Read Tase Naga Amo 7 Bible Online

Amo 7 - Tase Naga bible

Amo 7

¹Ngaz rueq Johvlc Yehowa kox wawc romzyac tvkhic vshiz lvp tauk. Hokhvmx waz tvkoc tsvmkuiz tvnc lot yix, httuingx vnyalx kemz phaungc wvnc yaq nuex kup jawrawx vkung vdaungx tvdung sung tueq kuex ngaz rueq khiz tauk.

²Ngvy romzyac maq kup jawrawx htenc rueq mungtan wawc wuiljuit wuiljaungx yauk lotlaz phauk gay yaq kuex khiz tauk, kvruex yimaq ngaz rueq, “Johvlc Yehowa lex, mmiqsaz mvrax kuex dawc kuq shuiuz! Tsuingshiq kuex mkhoc lac tvraungx lot tvnx? Tsuingshiq kuex vruinx saz hungc vlaungc vnulx rvtueq!” ngoz tueq jungx tauk.

³Yehowa kuex vpiq thuinz kvlayc yek vtueq, “Mnoz rueq khiz toq kuex yaungx wvnc tuex rvmuq,” ngoz tueq jungx tueq.

⁴Ngaz rueq vganc romzyac tvkhic vshiz muinz Johvlc Yehowa kox wawc lvp tauk. Kvruex romzyac tvkhic kvyuq vpiq miqsaz htenc muex wvr maq murx tvgurc dvnc yaq kuex khiz tauk. Kvruex wvr kuex ghaq khung nuex httax yaq svmuktvrax yuix yungx kuex khamc gay ruiux, ghaq kuex tvkhamc wvnc yaq.

⁵Kvruex yimaq ngaz rueq, “Johvlc Yehowa lex, hungx tueq! Mmiqsaz htenc kuex mkhoc lac tvraungx lot tvnx? Tsuingshiq kuex vruinx saz hungc vlaungc vnulx rvtueq!” ngoz tueq jungx tauk.

⁶Yehowa kuex vpiq thuinz kvlayc yek vtueq, “Vruex kuex yaungx wvnc tuex rvmuq,” ngoz tueq jungx tueq.

⁷Ngaz rueq Taungjix kox wawc romzyac tvkhic vganc lvp tauk. Kvruex romzyac tvkhic kvyuq vhtaz juing ruiuz maq tvtsuingc htaz vtueq vguirx shec palx ruk hep nuex vhtaz juing ruiuz kuex vyauk nuex shuimx iruiux jvp yaq kuex ngaz rueq khiz tauk.

⁸Vpiq rueq ngaz muex ngoc, “Amo lex, mnoz rueq yvmx lac khiz tonx?” ngoz tueq ngoz phuex. Ngaz rueq, “Vhtaz juing ruiuz vshiz,” ngoz tueq tvralc tauk. Kvruex yimaq vpiq rueq, “Ngvy miqsaz htenc kuex lanx muq palx ruk ikhoc yaungx wuez yaq kuex tvkhic kuy tvkoc kvruex ngaz rueq shuimx vshaungx. Tsuingshiq muex murx tvgurc shaungx nuex seng vtueq ngvy thuinz kvlayc wvnc taungx rvmuq.

⁹Esak suiuz vsaz phvnx rueq nawk palx yaq baung htenc kuex tvbac gay rvhumc tuex. Israel vsawc baung htenc httak tvbac gay shuex. Ngaz rueq Hokhvmx Jeroboam hokhvmx phvnx vmaq kuex tvsuimz gay shaungx,” ngoz tueq jungx tueq.

¹⁰Bethel wawc shomc waz Amazia rueq Israel Hokhvmx Jeroboam kox nuex kvjaz tvtay tueq kuex: “Amo rueq mungx miqsaz hvlwvl maq mnoz kuex khawc lvlc tvkoc dvnc yaq. Piq rueq jungphvnx yaq kvjaz kuex mungtan tvbac gay rvtueq.

¹¹Vruex kuex piq kvjaz rvtueq: ‘Jeroboam kuex ralx khvt nuex thueyc tuex, Israel miqsaz kuex tsuingshiq mungtan kvwawc thuq lvy rvhumc tuex.’”

¹²Kvruex yimaq Amazia rueq Amo muex, “Shvmmax waz lex, hungx tueq shex! Yuda mungx nuex yek waung vtueq kvyuq bomjungc jungphvnx kuq shuiuz. Kvruex yauk shuimc tvkoc nuex tsuingshiq rueq mnoz muex vmauk mkuq kv-phux.

¹³Bethel vyuq mkaq muinz rawshvmx nauk yaungx kaz. Vruex baung kuex hokhvmx waz rueq nawk palx juing, miqsaz htenc hoc rvtueq,” ngoz tueq jungx tueq.

¹⁴Amo rueq tvralc tueq, “Ngaz kuex yauk mauk tvkoc rawshvmx shvmx vtueq shvmmax yaungx vtaungx rvmuq. Ngaz kuex khelbuenx remc jix nuiyc phuiuq muiuq jungx htenc tsvp kvp jix miq washiz rvtauk.

¹⁵Yuq muinz Yehowa rueq khelbuenx remc ngvy yauk shuimc wawc gvl ruiux, vpiq miqsaz Israel htenc kox nuex kaz vtueq rawshvmx shvmx tvkoc nvr phuex.

¹⁶Kvkhoc rvtueq Yehowa rueq jungx yaq kvjaz kuex tay shuinz. Mnoz rueq ngaz muex rawshvmx shvmx mauk tvkoc muinz, Israel miqsaz muex khawc lvlc kvjaz tvthauk gay tvkoc muinz jungx vshuiux.

¹⁷Kvkhoc rvtueq, Amazia lex, Yehowa rueq mnoz muex jungx yaq, ‘Mtaungx nyuiuz kuex lvmx yungx nuex mephex nyuiuz muex yaungx tuex, msaz hez kuex ralx khvt nuex thvy gay rvhumc tuex. M-ghaq mraungx kuex phvlx vtueq vganc jix htenc muex kuq gay shuex, mshauk pumz kuex sawc muq mungtan vshiz nuex thueyc tuiux. Israel miqsaz kuex vsuing tsuingshiq mungtan wawc thuq wvnc rvhumc tuex,’” ngoz tueq jungx tueq.