Read Tase Naga HAGAI 1 Bible Online

HAGAI 1 - Tase Naga bible

HAGAI 1

¹Persia honoc Dariu yaungx tueq wawc nuiyc rac yapix lex tvruk vphaungc raungnuiyq Yehowa rueq shvmmax Hagai maq raz tueq kvjaz jungx tueq. Bomjungc kuex Shealtiel saz Yuda mungx walaungx Zerubabel nuiyc Jehozadak saz Shomc Wayungx Yoshua tvkoc rvtueq.

²Tvphaungc Tvsuip Yehowa rueq Hagai muex, “Vruex miq htenc vraq Shomc Yuimx guirc yek tvkoc vkhing max shauk doc,” ngoz tueq jungx wuez tueq.

³Kvruex yimaq Yehowa rueq vruex bomjungc kuex shvmmax Hagai maq raz tueq miq htenc muex kuq tueq.

⁴“Ngvy miqsaz htenc lex, nuimshiq kuex yuimx vhvlx nuex httax wuez vtuinx rvyruiux ngvy Shomc Yuimx kuex yvmx rvtueq lac kvhttak bac wvnc vtvnx?

⁵Nuimshiq nuex yvmx lac yaungx yaq nguinx khiz vshuinx haz?

⁶Nuimshiq rueq paunghvlc khic yuingc tuit, yuq muinz raungluingx saz dvyx yut wvnc tuit. Nuimshiq nuex phuiuz vsvy juing vhttax, yuq muinz phoay laz phauk saq shuinx rvmuq. Nuimshiq nuex vnuingc juing svpiq tix vhttax, yuq muinz pawx laz nuingx lvp shuinx rvmuq! Nuimshiq nuex khoz vkhvy vhttax, yuq muinz nuimshiq rueq luimx laz svmc juing vguez. Yauk shuimc jix rueq muinz miqmac phuiuz svy tvkoc hungx laz yauk mauk lvp muq.

⁷Yvmx ngoz tueq lac vkhoc yaungx kaz tvnx kuex nuimshiq rueq khiz lot muit haz?

⁸Majuiuc ghaqluimx htenc nuex duiz woz vtueq pulx htenc kuex laq vtueq Shomc Yuimx kuex guirx yek shuinz; kvkaq ngaz rueq raungc raq wvnc shaungx, ngaz muex aungx yaq tanc khvnc maq nuimshiq rueq nawk palx wvnc wuez phuinx.

⁹“Nuimshiq rueq paunghvlc yut lvp shuinx ngoz tueq kvmx wuez tuit, yuq muinz raungluingx dvyx yez lvp tuit. Nuimshiq rueq yut tuit kuex yuimx nuex lvmz wvnc ruiux yuq, ngaz rueq tvpvnc yvp gay shaungx. Ngaz rueq yvmx ngoz tueq lac kvkhoc ruez vshaungx? Ngvy Shomc Yuimx httak bac wvnc ruiux muinz nuimshiq kuex miqmac yuimx yauk shuimc dvyx shuimc ningkhvnc nuex rvtueq.

¹⁰Kvkhoc rvtueq raungyunx muq nuiyc yvmx muinz kemz lot muq.

¹¹Ngaz rueq mungtan ghaqluimx htenc htauk nuex muinz, vkhic vyuingc juing wuik vnax htenc nuex muinz, svpiq sunc htenc nuiyc olip sunc htenc nuex muinz, ghaq nuex kemz yaq pulx thuey waqthuimx phvnx ruip saz muinz, miqsaz nuiyc nyvmx saz htenc nuex muinz, nuimshiq hunglaungx vtueq vtvkoz kemz pulx thuey waqthuimx htauk nuex muinz, raungx kuex tvranx tauk.”

¹²Kvruex yimaq Zerubabel, Yoshua nuiyc Babelon mungx nuex vthuq laq wawc vyek waung miq htenc lotlaz rueq Yehowa tsuingshiq Tishox rueq tsuingshiq muex vshuimc vkay juing nvr tueq kuex shuimx kaz wuez tueq. Tsuingshiq kuex hiyaz vtueq Yehowa kamx waz shvmmax Hagai kvjaz kuex phvnx wuez tueq.

¹³Kvruex yimaq Hagai rueq Yehowa bomjungc kuex miq htenc muex vkhoc jungx tueq: “Ngaz kuex nuimshiq rulc vdvmz httax taungx, kvruex kuex ngvy bomkhvmc rvtueq,” ngoz tueq tvlvy jungx kuq tueq.

¹⁴Yehowa rueq miq pumz tek vtueq Shomc Yuimx yauk shuimc tvkoc Yuda mungx walaungx Zerubabel; Shomc Wayungx Yoshua nuiyc vthuq vruez laq wawc vyek waung miq lotlaz muex tvsvmz wuez tueq. Tsuingshiq rueq Tvphaungc Tvsuip Yehowa tsuingshiq Tishox Shomc Yuimx kuex,

¹⁵Dariu honoc yaungc wawc nueyc rac yapix lex tvruk raungx 24 nuex yauk shuimc phaungc wvnc tueq.