Read Tase Naga Mahte 18 Bible Online

Mahte 18 - Tase Naga bible

Mahte 18

¹Kvruex baunglaung sangac bix kuex Yesu kox nuex kaz vtueq, “Raungx Mungtan nuex mruex jix waz lac vyungx pinhtumc yaungx tvnx?” ngoz tueq wiz tueq.

²Kvkhoc rvtueq Yesu rueq nosaz saz washiz kuex gvl vtueq, tsuinghez max nuex tvjvp ruiux,

³“Nuimhez muex ngaz rueq vsuing jungx kuq ix, nuimshiq thuinz kvlayc vtueq nosaz saz vkhoc yaungx muit ngoz ruiux kuex raungx Mungtan nuex nyuip lvp muit.

⁴Vruex nosaz saz vkhoc thuinz tv-nyenz tvyomx jix waz ukhaq yuq muinz raungx Mungtan nuex vyungx pinhtumc yaungx tuex.

⁵Kvmaq nosaz saz vkhoc washiz muex ngvy muingc maq malc lvy jix waz kuex ukhaq yuq muinz, ngaz kuex malc wvnc rvtueq.

⁶“Ngaz muex kvmluimx jix vruex nosaz rulx vwawc washiz muex kvmluimx thuinz tvyaq kuy jix ukhaq yuq muinz, vbuq nuex lung htuimz yunghvlc pauk vtueq, svmuktvrax nuex tvdvy gay ruiux waz kuex piq tvkoc vhvlx rvtuex.

⁷Miqsaz htenc muex kvmluimx thuinz tvyaq jix httaz ningkhvnc nuex mungkawx nuex kvhiz juing httax yaq! Kvkhoc phvnx kuex mkaq muinz yaungx wvnc tuex, yuq muinz miq muex kvmluimx thuinz tvyaq kuy jix waz kuex kvhiz juing rvhumc tuex.

⁸“M-yauk rvmuq ngoz ruiux m-yaz rueq mnoz muex kvmluimx thuinz tvyaq kuq ruiux yuq vjumc rvgay shuiuz! Yauk vyaz vhvlx maq rullungx pattup wvr mungx nuex tvdvy gay rvhumc ngoc mvnx, yauk rvmuq ngoz ruiux yaz lomx muq maq rullungx tvraungx juing nuex nyuip kuex vhvlx pinhtumc rvtueq.

⁹Mmuik rueq mnoz kvmluimx thuinz tvyaq ruiux yuq, mmuik kuex vluc rvgay shuiuz! Muik nueyc rac vhttax maq ngarvyx wvr mungx nuex dvy wvnc ngoc mvnx, muik kox dvyx yuq muinz rullungx tvraungx juing nuex nyuip wvnc kuex vhvlx pinhtumc rvtueq.

¹⁰“Kvkhoc rvtueq nosaz saz washiz kuex nuimshiq rueq wvlc guez waqguez nauk tvyaungc kaz honc lvmz wuez shuinz. Nuimhez muex ngaz rueq jungx kuq ix, raungmungx wawc tsuingshiq kamx bix kuex raungmungx wawc Iwaz khaungkac nuex mkaq muinz httax wuez yaq.

¹¹[Miq Saz vruex kuex vmoz vruez wvnc jix htenc palc daungc kay vhttuiuc kaz rvtueq.][4]

¹²“Nuimshiq rueq yvmx khoc lac tvmaung vshuinx? Miq washiz rueq khelbuenx shashiz lvp tueq, kvruex phungc kvwawc vshiz moz wvnc ruiux yuq, khelbuenx rok tvkuiuz rac tvkuiuz kuex kuz kvyuq taq shec ruiux, vmoz vruez wvnc kuiux kuex thuiyx kaz tuex.

¹³Kvruex piq rueq humc ruiux yuq, ngaz rueq vsuing nuimshiq muex jungx ix, moz kaz muq rok tvkuiuz rac tvkuiuz kvmac kokez tuex htauk nuex muinz vhumc vrvkaz kuiux kvmac jvnc vtueq kokez tuex rvtueq.

¹⁴Kvrulc rv-ngvlc raungmungx wawc nuimshiq Waz rueq muinz vruex nosaz rulx vwawc washiz shiz muex lvmx tvyaq tvmawc kuy kuex roc muq.

¹⁵“Mphuz mnox waz rueq mnoz muex mvrax yaq kuq ruiux yuq, piq mvrax kuex jungc kuy tvkoc piq kox nuex kaz kuiuz, yuq muinz nuimnueyc dvyx rvjungc phvnc kuinz. Mkvjaz kuex tay kuq ruiux yuq, mphuz mnox waz kuex mnoz rueq tvyez palc wvnc yek shuiux.

¹⁶Yuq muinz mkvjaz kuex tay muq ngoz ruiux yuq, mnoz rueq tvgurc vshuiux mvrax kuex tvtsuingc tvlvmx wvnc tvkoc Rumvrc luik nuex jungx shec tueq rulc rv-ngvlc hakhix wanueyc wathuimx gvl shuiuz.

¹⁷Tsuingshiq kvjaz kvmuinz tay muq ngoz ruiux lec, kvruex lvmx lotlaz kuex phungc nuex tvtay shuiuz. Tvsuip nuex phungc miqsaz kvjaz muinz tay muq ngoz ruiux lec tvrac vguez miq nuiyc muinghic jix waz ikhoc lawx tvyaungc shuiuz.

¹⁸“Ngaz rueq nuimshiq muex vsuing jungx kuq ix, ghaq htauk vmaq nuimshiq rueq tvwanc vshuinx htenc kuex raungmungx maq tvwanc rvhumc tuex. Ghaq htauk vmaq nuimshiq rueq dawc kuq vshuinx yvmx yuq muinz raungmungx maq vdawc kuy rvhumc tuex.

¹⁹“Kvkhoc rvtueq ngaz rueq nuimshiq muex vsuing jungx ix, ghaq htauk vruex maq nuimshiq phungc kvwawc miq wanueyc kuex rungx raz vtueq vjux thoz ruiux yuq raungmungx nuex httaz yaq Iwaz rueq muinz tsuingnueyc muex tvhungx kuq shuex.

²⁰Yvmx khoc lac ngoz ruiux lec miq wanueyc wathuimx rueq ngvy muingc ruingc vtueq rvtuimx ruiux kuex, kvruex yuq tsuinghez hvlwvl nuex ngaz muinz lomx vtaungx rvtueq,” ngoz tueq.

²¹Kvkaq Peter kuex Yesu kox nuex kvnvp kaz vtueq, “Taungjix lex, phunox waz rueq ngaz muex yaq kuq ruiux yuq ngaz rueq tumc mjuc dawc kuy juing lac? Tumc mvshix nuex httuiuc laz haz?” ngoz tueq.

²²Yesu rueq tvralc tueq, “Tumc mvshix nuex httuiuc laz dawc kuy juing ngoz tueq ngaz rueq mnoz muex jungx mauk, tumc rok mvshix shix maq tumc mvshix nuex httuiuc laz dawc kuy mvy yaq ngoz tueq ngaz rueq mnoz muex jungx kuq vphaungx.

²³Kvkhoc rvtueq raungx Mungtan kuex piq nvrc waz hez muex tvtsuingc wvlc wisoz jix hokhvmx washiz rulc rv-ngvlc yaq.

²⁴Piq rueq tvtsuingc wvlc kuex wisoz phaungc wvnc koq tueq kuimphox senc vrok maq khac kop yaq miq washiz kuex piq kox nuex shvlx laq tueq.

²⁵Kvruex nvrc waz rueq htawhtuimc kuy juing piq yauk nuex yvmx muinz vguez ningkhvnc nuex, dax ikhoc piq pumz muinz, vnyuiuz vsahez nuiyc piq rueq vlvp httax yaq lotlaz kuex shaung vtueq htawhtuimc kuex mhtuimz kuq phueq ngoz tueq nvr tueq.

²⁶Kvkhoc rvtueq nvrc waz kuex hokhvmx waz khaungkac nuex bumx vtueq, ‘Ngaz muex menjenc kuq koq, ngaz rueq mnoz muex lotlaz htuimz kuq phaungx,’ ngoz tueq.

²⁷Hokhvmx waz rueq piq muex menjenc vtueq htawhtuimc htenc lotlaz tvshiz kuq gay tueq.

²⁸“Kvkaq nvrc waz piq kuex kvtenc waung wvnc vtueq piq htawhtuimc shashiz kop yaq nvrc waz washiz rulc rvhumc tueq, piq rueq kvruex waz kuex vduingx maq lvp vtueq, ‘Ngaz muex kuy juing khac kuex kuq koq,’ ngoz tueq.

²⁹Piq nvrc waz kvraq kuix tsvrung nuex bumx vtueq, ‘Ngaz muex menjenc kuq koq htawhtuimc httax yaq lotlaz kuex htuimz kuq phaungx!’ ngoz tueq kvmenc jenc thoz tueq.

³⁰Yuq muinz piq kvjaz kuex tay muq maq htawhtuimc htuimc kuy lot nuex httuiuc laz khoktep mungx nuex shauk gay tueq.

³¹Kvruex lvmx kuex nvrc waz vbez rueq khiz vtueq, tsuinghez kuex pinhtumc khaq ruiux, yaungx wvnc tueq lvmx phvnx ruip saz kuex hokhvmx waz muex tvtay jungx tueq.

³²Kvkaq piq rueq nvrc waz kuex gvl vtueq, ‘Khuec guez dax waz lex! Mnoz rueq ngvy kox wawc kvmenc jenc thoz nuex mduix nuex httax yaq khac lotlaz ngaz rueq dawc kuq gay phaungx.

³³Ngaz rueq mnoz muex menjenc kuq phaungx rulc rv-ngvlc, mnoz rueq muinz mnvrc waz muex menjenc kuy mvy yaq,’ ngoz tueq.

³⁴Hokhvmx waz kuex vthuinz khaq vtueq vnvrc waz rueq htawhtuimc htumc kuy lot nuex httuiuc laz murx tvgurc tvkoc khoktep nuex htawc gay tueq,” ngoz tueq.

³⁵Yesu rueq tvsuip nuex, “Nuimshiq muinz phunox vdvmz dvmz washiz mvrax kuex washiz rueq thuinz vmungx lotlaz maq dawc kuq muit ngoz ruiux yuq, raungmungx wawc Iwaz rueq muinz nuimshiq mvrax kuex dawc kuq shuex rvmuq,” ngoz tueq.