Read Tase Naga HABAKUK 2 Bible Online

HABAKUK 2 - Tase Naga bible

HABAKUK 2

¹Ngaz kuex pvrrawx htauk nuex duiz vtueq Yehowa rueq ngaz muex yvmx lac jungx kuq phvnx, ngaz rueq tvtay jungx tauk lvmz kuex yvmx khoc lac tvralc kuq phvnx kuex bvmc shaungx.

²Yehowa rueq ngaz muex vkhoc tvralc kuq phuex, “Ngaz rueq mnoz muex tvkhic kuq phaungx lvmz kuex lungdvmx htenc htauk nuex yoalx rek phat wvlc muex wuiyq taq shuiuz, kvkaq kvruex raungshuex raung wvl lvp shuex.

³Kvruex wuiyq taq shuiuz, yvmx khoc lac ngoz ruiux lec kvruex kuex vsuingc suing yaungx wvnc vkhing max httuiuc doc rvtueq. Yuq muinz vkhing kuex vlox dvyx httuiuc wvnc yaq, ngaz rueq mnoz muex tvkhic phaungx lvmz kuex vsuing httuiuc wvnc tuex. Kvruex httuiuc wvnc yaq vkhing kuex kvhet rut hvlc ikhoc yaungx yaq, yuq muinz kvruex bvmc shuiuz; kvruex kuex vsuingc suing yaungx wvnc tuex, kvruex httvmx tuex rvmuq.

⁴Vruex kuex bomjungc rvtueq: ‘Honc vbac jix miq kuex tvraungx httax lvp tuex rvmuq, yuq muinz tsuingrux jix htenc kuex vtvraungx httax lvp tuex yvmx rvtueq lac ngoz ruiux lec tsuingshiq kuex Tishox nuex tvmtuing httaz wuez yaq,’ ngoz tueq.”

⁵Tsak vnyvmx rueq vlauc lawc rvyaq. Kvkax wax thuinz yunghvlc jix kuex ngamc ngax vtueq kvhtuip kvluip httax yaq, tsuingshiq kuex vthueyc vmvy ikhoc mkaq muinz thuinz hvlc ngoz tueq vguez. Kvkhoc rvtueq tsuingshiq rueq miqphvnx phvnx shiz yix maq phvnx shiz kuex miqmac tvkoc khvt taungx gay tueq.

⁶Ralx sumx jix rueq ralx taungx jix muex nanxroc nanxsac maq tsuingshiq kuex ngoz ngax shummarc shuex. Tsuingshiq rueq, “Mnoz guimz muq kuex mnoz rueq lvmz toq, yuq muinz mnoz kuex vphoc rvhumc vtuiux! Nuimshiq rueq khac thoz tvhiz sungx ikhoc maq mtanc nuex httuiuc laz luiz waungx tix ngoz tueq lac tvmaung vshuinx?” ngoz tueq ngoz wuez yaq.

⁷Yuq muinz nuimshiq rueq kvruex lvmz max tuiuz shauk nuex, vganc jix htenc khvt taungx jix nuimshiq shauk pumz nuex khac kop vtueq vlap kuy tvkoc tvhiz sungx rvhumc tuinx. Ralx htenc kaz vtueq nuimshiq kuex tvhiz sungx kv-phuinx. Tsuingshiq rueq nuimshiq kuex khvt vtueq nyvlc wvnc kv-phuinx!

⁸Nuimshiq rueq miqphvnx paunghvlc miqsaz htenc kuex khvt vtueq nyvlc wvnc tuit, yuq muinz majuiuc tvraungx kvjungx yaq htenc rueq nuimshiq kuex khvt nyvlc wvnc kv-phuinx, yvmx khoc lac ngoz ruiux lec nuimshiq yaq tuit khac htenc nuiyc miqsaz httax yaq mungkawx nuiyc kvwawc ghaqyungx htenc kvyuq yauk laungc yalawx yauk shuimx wvnc tuit.

⁹Nuimshiq kuex vphoc rvhumc vtuinx! Yauk laungc yalawx maq vnyvlc tsak vnyvmx maq nuimshiq rueq miqmac yuimx wuinz kuex tvrungx wanx wvnc tuit, laungc maq miqmac jez kuex johvlc nuex jez yaq wushawx ikhoc miqmac yuimx kuex vhiz rac muq kvwungx lvp laz juing tvhungx vshuinx!

¹⁰Yuq muinz nuimshiq rueq kvmungx wvnc tuit htenc kvraq nuimshiq yuimx taungx htenc muex yvlc svy tvrvhumc vshuinx; nuimshiq rueq miqphvnx paunghvlc kuex tvbac gay ikhoc maq, miqmac pumz kuex tvbac wuez vshuinx.

¹¹Palx ruk lung htenc rueq doc muinz nuimshiq muex khawx lvlx ramc wuez yaq, wuxwaq htenc rv-nyawx tvruingx yaq.

¹²Nuimshiq kuex vphoc rvhumc vtuinx! Nuimshiq rueq khuec vkhac htauk nuex vjungx tvjvp ruiux miq thvy mvt maq ghaqshungc tec tuit.

¹³Nuimshiq rueq taungx gay tuit miqphvnx htenc kuex khuec guez yauk shuimc shuimx vtueq hunnyex wuez yaq, tsuingshiq lotlaz rueq vguirx htenc kuex wvr rueq khamc gay tsic tueq. Vruex kuex Tvphaungc Tvsuip Yehowa rueq vshuimx rvtueq.

¹⁴Yuq muinz svmuktvrax htenc kuex yuix rueq mvrc yaq ikhoc ghaq kuex Yehowa ngauz vngax phaqjic maq mvrc wvnc tuex.

¹⁵Nuimshiq kuex vphoc rvhumc vtuinx! Nuimshiq rueq miqmac thuinkhvy kvyuq yuimx phic yuimx phaungx wuinz muex yvlc svy tvhumc ruiux, muingc jungc tvbac kuq tuit; nuimshiq rueq tsuingshiq kuex vjuk vpawc jix miq ikhoc vhungx vhaung ruez vshuinx.

¹⁶Nuimshiq kuex tvtsanc nganc tvraung yvlc svy juing rueq yop wvnc rvhumc vtuinx, nuimshiq miqmac rueq nuingx vtueq vhungx vhaung yaungx wvnc tuinx. Yehowa rueq nuimshiq muex murx kok tvnuingc vtueq nuimshiq tvtsanc nganc kuex tvyvlc sac gay shuex.

¹⁷Nuimshiq rueq Lebanon wawc pulx roz htenc kuex dauk gay tuit; majuiuc nuimshiq kuex vduiuz gay rvhumc tuinx. Nuimshiq rueq kvruex yaruix wawc ngvmx saz htenc kuex thvt gay tuit; majuiuc ngvmx saz htenc rueq nuimshiq kuex tvhiz yaz kv-phuinx. Nuimshiq yaq wvnc tuit miq thvy khac htenc ningkhvnc nuex muinz, mungkawx nuiyc ghaqyungx htenc wawc miq htenc kuex yauk laungc yalawx maq rvwvnc tuit ningkhvnc nuex muinz vkhoc hulawx yaungx wvnc yek tuex.

¹⁸Yac yuimx kuex yvmx vjux lac httax yaq nguinx? Kvruex kuex miq rueq vtvhungx guirx dvyx ningkhvnc nuex vrot vkaq maq lvy vtueq, vkvjaz kvjak thenc muq. Miqmac rueq vguirx tvhungx taq kvmac kvmluimx nawk palx ruiux yuq, yvmx vjux lac httax yaq nguinx? Kvruex kuex vkvjaz lot muq tishox dvyx rvtueq nyix!

¹⁹Nuimshiq kuex vphoc rvhumc vtuinx nyix! Pulx pvnz muex ngoc, “Kvsvmc kuiuz!” ngoz tueq muinz, lung muex ngoc, “Kvtenc kuiuz!” ngoz tueq muinz, nuimshiq rueq jungx vshuinx. Yac yuimx vshiz rueq nuimshiq muex yvmx lvmz lac tvkhic kuq lot kv-phuinx? Kuimphox nuiyc kuimshawx maq vtvhungx yaungx ruiux yaungx tuex, yuq muinz yac yuimx kvyuq thuiuzthuic vguez.

²⁰Yehowa kuex vpiq vsawc Shomc Yuimx nuex httax yaq; ghaq htauk wawc miq ruip rawx htenc kuex vpiq khaungkac nuex suinglix lix mhttax wuez kueq.