Read Tase Naga WUINKHUEMC 9 Bible Online

WUINKHUEMC 9 - Tase Naga bible

WUINKHUEMC 9

¹Israel miqsaz htenc kuex Ejip mungx maq dungc kay yix, raungwawc wawc nueyc, vphaungc yapix nuex Yehowa rueq Moshe muex Sinai Kumtsvy tvnx maq rvbomc tueq. Vpiq rueq,

²“Israel miqsaz htenc rueq majuiuc yapix raungx 14 raungnuiyq, shalx nyuip wvnc tuex maq phaungc vtueq Tvlvy Wvnc Moalx nuex seng yaq htungx vlayx nuiyc phvnc juing tvrac htenc rulc rv-ngvlc tvhungx rax,” ngoz tueq jungx tueq.

⁴Kvkhoc rvtueq Moshe rueq Tvlvy Wvnc Moalx tvkoc miq htenc muex jungx tueq rulc rv-ngvlc,

⁵tsuingshiq rueq Sinai Kumtsvy tvnx nuex vphaungc yapix raungx 14 raungyac Tvlvy Wvnc Moalx kuex tvhungx tueq. Yehowa rueq Moshe muex nvr tueq rulc rv-ngvlc miq htenc rueq muinz shuimx kaz wuez tueq.

⁶Yuq muinz wvyvmc jix rueq miq maungx kuex shuimx gay tueq ningkhvnc nuex, nawk palx htungx maq sawc muq rvtueq kvruex raungnuiyq Tvlvy Wvnc Moalx nuex lomx lvp muq. Tsuinghez kuex Moshe nuiyc Arun kox nuex kaz vtueq,

⁷“Nuiyshiq kuex miq maungx shuimx gay tiq ningkhvnc nuex sawc wuez miq, vganc jix rueq kvkhoc nuiyhez rueq muinz Yehowa muex shomc kuy lvmz kuex shuimx kaz lvp miq shex haz?” ngoz tueq jungx wuez tueq.

⁸Moshe rueq, “Yehowa rueq jungx shuex kuex ngaz rueq lvp shaungx nuex httuiuc laz bvmc wuez shuinz,” ngoz tueq tvralc tueq.

⁹Yehowa rueq Moshe maq raz tueq,

¹⁰Israel miqsaz muex jungx kuq tueq kuex, “Majuiuc rvmuq ngoz ruiux yix maq Israel miqsaz wawc miq washiz shiz kuex Tvlvy Wvnc Moalx baunglaung, miq maungx shuimx gay vtueq sawc muq waz muinz, lvmx luz wuinz khuemc kay jix waz muinz, Tvlvy Wvnc Moalx nuex lomx roc ngoz ruiux kuex,

¹¹yapix lexshiz bvmc vtueq, lex nueyc yapix raungx 14 raungyac moalx mvy yaq, piq rueq khelbuenx ngvmx kuex wisiz lomx muq wanx, vkhuip phvnx wvyshuiuz namx yauk rulc phauk saq vtueq moalx kuex tvhungx mvy yaq.

¹²Raungx nvp kvyix nuex httuiuc laz phuiuz vsvy kuex tvjungx tvy mvy muq. Khelbuenx ruk vrawz kuex tv-ngawk mvy muq. Tvkhic jungx shec tueq rulc rv-ngvlc Tvlvy Wvnc Moalx kuex tvhungx rax.

¹³Miq vshiz shiz kuex nawk palx htungx maq vsawc rvhvt maq wuinz ghaq lvmx khuemc nuex muinz rvmuq rvyruiux, Tvlvy Wvnc Moalx baunglaung ngaz muex yauk noalc shomc kuq muq ngoz ruiux yuq, kvruex waz kuex ngvy phvnx miq wawc tvdungc gay rax. Piq kuex miqmac mvrax kvruex tv-phvnc murx tvgurc rax.

¹⁴“Nuimshiq rulc vdvmz nuex httaz naungc jix pungnuk miqsaz washiz rueq Tvlvy Wvnc Moalx moalx roc ngoz ruiux kuex, piq rueq moalx nuex seng yaq phvnc juing tvrac htenc kuex phvnc rax. Vphvnx miqsaz rueq rvmuq ngoz ruiux pungnuk miqsaz rueq tvrac htenc vruex phvnc rax.”

¹⁵Yehowa httax yaq Tap kuex tvjvp guirc raungnuiyq phuemx svt kaz vtueq puingc gay tueq. Raungwvrx nuex phuemx kuex wvrluic tul ikhoc lez yaq.

¹⁷Phuemx raungx nuex kvtenc wvnc tueq ruip rawx Israel miqsaz rueq jerak kuex httak vtueq, phuemx svt kaz yaq baung kvyuq jerak kuex tec yek yaq.

¹⁸Tsuingshiq kuex Yehowa rueq nvr shuex kvruex tv-phvnc jerak httak lvmz, jerak tec lvmz kuex shuimx kaz wuez yaq. Phuemx kuex Tap htauk nuex httax ruq wawwawx tsuingshiq rueq jerak kuex httak muq.

¹⁹Phuemx kuex Tap htauk nuex vkhing loayc hvlc httax ruiux yuq, tsuingshiq rueq Yehowa kvjaz kuex phvnx vtueq kvhttot khuemx muq.

²⁰Laukshiz shiz phuemx kuex Tap htauk nuex raungnuiyq vlox dvyx httax yaq; yvmx dvyx ruezruez Yehowa rueq nvr shuex rulc rv-ngvlc tsuingshiq kuex jerak nuex httax yaq, rvmuq ngoz ruiux vkhuemc rvwuez yaq.

²¹Laukshiz shiz phuemx kuex raungyac maq raungnvp nuex httuiuc laz dvyx httax yaq, tsuingshiq kuex phuemx kvtenc wvnc ruiux yuq, kvhttot khuemx wvnc wuez yaq. Phuemx kvtenc wvnc tuex ruip rawx tsuingshiq khuemx ruiux yaq.

²²Tap htauk nuex phuemx kuex raungnuiyq nueyc, yapix lexshiz, wawcshiz, rvmuq ngoz ruiux kvruex htauk nuex jvnc vtueq loayc hvlc httax yaq wawwawx tsuingshiq kuex kvhttot khuemc mvy muq; yuq muinz phuemx kvtenc waung ruiux kuex tsuingshiq kvhttot khuemx wvnc wuez yaq.

²³Yehowa rueq Moshe maq raz tueq vkuq kvjaz kvruex tv-phvnc tsuingshiq rueq jerak tec, jerak httak gay kuex shuimx kaz wuez yaq.