Read Tase Naga WUINKHUEMC 16 Bible Online

WUINKHUEMC 16 - Tase Naga bible

WUINKHUEMC 16

¹Lewi phvnx, Kohat taungx wawc Ezhar saz Kora rueq Moshe shunshvlx yaq kuex khawx lvlx tueq. Piq rulc lomx naungc jix kuex Ruben phvnx wawc waz thuimx rvtueq, kvruex hez kuex Eliab saz Dathan nuiyc Abiram, Pelet saz On rvtueq. Tsuinghez rulc Israel walaungx 250 muinz lomx naungx tueq.

³Kvruex hez htenc kuex Moshe nuiyc Arun khaungkac nuex rvtuimx kaz vtueq, “Nuimshiq honc vyaungc kuex jvnc hvlc! Israel miqsaz htenc kuex Yehowa rueq thvl wvnc vtueq, Yehowa kuex naungshiq lotlaz rulc vdvmz httax yaq. Kvkhoc rvyruiux Moshe kuex yvmx rvtueq lac Yehowa miqsaz phungc nuex mshauk pumz kuex kvsomc parc kaz tuiux?” ngoz tueq ngoz tueq.

⁴Moshe kuex tsuinghez kvjaz tay vtueq ghaq nuex bumx ruiux vjux thoz tueq.

⁵Kvruex yimaq piq rueq Kora nuiyc vyix phvnc jix hez muex ngoc, “Vpiq muex ukhaq lac seng yaq nguinx kuex invp Yehowa rueq tvkhic shuex; vpiq rueq thvl wvnc shuex waz kuex vpiq kox nuex shomrawx hep kvyuq tvnvp wvnc shuex.

⁶Invp mnoz nuiyc m-yix phvnc jix hez rueq wvr diq jungc juing tuik htenc nuex wvr kuinx nuiyc vhomc vshot kuex htawc vtueq shomrawx nuex lvmz laq shuinz. Kvkaq Yehowa rueq ukhaq lac thvl wvnc shvnx kuex tuiuz wuez shuinx. Lewi phvnx wawc nuimhez dvyx juex jvnc hvlc yaungx vtuinx!” ngoz tueq jungx tueq.

⁷

⁸Kvmaq hulawx Moshe rueq Kora muex ngoc, “Lewi miqsaz lex tay wuez shuinz!

⁹Israel Tishox rueq nuimshiq kuex vpiq kox nuex tvnvp vtueq Yehowa Tap nuex yauk shuimc tvkoc nuiyc miq kung lotlaz laung yauk shuimc tvkoc pungx thvl taq kv-phuinx. Kvruex kuex yauk shuimc vruinx saz ngoz tueq haz tvmaung vshuinx?

¹⁰Vpiq rueq mnoz nuiyc vganc Lewi miqsaz lotlaz muex kvkhoc tvtsanc nganc yauk shuimc kuex kuq kv-phuinx rvyruiux, majuiuc nuimshiq rueq shomc waz yauk shuimc kuex thoz vshuinx nyix!

¹¹Mnoz nuiyc m-yix phvnc jix hez htenc rueq Arun muex mvrax tvgurc vshuinx kvruex kuex vsuingc suing Yehowa muex khawc lvlc lvmx dvyx rvtueq,” ngoz tueq jungx tueq.

¹²Kvruex yimaq Moshe rueq Dathan nuiyc Abiram kuex gvl tueq, yuq muinz tsuingnueyc rueq, “Nvnueyc kuex kaz miq!

¹³Mnoz rueq nuiyshiq kuex yaruix tvnx nuex tvthueyc gay khvmc muex phuiuz vsvy rungwanx yaq Ejip mungx kvwawc tvdung shvlx laq phux rvmuq haz? Majuiuc mnoz kuex nuiyshiq htauk nuex jiyungx yaungc roc haz?

¹⁴Mnoz rueq nuiyshiq kuex phuiuz vsvy rungwanx yaq mungx nuex tvhttuiuc kuq lot muq kvdvyx muinz rvmuq, nuiyshiq rueq lvp juing wuik vnax nuiyc svpiq sunc htenc muinz kuq lot muq, mnoz rueq nuiyshiq kuex laulawc svy muex kvmungx vshuiux. Nuiyshiq kaz miq!” ngoz tueq jungx wuez tueq.

¹⁵Moshe kuex vthuinz khaq hvlc rvtueq Yehowa muex ngoc, “Kvruex hez rueq shomc kuy muex vwvnc kuex nauk thoz taq kaz. Ngaz rueq tsuinghez washiz muex muinz wvlc guez tvyaungc mauk doc; tsuinghez kox wawc loze vshiz doc muinz nyvlc mauk doc,” ngoz tueq jungx tvtay tueq.

¹⁶Moshe rueq Kora muex ngoc, “Invp raungnuiyq mnoz rulc vdvmz m-yix phvnc jix miq 250 kuex Yehowa httax yaq Tap kvyuq kay rax; Arun muinz kvyuq vhttax rvtuex.

¹⁷Nuimhez miq pumz tek vtueq shomrawx nuex yauk noalc kuy tvkoc wvr kuinx htawc juing tuik nuex vhomc vshot kuex htawc vtueq lvmc lvy rax,” ngoz tueq jungx tueq.

¹⁸Kvkhoc rvtueq miq pumz tek rueq miqmac wvr kuinx htawc juing tuik nuex vhomc vshot kuex htawc vtueq, Moshe nuiyc Arun rulc vdvmz Tap kaluix daungx nuex jvp wuez tueq.

¹⁹Kvruex yimaq Kora rueq miq htenc kuex tvtuimx vtueq Tap kaluix daungx nuex Moshe nuiyc Arun rulc htvlx rvhumc tvjvp tueq. Kvkaq dvyx Yehowa ngauz vngax kuex phelez kaz tueq.

²⁰Yehowa rueq Moshe nuiyc Arun muex ngoc,

²¹“Vruex hez hep kvwawc kvhttot vtueq httax kuinz, ngaz rueq tsuinghez kuex htat tvbac gay shaungx,” ngoz tueq jungx tueq.

²²Yuq muinz Moshe nuiyc Arun kuex ghaq nuex bumx vtueq, “O Tishox lex, mnoz kuex lotlaz thuiuzthuic pauk rvtoq. Miq washiz shiz mvrax ningkhvnc nuex wv-phvnx tuimx muex thuinz haz khaq vtuiux?” ngoz tueq tvtay jungx tueq.

²³Yehowa rueq Moshe muex ngoc,

²⁴“Miq htenc kvruex kuex Kora, Nathan nuiyc Abiram hez rulc vluz nuex rvgawz vtueq httaz tvkoc jungx shuinz,” ngoz tueq jungx tueq.

²⁵Kvruex yimaq Moshe kuex Israel walaungx bix rulc vdvmz Nathan nuiyc Abiram kox nuex kaz tueq.

²⁶Piq rueq miq htenc kvmac ngoc, “Vruex honc bac jix tap htenc vmaq vluz nuex rvgawz vtueq httax kuinz, tsuinghez nuex seng yaq hup svmx kuex nauk shuimx kaz. Ngvy kvjaz kuex tay muit ngoz ruiux yuq, tsuinghez mvrax ningkhvnc nuex tsuinghez rulc vdvmz bac tac wvnc naungx tuinx,” ngoz tueq honc jungx kuq tueq.

²⁷Kvkhoc rvkoq tueq tsuingshiq kuex Kora, Nathan nuiyc Abiram tap maq vluz nuex kvhttot kaz wuez tueq. Nathan nuiyc Abiram kuex miqmac juik vsaz hez rulc vdvmz miqmac tap kvlc nuex jvp kaz wuez tueq.

²⁸Moshe rueq, “Yehowa rueq nvrc ningkhvnc nuex ngaz rueq vkhoc shuimx vshaungx lvmz kuex ngaz rueq shuimx roc vtueq shuimx vshaungx rvmuq lvmz nuimshiq rueq tuiuz wvnc juing kuex vkhoc rvtueq.

²⁹Vruex wahez kuex Tishox rueq murx tvgurc rvhumc muq rvhvt maq, vthueyc muex juiux juiux thueyc kaz tueq ngoz ruiux kuex, Yehowa rueq ngaz nvr tvkaz phuex rvmuq.

³⁰Yuq muinz kungkhux nuex tay muit phvnx kuex Yehowa rueq shuimc ningkhvnc nuex tsuingshiq rulc vdvmz tsuingshiq hup vsvmx htenc kuex ghaq rueq yuk wvnc vtueq, tsuingshiq kuex tvraungx tsuik tsuik thueyc wvnc wuez ruiux yuq, tsuingshiq kuex Yehowa rueq tvdux gay tueq ngoz tueq tuiuz wvnc wuez shuinz,” ngoz tueq jungx tueq.

³¹Moshe rueq jungx lot rac Nathan nuiyc Abiram httax yaq wawc ghaq kuex vdvmz nuex khoz wvnc vtueq,

³²tsuingshiq rulc vdvmz tsuingshiq juik vsaz htenc, Kora yix phvnc jix hez htenc nuiyc tsuingshiq hup vsvmx httax yaq lotlaz kuex ghaq rueq yuk wvnc tueq.

³³Ekvkhoc tsuingshiq rueq guimz yaq hup vsvmx htenc rulc vdvmz tsuingshiq kuex wulumx mungx nuex tvraungx tsuik tsuik kaz wvnc wuez vtuex. Ghaq muinz tsuinghez htauk nuex kvyez wvnc yek vtueq puingc wvnc tueq.

³⁴Kvruex hong nuex httax yaq Israel miqsaz htenc muinz tsuingshiq guyc sez tvruingc kuex tay vtueq, “Yuz wuez kuinz! Naungshiq muinz ghaq rueq yuk gay khiq!” ngoz tueq guyc tvruingx wuez tueq.

³⁵Kvruex yimaq Yehowa rueq wvr tvdvy vtueq vhomc vshot kuex shomc kuy jix miq 250 kuex wvr rueq khamc gay tueq.

³⁶Kvruex yimaq Yehowa rueq Moshe muex ngoc,

³⁷“Wvr diq jungc juing nvyrvyx tuik htenc kuex vshomc kuy vruez phvnx hup svmx ningkhvnc nuex, shomc waz Arun saz Eleazar rueq wvr kuinx jungc juing tuik htenc kuex, vthueyc rvhumc tueq jix hez kox kvwawc lvmz vtueq wvr kuinx htenc kuex baungshiz nuex tvruiuc gay shuiuz.

³⁸Yehowa shomrawx nuex vhomc vshot jauk ruiux yuq, wvr kuinx jungc juing tuik kuex shuimc juing ningkhvnc nuex kvruex kuex vsawc hup svmx rvtueq. Kvkhoc rvtueq miqmac mvrax ningkhvnc nuex thueyc kaz tueq jix hez kox wawc wvr diq jungc juing tuik htenc kuex lvmz vtueq, tv-pherx jek ruiux shomrawx kuex puingc shuiuz. Kvruex nvyrvyx phawc kuex Israel miqsaz muex honc tvsvmz kuq shuex,” ngoz tueq jungx tueq.

³⁹Kvkhoc rvtueq shomc waz Eleazar rueq wvr diq jungc juing tuik htenc kuex lvmz vtueq shomrawx puingc muex tv-pherx jek tueq.

⁴⁰Arun phvnx wawc rvmuq jix miq uraq yuq muinz Yehowa muex vhomc vshot juiuz kuy tvkoc shomrawx hep nuex kay mvy muq ngoz tueq nvyrvyx guip rueq Israel miqsaz muex honc tvsvmz kuq yaq. Vruex phvnx muq jix htenc kuex Kora nuiyc vyix phvnc jix hez htenc ikhoc tvbac gay rvhumc tuex. Yehowa rueq Moshe maq raz tueq tvlvy jungx kuq tueq htenc kuex Eleazar rueq shuimx kaz tueq.

⁴¹Nvp yix raungnuiyq mungx miqsaz wvtaungx rueq Moshe nuiyc Arun muex ngoc, “Nuimnueyc rueq Yehowa miqsaz wvyvmc kuex thvt gay tuit,” ngoz tueq mvrax tvgurc wuez tueq.

⁴²Tsuingshiq kuex Moshe nuiyc Arun muex mvrax tvgurc tvkoc rvtuimx kaz vtueq Tap kox kvyuq lawc koq tueq, phuemx rueq tap kuex puingc wvnc vtueq Yehowa httax yaq ngauz vngax phelez yaq kuex khiz wuez tueq.

⁴³Moshe nuiyc Arun kuex Tap kvlc nuex jvp kaz tueq.

⁴⁴Yehowa rueq Moshe muex ngoc,

⁴⁵“Vruex hez kox vwawc kvbanc kuiuz, ngaz rueq tsuingshiq kuex lvmx lvy tvbac gay shaungx!” ngoz tueq jungx tueq. Tsuingnueyc kuex ghaq nuex bumx kaz wuez tueq,

⁴⁶Moshe rueq Arun muex ngoc, “M-wvr kuinx kuex lvmz vtueq htawc ruiux vhomc vshot kuex wvr kuinx htauk kvyuq tvdaungc shuiuz. Raz tueq wvr diq jungc juing tuik kuex miq phungc kvyuq yauk lox lvmz laq vtueq, tsuingshiq tvkoc tvsawc nawc lvmx kuex shuimx shuiuz. Yehowa kuex tsuingshiq muex khaq vtueq htaungc kuiyq tvhttuiuc kuq tueq!” ngoz tueq jungx tueq.

⁴⁷Moshe rueq jungx tueq rulc rv-ngvlc Arun rueq wvr diq jungc juing tuik kuex lvmz vtueq miq phungc mungx kvyuq yuz wvnc tueq. Kvkaq piq rueq miq htenc kox kvyuq htaungc kuiyq httuiuc kaz tueq lvmz kuex khiz vtueq, wvr kuinx htenc htauk kvyuq vhomc vshot kuex tvdaungc ruiux tsuingshiq tvkoc tvsawc nawc yauk shuimc kuex shuimx tueq.

⁴⁸Kvkaq vhiz juing htaungc kuiyq hvlx kaz koq tueq, piq kuex vtvraungx miq nuiyc vmaungx jix miq hvlwvl nuex jvp iruiux rvtueq.

⁴⁹Kora rueq khawc lvlc ningkhvnc nuex vthueyc kaz miq maq lvy vtueq, htaungc kuiyq ningkhvnc nuex vthueyc kaz miq kuex 14,700 rvtueq.

⁵⁰Htaungc kuiyq hvlc kay yix Arun kuex Moshe httax yaq Tap kaluix daungx kvyuq yek kaz tueq.