Read Tase Naga WUINKHUEMC 10 Bible Online

WUINKHUEMC 10 - Tase Naga bible

WUINKHUEMC 10

¹Yehowa rueq Moshe muex ngoc,

²“Mnoz rueq miq htenc tvtuimx gvl shuiux nuex muinz, jerak httak shuiux nuex muinz tuimc kuy tvkoc kuimphox bolic vnueyc kuex tvhungx jek guirx shuiuz.

³Bolic nueyc kuex vthuic thuic luz het vtueq tvthuiz ruiux yuq, miq htenc kuex ngaz httax vtaungx Tap kaluix nuex httax vtuiux mnoz kox kvyuq rvtuimx kay rax.

⁴Bolic vshiz dvyx tvthuiz ruiux yuq, vtaungx tv-phvnc wawc walaungx bix dvyx mnoz kox nuex rvtuimx kay rax.

⁵Bolic thuic htaq dvyx tvthuiz ruiux yuq, shaldungc kox nuex jerak tec jix phvnx htenc kuex kvtenc khuemc wvnc rax.

⁶Lauk nueyc ngoc yaungc bolic thuic htaq tvthuiz yek ruiux yuq, ghaqyaz kox nuex jerak tec jix phvnx htenc kuex kvtenc khuemc wvnc rax. Kvkhoc rvtueq bolic kuex thuic htaq maq tvthuiz ruiux yuq, jerak kuex httak wuez rax,

⁷yuq muinz miq htenc tvtuimx tvkoc tvthuiz ruiux yuq, bolic thuic kuex thuic luz het vtueq tvthuic rax.

⁸Shomc waz bix Arun sahez rueq bolic kuex tvthuic rax. “Lvmx kaq nuex httax yaq tvrac kuex mkaq muinz phvnc rax.

⁹Nuimshiq mungtan kuex ralx rueq khvt wvnc ruiux yuq, ralx kuex khvt tvkoc bolic htenc vruex tuimz vtueq honc tvsvmc kuy rax. Ngaz kuex Yehowa nuimshiq Tishox rvtauk, nuimshiq kuex rvwvlc tvmaung vtueq ralx yauk wawc palc wvnc phaungx.

¹⁰Ekvmaq vkoz vkez juing htenc rvtueq yac nyalx moalx htenc nuiyc vganc nawk palx htungx vlayx moalx htenc nuex wvr maq jauk shomc kuy nuiyc lux rvyaungc shomc kuq ruiux yuq, nuimshiq rueq bolic kuex tuimc rax. Kvkaq ngaz rueq nuimshiq kuex romc lawc kuq phaungx. Ngaz kuex Yehowa nuimshiq Tishox rvtauk,” ngoz tueq jungx tueq.

¹¹Israel miqsaz kuex Ejip mungx maq kay wvnc yix raungwawc wawc nueyc, lexnueyc yapix, raungrok nueyc raungnuiyq nuex Yehowa httax yaq Tap htauk nuex buingc yaq phuemx kuex kvtenc wvnc koq tueq,

¹²tsuingshiq kuex Sinai Kumtsvy tvnx maq kaz wvnc wuez tueq. Phuemx kuex Paran kvyuq httuiuc vtueq jvp kaz tueq.

¹³Tsuingshiq kuex Moshe maq raz tueq Yehowa rueq nvr shuex kvkhoc khuemx wuez vtueq,

¹⁴tsuingshiq khuemx wvnc tuex ruip rawx htvp htaz kuq tueq kvruex tv-phvnc khuemx ruiux yaq. Nganc dvmx khung nuex Yuda waruiuz htenc rueq kungkhux shvlx vtueq Amminadab saz Nashon rueq shunshvlx kvkhoc daungx shiz maq daungx shiz kaz yaq.

¹⁵Issakar phvnx kuex Zuar saz Nethanel rueq guimz yaq,

¹⁶Zebulun phvnx kuex Helon saz Eliab rueq guimz yaq.

¹⁷Kvruex yimaq Tap kuex httak vtueq Gershon taungx hez nuiyc Merari taungx hez htenc rueq gurx pix wuez yaq.

¹⁸Kvruex yimaq Ruben phvnx nganc dvmx yix nuex phvnc jix kuex Shedeur saz Elizur rueq guimz yaq, daungx shiz maq daungx shiz raz tueq kaz yaq.

¹⁹Simeon waruiuz kuex Zurishaddai saz Shelumiel rueq guimz yaq,

²⁰Gad phvnx kuex Deuel saz Eliasap rueq guimz yaq.

²¹Kvruex yimaq Lewi phvnx wawc Kohat taungx hez rueq Tap nuex seng yaq hup svmx htenc kuex gurx pix vtueq kaz yaq. Tsuinghez kuex jerak vshiz nuex httuiuc kaz ruiux yuq, Tap kuex vtvjvp guirx wuez yaq.

²²Kvruex yimaq Ephraim phvnx nganc dvmx yix nuex phvnc jix daungx kuex Ammihud saz Elishama rueq guimz ruiux, daungx shiz maq daungx shiz raz tueq kaz yaq.

²³Manase phvnx kuex Pedazur saz Gamaliel rueq guimz yaq,

²⁴Benjamin phvnx kuex Gideoni saz Abidan rueq guimz yaq.

²⁵Yix tvsuip Dan phvnx nganc dvmx yix nuex phvnc jix daungx kuex Ammishadai saz Ahiezer rueq guimz ruiux, daungx shiz maq daungx shiz raz tueq kaz yaq.

²⁶Asher phvnx kuex Okhran saz Pagiel rueq guimz yaq,

²⁷Naphtali phvnx kuex Enan saz Ahira rueq guimz yaq.

²⁸Israel miqsaz kuex kez kvhttot tuex ruip rawx lvmx htauk nuex httax yaq kvkhoc, miqmac daungx kuex tv-phvnc kaz yaq.

²⁹Moshe rueq Midian phvnx Jethro saz vguz Hobab muex ngoc, “Yehowa rueq nuiyshiq muex kuq phaungx ngoz tueq mungx nuex nuiyshiq majuiuc kaz vtix. Piq rueq Israel miqsaz muex tvrungx wanx kuq phaungx ngoz tueq bomkhvmc httax yaq ningkhvnc nuex nuiyshiq rulc vdvmz kaz naungx loq, mnoz rueq muinz nuiyshiq rulc rv-ngvlc lvp luz shuiux,” ngoz tueq jungx tueq.

³⁰Hobab rueq, “Ngaz kaz mauk, ngvy httaz juing ghaq nuex dvyx yek waung taungx,” ngoz tueq tvralc tueq.

³¹Moshe rueq, “Nuiyshiq kuex nauk gay shec vkueq, mnoz kuex rumz ghaq lvmx khuemc lvmx tuiuz yaq ningkhvnc nuex jerak tec wvnc juing baung htenc kuex nuiyshiq muex tvkhic kuy tvkoc lvmx shvlx kuq koq.

³²Nuiyshiq rulc vdvmz kaz naungx ruiux kuex Yehowa rueq ruimrix kejux kuq phuex htenc kuex mnoz rueq muinz lvp luz shuiux,” ngoz tueq jungx tueq.

³³Israel miqsaz kuex vsawc Sinai kanx maq kaz wvnc vtueq, nuiyq thuimx lvmx khuemx wvnc tueq. Tsuingshiq jerak tec juing baung kuex tvkhic kuy tvkoc Yehowa Bomkhvrc Jep kuex tsuingshiq khaungx tvmax nuex mkaq muinz kaz yaq.

³⁴Tsuingshiq jerak maq kvtenc kaz wvnc tueq ruip rawx Yehowa phuemx tul kuex raungnuiyq nuex tsuingshiq htauk maq kaz naungx yaq.

³⁵Bomkhvrc Jep kungkhux kaz wvnc yaq nuex Moshe rueq, “Yehowa lex kvtenc kuiuz; mnoz muex ralx yaungc jix hez kuex tvpanc yanc gay ruiux, mnoz muex shuiuc pac jix htenc kuex tvyuz gay shuiuz!” ngoz tueq tvtay jungx tueq.

³⁶Kvmaq jep kuex jvp kaz tuex tek, piq rueq, “Yehowa lex Israel miqsaz taungx vhingc maq httax yaq nuex yek kaz loq!” ngoz tueq jungx tvtay yaq.