Read Tase Naga WUINKHUEMC 5 Bible Online

WUINKHUEMC 5 - Tase Naga bible

WUINKHUEMC 5

¹Yehowa rueq Moshe muex ngoc,

²“Israel miqsaz wawc vshungx vshoyx kop jix, rvmuq ngoz ruiux shawz lvmx nuex phuingx vtueq tvjuiuz svrc yaq jix, miq maungx nuex kvthoay ningkhvnc nuex sawc muq jix htenc kuex jerak phic nuex yurc gay tvkoc jungx shuiuz.

³Ngvy phvnx miq rulc vdvmz ngaz httax vtaungx jerak kuex shuy shac muq tvkoc nawk palx htungx maq sawc muq jix miq htenc kuex jerak phic nuex yurc gay rax,” ngoz tueq jungx tueq.

⁴Israel miqsaz sawc muq jix lotlaz kuex jerak phic nuex yurc gay tueq.

⁵Yehowa rueq Moshe muex jungx tueq,

⁶Israel miqsaz rueq phvnc juing kuex vkhoc rvtueq. Miq washiz shiz rueq vganc miq washiz muex wvlc guez waqguez guirguenz kuq vtueq Yehowa muex yaq gay ningkhvnc nuex,

⁷kvruex waz kvraq piq mvrax kuex kvjungc kvdawc ruiux, wvlc guez waqguez guirguenc rvhumc jix waz muex hungx laz htuimz kuq shuex htauk nuex muinz, shashiz htauk nuex pasen 20 maq hulawx htuimc kuy yek rax.

⁸Yuq muinz vhtuimc thoz jix waz kuex thueyc kaz vtueq, taungnyuing sanox muinz vguez ngoz ruiux yuq kuex, vhtuimc kuex shomc waz tvkoc Yehowa muex lekuy rax. Mvrax yaq gay jix waz kuex vhtuimc kuq shuex kvdvyx muinz rvmuq, kvsawc nawc laung khelbuenx pung muinz kuy juing rvtueq.

⁹Israel miqsaz rueq Yehowa muex yauk noalc htep tvhungx kuq shuex kuex shomc waz bix rueq lvp yaq.

¹⁰Vpiq muex vshomc kuq yauk noalc htenc kuex shomc waz tek vtueq lvp taq wuez yaq.

¹¹Yehowa rueq Moshe maq raz tueq,

¹²Israel miqsaz muex vkhoc tvkhic jungx kuq tueq. Vtaungx nyuiuz kuex vtaungx waz nuex tvmtuing vguez maq vganc miqwaz rulc htok pawx vtueq piq shauk pumz tvshuy shac gay ruiux yuq, kvruex khac kuex vtaungx waz rueq helc tuiuz tsic muq. Yuq muinz vtaungx waz rueq kvruex lvmz kuex rvkhauk tuiuz lot muq, yvmx khoc lac ngoz ruiux lec vtaungx nyuiuz rueq kvruex khac kuex vpuingc pvy rvgay yaq, hakhix vguez, kvruex nyuiuz yaq tueq mvrax kuex lvp lot muq. Rvmuq ngoz ruiux vtaungx nyuiuz kuex piq htauk nuex tvmtuing vguez shex ngoz ruiux doc muinz vtaungx waz kuex vtaungx nyuiuz kuex helc lot muq muinz yaungx tuex.

¹⁵Yvmx khuec vkhac dvyx ruezruez vtaungx waz rueq vtaungx nyuiuz kuex shomc waz kox nuex gvlc lvy rax. Piq rueq shomc kuy tvkoc wanx tsvmz wungwanx tokshiz lvmc lvy rax, yuq muinz kvruex htauk nuex olip puiz tix kuex shvy mvy muq, vhomc vtumc phvnx muinz tvdaungc mvy muq, yvmx khoc lac ngoz ruiux lec kvruex kuex kvmx muq vtaungx waz kox wawc shomc kuy juing rvtueq rulc rv-ngvlc vlvmz kuex tvdungc juing lvmx rvtueq.

¹⁶Shomc waz rueq yalxjuik nyuiuz kvruex shomrawx khaungkac kvyuq tvjvp kay rax.

¹⁷Piq rueq gvmtuik kvyuq yuix khuing kuex htawc ruiux, Yehowa httax yaq Tap kvwawc bokkhuyx raungluingx lvmz vtueq, yuix tuik kvyuq htawc ruiux vtix kuex tvkhuip rax.

¹⁸Kvruex yimaq piq rueq yalxjuik nyuiuz khux mul kuex jalc ruiux shomc kuy juing wungwanx kuex piq yauk kvyuq htawc kuy rax. Shomc waz rueq vyauk nuex vkhuip mvnhttonc kuy juing tix httax yaq tuik kuex shuimc rax.

¹⁹Kvruex yimaq piq rueq yalxjuik nyuiuz kvmac vkhoc tuemc vtueq tvnuingc juing, “Mnoz kuex miqwaz vganc jix rulc htokpawx yaq muq ngoz ruiux kuex, yuix vruex ningkhvnc nuex httuiuc kaz yaq thuimkux wawc dung wvnc kuiux.

²⁰Yuq muinz mnoz miqwaz vganc rulc yaq toq ngoz ruiux kuex,

²¹mmuingc kuex mphvnx mmaq htumc nuex Yehowa rueq mvnhttonx kuy rvhumc kuiuz. Mnoz yalxjuik hupsvmx kuex httuiz rawk shanx wvnc vtueq, m-wuk mramx wvnc kueq.

²²Yuix vruex m-wuk nuex httuiuc wvnc vtueq, wuk kuex ramx wvnc ruiux mnoz yalxjuik hupsvmx kuex tvhttuiz rawk gay shuex,” ngoz tueq tuemc kuq tueq. Yalxjuik nyuiuz kvraq, “Ngaz rungx raz vtaungx; Yehowa rueq mhtvp htaz kuq phueq,” ngoz tueq tvralc tueq.

²³Kvruex yimaq shomc waz rueq tuemc luik wuiyq vtueq yuix khuip mungx kvyuq nut tvhuyx rax.

²⁴Yalxjuik nyuiuz muex kuilc daz tvrvhumc juing yuix kuex max tvnuingc nuex,

²⁵shomc waz rueq yalxjuik nyuiuz yauk wawc wungwanx kuex lvmz vtueq, Yehowa muex lekuq ruiux shomrawx htauk nuex tvdaungc rax.

²⁶Kvruex yimaq piq rueq wungwanx yaukkhunc shiz kuex lvmz vtueq, shomrawx htauk nuex wvr maq jauk shomc kuy rax. Vtvsuip nuex jix shomc waz rueq yalxjuik nyuiuz muex tuemc yuix kuex tvnuingc rax.

²⁷Yalxjuik nyuiuz kuex miqwaz vganc rulc htokpawx yaq tueq ngoz ruiux kuex piq pinhtumc kuilc daz rvhumc vtueq vwuk kuex ramx wvnc ruiux, yalxjuik hupsvmx kvmuinz httuiz rawk shanx wvnc tuex. Piq muingc kuex miqmac phvnx vmaq htumc nuex mvnhttonc rvhumc jix nyuiuz rvtuex.

²⁸Yuq muinz yalxjuik nyuiuz piq kuex yaq muq ngoz ruiux yuq, yvmx muinz rungx rax muq maq suiuz vsaz jawx wvnc yek shuex.

²⁹Vkhoc tvrac vruex kuex vtaungx waz rueq vtaungx nyuiuz htokpawx yaq ngoz tueq, vtaungx nyuiuz muex kvmx muq nuex phvnc juing tvrac rvtueq. Shomc waz rueq yalxjuik nyuiuz kuex shomrawx khaungkac nuex tvjvp vtueq htungx tvrac rulc rv-ngvlc wisoz rax.

³¹Vtaungx waz kuex mvrax yaq muq miq yaungc rax, yuq muinz vtaungx nyuiuz kuex mvrax yaq gay tueq ngoz ruiux yuq, yaq gay tueq mvrax kvruex tv-phvnc murx rvhumc tuex.