Read Tase Naga WUINKHUEMC 33 Bible Online

WUINKHUEMC 33 - Tase Naga bible

WUINKHUEMC 33

¹Moshe nuiyc Arun rueq shunshvlx vtueq Ejip mungx maq vphvnx tv-phvnc kaz wvnc wuez tueq, Israel miqsaz rueq jerak tec wvnc tueq baung htenc vmuingc vlvmz kuex vkhoc rvtueq.

²Yehowa rueq nvr tueq rulc rv-ngvlc Moshe rueq tsuingshiq jvp ngaungc laq tueq jerak vshiz maq vshiz ghaq muingc htenc kuex tvtsuingc taq tueq.

³Israel miqsaz rueq vphaungc shauk shauk tvhungx tueq Tvlvy Wvnc Moalx lot vtueq raungnvp kvyix, vphaungc yapix raungx rokshiz rac raungx bv-ngac nuex Ejip mungx maq kaz wvnc phaungc tueq. Tsuingshiq kuex Yehowa rueq tvkhup wungx kuy ningkhvnc nuex Ejip phvnx khaungkac nuex Ramese ghaq maq kaz wvnc tueq.

⁴Ekvkaq Ejip miqsaz kuex Yehowa rueq thvt gay tueq miqwaz pekhux htenc kuex shuz luip wuez yaq. Ekvkhoc murx tvgurc ningkhvnc nuex Yehowa kuex Ejip phvnx tishox htenc htauk nuex muinz luimc vkawc yungx yaq lvmz tvkhic kuq tueq.

⁵Israel miqsaz kuex Ramese ghaq maq kaz wvnc vtueq Sukkot jerak nuex httax shec tueq.

⁶Ekvmaq hulawx kumtsvy tvnx tvsuip wawc Etham jerak nuex httax kaz tueq.

⁷Kvmaq hulawx tsuingshiq kuex Bala Zephon maq shaldungc kox Pi Hahirot nuex kvroz yek vtueq, Migdol hep nuex jerak tec httax tueq.

⁸Tsuingshiq kuex Pi Hahirot maq kaz wvnc vtueq, Yuix Shawx Jumx kuex yanz wvnc ruiux Shur kumtsvy tvnx nuex httuiuc kaz tueq; nuiyq thuimx lvmx kaz yek vtueq tsuingshiq kuex Mara nuex jerak tec ruiux httax tueq.

⁹Tsuingshiq kuex kvruex baung kvmaq Elim nuex httuiuc kaz tueq, kvruex yuq yuix saz ruilx rokshiz rac vnueyc nuiyc tvtsax jungx rok mvshix httax yaq rvtueq kvyuq tsuingshiq rueq jerak tec tueq.

¹⁰Tsuingshiq kuex Elim maq kaz wvnc yek vtueq, Su-et noc hep nuex jerak tec wuez tueq.

¹¹Ekvmaq hulawx Sin kumtsvy tvnx nuex jerak tec tueq.

¹²Kvruex yimaq Dopkha jerak nuex,

¹³kvmaq hulawx Alusha nuex jerak tec ruiux httax tueq.

¹⁴Kvmaq hulawx kaz wvnc yek vtueq tsuingshiq rueq nuingc juing yuix vguez Rephidim nuex jerak tec ruiux httax tueq.

¹⁵Rephidim maq Hor Kanx nuex httuiuc laz tsuingshiq jerak tec wvnc tueq baung htenc kuex: Sinai Gumtsvy tvnx, Kibrot Hattawa (rvmuq ngoz ruiux “Sungx rvmc hvlc Luip khux”), Hazerot, Ritma, Rimmon Pereza, Libna, Risa, Kehelatha, Shepher Kanx, Harada, Makhelot, Tahat, Tera, Mithka, Hashmona, Moserot, Bene Jaakan, Hor Hagitgat, Jotbatha, Abrona, Eziongeber, Zin yaruix tvnx (kvruex kuex Kadesh), Edom mungtan ghaqruiy wawc Hor Kanx htenc kvruex rvtueq.

³⁸Yehowa rueq nvr tueq rulc rv-ngvlc shomc waz Arun kuex Hor Kanx nuex duiz woz tueq. Israel miqsaz kuex Ejip mungx maq kay wvnc yix, wawc rok bvlic httuiuc tueq raungwawc, lex bv-ngac yapix vphaungc raungnuiyq piq rullungx wawc 123 nuex thueyc kaz tueq.

⁴⁰Ekvkaq Kanaan mungx ghaqyaz kox nuex httax yaq hokhvmx Arad rueq Israel miqsaz waung yaq lvmz kuex tay tueq.

⁴¹Hor Kanx maq Moba tvnx nuex httuiuc laz Israel miqsaz jerak tec tueq baung htenc kuex: Zalmona, Punon, Obot, Moba mungx nuex httax yaq Abarim, Dibon Gad, Almon Dibalathaim, Nebo Kanx hep wawc Abarim Kanx, Bet Jeshimot nuiyc Akasia Warc tvnx hvl Yerikho ghaq ral Yodan ruilx hep wawc Moba tvnx htenc rvtueq.

⁵⁰Yehowa rueq Moshe maq raz tueq Yerikho ghaq ral Yodan ruilx hep wawc Moba tvnx maq,

⁵¹Israel tvkoc phvnc juing kvjaz htenc kuq tueq kuex vkhoc rvtueq: “Nuimshiq rueq Yodan ruilx kuex yanz wvnc vtueq Kanaan mungx nuex httuiuc kaz tuinx yuq,

⁵²kvruex mungx nuex httax yaq miqsaz lotlaz kuex yurc gay rax. Tsuingshiq rueq lung htenc nuiyc vtvyuimx shoay raz tueq vtvhungx yac yuimx htenc, tsuingshiq rueq nawk palx yaq baung htenc kuex tvbac gay rax.

⁵³Ngaz rueq kvruex mungx kuex nuimshiq muex kuq phaungx ningkhvnc nuex nuimshiq rueq kvruex mungx kuex khvt taungx gay ruiux kvyuq httaz shaungx httax ngaungc wuez rax.

⁵⁴Vphvnx nuiyc vtaungx htenc kuex tv-phvnc hangchac maq ghaq kuex phvlc kuy rax, vtaungx miq vpaung jix muex vpaung, miq vthvp taungx hez muex vthvp ghaqphux kuex phvlc kuy rax.

⁵⁵Yuq muinz nuimshiq rueq kvruex mungx wawc miq kuex yurc gay muit ngoz ruiux yuq, kvjungx yaq miq kuex nuimshiq muik nuex suingkez ikhoc, nuimshiq samx htenc nuex shuiuq ikhoc yaungx vtueq nuimshiq kuex khawx lvlx khvt kv-phuinx.

⁵⁶Nuimshiq rueq kvruex mungx wawc miq kuex yurc gay muit ngoz ruiux yuq, tsuingshiq kuex ngaz rueq tvbac gay dvnc shaungx ikhoc nuimshiq kuex ngaz rueq tvbac gay phaungx,” ngoz tueq.