Read Tase Naga WUINKHUEMC 12 Bible Online

WUINKHUEMC 12 - Tase Naga bible

WUINKHUEMC 12

¹Moshe rueq Kushi phvnx shvlx lvmz koq tueq, Miriam nuiyc Arun rueq piq muex mvrax tvgurc wuez tueq.

²Tsuingshiq rueq, “Yehowa rueq Moshe maq raz tueq dvyx haz jungx kuq yaq nguinx? Nuiyshiq maq raz tueq kuex jungx kuq muq haz?” ngoz tueq jungx tueq. Kvruex kvjaz kuex Yehowa rueq tay tueq.

³(Moshe kuex thuinz nyenz miq rvtueq, ghaq htauk vyuq piq kvkhoc thuinz nyenz jix miq washiz muinz vguez.)

⁴Lvmx lvy dvyx, Yehowa rueq Moshe, Arun nuiyc Miriam hez muex ngoc, “Nuimthuimx wathuimx vtaungx ngaz httax yaq Tap nuex kaz wuez luit,” ngoz tueq jungx tueq. Tsuingthuimx httuiuc kaz koq tueq,

⁵Yehowa kuex phuemx tul maq httuiuc kaz tueq, Tap kaluix nuex jvp vtueq, “Arun nuiyc Miriam!” ngoz tueq gvl tueq. Kvkaq tsuingnueyc kuex max kac kvyuq kaz koq tueq,

⁶Yehowa rueq, “Majuiuc ngaz rueq jungx phaungx htenc kuex tay shuinz! Nuimshiq nuex shvmmax httax yaq ngoz ruiux ngvy shauk pumz maq tsuinghez muex romzyac maq tvkhic kuq ruiux maung maq jungx kuq shaungx rvtueq.

⁷Ngvy nvrc waz Moshe kuex kvkhoc rvmuq; ngvy miqsaz Israel htenc lotlaz kuex piq yauk nuex ngaz rueq lekuq tauk shex.

⁸Kvkhoc ningkhvnc nuex ngaz rueq piq muex kvjaz jungx ruiux yuq bomc nungx maq jungx mauk, piq rulc htvlx rvhumc maq raz tueq raungshuex raung jungx shaungx; piq rueq ngvy romkomz doc muinz khiz phuex shex! Nuimshiq rueq ngvy nvrc waz Moshe muex mvrax tvgurc kvjaz yvmx khoc lac ngoz vshuinx?” ngoz tueq jungx tueq.

⁹Yehowa kuex tsuingnueyc muex khaq tueq; kvkhoc rvtueq piq dung wvnc koq tueq,

¹⁰Tap khux wawc phuemx tul kvtenc waung wvnc yix, Miriam gvnz nuex miqhiz vsac vshungx vshoyx kop vtueq gvnpumz nuex luiz wvnc tueq. Arun kuex Miriam gvnz nuex vmac vtsac kop yaq kuex khiz vtueq,

¹¹piq rueq Moshe muex ngoc, “Jiyungx waz lex, nuiyshiq yaq ngaz gay tiq mvrax ningkhvnc nuex murx nauk tvrvhumc vkueq.

¹²Vjawc nuex dvyx gvnngvmx htaq kox kuex vnvmx shex vmaungx miq ikhoc Miriam kuex nauk tvyaungc kaz,” ngoz tueq kvmenc jenc thoz tueq.

¹³Kvkhoc rvtueq Moshe rueq Yehowa muex ngoc, “O Tishox lex, Miriam mac tsac kuex tvhvlc kuq shuiuz!” ngoz tueq guyc sez thoz tueq.

¹⁴Yehowa rueq, “Vwaz rueq piq htvlx phawc nuex htoz maq htoz ruiux yuq, piq kuex raungx mvshix tup yvlc svy rvhumc tuex rvtueq. Kvkhoc rvtueq piq kuex jerak phic nuex raungx mvshix pungx httaz tvhttax shuinz, kvruex yimaq jix piq kuex jerak mungx nuex tvyez gvlc yek rax,” ngoz tueq jungx tueq.

¹⁵Kvkhoc rvtueq Miriam kuex jerak phic nuex raungx mvshix pungx httaz tvhttaz tvkoc tvdung gay tueq, piq kuex jerak mungx nuex tvyez shvlx wvnc tueq nuex httuiuc laz miq htenc kuex khuemx shamx muq rvtueq.

¹⁶Kvruex yimaq tsuingshiq kuex Hezerot maq kaz wvnc vtueq Paran nuex jerak tec tueq.