Read Tase Naga ZECHARIA 14 Bible Online

ZECHARIA 14 - Tase Naga bible

ZECHARIA 14

¹Yehowa vpiq rueq khac phoc juing nuex ngaungc raungnuiyq kuex vnyek shex. Kvkaq Yerusalem kuex khvt nyvlc wvnc rvhumc tuex, vkhvt vnyvlc vruez hup svmx kuex nuimshiq muik lawc nuex rv-phvlc wuez tuex.

²Yehowa rueq Yerusalem kuex khvt tvkoc miqphvnx htenc kuex vdvmz nuex tvtuimx shuex. Ghaqyungx kuex khvt nyvlc wvnc rvhumc vtueq, yuimx htenc kuex httak gay ruiux yalxjuik rulx htenc kuex yomnamc rvhumc tuex. Miq khoz lak kuex vthuq wvnc rvhumc tuex, yuq muinz kvjungx yaq miq htenc kuex ghaqyungx kvwawc thuq wvnc rvhumc muq.

³Kvruex yimaq vpiq rueq lvy wvnc tueq jauz khvt tueq ikhoc Yehowa kuex kaz vtueq miqphvnx htenc kuex khvt shuex.

⁴Kvkaq vpiq kuex Yerusalem maq shaldungc kox Olip Kanx nuex jvp tuex. Kvkaq Olip Kanx kuex shaldungc kox maq shalx nyuip kox nuex httuiuc laz vnueyc muex khoz wvnc vtueq yunghvlc warc tvnx vshiz muex yaungx wvnc tuex. Kanx kholak kuex ghaqkhux kox nuex, kholak kuex ghaqyaz kox nuex kvhttot wvnc tuex.

⁵Nuimshiq kuex kanx hvlwvl warc tvnx lvmx maq yuz wvnc lvp tuinx. Yuda Hokhvmx Uzia pat nuex gaqyung mux vtueq, nuimshiq jix vwaz tamx yuz wuez tueq ikhoc, nuimshiq yuz wuez tuinx. Yehowa ngvy Tishox rueq vpiq rulc vdvmz httax yaq raungkamx bix lotlaz kuex shvlx laq ruex.

⁶Kvkhoc vkhing httuiuc wvnc tuex nuex, kvruex baung kvyuq mkaq muinz kuiyq hvlc raz tueq tsuik hek dvy tuex rvmuq,

⁷raungx muinz nyauk tuex rvmuq. Kvruex yuq raungwuic kuex mkaq muinz wuix vtueq raungwvrx nuex muinz wuix tuex. Vkhoc yaungx wvnc tuex kuex Yehowa rueq dvyx tuiuz yaq.

⁸Kvkhoc raungnuiyq httuiuc wvnc tuex nuex, rullungx yuix kuex Yerusalem maq kaz tuex, yuix kholak kuex Yuix Maungx Jumx nuex, vganc kholak kuex Mediteranean nuex rvtuex. Kvruex yuix kuex raungyux raunglawc wawc shiz tup kaz tuex.

⁹Kvruex yimaq Yehowa kuex mungkawx lotlaz hokhvmx muex yaungx tuex; miq ruip rawx rueq muinz Tishox vpiq kuex nawk palx vtueq vpiq muingc rv-ngvlc dvyx rvtueq kuex tuiuz wuez shuex.

¹⁰Ghaqkhux kox Geba ghaq maq ghaqyaz kox Rimmon ghaq nuex httuiuc laz yungx yaq hong kuex ghaq htungx muex yaungx wvnc tuex. Yerusalem kuex kvruex tvroz wawc yvnc vghaq htenc htauk nuex vjoz rvtuex, kvruex ghaqyungx kuex Benjamin Palc Kaluix maq kungkhux wawc Vshuk Palx Kaluix nuex httuiuc laz, Hananel Pvrrawx maq hokhvmx svpiq tix surc juing nuex httuiuc laz yungx tuex.

¹¹Miq htenc kuex kvyuq kvwungx httax wuez vtueq, yix maq tvbac gay nuiyc tvhiz tvsungx kuex mkaq muinz rvhumc muq.

¹²Yehowa rueq Yerusalem kuex ralx tvyaungc jix miqphvnx htenc lotlaz htauk nuex kvhiz juing thuimkux mac tsac tvhttuiuc shuex. Tsuingshiq shauk gvnz kuex tsuingshiq vtvraungx nuex dvyx nvmx wvnc vtueq, tsuingshiq muik nuiyc tvlix htenc muinz nvmx wvnc tuex.

¹³Kvkaq Yehowa rueq tsuingshiq kuex tvthuip khvt tvhiz sungx tvyaungc ruiux, miq tek vtueq miqmac phic vphaungx wawc waz kuex khvt thvt wuez shuex.

¹⁴Yuda waz rulx rueq muinz Yerusalem tvguing tvkoc khvt wuez shuex. Tsuingshiq rueq miqphvnx htenc lotlaz tsak vnyvmx kuimshawx, kuimphox nuiyc khoz vkhvy paunghvlc nyvlc lvmz wvnc shuex.

¹⁵Ralx nuk jerak wawc mvre htenc, kamel htenc nuiyc kumrawx htenc httax yaq nyvmx saz lotlaz htauk nuex thuimkux mac vtsac kuex tvhttuiuc shuex.

¹⁶Kvruex yimaq Yerusalem khvt gay jix miqphvnx htenc wawc tvraungx kvjungx yaq jix lotlaz kuex, Tvphaungc Tvsuip Yehowa muex nawk palx tvkoc muinz, Bulax Tap Moalx moalx tvkoc muinz wawc tek kvruex ghaq kvyuq woz wuez tuex.

¹⁷Tvphaungc Tvsuip Yehowa hokhvmx waz muex nawk palx kaz muq maq tvlvlc jix miqphvnx phvnx shishiz httax ruiux yuq, tsuingshiq mungtan nuex raungyunx tuex rvmuq.

¹⁸Ejip miqsaz rueq Bulax Tap Moalx moalx muq tvlvlc ruiux yuq, tsuingshiq rueq kvkhoc khawx lvlx yaq jix htenc tvkoc Yehowa rueq tvkaz shuex thuimkux mac vtsac kuex rvhumc tuex.

¹⁹Bulax Tap Moalx moalx muq ngoz ruiux Ejip mungx htauk nuex muinz, vganc miqphvnx htenc lotlaz htauk nuex muinz vruex murx kuex rvhumc tuex.

²⁰Kvkaq mvre sengrengc htenc nuex “Yehowa tvkoc lekuq tueq,” ngoz yaq bomc poz kuex tvkop taq shuex. Shomc Yuimx mungx wawc dungc yaungc juing tuik htenc kuex shomrawx kvlc nuex vtaq pantuimz htenc ikhoc vsawc yaungc tuex.

²¹Yerusalem nuiyc Yuda mungx lotlaz nuex httax yaq dungc yaungc juing tuik tek kuex, Tvphaungc Tvsuip Yehowa tvkoc shuimc muex tvsawc taq wuez shuex. Shomc nawk juing shomc kuy jix miq htenc rueq muinz shomc nawk juing ngvmx lumc tvkoc kvruex htenc kuex shuimx shuex. Kvkhoc vkhing httuiuc tuex nuex, Tvphaungc Tvsuip Yehowa Shomc Yuimx nuex pvkac pvylvyc jix kuex mkaq muinz httax tuex rvmuq shex.