Read Tase Naga Jona 3 Bible Online

Jona 3 - Tase Naga bible

Jona 3

¹Yehowa rueq Yona muex laukshiz hulawx jungx yek tueq.

²Vpiq rueq, “Yunghvlc Ninewe ghaqyungx kvyuq kaz kuiuz, ngaz rueq mnoz muex jungx vphaungx bomjungc kuex kvruex ghaq wuinz htenc muex jungx kuq shuiuz,” ngoz tueq jungx tueq.

³Kvkhoc rvtueq Yona rueq Yehowa kvjaz kuex tay kuq vtueq, Ninewe ghaq nuex kaz wvnc tueq, kvruex ghaq kuex ghaqyungx ningkhvnc nuex tvlanx juit khuemx ruiux yuq nuiyq thuimx khuemc juing lvmx rvtueq.

⁴Yona kuex ghaqyungx kvyuq nyuip vtueq nuiyq shiz lvmx khuemc yix maq, “Raungrok bvlic htvmx yix, Ninewe ghaq kuex bac wvnc tuex,” ngoz tueq ramc tueq.

⁵Ninewe ghaq jix kuex Tishox bomjungc muex kvmluimx wuez tueq. Kvkhoc rvtueq tsuingshiq thuinz kvlayc wvnc tueq kuex tvkhic tvkoc vyungx pinhtumc maq vruinx pinhtumc nuex httuiuc laz, miq ruip rawx rueq ruiyhec khvy svmx wuez ruiux phuiuz vsvy mamc tvkoc htvp htaz wuez tueq.

⁶Ninewe hokhvmx waz rueq kvruex thaungc kuex tay vtueq, piq hokhvmx hoc maq kvtenc vtueq, piq marrarc khvy kuex puk gay ruiux ruiyhec khvy kuex svmx vtueq tvp nuex ngaungc tueq.

⁷Piq rueq Ninewe ghaq wuinz muex vkhoc jungx tvtay tueq: “Vruex kuex hokhvmx waz nuiyc piq vyungx vlaungx bix kox wawc vnvr bomc tvdvy rvtueq: uraq muinz yvmx muinz phuiuz svy mvy muq; miq lotlaz rueq muinz, suiux vmanx nuiyc khelbuenx htenc rueq muinz phuiuz svy mvy muq, yuix muinz nuingc mvy muq.

⁸Miq nuiyc nyvmx saz htenc rueq ruiyhec khvysvmc rax. Miq lotlaz rueq thuinz tvyungc vtueq Tishox kox wawc vjux thoz rax, kvmaq miqmac bac vtac layx nuiyc vbac yauk shuimc htenc kuex tuip gay rax.

⁹Kvkhoc ngoz ruiux jix Tishox vpiq thuinz kvlayc vtueq; thuinkhvy kuex tvthauk gay ruiux yuq, naungshiq thueyc miq wuez rvtix!”

¹⁰Tishox rueq tsuingshiq yvmx lac shuimx wvnc tvnx kuex khiz tueq; tsuingshiq rueq tsuingshiq layx vbac honc vyaungc htenc tuip gay tueq kuex khiz tueq. Kvkhoc rvtueq vpiq kuex vthuinz kvlayc wvnc ruiux vpiq rueq shuimx shaungx ngoz tueq jungx tueq rulc rv-ngvlc tsuingshiq muex murx tvgurc muq shex.