Read Tase Naga WUINKHUEMC 22 Bible Online

WUINKHUEMC 22 - Tase Naga bible

WUINKHUEMC 22

¹Israel miqsaz kuex kaz wvnc yek vtueq Yerikho ghaq ralc, Yodan ruilx maq shaldungc kox nuex httax yaq Moba tvnx nuex jerak tec tueq.

²Zippor saz Moba hokhvmx waz Balak rueq Israel miqsaz paunghvlc httax yaq lvmz kvmuinz, Israel miqsaz rueq Amori miqsaz yvmx khoc lac ruez wvnc tvnx lvmz kvmuinz tay vtueq,

³piq rulc vdvmz mungx miqsaz htenc kuex kawc yawc hisungx wuez tueq.

⁴Kvkhoc rvtueq tsuingshiq rueq Midian mungx wawc walaungx bix muex ngoc, “Manx vremc juing baung wawc renhttuingx tvhtumx laz phauk gay yaq ikhoc, miq phungc vraq naungshiq tvroz nuex httax yaq htenc kuex tvbac gay shuex,” ngoz tueq jungx tueq. Kvkhoc rvtueq hokhvmx Balak kuex,

⁵Amaw mungx Euphrat ruilx hep wawc Pethor ghaq nuex httax yaq Beor saz Balam muex jungc tvtay tvkoc miq tvkaz tueq. Tsuingshiq rueq muinz Balak kox wawc bomjungc kuex piq kox nuex laq tueq: “Miqphvnx phvnx shiz kuex Ejip mungx maq kaz vtueq baung ruip saz nuex httuiuc kay yix, majuiuc nuiyshiq mungtan kuex nyvlc lvp wvnc tvkoc tvhiz sungx wuez yaq.

⁶Tsuingshiq kuex nuiyshiq mac muinz miq paunghvlc ningkhvnc nuex kaz vtueq httonx tvmx kaz loq. Kvkhoc ngoz ruiux yuq jix tsuingshiq kuex nuiyshiq rueq khvt vtueq yurc gay ruiux, yurc gay lot shix. Mnoz rueq ruimruimx kuq shuiux jix rueq ruimrix lvp wvnc yaq, mnoz rueq mvnhttonx kuq shuiux jix kuex mvnhttonc rvhumc tuex,” ngoz tueq httax yaq.

⁷Kvkhoc rvtueq Moba nuiyc Midian walaungx bix kuex tsuinghez rulc vdvmz mvnhttonc mauk tauk laq vtueq, Balam kox nuex kaz tueq Balak bomjungc kuex jungphvnx kuq tueq.

⁸Balam rueq tsuingshiq muex, “Majuiuc raungyac kuex vyuq dvyx duiz kuinz, Yehowa rueq ngaz muex yvmx khoc lac jungphvnx kuex invp jix ngaz rueq jungx kuq phaungx,” ngoz tueq jungx tueq. Kvkhoc rvtueq Moba walaungx bix kuex Balam kox nuex duiz wuez tueq.

⁹Tishox kuex Balam kox nuex kaz vtueq, “Mnoz rulc vdvmz nuex yuip naungc jix miq kuex ukhaq lac?” ngoz tueq wiz tueq.

¹⁰Piq rueq, “Moba hokhvmx waz Balak kox maq vkaz jix miq rvtueq,

¹¹Balak rueq Ejip mungx wawc vkaz miqphvnx phvnx shiz ghaq ruiyx khuix nyvmc laz httuiuc kaz tueq lvmz, tsuingshiq kuex khvt yurc gay lot tvkoc ngaz kuex tsuingshiq kox nuex kaz vtueq mvnhttonc kuy kay tvkoc ngoz tueq tvtay jungc kay jix rvtueq,” ngoz tueq tvralc tueq.

¹²Tishox rueq Balam muex ngoc, “Mnoz kuex kvruex hez rulc vdvmz nuex kay naungc mvy muq, Israel miqsaz kuex ngvy ruimrix kejux lvp wvnc jix miq ningkhvnc nuex tsuingshiq kuex httonc tvmc mvy muq,” ngoz tueq jungx tueq.

¹³Nvp yix raungnuiyq nuex Balam rueq Balak thaungc jungc kay jix hez muex ngoc, “Nuimshiq yek waung kuinz; nuimshiq rulc vdvmz kay tvkoc Yehowa rueq vkhangx kuq muq,” ngoz tueq jungx tueq.

¹⁴Kvkhoc rvtueq tsuinghez kuex Balak kox nuex yek woz vtueq tsuinghez rulc Balam kaz naungx muq lvmz kuex tvtay jungx kuq tueq.

¹⁵Kvruex yimaq Balak rueq vphaungc nuex tvkaz tueq walaungx bix kvruex htauk nuex muinz vpaung, vkhek miq htenc kuex Balam kox nuex tvkaz yek tueq.

¹⁶Tsuinghez kuex Balam kox nuex kaz vtueq Balak bomjungc kuex vkhoc tvlvy jungx tueq, “Yvmx vtuing vshaung muinz vguez maq ngaz kox nuex httuiuc laz kaz loq!

¹⁷Ngaz rueq mnoz muex pinhtumc tvtsvmc vphaungx, mnoz rueq nvr shuiux htenc kuex tvhungx htaungx kuq phix. Kejux maq httuiuc kaz vtueq vruex hez htenc kuex httonx tvmx kaz loq,” ngoz tueq tvjungx kaz tueq.

¹⁸Yuq muinz Balam rueq, “Balak rueq piq hoc nuex httax yaq kuimshawx, kuimphox kuex ngaz muex phungc kuq ruiux yuq muinz, Yehowa ngvy Tishox rueq nvr yaq kuex ngaz rueq tvlvlc lot mauk.

¹⁹Yuq muinz Yehowa rueq ngaz muex yvmx khoc lac jungx kuq phvnx kuex tuiuz tvkoc vyuq lawx yuip kuinz,” ngoz tueq jungx tueq.

²⁰Kvruex raungwvrx Tishox kuex Balam kox nuex kaz vtueq, “Vruex hez rueq mnoz kuex tsuinghez rulc vdvmz kay naungc tvkoc gvl ruiux yuq kaz naungx kuiuz, yuq muinz ngaz rueq jungx phaungx kvkhoc dvyx shuimc kay rax,” ngoz tueq jungx tueq.

²¹Kvkhoc rvtueq raungnvp kvyix Balam kuex piq mvre kuiux htauk nuex kamramz[3] tvdaungc ruiux ngaungc vtueq Moba walaungx bix rulc kaz naungx tueq.

²²Balam kaz wvnc naungx koq tueq Tishox kuex vkhaq rvtueq, Balam kuex mvre htauk nuex ngaungc ruiux piq nvrc wanueyc rulc kaz naungx yaq nuex, Yehowa raungkamx waz kuex piq kay juing lvmx nuex jvp vtueq tvwanc tueq.

²³Kvkaq mvre kuiux kuex lvmx nuex yaung shuimx vtueq jvp yaq raungkamx waz kuex khiz vtueq, lvmx phic nax tvnx kox nuex svt kaz wvnc tueq. Rvkoq tueq Balam rueq mvre kuiux kuex wung vtueq lvmx kox nuex tvyek tueq.

²⁴Kvruex yimaq raungkamx waz kuex svpiq sunc vnueyc nuiyc lung rauk hvlwvl lvmx vtsaungx baung nuex jvp laz tueq.

²⁵Kvkaq mvre kuiux rueq raungkamx waz kuex khiz vtueq lung rauk kox nuex kvnvp koq tueq Balam yaz kuex tvjep itueq. Rvkoq tueq Balam rueq mvre kuiux kuex wung tueq.

²⁶Lauk shiz hulawx raungkamx waz kuex max kox nuex kvhttot yek vtueq; vkeq vphvrx kvroz mvy muq baung nuex jvp tueq.

²⁷Vruex lauk nuex mvre kuiux rueq raungkamx waz kuex khiz yek vtueq lvmx mungx nuex bumx kaz tueq. Balam kuex vthuinz khaq vtueq mvre kuiux kuex paq maq wung tueq.

²⁸Kvruex yimaq Yehowa rueq mvre kuiux muex luimc vkawc kuq vtueq tvjak koq tueq, mvre kuiux rueq Balam muex ngoc, “Yvmx mvrax ningkhvnc nuex lac ngaz kuex lauk thuimx nuex httuiuc lac thvt vphux?” ngoz tueq wiz tueq.

²⁹Balam rueq, “Mnoz rueq ngaz kuex vruc vngaz muex tvyaungc vphux nyix! Ngvy yauk nuex yaung vhttax ngoz ruiux yuq, mnoz kuex thvt gay khvmz phaungx,” ngoz tueq tvralc tueq.

³⁰Mvre kuiux rueq, “Ngaz kuex mnoz rullungx wvlex ngaungc ruiux tuiux mvre kuiux rvtauk rvmuq haz? Ngaz rueq kungkhux nuex vkhoc rvkuq ruiux phaungx haz?” ngoz tueq tvralc tueq. Balam rueq, “Vkhoc kuex rvmuq,” ngoz tueq tvralc tueq.

³¹Kvruex yimaq Yehowa rueq Balam muex yaung shuimx vtueq jvp yaq raungkamx waz kuex tvkhic koq tueq; piq kuex ghaq nuex bumx kaz tueq.

³²Raungkamx waz rueq Balam muex ngoc, “Mnoz rueq mvre kuiux kuex yvmx ngoz tueq lac lauk thuimx nuex httuiuc laz wung thvt tonx? Mnoz kay mvy muq laz juing ngaz rueq mkay juing lvmx kuex tuing gay tauk.

³³Mmvre kuiux kuex ngaz khiz vtueq lauk thuimx nuex httuiuc laz lvmx phic nuex dawk tueq. Mkhoc shoc maq mvre kuiux kuex lvmx phic nuex dawk muq ngoz ruiux yuq, ngaz rueq mnoz kuex thvt gay ruiux, mvre kuiux muex thuiuzthuic tvraungx kuq shaungx,” ngoz tueq jungx tueq.

³⁴Balam rueq, “Ngaz yaq gay tauk. Mnoz rueq ngvy tvwanc tvkoc lvmx nuex jvp yaq kuex ngaz rueq tuiuz mauk; majuiuc muinz ngaz kaz yek ruiux yuq, vyaq ngoz ruiux kuex yuimx nuex dvyx yek waung taungx,” ngoz tueq tvyez jungx kuq tueq.

³⁵Raungkamx waz rueq muinz, “Vruex hez vrulc kaz naungx kuiuz, yuq muinz ngaz rueq jungx roc shaungx kvkhoc dvyx jungc rax,” ngoz tueq jungx tueq. Kvkhoc rvtueq Balam kuex tsuinghez rulc kaz naungx tueq.

³⁶Balak hokhvmx waz kuex Balam kaz yaq thaungc kuex tay vtueq, Moba mungx ghaqruiy wawc Aranon ruilx kawx nuex httax yaq Ar ghaq nuex kaz vtueq humc kaz tueq.

³⁷Balak rueq Balam muex ngoc, “Ngaz rueq vphaungc lauk mnoz gvlc kay tvkoc tvkaz phaungx ikaq yvmx rvtueq lac kaz muq rvtonx? Mnoz muex hungx laz htaungx laz juing yauk noalc kuq lot muq ngoz tueq haz tvmaung tonx?” ngoz tueq taungshauk wiz tueq.

³⁸Balam rueq, “Ngaz majuiuc httuiuc kaz raungx. Yuq muinz ngaz rueq jungc juing yvmx lac httax yaq nguinx? Tishox rueq ngaz muex tvjungx yaq kvdvyx ngaz rueq jungx lot shaungx,” ngoz tueq tvralc tueq.

³⁹Kvkhoc rvtueq Balam kuex Balak rulc vdvmz Huzot ghaq nuex kaz wvnc naungx tueq.

⁴⁰Kvruex ghaq kvmaq Balak rueq manx nuiyc khelbuenx htenc kuex thvt vtueq, ngvmx wvyvmc kuex Balam nuiyc piq rulc vdvmz httax yaq walaungx bix htenc muex tvkuq kaz tueq.

⁴¹Nvp yix raungnuiyq Balak rueq Balam kuex shvlx wvnc vtueq, Israel miqsaz kvkhic yaq Bamot Bala luimx nuex duiz woz tueq.