Read Tase Naga Jona 2 Bible Online

Jona 2 - Tase Naga bible

Jona 2

¹Ngaq wuk mungx nuex baunglaung Yona rueq Yehowa piq Tishox kox wawc vjux thoz tueq kuex:

²“O Yehowa lex, ngaz vgvrx rvhumc vtaungx ningkhvnc nuex mnoz gvl vphaungx, mnoz rueq tvralc koq. Wulumx mungx maq ngaz muex romc kuy tvkoc, guyc sez phaungx tueq, mnoz rueq ngvy guyc tay toq.

³Mnoz rueq ngaz kuex thuiuz hvlc svmuktvrax phawx rawz nuex httuiuc laz tvdvy tuip gay phux, kvyuq yuix htenc rueq ngaz kuex tvroz tuimx wvnc vtueq, m-yuix daungx yungx tul htenc kuex ngvy htauk maq kuix wvnc wuez tueq.

⁴Ngaz kuex mkhaungkac wawc yurc gay rvhumc tauk ningkhvnc nuex, mnoz vsawc Shomc Yuimx kuex mkaq muinz khiz shaungx rvmuq shex ngoz tueq tvmaung wvnc tauk.

⁵Yuix rueq ngaz kuex luimz wvnc vtueq, ngvy thuiuzthuic shup muinz mvy muq shex; svmuktvrax yuix rueq ngaz kuex luimz wvnc vtueq, svmuktvrax photwot rueq ngvy khux nuex menc laq wuez phuex.

⁶Ngaz kuex kanx yaz nuex httuiuc kaz vtueq, wulumx mungx wawc kaluix htenc pattup pat-sac shauk gay tueq. Yuq muinz, O Yehowa ngvy Tishox lex, ngvy thuiuzthuic kuex thuiuz hvlc mungx wawc palc wvnc yek phux.

⁷Ngvy thuiuzthuic pat wvnc vtuex shex ngoc juing nuex, O Yehowa lex, ngaz rueq mnoz kox wawc vjux thoz tauk, mnoz rueq ngvy thuic bomc kuex vsawc Shomc Yuimx maq tay toq.

⁸Khuec guez yac yuimx htenc nawk palx jix hez rueq mhtauk nuex tvmtuing httaz lvmz lauk tuip gay wuez tueq.

⁹Yuq muinz ngaz kuex mnoz muex shix ngoyx tvtsvmc shaungx; ngaz rueq mnoz muex shomc nawk kuy shomc kuq vtueq, ngaz rueq bomkhvmc taq tauk rulc rv-ngvlc shuimx shaungx. Palc daungc wvnc lvmz kuex Yehowa kox wawc vkaz rvtueq!” ngoz tueq thoz tueq.

¹⁰Kvruex yimaq Yehowa rueq ngaq kuiux muex nvr koq tueq ngaq kuiux rueq Yona kuex taungkawx htauk nuex phaay gay waung tueq.