Read Tase Naga WUINKHUEMC 11 Bible Online

WUINKHUEMC 11 - Tase Naga bible

WUINKHUEMC 11

¹Miq htenc rueq miqmac rvhumc wvnc yaq vkuilc vdaz htenc kvruex ningkhvnc nuex Yehowa muex kvbot nyvnx wuez tueq. Yehowa rueq tay vtueq, vthuinz khvy thuiuz muex tsuingshiq htauk nuex wvr tvdvy tueq. Tsuingshiq phungc nuex khamc gay vtueq jerak tvsuip wawc baungshiz kuex tvbac gay tueq.

²Miq htenc kuex Moshe rueq romc kuy tvkoc guyc sez wuez tueq; piq rueq Yehowa kox wawc vjux thoz koq tueq wvr kuex thuik kaz tueq.

³Tsuingshiq htauk nuex Yehowa wvr rueq khamc gay ningkhvnc nuex, kvruex baung kuex Tabera[1] ngoz tueq muingc tueq.

⁴Israel miqsaz rulc vlomx kaz wvnc naungx pungnuk miqsaz htenc kuex ngvmx muex rvnphvnx wuez tueq. Israel miqsaz rueq muinz, “Ngvmx phuiuz roc hvlc!

⁵Naungshiq rueq Ejip mungx maq ngaq kuex vrez rax muq maq hungx laz phauk saq ruiux shix, kumjul thuey, kumka thuey, nvyshuinx yauk, nvyshuinx poz, phvroz tsuingx htenc kuex phauk saq ruiux shix rvmuq haz?

⁶Yuq muinz majuiuc kuex naungshiq hungc vlaungc shex nulx kaz. Nuiyqshiz maq nuiyqshiz manna wanx maq lvy vtueq vganc phuiuz svy juing muinz vguez,” ngoz tueq kvbot nyvnx wuez tueq.

⁷(Manna wanx kuex vrawz sahez ikhoc vmenx luiz lep lep rvtueq.

⁸Raungyac nuex buing rulc vdvmz jerak mungx kvyuq dvy yaq. Raungnvp nuex miq rueq tvjomx tsenz kaz vtueq, tvwanx raz tueq, rvmuq ngoz ruiux vhtuy raz tueq wungwanx muex tvyaungc ruiux lumc vtueq wansawx muex tvhungx yaq. Vsumx vkvmc kuex olip puiz rulc vshuz wanx sumc rulc rv-ngvlc yaq.)

¹⁰Miq htenc kuex miqmac tap kvlc htenc nuex rvtuimx wuez vtueq kvbot nyvnx thuirx tvruingx wuez yaq kuex Moshe rueq tay tueq. Yehowa thuinkhaq yaq ningkhvnc nuex Moshe kuex thuinhvlx muq rvtueq,

¹¹piq rueq Yehowa muex ngoc, “Yvmx rvtueq lac ngaz muex kuilc daz htemc rvmc tvrvhumc vphux? Yvmx rvtueq lac ngaz rueq htvlx phawc lvp mauk rvlaq shaungx? Vruex hez htenc tvkoc ngvy htauk nuex yvmx rvtueq lac yauk shuimc tvdaungc kuq vphux?

¹²Tsuinghez kuex ngvy wuk nuex gurx vtueq vjawx hez haz rvtvnx! Mnoz rueq tsuingshiq jix vwaz muex kuq phaungx ngoz tueq bomkhvmc taq toq mungx nuex kay juing lvmx wvlex nuex nox tvguilc jix waz rueq ikhoc, yvmx rvtueq lac ngaz rueq tsuinghez kuex tenpix vshaungx nguinx?

¹³Miq vjuc vraq phuiuz tvkoc ngvmx kuex ngaz rueq m-wawc lac lvp lot shaungx? Tsuingshiq rueq ngvmx phuiuz roc hvlc ngoz tueq kvbot nyvnx thoz wuez yaq.

¹⁴Miq vjuc vruex laung ngaz washiz rueq dvyx khvmx lot mauk; kvruex kuex ngvy tvkoc yauk shuimc yunghvlc yaungx yaq!

¹⁵Ngaz rueq yauk shuimc vruex gurc pic juing ngoz ruiux kuex mnoz rueq ngaz muex menjenc vtueq, majuiuc dvyx tvthueyc gay ruiux kuilc daz htemc rvmc vruex wawc tvdung wvnc koq,” ngoz tueq thoz tueq.

¹⁶Yehowa rueq Moshe muex ngoc, “Israel miqsaz wawc muingc jungc vhttax walaungx bix rok mvshix kuex ngaz httax yaq Tap vyuq mnoz rulc vdvmz jvp kay naungx tvkoc jungx shuiuz.

¹⁷Ngaz kuex kaz vtueq mnoz rulc kvyuq kvjak kaz raungx, ngaz rueq mnoz muex kuq phaungx siyac kvwawc wvyvmc kuex lvmz vtueq tsuinghez muex kuq shaungx. Kvkaq miq htenc vruex tvkoc gurc pic juing yauk shuimc kuex tsuinghez rueq mnoz muex romc shuimc kuy naungc ningkhvnc nuex, yauk shuimc kuex mnoz washiz rueq dvyx gurc pic rac muq shex.

¹⁸Majuiuc tsuingshiq muex vkhoc jungx kuq shuiuz, ‘Tsuingshiq rueq invp raungnuiyq tvkoc miqmac shauk pumz kuex kvsawc nawc wuez rax; tsuingshiq rueq ngvmx phauk lvp wuez shuex. Tsuingshiq kuex Ejip mungx maq ngvmx phauk yaq lvmz, tsuingshiq rueq ngvmx phuiuz roc vtueq kvbot nyvnx yaq lvmz kuex Yehowa rueq tay tueq shex. Majuiuc tsuingshiq rueq phuiuz tvkoc ngvmx kuex Yehowa rueq kuq shuex ningkhvnc nuex, tsuingshiq rueq phauk saq lvp shuex.

¹⁹Tsuingshiq rueq ngvmx kuex nuiyq nueyc, rvmuq ngoz ruiux raungx bv-ngac, raungx rokshiz, raungrok nueyc tanc khvnc dvyx phauk saq lvp shuex rvmuq,

²⁰yuq muinz ngvmx kuex tsuingshiq khuiz nuex thuingx vtueq shuiuc laz juing yapix lex shiz tup phauk saq wuez shuex. Ekvkhoc yaungx tuex lvmz kuex tsuingshiq rueq Ejip mungx kvruex rvwvl vtueq, tsuingshiq rulc vdvmz httax yaq Yehowa kuex tuip gay ruiux kvbot nyvnx ningkhvnc nuex rvtueq,’” ngoz tueq jungx tueq.

²¹Moshe rueq Yehowa muex ngoc, “Ngaz kox nuex miq 600,000 httax yaq, mnoz rueq tsuingshiq muex yapix lex shiz tup ngvmx kuex kuq phauk lot shuiux haz?

²²Tsuingshiq rueq hungx laz htaungx laz phuiuz svy tvkoc khelx vmanx nuiyc khelbuenx kuex hunghtaungx laz lvp lot shuiux haz? Tsuingshiq tvkoc svmuktvrax wawc ngaq hunghtaungx laz lvp lot shuiux haz?” ngoz tueq tvtay jungx tueq.

²³Yehowa rueq, “Ngvy luimc vkawc maq lot laungc mauk phvnx vhttax haz? Ngaz rueq nvr phaungx rulc rv-ngvlc yaungx tuex shuex yaungx muq lac kuex mnoz rueq mtanc httax muq nuex khiz shuiux!” ngoz tueq tvralc tueq.

²⁴Moshe kuex Tap mungx maq dung kaz vtueq Yehowa rueq jungx tueq htenc kuex miq htenc kvmac tvtay jungx kuq tueq. Piq rueq Israel miqsaz walaungx bix rok mvshix kuex gvl vtueq Tap tvroz nuex tvjvp tueq.

²⁵Kvkaq Yehowa kuex phuemx rulc svt kaz vtueq, Moshe rulc kvjak kaz tueq. Vpiq rueq Moshe muex vkuq siyac kvwawc wvyvmc kuex lvmz vtueq walaungx bix rok mvshix kvmac kuq tueq. Tsuinghez kuex siyac lvp wvnc wuez vtueq shvmmax bix ikhoc guyc wuez tueq, yuq muinz laukshiz phok dvyx guyc wuez tueq.

²⁶Walaungx bix warok mvshix wawc Eldad nuiyc Medad ngoz yaq wanueyc kuex Tap nuex kaz muq maq jerak nuex dvyx kvjungx kaz tueq. Jerak kvyuq tsuingnueyc htauk nuex muinz siyac svt kaz koq tueq shvmmax bix ikhoc guyc wuez tueq.

²⁷Yalx rox washiz rueq Eldad nuiyc Medad yaungx shaungx yaq lvmz kuex Moshe kox nuex yuz vtueq jungx kaz tueq.

²⁸Kvkaq nosaz maq phuex Moshe muex romc lawc kuy jix waz Nun muex vsaz Yoshua rueq Moshe muex ngoc, “Taungjix lex, tsuinghez kuex tvthauk gay shuiuz!” ngoz tueq nvr tueq.

²⁹Moshe rueq, “Ngvy tvkoc rvwvl vtueq haz jungx vshuiux? Yehowa rueq piq miqphvnx lotlaz htauk nuex siyac kuy ningkhvnc nuex tsuinghez kuex shvmmax bix ikhoc m-guyc sez wuez kueq!” ngoz tueq jungx tueq.

³⁰Kvruex yimaq Moshe nuiyc Israel miqsaz walaungx bix rok mvshix kuex jerak nuex yek waung wuez tueq.

³¹Yehowa rueq svmuktvrax kox wawc raungx tvguil koq tueq raungguil rulc vdvmz wupic htenc lomx wvnc naungx tueq. Wupic htenc kvruex kuex ghaq maq suk nueyc tanc khvnc vjoz maq baz vtueq, jerak mungx nuex jerak phic tvroz kilometer paunghvlc nuex httuiuc laz baung ruip saz nuex httax tueq.

³²Kvkhoc rvtueq miq htenc rueq kvruex raungnuiyq nuiyq tuimc nuiyc wvrx taungx muinz nvp yix raungnuiyq muinz wupic htenc kuex lvp wuez tueq; miq washiz rueq vkomc pinhtumc kilogram 1,000 tanc tvjomx lvp tueq. Tsuingshiq rueq jerak tvroz kvyuq wushawx htenc kuex tvparc vtueq tvshanc noalx wuez tueq.

³³Wupic ngvmx paunghvlc doc httax yaq baunglaung Yehowa kuex vthuinz khaq vtueq tsuingshiq nuex thuimkux tvhttuiuc kuq tueq.

³⁴Kvruex hong kvyuq ngvmx muex rvnphvnx jix hez maungx htenc kuex luip gay shec tueq ningkhvnc nuex, “Kibrot-hatawa rvmuq ngoz ruiux rvnphvnx jix ruiuz khux,” ngoz tueq muingc tueq.

³⁵Tsuingshiq kuex kvruex hong maq kaz wvnc vtueq Hazerot nuex jerak tec kaz tueq.