Read Tase Naga WUINKHUEMC 34 Bible Online

WUINKHUEMC 34 - Tase Naga bible

WUINKHUEMC 34

¹Yehowa rueq Moshe maq raz tueq

²Israel miqsaz htenc tvkoc vkhoc tvkhic jungx kuq tueq: “Nuimshiq kuex ngaz rueq kuq phaungx Kanaan mungx kvyuq httuiuc waung ruiux yuq, nuimshiq rueq guimz shuinx ghaqruiy kuex vkhoc rvtueq.

³Ghaqyaz kox ghaqruiy kuex Zin yaruix tvnx maq duiz wvnc vtueq Edom mungx ghaqruiy tv-phvnc rvtueq. Kvruex ghaqruiy kuex shaldungc kox maq svt wvnc vtueq ghaqyaz kox Yuix Maungx Jumx yaz tvsuip nuex httuiuc laz rvtuex.

⁴Kvmaq vruiy wvnc kuex ghaqyaz kox Akrabim kanx hvl kox nuex kvroz wvnc tueq, Zin yaruix tvnx maq svt wvnc vtueq ghaqyaz kox nuex httax yaq Kadesh Barnea nuex httuiuc laz. Ekvmaq shalx nyuip ghaqkhux kox nuex httax yaq Hazar Addar nuex kvroz duiz wvnc vtueq Azamon nuex tiq rvtueq.

⁵Ekvmaq kvroz svt wvnc vtueq Ejip mungx ghaqruiy nuex httax yaq warc tvnx tv-phvnc Mediteranean kawx nuex tvsuip kay rax.

⁶“Shalx nyuip kox ghaqruiy kuex Mediteranean kawx maq ruiy rax.

⁷“Ghaqkhux kox ghaqruiy kuex Mediteranean kawx maq Hor Kanx nuex,

⁸kvmaq raz tueq Hamat kanx hvl lvmx kuex yanz wvnc vtueq Zedad nuex,

⁹kvruex maq Ziphron kuex lvy wvnc ruiux Hazar Enan nuex tvsuip rax.

¹⁰“Shaldungc kox ghaqruiy kuex Hazar Enan maq Shepham nuex.

¹¹Ekvmaq ghaqyaz kox Harbel nuex svt vtueq Ain maq shaldungc kox nuex tiq, Galile Jumx kawx shaldungc kox nuex httax yaq ghaq luimx htenc kuex yanz wvnc vtueq,

¹²Ghaqyaz kox Yodan ruilx tv-phvnc kaz wvnc vtueq Yuix Maungx Jumx nuex tvsuip kay rax. “Kvruex kuex nuimshiq rueq lvp juing ghaq vraungx ghaqruiy rvtueq.”

¹³Kvkhoc rvtueq Moshe rueq Israel miqsaz htenc muex ngoc, “Mungtan vruex kuex Yehowa rueq nuimshiq phvnx tvkuiuz nuiyc vphvnx wawc kholak hez muex vruiy kuq ghaqphux ningkhvnc nuex nuimshiq rueq hangchac maq rv-phvlc wuez rax.

¹⁴Ruben, Gad phvnx htenc nuiyc shaldungc Manase phvnx kholak rueq kuex tsuingshiq tvkoc ghaqphux vlvp wuez shex,

¹⁵kvruex kuex vtaungx tv-phvnc Yodan ruilx maq shaldungc kox Yerikho ghaq ralc nuex httax yaq ghaqphux htenc kuex rv-phvlc wuez tueq,” ngoz tueq jungx tueq.

¹⁶Yehowa rueq Moshe muex ngoc,

¹⁷“Shomc waz Eleazar nuiyc Nun saz Yoshua rueq miq htenc kvruex tvkoc ghaqphux kuex phvlc kuy rax.

¹⁸Ghaq phux phvlx kuq ruiux yuq tsuingnueyc muex romc kuy tvkoc vphvnx tek wawc walaungx washiz phok kuex shvlc rax,” ngoz tueq jungx tueq.

¹⁹Vruex hez htenc kuex Yehowa rueq vthvl taq miq rvtueq: [Phvnx] — [Walaungx] Yuda — Jephunne saz Kaleb Simeon — Ammihud saz Shelumiel Benjamin — Chislon saz Elidad Dan — Jogli saz Bukki Manase — Ephod saz Hanniel Ephraim — Shiphtan saz Kemuel Zebulun — Parnach saz Elizaphan Issakar — Azan saz Paltiel Asher — Shelomi saz Ahihud Naphtali — Ammihud saz Pedahel

²⁹Vruex hez kuex Israel miqsaz muex Kanaan mungx kuex phvlc kuy tvkoc Yehowa rueq vthvl taq shex miq hez rvtueq.