Read Tase Naga WUINKHUEMC 20 Bible Online

WUINKHUEMC 20 - Tase Naga bible

WUINKHUEMC 20

¹Vphaungc yapix nuex Israel miqsaz kuex Zin ngoz yaq yaruix tvnx nuex httuiuc kaz vtueq Kadesh hong nuex jerak tec wuez tueq. Kvruex yuq Miriam thueyc kaz koq tueq shuluip wuez tueq.

²Jerak tec tueq baung kvyuq yuix vguez rvkoq tueq tsuingshiq rueq Moshe nuiyc Arun kox nuex rvtuimx kaz wuez vtueq,

³“Nuiyshiq kuex majuiuc vkhoc kuilc daz htemc rvmc rvhumc vtix htauk nuex miqmac phvnx vmaq Israel miqsaz rulc vdvmz nuex Yehowa Tap kvlc nuex thueyc kaz ruiux waz vhvlx rvtuex.

⁴Nuiyshiq kuex nyvmx saz htenc rulc vdvmz nuex thueyc mvy wvnc tvkoc nuimshiq rueq nuiyshiq kuex yaruix tvnx vyuq yvmx khoc lac shvlx laq ruinx?

⁵Yvmx ngoz tueq lac nuiyshiq kuex Ejip mungx maq shvlx laq vtueq, yvmx muinz kemz muq htemc rvmc hvlc baung nuex shvlx laq phuinx? Vruex yuq puix wungx vguez, phuiuq muiuq vguez, svpiq vguez, pomegranat vguez, vnuingc juing yuix vguez!” ngoz tueq kvbot nyvnx wuez tueq.

⁶Moshe nuiyc Arun kuex miq phungc mungx kvwawc dung kaz vtueq Tap kvlc nuex jvp kaz wuez tueq. Tsuingnueyc kuex kuix tsvrung nuex bumx yaq baunglaung Yehowa phelez ngauz vngax kuex tsuingnueyc nuex kvkhic kaz tueq.

⁷Yehowa rueq Moshe muex ngoc,

⁸“Bomkhvrc Jep khaungkac nuex httax yaq ngvlhtulc kuex lvmz shuiuz, raz tueq Arun nuimnueyc rueq Israel miqsaz htenc kuex rvtuimx tvkoc jungx shuiuz. Tsuingshiq khaungkac nuex httax yaq lung rauk kvwawc yuix dungc tvkoc nvr shuiuz. Tsuingshiq nuiyc tsuingshiq nyvmx saz htenc rueq nuingc juing yuix kuex lung rauk kvwawc dung tuex,” ngoz tueq jungx tueq.

⁹Moshe kuex Yehowa rueq jungx tueq rulc rv-ngvlc ngvlhtulc kuex lvmz laq tueq.

¹⁰Piq rueq Arun rulc vdvmz miq htenc kuex lung rauk kvlc kvyuq tvrvtuimx vtueq Moshe rueq, “Khawc lvlc jix nuk lex tay shuinz! Vruex lung rauk vwawc nuimshiq tvkoc yuix dung laz juing nuiyshiq rueq ruec juing haz?” ngoz tueq jungx tueq.

¹¹Ngvlhtulc kuex tenz vtueq lung rauk kuex lauk nueyc wung tueq, kvkaq lung rauk wawc yuix paunghvlc dung koq tueq miq htenc rueq nuiyc nyvmx saz htenc rueq nuingx wuez tueq.

¹²Yuq muinz Yehowa rueq Moshe nuiyc Arun muex ngoc, “Nuimshiq kuex Israel miqsaz khaungkac nuex vsawc ngvy luimc vkawc muex kvmluimx vkomc ningkhvnc nuex bomkhvmc vtaq mungx nuex tsuingshiq kuex shvlx wvnc shaungx rvmuq,” ngoz tueq jungx tueq.

¹³Israel miqsaz rueq Yehowa muex kvbot nyvnx koq tueq, vpiq vsawc rvtueq lvmz tsuingshiq muex tvkhic kuq tueq kuex Meriba[2] maq yaungx wvnc tueq.

¹⁴Moshe rueq Kadesh hong maq Edom hokhvmx kox nuex thaungc tvtay kay miq tvkaz tueq. Thaungc jungc jix rueq Edom hokhvmx muex ngoc, “Vruex bomjungc kuex mnoz muex taungnyuing sanox Israel miqsaz kox wawc rvtueq. Nuiyshiq kuilc daz htemc rvmc mtanc khvnc wuez rvhumc wvnc tiq lvmz kuex mnoz rueq tuiuz yaq,

¹⁵Nuiyshiq jix vwaz kuex Ejip mungx nuex httuiuc kaz vtueq raungwawc loayc hvlc httax tueq. Ejip phvnx rueq nuiyshiq jix vwaz tamx nuiyc nuiyshiq kuex naqsaq guirguenz wvnc phuex tueq,

¹⁶nuiyshiq rueq Yehowa kox wawc romc lawc kuy thoz koq tueq, vpiq rueq tay kuq ruiux raungkamx waz tvkaz vtueq nuiyshiq kuex Ejip mungx wawc tvdung shvlx laq phuex. Majuiuc nuiyshiq kuex m-ghaq ruiyx nuex httax yaq Kadesh ghaq nuex httuiuc kaz tiq.

¹⁷Mmungtan maq yanc lvy tvkoc vkhangx kuq koq. Nuiyshiq rulc vdvmz nyvmx saz htenc kuex nuimshiq wuik vnax nuiyc svpiq sunc htenc maq yanz wvnc shix rvmuq, nuimshiq yuix jumx wawc yuix muinz nuingx miq. Nuiyshiq kuex m-ghaq tvlvy laz lvmx laungx tv-phvnc dvyx phvnx shix,” ngoz tueq tvtay jungx tueq.

¹⁸Edom miqsaz rueq, “Nuimshiq muex nuiyshiq mungx maq yanc wvnc tvkoc vkhangx kuq lot miq! Nuimshiq rueq yanz wvnc ruiux yuq, nuiyshiq rueq miq vdaungx maq jvp vtueq khvt phix,” ngoz tueq tvyez jungx tueq.

¹⁹Israel miqsaz rueq, “Nuiyshiq kuex lvmx laungx tv-phvnc dvyx yanz wvnc shix, nuiyshiq nuiyc nuiyshiq nyvmx saz htenc rueq mmungtan wawc yuix kuex nuingx iruiux yuq, yuix kvruex vrez kuq phix, yanc wvnc vkhangx dvyx kuq koq,” ngoz tueq tvtay jungx tueq.

²⁰Edom miqsaz rueq, “Nuiyshiq rueq khawx vshix!” ngoz tueq tvyez ngoz ruiux, Israel miqsaz khvt tvkoc luimc vkawc httaz hvlc nolaungx daungx kvtenc wvnc tueq.

²¹Israel miqsaz htenc kuex tsuingshiq mungx maq yanc wvnc vkhangx kuq muq ningkhvnc nuex Israel miqsaz htenc kuex kvroz vtueq vganc lvmx maq kaz wvnc wuez tueq.

²²Israel miqsaz daungx kuex Kadesh hong maq kaz wvnc vtueq Hor Kanx nuex httuiuc kaz tueq,

²³kvruex baung kuex Edom ghaqruiy nuex rvtueq. Kvruex maq Yehowa rueq Moshe nuiyc Arun muex ngoc,

²⁴“Arun kuex vthueyc shex rvtuex, piq kuex Israel miqsaz muex ngaz rueq bomkhvmc vkuq mungx nuex nyuip lvp tuex rvmuq; yvmx khoc lac ngoz ruiux lec nuimnueyc rueq Meriba maq ngaz rueq nvr phaungx tueq ngvy kvjaz phvnx muit ningkhvnc nuex rvtueq.

²⁵Arun nuiyc vsaz Eleazar kuex Hor Kanx nuex shvlx laq vtueq,

²⁶Arun rueq svmx yaq shomc waz khvy kuex put vtueq Eleazar muex tvsvmc shuiuz. Arun kuex kvruex hong nuex vthueyc shex rvtuex,” ngoz tueq jungx tueq.

²⁷Yehowa rueq nvr tueq rulc rv-ngvlc Moshe rueq shuimx kaz tueq. Israel miqsaz htenc khaungkac nuex tsuingthuimx kuex Hor Kanx nuex duiz wvnc wuez tueq,

²⁸kanx kvmaq Arun rueq svmx yaq shomc waz khvy kuex Moshe rueq put vtueq Eleazar muex tvsvmc kuq tueq. Arun kuex kanx kvyuq dvyx thueyc kaz tueq, Moshe nuiyc Eleazar kuex svt kaz yek tueq.

²⁹Israel miqsaz htenc kuex Arun thueyc kaz tueq lvmx tay wuez vtueq, raungrok thuimx tup thuinbac yonzyex khoar wuez tueq.