Read Tase Naga Mikha 5 Bible Online

Mikha 5 - Tase Naga bible

Mikha 5

¹Yerusalem miqsaz lex, nuimshiq nolaungx hungc kuex tvjomx taq shuiuz! Naungshiq kuex vtuimc wvnc rvhumc vtix! Tsuingshiq rueq Israel vyungx vlaungx waz kuex khvt yaq!

²Yehowa rueq, “Betlehem Ephratha lex, mnoz kuex Yuda mungx wawc miqghaq vruinx pinhtumc vshiz rvtoq, yuq muinz Israel tvkoc guimz lawc jix washiz kuex mnoz kox wawc ngaz rueq tvdung shaungx, piq waruiuz kuex vjix vwaz pat maq phuex vhttax rvtueq,” ngoz tueq jungx tueq.

³Kvkhoc rvtueq wuic khic thuiuz yaq nyuiuz kuex nox jawc jauz nuex httuiuc laz Yehowa rueq vpiq miqsaz kuex tsuingshiq ralx hez yauk nuex lekuq gay shuex. Kvruex yimaq vthuq vruez laq miqsaz htenc kuex miqmac phuz vnox bix rulc vdvmz nuex rvromc wvnc yek tuex.

⁴Vpiq httuiuc kaz tuex nuex, vpiq kuex Yehowa kox wawc hungc vlaungc nuiyc Yehowa Tishox vpiq ngauz vngax maq vpiq miqsaz kuex guimz wvnc shuex. Vpiq miqsaz htenc kuex kvwungx httax tuex, yvmx khoc lac ngoz ruiux lec ghaq wawc miqsaz lotlaz rueq vpiq yungx luz yaq kuex kvjungc wuez tuex,

⁵vpiq rueq nomic kuex lvmz laq shuex. Asiria miqsaz kuex naungshiq mungx vyuq nyuip khvt vtueq naungshiq nolaungx ghaqshungc htenc kuex tvbac gay shuex nuex, naungshiq rueq muinz tsuingshiq kuex khvt tvkoc hungc vlaungc vhttax vyungx vlaungx bix kuex tvkaz shix.

⁶Tsuingshiq rueq koz vlaq hungc maq Nimrod ghaq vraungx Asiria kuex khvt taungx gay shuex, tsuingshiq rueq naungshiq ghaq vraungx nuex nyuip khvt shuex nuex, kvruex walaungx bix rueq naungshiq kuex Asiria kox wawc palc wvnc phuex.

⁷Tvraungx kvjungx yaq Israel miqsaz htenc kuex Yehowa tvdvy yaq buing ikhoc mungtan paunghvlc muex tvruip tvhemc kuq shuex, vkemc htenc htauk nuex yunx yaq raungyunc ikhoc yaungx tuex. Kvruex raq miqsaz nvr yaq kuex phvnx muq, Tishox rueq nvr yaq kvdvyx phvnx yaq.

⁸Kvjungx yaq hez kuex miqphvnx htenc hvlwvl luingx vlak nuex, rvmuq ngoz ruiux ngac remc juing nuex phuiuz vsvy thuiyc khuyx yaq hangsic ikhoc yaungx tuex. Piq kuex khelbuenx phungc nuex nyuip vtueq puinthuing puinthaung juir gay shuex; kvruex baung wawc palc wvnc tvkoc thuinz tvluimc juing httax tuex rvmuq.

⁹Israel rueq piq ralx htenc kuex taungx gay shuex, tsuingshiq lotlaz tvbac gay shuex.

¹⁰Yehowa rueq, “Kvtanc jauz ngaz rueq mmvre htenc kuex lvmz gay ruiux, mnoz nolaungx renc htenc kuex tvbac gay shaungx.

¹¹Ngaz rueq m-ghaq mraungwawc ghaqyungx htenc kuex tvbac gay ruiux mnoz nolaungx ghaqshungc htenc lotlaz runx gay shaungx.

¹²Ngaz rueq nuimshiq rueq shuimx vshuinx hangsex htenc kuex tvbac gay ruiux, nuimshiq nuex luinglawc thenc jix httax tuex rvmuq.

¹³Ngaz rueq nuimshiq rueq vtvhungx yac yuimx htenc nuiyc vsawc lunghtung htenc kuex tvbac gay shaungx; yix maq pat nuex nuimshiq yauk maq vtvhungx phvnx htenc kuex nuimshiq rueq mkaq muinz nawk palx shuiux rvmuq shex.

¹⁴Ngaz rueq nuimshiq mungtan wawc Ashera tishox nyuiuz yac htenc kuex baungc gay ruiux, nuimshiq ghaqyungx htenc kuex tvbac gay shaungx.

¹⁵Ngvy thuinkhaq hvlc ningkhvnc nuex ngvy kvjaz tay muq phvnx muq miqphvnx htenc lotlaz htauk nuex ngaz rueq murx tvyez shaungx,” ngoz tueq jungx tueq.