Read Tase Naga WUINKHUEMC 32 Bible Online

WUINKHUEMC 32 - Tase Naga bible

WUINKHUEMC 32

¹Ruben phvnx nuiyc Gad phvnx nuex suiux vmanx paunghvlc httax yaq. Kvkaq tsuingshiq rueq Jazer mungx nuiyc Gilead mungx nuex remc juing ghaq vhvlx khiz vtueq,

²tsuingshiq kuex Moshe, Eleazar nuiyc Israel miqsaz walaungx bix kox nuex kaz vtueq,

³“Yehowa rueq romc lawc kuy ningkhvnc nuex Israel miqsaz rueq vlvp wvnc Atarot, Dibon, Jazer, Nimra, Heshbon, Eleale, Sibma, Nebo nuiyc Beon ghaq htenc httax yaq hong kuex suiux vmanx remc muex ghaq hvlx rvtueq, nuiyshiq kuex suiux vmanx paunghvlc httax yaq.

⁵Kvkhoc rvtueq vruex hong kuex nuiyshiq httaz muex kuq koq, nuiyshiq kuex Yodan ruilx kvkox ral nuex rvp vtueq nauk tvhttax vkueq,” ngoz tueq thoz tueq.

⁶Moshe rueq, “Nuimshiq phvnx vmaq htenc kuex ralx khvt yaq baunglaung nuimshiq kuex vruex hong vyuq dvyx haz httax tuinx?

⁷Israel miqsaz kuex Yodan ruilx rvp vtueq Yehowa rueq vkuq mungx kvyuq nyuip tvkoc nuimshiq rueq yvmx ngoz tueq lac tsuingshiq thuinz tvruinc kuq vshuinx?

⁸Ngaz rueq nuimshiq jix vwaz tamx muex kvruex mungx kuex sisunx kay tvkoc Kadesh Barnea maq tvkaz tauk nuex tsuinghez rueq miq thuinz tvbac tvruinc kuq tueq.

⁹Tsuinghez kuex Eshkol Warc tvnx nuex httuiuc laz kaz vtueq, kvruex mungx kuex khiz kaz ruiux yek waung tueq nuex Yehowa rueq vkuq mungtan kvyuq kaz muq tvkoc miq htenc muex jungphvnx kuq tueq.

¹⁰Kvruex raungnuiyq Yehowa khaq vtueq:

¹¹‘Nuimshiq rueq ngvy lvmx rvkhauk phvnx muit ningkhvnc nuex Ejip mungx maq vkaz wvnc miq kvwawc rullungx wawc roknueyc maq htauk kox miq, miqwaz rulx htenc kuex Abraham, Esak, Yaku muex ngaz rueq kuq phaungx ngoz tueq bomkhvmc vtaq mungx kvyuq nyuip lvp muq,’ ngoz tueq tuemc vtueq jungx kuq tueq.

¹²Ekvkhoc murx tvgurc rvhumc tueq kvyuq Kenizi taungx wawc Jephunne saz Galeb nuiyc Nun saz Yoshua kuex lomx muq; tsuingnueyc kuex Yehowa lvmx rvkhauk laz phvnc jix rvtueq.

¹³Yehowa kuex Israel miqsaz muex thuinkhaq vtueq, vpiq thuinroc lvmx khawc lvlc jix miq htenc thueyc kaz wuez tueq nuex httuiuc laz, tsuingshiq kuex yaruix tvnx nuex wawc rok bvlic tup tvroz khuemx vtueq tvhttax tueq.

¹⁴Majuiuc muinz Yehowa thuinkhvy kuex Israel htauk nuex tvyoalc yoalx tvhttuiuc yek muex, vbac vtac pat vnyalx miq nuimshiq kuex nuimshiq jix vwaz tamx kvhttungx muex yaungx vtuinx.

¹⁵Ruben phvnx nuiyc Gad phvnx nuimshiq kuex Yehowa yix nuex majuiuc phvnx muit ngoz ruiux yuq, vpiq rueq vruex miq htenc lotlaz kuex yaruix tvnx nuex laukshiz hulawx tuip gay yek shuex, kvkaq bac wvnc tueq tsuingshiq tvkoc nuimshiq htauk nuex gurc kvdaungc wvnc tuex,” ngoz tueq tvralc tueq.

¹⁶Tsuinghez kuex Moshe kox nuex kvnvp vtueq, “Vphaungc nuex nuiyshiq khelbuenx htenc remc muex lung maq ruk ruk tvhungx tvkoc muinz, nuiyshiq nuex kvwungx jix htenc httaz tvkoc palx ruk tvy yoalx ghaqyungx tec tvhungx tvkoc muinz vkhangx kuq koq.

¹⁷Kvruex yimaq jix nuiyshiq kuex naungshiq Israel miqsaz rueq lvp juing mungx nuex ghaqshungc rvkhauk laz shex httax wvnc tuex nuex httuiuc laz, tsuinghez kuex shunshvlx vtueq khvt kaz tix. Kvruex baunglaung nuiyshiq nuex kvwungx jix htenc kuex phaungx duingduing ghaqshungc htenc nuex httaz lvp ningkhvnc nuex, vruex hong wawc miq htenc kuex gawx gay lot shix.

¹⁸Vganc Israel miqsaz lotlaz muinz tsuingshiq rueq lvp shuex mungtan tsak kuex lvp wvnc lot shuex nuex httuiuc laz nuiyshiq muinz miqmac yuimx nuex yek waung wuez miq.

¹⁹Yodan ruilx maq shaldungc kox nuex nuiyshiq muex ghaqphux phvlc kuy yoalx shex ningkhvnc nuex, shalx nyuip kox ral wawc ghaqphux phvlc kuy tvkoc thoz yek miq shex,” ngoz tueq jungx tueq.

²⁰Moshe rueq, “Nuimshiq bomkhvmc tv-phaungx shuinx ngoz ruiux kuex, Yehowa khaungkac nuex ralx khvt kay tvkoc tvyoalc wuez shuinz.

²¹Nuimshiq nolaungx daungx rueq Yodan ruilx kuex yanz ruiux Yehowa rueq nvr yaq kvjaz kuex phvnx vtueq, nuiyshiq ralx htenc kuex khvt gay ruiux,

²²mungtan kuex lvp tvy rax. Kvruex yimaq jix nuimshiq kuex Yehowa nuiyc miqmac phvnx Israel miqsaz laung nuex yauk shuimc shuimx tuit shex ningkhvnc nuex, vruex yuq yek kaz lvp tuinx. Kvkaq Yehowa rueq Yodan ruilx maq shaldungc kox mungx vruex kuex nuimshiq muex vphvlx kuq rvtueq lvmz tuiuz wvnc wuez shuex.

²³Yuq muinz nuimshiq rueq bomkhvmc tv-phaungx muit ngoz ruiux kuex Yehowa muex yaq gay mvrax yaungx tuex. Kvkaq nuimshiq kuex mvrax murx tvgurc vsuing rvhumc tuinx.

²⁴Nuimshiq ghaqyungx htenc nuiyc khelbuenx ruk htenc kuex tvhungx guirx wuez shuinz, yuq muinz nuimshiq bomkhvmc kuex nauk tvbac kaz!” ngoz tueq tvralc tueq.

²⁵Gad phvnx nuiyc Ruben phvnx rueq, “Mnoz rueq jungx vphux kvkhoc nuiyshiq rueq shuimx kaz shix.

²⁶Nuiyshiq juik vsaz hez htenc nuiyc khelx, vmanx nuiyc khelbuenx htenc kuex vruex hong nuex httax yaq Gilead ghaq nuex mhttax laz kueq.

²⁷Nuiyshiq kuex Yehowa rueq nvr yaq kvjaz kuex phvnx vtueq ralx khvt kay tvkoc tvyoalc yoalx maq httax vtix. Mnoz rueq jungx kuq phux rulc rv-ngvlc nuiyshiq rueq Yodan ruilx yanz wvnc vtueq ralx htenc kuex khvt shix,” ngoz tueq jungx wuez tueq.

²⁸Kvkhoc rvtueq Moshe rueq Eleazar, Yoshua nuiyc vganc Israel miqsaz walaungx bix muex ngoc,

²⁹“Gad phvnx nuiyc Ruben phvnx kuex Yehowa rueq nvr tueq rulc rv-ngvlc Yodan ruilx kuex yanz vtueq ralx khvt ruiux yuq muinz, nuimshiq kuex tsuingshiq rueq romc kuy ningkhvnc nuex kvruex mungx kuex lvp wvnc ruiux yuq muinz, Gilead mungx kuex tsuingshiq muex kuq gay shuinz.

³⁰Yuq muinz tsuingshiq kuex nuimshiq rulc vdvmz Yodan ruilx kuex yanz vtueq ralx khvt kaz naungx muq ngoz ruiux kuex, Kanaan mungx wawc nuimshiq rueq rv-phvlc tuinx ikhoc nuimshiq rulc vdvmz tsuingshiq ghaqphux phvlc mvnjuz kuex lvp wvnc shuex rvtueq,” ngoz tueq jungx kuq tueq.

³¹Gad phvnx nuiyc Ruben phvnx rueq, “Yehowa rueq jungx shuex rulc rv-ngvlc nuiyshiq rueq shuimx kaz shix.

³²Nuiyshiq rueq Yodan ruilx maq shaldungc kox mungx kuex lvp tvkoc Yehowa rueq shunshvlx yaq kuex phvnx vtueq, Kanaan mungx kox nuex rvp wvnc vtueq ralx kuex khvt shix,” ngoz tueq tvralc tueq.

³³Kvkhoc rvtueq Moshe rueq Amori Hokhvmx waz Sihon nuiyc Bashan Hokhvmx waz Oga rueq guimz yaq ghaqphux htenc maq raz tueq, tvroz nuex httax yaq miqghaq htenc kuex Gad phvnx, Ruben phvnx nuiyc Manase phvnx muex htvp htaz kuq tueq.

³⁴Gad phvnx kuex Dibon ghaq, Atarot ghaq, Aroer ghaq,

³⁵Atrot ghaq, Shophan ghaq, Jazer ghaq, Jogbeha ghaq,

³⁶Bet Nimra ghaq nuiyc Bet Haran ghaq, kvruex palx ruk vhttax ghaq htenc kuex tvhvlc guirx wuez yek tueq.

³⁷Ruben phvnx kuex Heshbon ghaq, Eleale ghaq, Kiriathaim ghaq,

³⁸Nebo ghaq Bala Meon ghaq, (vruex ghaq muingc kuex vlayc rvgay tueq), nuiyc Sibma ghaq htenc kuex tvhvlc guirx wuez yek tueq. Tsuingshiq rueq tvhvlc guirx wvnc yek tueq ghaq htenc kuex ghaq muingc vnyalx muingc wuez tueq.

³⁹Manase saz Makhir taungx hez htenc rueq Gilead mungx kuex khvt kaz vtueq kvyuq httax jix Amori phvnx htenc kuex yurc gay ruiux, mungtan kuex lvp wvnc tueq.

⁴⁰Kvkhoc rvtueq Moshe rueq Makhir taungx hez muex Gilead mungx kuex kuq koq tueq, tsuinghez kuex kvyuq httax tueq.

⁴¹Manase phvnx wawc Jair rueq miqghaq wvyvmc kuex khvt taungx gay lot yix, “Jair ghaq htenc,” ngoz tueq muingc tueq.

⁴²Noba rueq muinz Kenat ghaq hep wawc miqghaq htenc kuex khvt taungx gay lot yix, miqmac muingc lvmz vtueq Noba ghaq ngoz tueq muingc tueq.