Read Tase Naga WUINKHUEMC 31 Bible Online

WUINKHUEMC 31 - Tase Naga bible

WUINKHUEMC 31

¹Yehowa rueq Moshe muex ngoc,

²“Israel miqsaz muex tsuingshiq rueq vshuimc tvyaq shvlc ningkhvnc nuex Midian miqsaz muex murx tvyez shuinz. Kvruex yauk shuimc kuex shuimc lot yix mnoz kuex vthueyc shex rvtuiux,” ngoz tueq jungx tueq.

³Kvkhoc rvtueq Moshe rueq miq htenc muex ngoc, “Ralx lungc tvkoc tvyoalc shuinz, ngoz ruiux nuimshiq rueq Midian miqsaz kuex khvt vtueq Yehowa muex tsuingshiq rueq yvmx lac ruez tvnx kvruex laung tsuingshiq muex murx tvgurc shuinx rvtueq.

⁴Ralx khvt kay tvkoc Israel phvnx htenc wawc phvnx shiz wawc miq hingshiz shiz tvkaz wuez shuinz,” ngoz tueq jungx tueq.

⁵Kvkhoc rvtueq ralx khvt kay tvkoc Israel phvnx htenc wawc miq hingshiz phok raz tueq miq munshiz rac hingnueyc kuex thvl taq tueq.

⁶Moshe rueq vsawc taungx vwawx htenc nuiyc bolic tuimx vtueq honc tvlvmc kuy nuex shunshvlc jix shomc waz Eleazar saz Phineha rueq shvlx yaq khung nuex tsuinghez kuex tvkaz naungx tueq.

⁷Yehowa rueq Moshe muex nvr tueq rulc rv-ngvlc tsuingshiq rueq Midian miqsaz htenc kuex khvt lot vtueq,

⁸Midian hokhvmx waz bv-ngac rvtueq, Ewi, Rekem, Zur, Hur, Reba muinz vlomx thvt gay tueq. Beor saz Balam muinz thvt gay tueq.

⁹Israel miqsaz rueq Midian shvlx rulx nuiyc nosaz rulx htenc kuex wuinz saz tvyaungc muex lvp ruiux, tsuingshiq khelbuenx, suiux vmanx nyvmx saz kung htenc nuiyc hup vsvmx lotlaz kuex lvmz wvnc tueq.

¹⁰Tsuingshiq ghaqyungx htenc nuiyc jerak htenc kvmuinz wvr maq jauk gay tueq.

¹¹Tsuingshiq rueq lvmz wvnc tueq hup vsvmx, miq nuiyc nyvmx saz htenc kuex,

¹²Yerikho ghaq ral Yodan ruilx kawx nuex httax yaq Moba yaruix tvnx nuex jerak tec vtueq httax yaq Moshe, Eleazar nuiyc Israel miqsaz kox nuex lvmz wvnc tueq.

¹³Moshe, Eleazar nuiyc walaungx bix htenc kuex jerak phic nuex kaz vtueq nolaungx bix kuex humc kaz tueq.

¹⁴Yuq muinz Moshe kuex ralx lungc ruix maq vyek vyungx vlaungx bix nuiyc vshunc vshvlc jix htenc muex khaq vtueq,

¹⁵“Nuimshiq rueq yvmx ngoz tueq lac yalxjuik rulx htenc kuex thuiuzthuic tvraungx taq tuinx?

¹⁶Yalxjuik rulx htenc vruex kuex Balam kvmungx honc jungc rulc rv-ngvlc phvnx vtueq, Israel miqsaz kuex Peor hong maq Yehowa muex tvyaq wvnc tueq lvmz kuex rvwvl tvmaung wuez shuinz. Kvruex mvrax ningkhvnc nuex Yehowa miqsaz phungc mungx nuex thuimkux dung tueq.

¹⁷Kvkhoc rvtueq miqwaz saz rulx htenc nuiyc miqwaz rulx rulc woalc naungc yoalx yalxjuik rulx htenc kuex lotlaz thvt gay shuinz,

¹⁸yuq muinz yalxjuik saz rulx htenc nuiyc yalxtux rulx htenc kuex nuimshiq tvkoc tvjungx taq shuinx,

¹⁹nuimhez phungc kvwawc miq thuiuzthuic thvy gay jix nuiyc miq maungx shuimc gay jix htenc kuex jerak phic kvyuq raungx mvshix httaz rax. Raungnuiyq thuimx raungnuiyq nuiyc raungx mvshix raungnuiyq htenc nuex nuimshiq pumz nuiyc nuimshiq rueq vlvp laq yalxjuik rulx htenc kvruex tvkoc kvsawc nawc yauk shuimc kuex shuimc rax.

²⁰Nuimshiq khoz vkhvy htenc nuiyc ngvmx khuix, khelkhix mul rvmuq ngoz ruiux pulx maq vtvhungx hup vsvmx htenc kuex tvsawc rax,” ngoz tueq jungx tueq.

²¹Shomc waz Eleazar rueq muinz ralx lungc ruix maq vyek nolaungx bix muex ngoc, “Yehowa rueq Moshe muex kuq tueq tvrac htenc kuex,

²²kuimshawx, kuimphox, nvyrvyx, yanx, yanluiz, junx kvhtenc kvruex wvrluic htauk maq tvlvy vtueq tvsawc nawc shuinz. Vganc phvnx yanx hup svmx htenc kuex tvsawc nawc juing yuix maq tvsawc rax.

²⁴Raungx mvshix raungnuiyq nuex nuimshiq khoz vkhvy htenc kuex huy rax; kvruex yimaq jix nuimshiq kuex sawc nawc wvnc tuinx ningkhvnc nuex jerak mungx nuex nyuip waung lvp tuinx ngoz tueq httax yaq,” ngoz tueq jungx tueq.

²⁵Yehowa rueq Moshe muex ngoc,

²⁶“Mnoz nuiyc Eleazar kuex Israel miqsaz walaungx bix htenc rulc vdvmz vlvp vruez wvnc miq nuiyc nyvmx saz htenc, vlvp vruex laq hup vsvmx httax yaq htenc kuex wvlc rax.

²⁷Kvruex hup svmx htenc kuex ngvlc rv-ngvlc phvlx vtueq, kholak kuex nolaungx daungx kvmac kuq ruiux, kholak kuex Israel miqsaz muex kuy rax.

²⁸Nolaungx daungx tvkoc vphvlx taq kvwawc Yehowa tvkoc hihic rawrawc kuex wuinz saz shac bv-ngac wawc washiz, kvmaq khelx, vmanx, khelbuenx, mvre htenc muinz kvkhoc jvnc lvmc tvy rax.

²⁹Yehowa muex yauk noalc htep kuy tvraung kvruex phvlc kuex shomc waz Eleazar muex kuy rax.

³⁰Israel miqsaz tvkoc vphvlx taq kvwawc wuinz saz rok bv-ngac wawc washiz, kvmaq khelx, vmanx, khelbuenx, mvre htenc muinz kvkhoc jvnc lvmz vtueq Yehowa Tap kuex bvmc lawc jix Lewi miqsaz kvmac kuy rax,” ngoz tueq jungx tueq.

³¹Moshe nuiyc Eleazar kuex Yehowa rueq nvr tueq rulc rv-ngvlc shuimx kaz tueq.

³²Nolaungx daungx rueq miqmac laung vlvmz taq hup svmx htenc maq lvy vtueq: vlvp vruex laq nyvmx saz nuiyc miq htenc kvruex muingc wvlc kuex khelkhix nuiyc khelbuenx 675,000, manx 72,000, mvre 61,000, nuiyc yalxtux sahez nyuiuz 32,000 rvtueq.

³⁶Nolaungx daungx tvkoc tvkhoz lak vphvlx khelkhix nuiyc khelbuenx 337,500 rvtueq, kvwawc Yehowa laung hihic rawrawc kuy tvkoc 675 rvtueq; nolaungx daungx tvkoc vphvlx taq manx 36,000 rvtueq, kvwawc Yehowa laung hihic rawrawc kuy tvkoc 72 rvtueq; nolaungx daungx tvkoc vphvlx taq mvre 30,500 rvtueq, kvwawc Yehowa laung hihic rawrawc kuy tvkoc 61 rvtueq; nolaungx daungx tvkoc vphvlx taq yalxtux rulx nyuiuz 16,000 rvtueq, kvwawc Yehowa laung hihic rawrawc kuy tvkoc nyuiuz 32 rvtueq.

⁴¹Kvkhoc rvtueq Yehowa rueq nvr tueq rulc rv-ngvlc Moshe rueq Yehowa muex yauk noalc htep kuy tvraung vphvlx kuex Eleazar muex kuq tueq.

⁴²Israel miqsaz laung vphvlx taq kvmuinz nolaungx daungx muex vphvlx taq rulc rv-ngvlc khelkhix nuiyc khelbuenx 337,500 rvtueq, manx 36,000 rvtueq, mvre 30,500 rvtueq, yalxtux rulx nyuiuz 16,000 rvtueq.

⁴⁷Moshe rueq kvruex phvlc phvlc kvwawc vlvp vruez miq nuiyc nyvmx saz htenc kuex rok bv-ngac wawc vshiz lvmz vtueq, Yehowa rueq nvr tueq rulc rv-ngvlc Yehowa Tap bvmc lawc jix Lewi miqsaz muex kuq tueq.

⁴⁸Kvruex yimaq nolaungx daungx wawc vyungx vlaungx bix kuex Moshe kox nuex kaz vtueq, “Nuiyhez yauk khung wawc nolaungx bix kuex wvllawc koq tueq washiz muinz thueyc mvy muq kuex khiz lvp vshix.

⁵⁰Kvkhoc rvtueq nuiyshiq pumz tek rueq vlvp taq kvmarc rarc juing kuimshawx htenc, yauk paungc, yauksanx, yauktop, najic nuiyc luek tumx htenc kuex piq kox nuex lvmz laq wuez tueq. Yehowa rueq nuiyshiq thuiuzthuic tvraungx kuq phuex ningkhvnc nuex vruex htenc kuex shomc kuq vphix,” ngoz tueq jungx tueq.

⁵¹Moshe nuiyc Eleazar rueq kvsvp rvp juing kuimshawx htenc kuex thoz taq tueq.

⁵²Vyungx vlaungx bix rueq shomc kuq tueq kvsvp rvp juing kuex kilogram 200 rvtueq.

⁵³Nolaungx lvmlvmc yaungc jix hez rueq miqmac rueq vlvp hup svmx htenc kuex miqmac rueq lvmz laq ruingx dvyx lvmz laq tueq.

⁵⁴Yehowa rueq Israel miqsaz kuex tvkhup wungx kuy tvkoc Moshe nuiyc Eleazar rueq kuimshawx htenc kuex Tap nuex lvmz laq tueq.