Read Tase Naga WUINKHUEMC 18 Bible Online

WUINKHUEMC 18 - Tase Naga bible

WUINKHUEMC 18

¹Yehowa rueq Arun muex ngoc, “Ngaz httax yaq Tap mungx wawc yauk shuimc nuex seng vtueq yaq gay mvrax kuex mnoz rulc vdvmz msaz hez nuiyc Lewi miqsaz htenc rueq lvp shuex, yuq muinz shomc waz yauk shuimc nuex seng vtueq yaq gay ruiux kuex msaz nuimhez rueq dvyx gurx shuinx.

²Msaz nuimhez rueq Tap nuex seng vtueq shuimx kaz gurx pix ruiux yuq, Lewi phvnx wawc mphuz mnox hez rueq mnoz muex mromc lawc kuq kv-phuinx.

³Tsuinghez rueq m-yauk shuimc nuiyc Tap yauk shuimc kuex mshuimx kuq shueq, yuq muinz tsuinghez rueq Vsawc Baung nuex seng yaq hup svmx htenc nuiyc shomrawx kuex heq shuimc mvy muq. Tsuinghez rueq shuimx kaz iruiux kuex tsuinghez rulc vdvmz msaz nuimhez muinz vthueyc rvhumc tuinx.

⁴Tsuingshiq kuex mnoz rulc vdvmz Tap nuex seng yaq yauk shuimc htenc kuex shuimc kay naungc rax, yuq muinz vganc jix miq uraq muinz mnoz rulc yauk shuimc naungc mvy muq.

⁵Msaz nuimhez rueq dvyx Vsawc Baung nuiyc shomrawx nuex seng yaq yauk shuimc kuex gurc pic rax, kvkhoc ngoz ruiux jix ngaz kuex yix maq laukshiz Israel miqsaz muex khaq mauk shex.

⁶Ngaz rueq mnoz tvkoc yauk noalc tvyaungc muex mphvnx mmaq Lewi miqsaz htenc kuex Israel miqsaz wawc ngaz rueq thvl wvnc tauk. Tsuingshiq kuex ngvy tvkoc lekuy yoalx shex khuec nuex Tap yauk shuimc kuex gurc pic lvp wuez shuex.

⁷Yuq muinz msaz nuimhez rueq dvyx shomrawx nuiyc Vsawc Baung nuex seng vtueq shomc waz rueq gurc pic juing htenc kuex shuimc kay rax. Nuimhez rueq shuimc juing shomc waz yauk shuimc kuex yauk noalc ikhoc lekuq shec phaungx ningkhvnc nuex kvruex kuex mnoz rueq gurc pic juing rvtueq. Kvkhoc rvtueq vsawc baung nuex kvnvp kay jix seng muq miqsaz ukhaq yuq muinz vthueyc rvhumc tuex,” ngoz tueq jungx tueq.

⁸Yehowa rueq Arun muex ngoc, “Wvr maq jauk shomc nawk kuy juing phvnx rvmuq maq, yauk noalc htep shomc kuy juing phvnx htenc kuex msaz nuimhez muex ngaz rueq kuq phaungx, vruex mvnjuz kuex mnoz nuiyc msaz msuiuz hez muex kuq phaungx.

⁹Shomrawx htauk nuex wvr maq jauk muq vsawc pinhtumc shomc kuy juing ngoz yaq: vruiy vwungx maq shomc kuq yaq, mvrax kvdawc shomc kuq yaq nuiyc murx kvdawc shomc kuq yaq htenc kuex mnoz rueq lvp shuiux. Ngvy tvkoc ngoz tueq vlekuq vsawc shomc kuq yaq yauk noalc phvnx htenc kuex msaz nuimhez rueq lvp juing rvtueq.

¹⁰Kvhtenc kvruex kuex vsawc baung maq phuiuz svy rax, miqwaz rulx rueq dvyx phuiuz svy juing; kvruex kuex vsawc phuiuz vsvy rvtueq.

¹¹“Ekvmaq lvy vtueq Israel miqsaz rueq ngaz muex yauk noalc htep shomc kuq yaq htenc kvmuinz nuimshiq muex seng yaq. Vhtenc vruex kuex mnoz nuiyc msaz hez, msuiuz hez nuiyc pat vjat nuex httuiuc laz ngaz rueq kuq phaungx. M-yuimx wawc miq htenc kuex nawk palx htungx maq vsawc jix miq rueq dvyx kvruex phuiuz vsvy kuex phauk saq lvp shuex.

¹²“Israel miqsaz rueq ngaz muex wawc tek kuq yaq, vphaungc thuey ngoz yaq vhvlx pinhtumc olip puiz, svpiq tix nuiyc tuiz vtsvmz htenc kuex ngaz rueq nuimshiq muex kuq phaungx.

¹³Kvruex lotlaz kuex mnoz muex seng yaq. M-yuimx wawc miq htenc kuex nawk palx htungx maq vsawc jix miq rueq dvyx kvruex phuiuz vsvy kuex phauk saq lvp shuex.

¹⁴“Israel miqsaz rueq ngaz muex kuy tvlanc vkuq gay htenc kuex nuimshiq muex seng yaq.

¹⁵“Miqsaz rvmuq ngoz ruiux nyvmx saz kuex ngvy tvkoc ngoz tueq Israel miqsaz rueq lekuq yaq pekhux saz kuex mnoz muex seng yaq. Yuq muinz pekhux sahez kuex nuimshiq rueq daungc ruiyx wvnc lvp shuinz, sawc muq nyvmx saz nyuiuz phaungc htenc muinz nuimshiq rueq daungc ruiyx wvnc yaq kuex thoz tvy shec rax.

¹⁶Yapix lex shiz nox htenc kuex rungx kaqpex shenc maq kuimphox sawx bv-ngac maq daungc wvnc yek rax.

¹⁷Yuq muinz khelx vmanx nuiyc khelbuenx nyuiuz phaungc sahez htenc kuex tvyez rez wvnc yek mvy muq; kvruex kuex ngaz muex lekuy tvlanc shomc kuy rax. Kvruex nyvmx saz tvguiy kuex shomrawx htauk nuex buit wuinc vtueq, vpuiz kuex phuiuz vsvy shomc kuy tvyaungc muex wvr maq juiuz rax, kvruex homc tumc kuex ngaz rueq raungc raq vshaungx.

¹⁸Vkhuiuq nuiyc vkeq kox huk kuex nuimshiq muex seng yaq rulc rv-ngvlc vngvmx muinz nuimshiq muex seng yaq, kvruex kuex htep shomc kuy rvtueq.

¹⁹“Israel miqsaz rueq ngaz muex yauk noalc htep kuq yaq htenc kuex mnoz nuiyc msaz hez muex pat vjat nuex httuiuc laz kuq vphaungx. Bomkhvrc vruex kuex ngaz rueq mnoz nuiyc msuiuz msaz hez rulc vtvhungx pattup phaungx ngaungx yaq rvtueq,” ngoz tueq jungx tueq.

²⁰Yehowa rueq Arun muex ngoc, “Israel mungtan nuex mnoz rueq lvp juing tsak jungx nuiyc mnoz rueq guimz juing ghaqphux kuex lvp shuiux rvmuq. Ngaz, Yehowa kuex mnoz kvwungx tvluimc juing rvtueq,” ngoz tueq jungx tueq.

²¹Yehowa rueq, “Israel miqsaz rueq mvnrok shiz wawc mvnshiz ngaz muex kuq yaq kuex ngaz rueq Lewi miqsaz muex kuq tauk. Vruex kuex ngaz httax yaq Tap kvyuq shuimx kaz yaq hez tvkoc yauk mauk rvtueq.

²²Israel miqsaz vganc phvnx htenc kuex Tap hep nuex kvnvp kay mvy muq, kvnvp kaz ruiux kuex vthueyc rvhumc tuex.

²³Majuiuc vmaq phaungc vtueq Lewi miqsaz rueq dvyx Tap kuex httuiyq httvmx ruiux, kvyuq seng yaq shuimc vkay httax yaq htenc kuex khauk gurc pic wuez rax. Tvrac vruex kuex msuiuz msaz pat vjat rueq phvnc rax. Lewi miqsaz rueq Israel mungtan wawc hup vsvmx kuex guimz muq,

²⁴yvmx khoc lac ngoz ruiux lec Israel miqsaz rueq ngaz muex htep kuq noalx yaq mvnrok shiz wawc mvnshiz tsak vnyvmx kuex ngaz rueq tsuingshiq muex kuq vshaungx. Kvkhoc rvtueq tsuingshiq rueq Israel mungtan wawc hup vsvmx guimz lvp muit ngoz tueq ngaz rueq tsuingshiq muex jungx kuq tauk shex,” ngoz tueq jungx tueq.

²⁵Yehowa rueq Moshe maq raz tueq

²⁶Lewi miqsaz muex ngoc: “Nuimshiq tsak laung nuex Yehowa rueq nuimshiq muex kuq tueq mvnrok shiz wawc mvnshiz kuex Israel miqsaz kox wawc nuimshiq lvp wvnc ruiux yuq, kvruex wawc mvnrok shiz wawc mvnshiz kuex Yehowa laung yauk noalc htep kuy rax.

²⁷Yauk noalc htep kvruex kuex wuik vnax shuimc jix rueq kuq yaq tsvmz nyalx nuiyc svpiq tix vnyalx kvruex rvtueq.

²⁸Vkhoc maq raz tueq nuimshiq rueq Israel miqsaz kox wawc lvp shuinx mvnrok shiz wawc mvnshiz kuex ngaz muex yauk noalc htep tvyaungc vtueq kuy rax. Nuimshiq rueq ngaz muex kuq vphuinx yauk noalc htep kuex shomc waz Arun muex kuy rax.

²⁹Nuimshiq rueq lvp shuinx kvwawc vhvlx pinhtumc kuex kuy juing rvtueq.

³⁰Nuimshiq rueq vhvlx pinhtumc rawc kuex lekuy lot yix nuex, vganc kvjungx yaq kvmuinz wuik vnax shuimc jix waz piq rueq shomc kuq shuex yix maq, kvjunngx yaq kuex taq yaq ikhoc nuimshiq rueq muinz taq lvp shuinx.

³¹Kvjungx yaq yauk noalc kuex nuimshiq rueq Tap yauk shuimc shuimx vshuinx kvruex laung lvp aungx yaq yauk mauk ningkhvnc nuex, yauk noalc kvruex kuex mnoz nuiyc m-yuimx wuinz htenc rueq yvmx khoc baung maq yuq muinz phuiuz svy mvy yaq.

³²Yauk noalc kvwawc vhvlx pinhtumc kuex Yehowa muex shomc kuy lot yix phauk saq ruiux yuq kuex nuimshiq nuex mvrax vguez. Yuq muinz Israel miqsaz rueq vkuq yauk noalc kvwawc vhvlx pinhtumc kuex Yehowa muex max shomc kuq nuex phauk saq vtueq, vsawc yauk noalc kuex nauk tvshuy shac kaz; nuimshiq rueq shuimx kaz iruiux yuq, nuimshiq kuex vthueyc rvhumc tuinx,” ngoz tueq jungx tueq.