc phuex. Shomc Yuimx nuex nyuip waungc juing hep wawc ruk nuiyc shomrawx hvlwvl nuex miq waz rok nueyc rac waz bv-ngac tanc httax yaq. Tsuinghez rueq shomc yuimx kuex yix tvnungx shung ruiux, shaldungc kox nuex bumx vtueq shalx dung wvnc yaq kuex nawk wuez yaq.

¹⁷Yehowa rueq ngaz muex, “Vthueyc rvyaq miq lex, kvkhoc ruez yaq kuex khiz toq haz? Kvruex Yuda miqsaz htenc kuex vruex yuq mnoz rueq khiz vshuiux tsuingshiq rueq shuimx yaq miqsuirc vsac yauk shuimc lotlaz nuiyc wvmungx tuimx nuex yauk laungc yalawx rvyaq kvmac doc muinz thuinz suing wuez yaq rvmuq. Tsuingshiq kuex vruex Shomc Yuimx mungx nuex kaz vtueq ngvy thuinz pinhtumc tvkhaq wuez yaq. Tsuingshiq rueq ngaz kuex rvlot yaq tanc khvnc maq wvlc guez waqguez mtanc lac yomnamc yaq nguinx kuex lawc shuiuz!

¹⁸Tsuingshiq rueq ngvy thuinkhvy phuk yaq lotlaz kuex rvhumc phauk tuex. Ngaz rueq tsuingshiq kuex tvraungx taq shaungx rvmuq, tsuingshiq muex menjenc shaungx rvmuq. Tsuingshiq rueq ngvy kox wawc tsuingshiq guyc lot tuex tanc khvnc maq ramc thoz shuex, yuq muinz tsuingshiq rueq thoz yaq kuex ngaz rueq tay kuq shaungx rvmuq,” ngoz tueq jungx tueq.