Read Tase Naga WUINKHUEMC 25 Bible Online

WUINKHUEMC 25 - Tase Naga bible

WUINKHUEMC 25

¹Israel miqsaz kuex Akasia Warc tvnx nuex jerak tec vtueq httax tueq baunglaung miqwaz rulc wvyvmc kuex Moba phvnx shvlx rulx rulc yaq phaq wuez tueq.

²Yalxjuik rulx kvraq Moba tishox muex shomc kuy moalx nuex tsuingshiq gvl laq vtueq nawk palx kaz tueq. Israel miqsaz htenc muinz phuiuz vsvy phauk saq kaz vtueq Peor Bala tishox muex nawk palx kaz tueq.

³Kvkhoc rvtueq Yehowa kuex tsuingshiq muex khaq vtueq,

⁴Moshe muex ngoc, “Ngvy thuinkhvy shiz tvkoc Israel miqsaz walaungx bix htenc kuex tvdung vtueq mungx miqsaz khaungkac nuex thvt gay shuiuz,” ngoz tueq jungx tueq.

⁵Moshe rueq Israel miqsaz vphvnx tv-phvnc guimz lawc jix hez muex ngoc, “Nuimhez miq pumz tek rueq miqmac phvnx wawc Peor Bala muex nawk palx jix miq htenc kuex thvy gay rax,” ngoz tueq nvr tueq.

⁶Moshe nuiyc mungx miqsaz phungc kuex Yehowa httax yaq Tap kaluix daungx nuex khoarnyerx yaq baunglaung, tsuinghez khaungkac nuex Israel miq washiz rueq Midian shvlx nyuiuz shiz kuex vtap mungx nuex shvlx wvnc tueq kuex khiz tueq.

⁷Kvkaq shomc waz Arun suiuz, Eleazar saz Phineha rueq kvruex khiz vtueq miq phungc wawc dung kaz tueq. Piq rueq paq vshiz shuimx laq vtueq,

⁸kvruex waz nuiyc yalxjuik nyuiuz httax yaq tap kvyuq phvnx laq vtueq, vnueyc wvtaungx paq maq shuiuq thvt gay tueq. Ekvkhoc maq jix Israel tvbac yaq htaungkuiyq kuex tvsuingx gay tueq,

⁹yuq muinz vthvy gay rvhumc tueq miq kuex 24,000 rvtueq.

¹⁰Yehowa rueq Moshe muex ngoc,

¹¹“Phineha rueq shuimx tvlot gay tueq ningkhvnc nuex Israel miqsaz muex ngvy thuinkhvy shiz tueq shex. Ngaz maq lvy vtueq vganc tishox muex nawk palx yaq kuex piq rueq tvdux gay tueq, kvkhoc rvtueq ngvy thuinz tvkhaq vtueq tsuingshiq kuex tvbac gay mauk shex.

¹²Kvkhoc rvtueq mkaq muinz phvnc juing bomkhvrc kuex ngaz rueq piq rulc tvhungx shaungx lvmz jungx kuq shuiuz.

¹³Piq rueq ngaz maq lvy vtueq vganc tishox kuex raungc raq muq maq Israel miqsaz mvrax kvdawc juing lvmz shuimx wvnc tueq ningkhvnc nuex, piq maq phaungc vtueq vsuiuz vsaz hez rueq shomc waz yauk shuimc kuex mkaq muinz shuimx wvnc wuez shuex,” ngoz tueq jungx tueq.

¹⁴Midian shvlx rulc vdvmz nuex thvt gay tueq Israel miqwaz kuex Simeon waruiuz wawc vyungx vlaungx yaungc jix Salu saz Zimri rvtueq.

¹⁵Yalxjuik nyuiuz kvruex muingc kuex Kozbi rvtueq. Vwaz Zur kuex Midian miqsaz wawc ngongc waz rvtueq.

¹⁶Yehowa rueq Moshe muex ngoc,

¹⁷“Midian miqsaz htenc kuex tvbac gay shuiuz,

¹⁸yvmx khoc lac ngoz ruiux lec, tsuingshiq rueq Peor maq nuimshiq tvshonx ronx vtueq tvyaq kv-phuinx ningkhvnc nuex muinz, kvruex hong maq htaungkuiyq dung tueq baunglaung vthueyc kaz Kozbi ningkhvnc nuex muinz, Midian miqsaz kuex tvsawc tvric khvt gay shuiuz,” ngoz tueq jungx tueq.