Read Tase Naga WUINKHUEMC 23 Bible Online

WUINKHUEMC 23 - Tase Naga bible

WUINKHUEMC 23

¹Balam rueq Balak muex ngoc, “Vyuq shomrawx mvshix tvhungx shuiuz, manx pung mvshix nuiyc khelbuenx pung mvshix rac lvmz wvnc loq,” ngoz tueq jungx tueq.

²Balam rueq nvr tueq rulc rv-ngvlc Balak rueq tvhungx htaungx vtueq, tsuingnueyc rueq shomrawx tek nuex manx vshiz khelbuenx vshiz maq shomc kuq tueq.

³Kvruex yimaq Balam rueq Balak muex ngoc, “Mnoz kuex wvr maq jauk shomc kuy juing koalc kvyuq jvp kuiuz, Yehowa kuex ngaz rulc rvhumc tvkoc kaz yaq shuex, kaz muq lac lawc kaz phaungx. Vpiq rueq ngaz muex tvkhic jungx kuq phuex htenc kuex mnoz muex jungx kuq yek phaungx,” ngoz tueq jungx tueq. Kvkhoc rvtueq piq kuex washiz lauk lauk dvyx kanx vshiz nuex duiz woz koq tueq,

⁴Tishox kuex piq rulc rvhumc kaz tueq. Kvkaq Balam rueq vpiq muex, “Ngaz rueq shomrawx mvshix kuex tvhungx vtueq vshiz nuex mansuiux pung vshiz, khelbuenx pung vshiz phok maq shomc kuq tauk,” ngoz tueq tvtay jungx tueq.

⁵Yehowa rueq Balak muex tvlvy jungc kay juing vpiq bomjungc kuex jungc kuy lot yix, Balam kuex Balak kox nuex tvyek yek tueq.

⁶Kvkhoc rvtueq Balam kuex Balak kox nuex yek kaz koq tueq, piq kuex Moba walaungx bix rulc vdvmz wvr maq jauk shomc kuq yaq koalc nuex jvp wuez yaq kuex khiz tueq.

⁷Balam rueq vruex rawshvmx kvjaz kuex vkhoc jungx kuq tueq: “Moba hokhvmx waz Balak rueq Siria mungx nuex httax yaq Shaldungc kox kanx htenc wawc ngaz kuex gvl laq phuex. Piq rueq, ‘Kaz loq, Yaku suiuz vsaz htenc kuex httonx tvmx shuiuz,’ ‘Kaz vtueq Israel miqsaz htenc kuex yomnamc gay shuiuz,’ ngoz tueq jungx phuex.

⁸Tishox rueq httonx tvmx muq miq kuex ngaz rueq yvmx khoc lac httonx shaungx, Yehowa rueq phox muq ngoz ruiux yuq, ngaz rueq yvmx khoc lac phox shaungx?

⁹Ngaz rueq lung rauk htauk maq tsuingshiq kuex khiz vshaungx; ghaqluimx htenc htauk maq tsuingshiq kuex lawc vshaungx. Tsuingshiq kuex miqphvnx ruip rawx htauk nuex pungx phvnx muex yaungx yaq; Tsuingshiq kuex miqphvnx vganc htauk nuex muinz ruimrix vjvnc lvp yaq kuex tsuingshiq rueq tuiuz yaq.

¹⁰Israel suiuz vsaz htenc kuex paunghvlc ningkhvnc nuex, Bokkhuyx wvl lot miq ikhoc, tsuingshiq kvmuinz wvl lot miq. Tishox miq washiz ikhoc yaungx vtueq thueyc wvnc roc; Tsuingrux miq washiz ikhoc kuiyqshuik shuik hvlc thueyc wvnc roc.”

¹¹Kvruex yimaq Balak rueq Balam muex ngoc, “Mnoz rueq yvmx khoc lac rvtonx? Ngvy ralx hez kuex httonc tvmc tvkoc mnoz kuex gvl laq phaungx, yuq muinz mnoz rueq tsuingshiq muex ruimruimx kuq vshuiux nyix,” ngoz kuq tueq.

¹²Balam rueq, “Yehowa rueq jungx yaq kvkhoc dvyx ngaz rueq jungx lot shaungx,” ngoz tueq tvralc tueq.

¹³Kvruex yimaq Balak rueq Balam muex ngoc, “Israel miqsaz wvyvmc dvyx kvkhic yaq baung nuex kaz ix. Kvruex baung kvmaq tsuingshiq kuex httonx shuiuz,” ngoz tueq jungx tueq.

¹⁴Piq rueq Balam kuex Pisga Kanx nuex httax yaq Zophim htungx nuex shvlx laq tueq. Kvruex yuq muinz piq rueq shomrawx mvshix tvhungx vtueq, vshiz nuex mansuiux pung vshiz, khelbuenx pung vshiz phok maq shomc kuq tueq.

¹⁵Balam rueq Balak muex ngoc, “Mnoz kuex wvr maq jauk shomc kuy juing hep kvyuq jvp laz nguiuz, ngaz kuex nuex kvyuq Tishox rulc rvhumc kaz phaungx,” ngoz tueq jungx tueq.

¹⁶Yehowa rueq Balak muex tvlvy jungc juing vpiq bomjungc kuex jungc kuy lot yix, Balam kuex Balak kox nuex tvyek yek tueq.

¹⁷Kvkhoc rvtueq Balam kuex Balak kox nuex yek woz koq tueq, Balak kuex Moba walaungx bix htenc rulc vdvmz nuex wvr maq jauk shomc kuy juing nuex dvyx jvp yaq kuex khiz woz tueq. Balak rueq Yehowa rueq yvmx khoc lac jungx tvnx ngoz tueq wiz tueq,

¹⁸kvkaq Balam rueq rawshvmx kvjaz kuex vkhoc jungx kuq tueq: “Zippor saz Balak, ngaz kox nuex kaz loq, Ngaz rueq jungx shaungx kuex tay shuiuz.

¹⁹Tishox kuex miqsaz ikhoc vrot vkaq kvjak muq; Miqsaz ikhoc thuinz kvlec lauz muq. Bomkhvmc rulc rv-ngvlc shuimx yaq; Jungx shuex rulc rv-ngvlc yaungx woz yaq.

²⁰Ruimruimc kuy tvkoc ngaz kuex tvkaz phuex, Tishox rueq kuq yaq ruimrix kuex ngaz rueq tvyez gay lot mauk.

²¹Israel miqsaz kuex yix maq pat nuex kuilc daz rvhumc tuex lvmz kuex ngaz rueq khiz mauk. Yehowa tsuingshiq Tishox kuex tsuingshiq rulc vdvmz httax yaq; Vpiq kuex tsuingshiq Hokhvmx rvtueq lvmz thaungbaungx wuez yaq.

²²Tishox rueq tsuingshiq kuex Ejip mungx wawc tvdung shvlx laq tueq; Tsuingshiq kuex manx tsvy ikhoc hungc vlaungc httaz hvlc.

²³Israel phvnx httonx tueq nuex vlox phajic, ngvmc khic phaqjic kuex nyuip lot tuex rvmuq. Majuiuc kuex miq htenc rueq Israel lvmz kuex, ‘Lawc shuinz, Tishox rueq kvkhoc ruez gay tueq ix!’ ngoz tueq jungx wuez shuex.

²⁴Israel miqsaz kuex hungc vlaungc httaz hvlc hangsic rulc rv-ngvlc yaq: Ngvmx kauk lvp muq nuiyc tvguiy nuingx lvp muq ngoz ruiux yuq, Kuiyq shuik httax tuex rvmuq.”

²⁵Kvruex yimaq Balak rueq Balam muex ngoc, “Mnoz rueq Israel miqsaz kuex nauk httonx kaz, yuq muinz tsuingshiq muex ruimc nauk ruimx kuq kaz!” ngoz tueq jungx tueq.

²⁶Balam rueq, “Ngaz kuex Yehowa rueq nvr yaq rulc rv-ngvlc dvyx shuimx kaz vshaungx ngoz tueq mnoz muex ngaz rueq jungx phaungx rvmuq haz?” ngoz tueq tvralc tueq.

²⁷Balak rueq, “Vganc baungshiz nuex ngaz rulc vdvmz kaz naungx loq. Mnoz rueq kvruex baung maq tsuingshiq kuex httonc tvkoc Tishox thuinroc lvmx kuex mkhoc rvtueq muinz httax tuex,” ngoz tueq jungx tueq.

²⁸Kvkhoc rvtueq piq rueq Balam kuex kumtsvy tvnx kvkhic yaq Peor Kankhux nuex shvlx wvnc tueq.

²⁹Balam rueq Balak muex ngoc, “Vruex baung vyuq ngaz muex shomrawx mvshix tvhungx shuiuz, manx pung mvshix nuiyc khelbuenx pung mvshix rac lvmz wvnc loq,” ngoz tueq jungx tueq.

³⁰Balak rueq muinz Balam rueq nvr tueq rulc rv-ngvlc shomrawx htenc tvhungx ruiux, vshiz nuex manx pung vshiz rac khelbuenx pung vshiz phok maq shomc kuq tueq.