Read Tase Naga WUINKHUEMC 27 Bible Online

WUINKHUEMC 27 - Tase Naga bible

WUINKHUEMC 27

¹Mala, Noa, Hogla, Milka, Tirza kuex Zelophehad saz yalxjuik sahez rvtueq. Zelophehad kuex Hepher saz, Hepher kuex Gilead saz, Gilead kuex Makhir saz, Makhir kuex Manase saz, Manase kuex Yosep saz rvtueq.

²Tsuinghez kuex Yehowa httax yaq Tap kvlc nuex kaz vtueq Moshe, shomc waz Eleazar, walaungx bix nuiyc Israel miqsaz htenc kvruex khaungkac nuex jvp vtueq,

³“Nuiyshiq waz kuex yaruix tvnx nuex thueyc kaz tueq, vsaz miqwaz saz washiz muinz kvjungx muq doc. Nuiyshiq waz kuex Yehowa muex khawc lvlc jix Kora phungc nuex lomx muq doc; piq kuex miqmac mvrax ningkhvnc nuex thueyc kaz tueq.

⁴Piq kuex vsaz miqwaz saz vguez ningkhvnc nuex piq muingc kuex Israel miqsaz wawc vmoz kay juing haz? Nuiyshiq taungnyuing sanox muex ghaq phvlx kuq tuit kvkhoc, nuiyhez muex muinz phvlx kuq kuit,” ngoz tueq thoz tueq.

⁵Tsuinghez rueq thoz tueq lvmz kuex Moshe rueq Yehowa muex tvtay koq tueq,

⁶Yehowa rueq,

⁷“Zelophehad sahez rueq thoz tueq lvmz kuex aungx yaq ningkhvnc nuex vwaz muex taungnyuing sanox muex ghaq phvlx kuq toq kvkhoc, tsuinghez muex muinz phvlx kuq shuiuz. Vwaz tsak jungx kuex tsuinghez rueq mlvp shueq.

⁸Miq washiz shiz kuex vsaz miqwaz saz max lvp nuex thueyc kaz ruiux yuq, vsaz yalxjuik saz rueq tsak jungx lvp wvnc shuex lvmz kuex Israel miqsaz muex jungx kuq shuiuz.

⁹Kvruex waz kuex vsaz vguez ngoz ruiux yuq, vphuz vnox rueq piq tsak jungx kuex lvp wvnc rax.

¹⁰Piq phuz vnox muinz vguez ngoz ruiux kuex vwaungx hez rueq tsak jungx kuex lvp rax.

¹¹Kvruex waz kuex vphuz vnox nuiyc vwaz vwaungx htenc muinz vguez ngoz ruiux yuq, taungnyuing sanox vnyek jix rueq tsak jungx kuex lvp tvy rax. Ngaz, Yehowa rueq mnoz muex jungx vphaungx rulc rv-ngvlc Israel miqsaz rueq tvrac vruex phvnx vtueq shuimc kay rax,” ngoz tueq jungx tueq.

¹²Yehowa rueq Moshe muex ngoc, “Abarim Kanx nuex duiz woz vtueq Israel miqsaz muex ngaz rueq kuq shaungx mungtan kuex lawc shuiuz.

¹³Mphuz Arun thueyc kaz tueq ikhoc, mnoz muinz kvruex mungx kuex khic yix maq thueyc wvnc tuiux,

¹⁴yvmx khoc lac ngoz ruiux lec nuimnueyc rueq Zin yaruix tvnx maq ngaz rueq nvr phaungx kvjaz kuex lvlc gay ningkhvnc nuex rvtueq. Meriba maq Israel miqsaz rueq ngaz muex mvrax tvgurc thuirx tvruingx wuez tueq nuex nuimnueyc rueq tsuingshiq khaungkac nuex ngvy vsawc luimc vkawc kuex wvlc guez tvyaungc wvnc tuit,” ngoz tueq jungx tueq. (Meriba kuex Zin yaruix tvnx wawc Kadesh nuex httax yaq yuix saz ruilx kuiuq ngoc rvtueq.)

¹⁵Moshe rueq, “Rullungx thuiuzthuic pauk lotlaz muex vjungx rvtoq

¹⁶Yehowa Tishox lex, vruex miq htenc kuex shunshvlx vtueq

¹⁷tsuingshiq kuex ralx khvt nuex shunshvlc lot jix miq washiz kuex thvl taq shuiuz, kvkaq mmiq kung kuex vremc jix vguez khelbuenx ikhoc yaungx muq mruez kueq,” ngoz tueq vjux thoz tueq.

¹⁸Yehowa rueq Moshe muex ngoc, “Nun saz Yoshua kuex hungc vlaungc vhttax khvmc yaq miq washiz rvtueq ningkhvnc nuex vkhux htauk nuex m-yauk tvdaungc kuq shuiuz.

¹⁹Shomc waz Eleazar nuiyc miq htenc kvruex khaungkac nuex piq kuex tvjvp vtueq mpumz httungx jix waz rvtueq lvmz kuex jungx tvtay shuiuz.

²⁰Mnoz vrangx vpangx wvyvmc kuex piq muex kuq shuiuz, kvkaq Israel miqsaz lotlaz rueq piq kvjaz tay phvnx wvnc wuez shuex.

²¹Piq kuex ngvy thuinroc lvmx Urim nuiyc Thummim[4] muex wiz yaq shomc waz Eleazar muex kvmluimx tvluimc rax. Ekvkhoc maq Eleazar rueq Yoshua nuiyc Israel mungx miqsaz wvtaungx muex tsuingshiq rueq shuimc juing htenc lotlaz kuex jungphvnx tvkhic kuy rax tuex,” ngoz tueq jungx tueq.

²²Moshe rueq muinz Yehowa rueq nvr tueq htenc kuex shuimx kaz tueq.

²³Kvruex yimaq Moshe kuex Yehowa rueq nvr tueq rulc rv-ngvlc Yoshua khux htauk nuex vyauk tvdaungc vtueq piq pumz httungx jix waz rvtueq lvmz kuex tvtay jungx tueq.