Read Tase Naga Mahte 1 Bible Online

Mahte 1 - Tase Naga bible

Mahte 1

¹Abraham nuiyc Dawid suiuz vsaz phvnx Yesu Christu vpiq waruiuz lvmx phvnc kuex vkhoc rvtueq.

²Abraham saz kuex Esak, Esak saz kuex Yaku, Yaku saz kuex Yuda nuiyc vphuz vnox hez rvtueq,

³Yuda nuiyc Tamar saz kuex Pereza nuiyc Zera rvtueq. Pereza saz kuex Hesron, Hesron saz kuex Aram,

⁴Aram saz kuex Aminadab, Aminadab saz kuex Nashon, Nashon saz kuex Selmon,

⁵Selmon nuiyc Rahab saz kuex Boaza, Boaza nuiyc Rutha saz kuex Obed, Obed saz kuex Jese,

⁶Jese saz kuex Dawid hokhvmx rvtueq. Dawid kuex Uria taungnyuiuz rulc httax vtueq vsaz Solomon humc tueq,

⁷Solomon saz kuex Rehoboam, Rehoboam saz kuex Abija, Abija saz kuex Asa, Asa saz kuex Jehoshaphat,

⁸Jehoshaphat saz kuex Jehoram, Jehoram saz kuex Uzia, Uzia saz kuex Jotham,

⁹Jotham saz kuex Ahaza, Ahaza saz kuex Hezekia,

¹⁰Hezekia saz kuex Manase, Manase saz kuex Amon, Amon saz kuex Josia,

¹¹Josia kuex Babelon mungx nuex thuq wvnc tueq kvkaq, Jehoiachin nuiyc vphuz vnox hez humc tueq,

¹²Babelon nuex thuq wvnc tvkoc Israel miqsaz htenc lvp shvlx wvnc tueq yix maq, Jehoiachin rueq Shealtiel lvp tueq, Shealtiel saz kuex Zerubabel,

¹³Zerubabel saz kuex Abiud, Abiud saz kuex Eliakim, Eliakim saz kuex Azor,

¹⁴Azor saz kuex Zadok, Zadok saz kuex Achim, Achim saz kuex Aliud,

¹⁵Aliud saz kuex Eleazar, Eleazar saz kuex Mathan, Mathan saz kuex Yaku,

¹⁶Yaku saz kuex Mary taungwaz Yosep rvtueq, Mary rueq Mesia ngoz yaq Yesu kuex jawx tueq.

¹⁷Abraham pat maq Dawid pat nuex httuiuc laz pat rokshiz rac pat bvlic. Dawid pat maq Israel miqsaz Babelon mungx nuex thuq wvnc tueq nuex httuiuc laz pat rokshiz rac pat bvlic. Babelon nuex thuq wvnc tueq pat maq Mesia jawx kaz tueq nuex httuiuc laz pat rokshiz rac pat bvlic rvtueq.

¹⁸Yesu Christu jawx kaz tueq lvmz kuex vkhoc rvtueq, vpiq nyuiuz Mary kuex Yosep rueq vtvkvp taq nyuiuz rvtueq, tsuingnueyc vroc max httax shauk nuex dvyx piq nuex Vsawc Siyac maq vlvp wvgvnz rvtueq.

¹⁹Yosep kuex tsuingrux raz tueq vlvmz maq mkaq muinz shuimx lvmz yaq waz rvtueq rulc rv-ngvlc, piq rueq Mary kuex miq htumc nuex yvlc svy tvrvhumc roc muq ningkhvnc nuex piq vtvkvp taq shec lvmz kuex vyumx maq httvrc tvy gay dvnc tueq.

²⁰Kvkhoc tvmaung yaq baunglaung Taungjix kamx waz vshiz rueq maung nuex kvkhic kaz vtueq, “Dawid suiuz vsaz Yosep lex, mtaungx nyuiuz Mary lvmc tvkoc nauk hiz kaz, yvmx khoc lac ngoz ruiux lec piq wvgvnz yaungx yaq kuex Vsawc Siyac maq yaungx wvnc tueq.

²¹Piq rueq miqwaz saz jawx shuex, mnoz rueq vpiq muingc kuex Yesu ngoz tueq muingc shuiux. Yvmx khoc lac ngoz ruiux lec vpiq miqsaz htenc kuex mvrax mungx wawc palc tvdungc wvnc jix waz rvtueq,” ngoz tueq.

²²Vruex lvmz htenc kuex Taungjix vpiq pumz maq shvmmax nuix maq raz tueq jungx tueq kvjaz kuex hungx wvnc muex yaungx wvnc tueq.

²³Piq rueq, “Lawc shuiuz, kvruex yalxtux shauk nyuiuz kuex wvgvnz yaungx vtueq vsaz miqwaz saz jawx shuex, vpiq muingc kuex Immanuel ngoz tueq muingc shuex,” ngoz tueq. Kvruex vlvmz kuex, “Tishox kuex naungshiq rulc vdvmz httax yaq!” ngoc rvtueq.

²⁴Kvkhoc rvtueq Yosep kuex vkvtsoalx wawc tvsvmc wvnc vtueq Taungjix raungkamx waz rueq jungx kaz tueq rulc rv-ngvlc phvnx vtueq, Mary kuex lvmz tueq.

²⁵Yuq muinz nox raungwuic khic nuex httuiuc laz piq rulc gvnngvmx maq guilc ngaungc naungx muq maq httax tueq; nox miqwaz saz kuex piq rueq Yesu ngoz tueq muingc tueq.