Read Tase Naga WUINKHUEMC 36 Bible Online

WUINKHUEMC 36 - Tase Naga bible

WUINKHUEMC 36

¹Yosep muex suiuz piz, Manase suiuz, Makhir saz Gilead taungx hez wawc vkhux yaungc jix hez kuex Moshe nuiyc vganc walaungx bix kox nuex kaz tueq.

²Tsuingshiq rueq, “Yehowa rueq Israel miqsaz muex hangchac maq ghaqphux phvlc kuy tvkoc mnoz muex nvr tueq. Vpiq rueq nuiyshiq muex taungnyuing sanox Zelophehad piq saz yalxjuik sahez tvkoc piq tsak jungx ghaqphux kuex kuy tvkoc mnoz muex nvr kv-phux.

³Yuq muinz kvruex yalxjuik sahez kuex vganc jix phvnx waz rulx muex waung ruiux yuq, tsuinghez tsak jungx ghaqphux kuex kvruex phvnx miqwaz rulx yauk nuex httuiuc waungc juing ningkhvnc nuex, nuiyshiq muex vphvlx kuq ghaqphux kuex komc kaz tuex.

⁴Kvkhoc rvtueq Tvdungc gay Raungwawc nuex Vshaungc vruex gay ghaqphux lotlaz kuex vtaungjix kvmac yez kuq shuex kvkaq, Zelophehad saz yalxjuik sahez waung tueq phvnx kox nuex httuiuc waung ruiux nuiyshiq phvnx vmaq wawc moz wvnc tuex,” ngoz tueq jungx tvtay wuez tueq.

⁵Kvkaq Moshe rueq Israel miqsaz muex Yehowa rueq nvr tueq kvjaz kuex jungx kuq tueq. Piq rueq, “Manase phvnx rueq jungx tvtay tueq lvmz kuex vlvmx rvtueq,

⁶Yehowa rueq Zelophehad saz yalxjuik sahez kuex miqmac rvlungwawc tuex miqwaz saz rulc rvlvmc mvy yaq, yuq muinz miqmac phvnx waz rulx muex dvyx waung lvp tuex.

⁷Israel miqsaz tek rueq guimz yaq tsak jungx ghaqphux kuex piq phvnx vmaq htenc nuex dvyx httaz rax rvtueq.

⁸Israel phvnx htenc wawc tsak jungx ghaqphux lvp jix yalxjuik rulc htenc kuex miqmac phvnx wawc miqwaz rulx muex dvyx waungc kuy rax. Ekvkhoc maq tsuingshiq jix vwaz ghaqphux kuex tvhttoarc lvp wvnc ningkhvnc nuex,

⁹ghaqphux kuex phvnx shiz yauk wawc vganc phvnx shiz yauk nuex httuiuc woz tuex rvmuq. Vphvnx tek miqmac rueq guimz yaq ghaqphux kuex tvhttoarc vtueq lvp wvnc shuex,” ngoz tueq jungx tueq.

¹⁰Kvkhoc rvtueq Moshe muex Yehowa rueq jungx kuq tueq rulc rv-ngvlc Zelophehad saz yalxjuik sahez, Mala, Tirza, Hogla, Milka nuiyc Noa rueq muinz phvnx vtueq, waz roalc sahez vphux tamx muex waung wuez tueq.

¹²Tsuinghez kuex Yosep saz Manase phvnx wawc vtaungx hez muex waungc wuez ningkhvnc nuex, tsuingshiq tsak jungx lvp taq tueq ghaqphux kuex vwaz phvnx nuex dvyx tvhttoarc vtueq httax yaq.

¹³Tvrac htenc vruex kuex Yerikho ghaq ral Yodan ruilx kawx wawc Moba tvnx maq Yehowa rueq Moshe maq raz tueq Israel miqsaz muex vkuq shec rvtueq.