Read Tase Naga HABAKUK 1 Bible Online

HABAKUK 1 - Tase Naga bible

HABAKUK 1

¹Vruex bomjungc kuex Yehowa rueq shvmmax Habakuk muex vtvkhic kuq lvmz htenc rvtueq.

²O Yehowa lex, mnoz rueq max tay kuq, nuiyshiq kuex yauk laungc yalawx yauk shuimc rvhumc wvnc tiq wawc mnoz rueq max palc wvnc nuex, romc lawc kuy tvkoc mtanc nuex httuiuc laz lac ngaz rueq gvl phaungx?

³Vkhoc kuilc daz kuex mnoz rueq ngaz muex yvmx ngoz tueq lac tvkhic vphux? Mnoz rueq vkhoc vyaq yauk shuimc kuex yvmx khoc lac lawc lot vshuiux? Tvbac gay nuiyc yauk laungc yalawx rueq ngaz kuex tvroz tuimx wvnc vtueq, rvthvy rvkhvt nuiyc thaungthoz wawx yez muinz baung ruip saz nuex yaungx yaq.

⁴Tvrac kuex nulx wvnc vtueq khuec guez dvyx rvtueq, tvrac vlvmz phox thamx jix kox wawc mkaq muinz dung muq. Honc vbac miqsaz htenc rueq tsuingrux miqsaz htenc kuex taungx wvnc tueq ningkhvnc nuex, tvrac vlvmz kuex kvkhic lot muq.

⁵Kvruex yimaq Yehowa rueq vpiq miqsaz htenc muex, “Nuimshiq tvroz nuex httax yaq miqphvnx htenc kuex lawc tvtsuingc shuinz, kvmaq nuimshiq rueq yvmx lac khiz shuinz kvmac wangc langc wuez tuinx. Nuimshiq rueq kvruex tay ruiux yuq, nuimshiq kvmx muit juing lvmx phvnx shishiz kuex ngaz rueq tvyaungc gay shaungx.

⁶Ngaz rueq kvhiz juing kvhtuip kvluip httax yaq Babelon miqsaz htenc muex luimc vkawc kuq shaungx. Tsuingshiq rueq vganc mungtan htenc kuex khvt gay tvkoc mungkawx nuex khuemx yaq.

⁷Tsuingshiq rueq tvhiz juing lvmz kuex tvparc narc yaq, tsuingshiq shauk pumz kuex tvrac ningkhvnc nuex ngamc ngax wuez yaq.

⁸“Tsuingshiq mvre htenc kuex jaqtuik htauk nuex muinz lvwvnz hvlc, vrvmc thuiuz rvhumc yaq shoalx htauk nuex muinz vhiz juing rvtueq. Mvre nuex ngaungc jix shvrvyx bix kuex lvmx luz maq tvyuz vtueq kaz wuez yaq; tsuingshiq mvre htenc rueq ghaq kuex vyaz maq khvyhuip yaq. Tsuingshiq kuex vkhuingx maq phamx yaq lawx htenc rueq ikhoc phamx laq yaq.

⁹“Tsuingshiq nolaungx bix htenc rueq rv-phenc rv-phuk khvt wvnc vtueq taungx wvnc wuez yaq, miq ruip rawx kuex tsuingshiq httuiuc wvnc koq tueq kawc yawc kvkhuirc wuez tueq. Tsuingshiq rueq vlvp taq thuq wvnc miqsaz htenc kuex kumtsvy ikhoc paung yaq.

¹⁰Tsuingshiq rueq hokhvmx bix htenc kuex shummarc vtueq vjoz vyungx vlaungx bix htenc kuex nueykuic gay tueq. Tsuingshiq kuex tvgap gawx lot jix nolaungx ghaqshungc vguez, tsuingshiq rueq ghaq kvtuk htenc tvhungx vtueq khvt taungx gay yaq.

¹¹Kvruex yimaq tsuingshiq kuex raungguil ikhoc pvnx wvnc vtueq moz wvnc tueq, vruex miq htenc luimc vkawc kuex tsuingshiq tishox rvtueq,” ngoz tueq jungx wuez yaq.

¹²Yehowa lex, mnoz kuex raungphaungc ghaqwaungc maq phuex Tishox rvtoq. Mnoz kuex ngvy Tishox rvtoq, vsawc nuiyc pattup httax vtuiux. Yehowa ngvy Tishox nuiyc ngaz muex tvkhup wungx kuy jix waz lex, mnoz rueq Babelon miqsaz htenc kuex thvl wvnc vtueq tsuingshiq muex hungc vlaungc tvhungc kuq toq, kvkhoc rvtueq tsuingshiq rueq nuiyshiq muex murx tvgurc kuq lot yaq.

¹³Yuq muinz mnoz rueq vruex kv-phelc kvruik raz tueq honc vbac miqsaz htenc muex yvmx khoc lac nanx kuq vshuiux? Mmuik htenc kuex pinhtumc sawc hvlc ningkhvnc nuex honc vbac htenc kuex lawc roc muq, miqsaz htenc rueq vyaq yauk shuimx yaq kvmuinz mnoz rueq nanx lot muq. Kvkhoc rvyruiux tsuingshiq rueq tsuingshiq htauk nuex jvnc vtueq tsuingrux yaq miqsaz htenc tvbac gay yaq nuex mnoz kuex yvmx rvtueq lac kuiyqshuik dvyx httax vtuiux?

¹⁴Mnoz rueq miqsaz htenc kuex ngaq ikhoc, rvmuq ngoz ruiux vremc lawc jix vguez yungsuiuz yawxsaz ikhoc yvmx ngoz tueq lac tvyaungc vshuiux?

¹⁵Babelon miqsaz htenc rueq htvnz htenc maq ngaq htvnz shix ikhoc miq htenc kuex khuiyq lvp yaq. Tsuingshiq rueq jak maq khup lvp vtueq, tsuingshiq rueq lvp tueq kvmac kokez guyc sez wuez yaq.

¹⁶Tsuingshiq kuex tsuingshiq jak htenc kvruex doc muinz nawk palx vtueq shomc nawk kuy shomc kuq wuez yaq, yvmx khoc lac ngoz ruiux lec tsuingshiq jak htenc rueq vhvlx pinhtumc taungx vwawx phvnx ruip saz maq tsuingshiq muex htuiz daungx kuq yaq.

¹⁷Tsuingshiq rueq tsuingshiq yaung htenc kuex pattup shuimx vtueq menjenc thuinz vguez maq miqphvnx htenc kuex mkaq muinz tvbac gay wuez shuex haz?