Read Tase Naga Mahte 27 Bible Online

Mahte 27 - Tase Naga bible

Mahte 27

¹Raungnvp samaq shomc walaungx bix nuiyc nuk miqsaz walaungx rulx htenc kuex Yesu thvy gay tvkoc rungx raz tueq.

²Tsuingshiq rueq Yesu kuex buinc vtueq Roma hokhvmx waz Pilat kox nuex shvlx wvnc vtueq tvshuk kuq gay tueq.

³Kvruex kaq Yesu tvshuk kuy gay jix waz Yuda kuex Yesu htvp htaz gay tueq kuex khiz vtueq, piq thuinz kvlayc ruiux kuimphox sawx rok thuimx kuex shomc waz bix nuiyc walaungx bix kox nuex lvmz laq tueq.

⁴“Ngaz rueq mvrax lvp muq miq washiz kuex tvthueyc tvkoc tvshuk kuq gay tauk ningkhvnc nuex mvrax lvp tauk!” ngoz tueq. Tsuinghez rueq, “Vruex kuex nuiyshiq muex yvmx lac seng yaq nguinx? Kvruex kuex m-yauk shuimc rvtueq!” ngoz kuq tueq.

⁵Kvkaq Yuda rueq kuimphox rok thuimx kuex Shomc Yuimx nuex tvwoalc tuip gay shec ruiux kaz wvnc tueq. Piq kuex pungbaung nuex kaz wvnc vtueq ruiuz nuex kvshuirc thueyc tueq.

⁶Shomc walaungx bix rueq kuimphox kuex tsenz vtueq, “Kuimphox vruex kuex miq tvguiy rez ningkhvnc nuex shomc yuimx yauk noalc kuimphox tek nuex htawc tvkoc naungshiq Tvrac nuex vkhangx kuq muq,” ngoz tueq.

⁷Tsuingshiq rungx raz lot vtueq kvruex kuimphox kvmaq tuik lauz jix waz ghaqphux kuex ruiyx vtueq pungnuk miqsaz maungx luip juing muex tvyaungc tueq.

⁸Kvkhoc rvtueq kvruex wuik kuex, “Tvguiy ghaqphux,” ngoz tueq majuiuc raungnuiyq nuex httuiuc laz jungx wuez yaq.

⁹Kvkaq shvmmax Yeremia rueq jungx tueq, “Nuimshiq rueq kvruex waz tvkoc vhtawz vrawz ikhoc maq Israel miqsaz htenc rueq vhtvp htaz kuq kuimphox rok thuimx kuex lvmx vtueq,

¹⁰Taungjix rueq ngaz muex nvr phuex rulc rv-ngvlc tuik lauz jix waz ghaqphux rez muex shuimx gay tueq,” ngoz tueq kvjaz kuex hungx wvnc tueq.

¹¹Yesu kuex Roma mungx walaungx htumc nuex jvp yaq, mungx walaungx waz rueq, “Mnoz kuex Yuda hokhvmx waz doc haz?” ngoz tueq wiz tueq. Yesu rueq, “Mnoz rueq jungx vshuiux rulc rv-ngvlc ngaz rvtauk,” ngoz tueq tvralc tueq.

¹²Yuq muinz shomc walaungx bix nuiyc nuk miqsaz walaungx bix rueq mvrax tvgurc lvmx htenc kuex vpiq rueq yvmx muinz tvralc muq.

¹³Kvkhoc rvtueq Pilat rueq, “Mnoz muex tsuinghez rueq phvnx ruip saz maq mvrax tvgurc yaq kuex mnoz rueq tay muq haz?” ngoz tueq wiz tueq.

¹⁴Yuq muinz Yesu rueq bomc poshiz muinz tvralc muq, kvkhoc ningkhvnc nuex mungx walaungx waz kuex pinhtumc wangc tueq.

¹⁵Roma mungx walaungx waz rueq Tvlvy Wvnc Moalx ruip rawx nuex nuk miqsaz rueq thoz shuex waz kuex khoktep mungx wawc tvdungc kuy htungx httax yaq.

¹⁶Kvruex baunglaung vmuingc Yesu Barnaba ngoz yaq, muingc dung yaq khoktep miq washiz httax tueq.

¹⁷Kvkhoc rvtueq miq rvtuimx yaq nuex Pilat rueq, “Nuimshiq tvkoc mruex jix waz tvdungc kuy lac roc shuinx? Yesu Barnaba shuex Mesia ngoz yaq waz Yesu lac?” ngoz tueq wiz tueq.

¹⁸Yuda miqsaz vrangx vpangx jix rueq tsuingc khelric svy thuiuz muex Yesu kuex piq yauk nuex tvshuk kuq kaz tueq lvmx piq rueq vhvlx waq tuiuz yaq.

¹⁹Pilat kuex khac phoc juing nuex ngaungc yaq baunglaung vtaungx nyuiuz rueq miq washiz tvkaz vtueq bomjungc tvjungx kaz tueq kuex: “Miqtsuing miqrux waz kuex yvmx muinz nauk ruez kaz, yvmx khoc lac ngoz ruiux lec vpiq ningkhvnc nuex m-wvrx raungwvrx ngvy maung maq kuilc daz paunghvlc rvhumc tauk,” ngoz tueq.

²⁰Shomc walaungx bix nuiyc walaungx rulx rueq Barnaba kuex tvdung shuiuz, Yesu kuex thvt gay shuiuz, ngoz tueq Pilat kox wawc thoz tvkoc nuk miqsaz htenc muex nvr tueq.

²¹Yuq muinz Pilat rueq nuk miqsaz htenc muex, “Vruex wanueyc vwawc ngaz rueq nuimshiq tvkoc mruex jix waz httvr kuq ruiux lac roc shuinx?” ngoz tueq wiz tueq. Tsuingshiq rueq, “Barnaba kuex roc vshix!” ngoz tueq tvralc tueq.

²²Pilat rueq, “Kvkhoc ngoz ruiux yuq kuex Mesia ngoz yaq Yesu kuex ngaz rueq yvmx khoc lac rvshaungx?” ngoz tueq tsuinghez muex wiz tueq. Tsuingshiq lotlaz rueq, “Piq kuex yaukjuinc bulx nuex but thvt gay shuiuz!” ngoz tueq.

²³Pilat rueq, “Vpiq yvmx lac yaq gay tvnx?” ngoz tueq wiz tueq. Tsuingshiq rueq, “Vpiq kuex yaukjuinc bulx nuex thvt gay shuiuz!” ngoz tueq hung vtueq guyc tvruingx wuez tueq.

²⁴Pilat rueq yvmx khoc jungc muinz mvy muq nuk miqsaz htenc kuex rvmulc tsvlc wvnc tueq lvmx tuiuz ningkhvnc nuex, yuix lvmz ruiux nuk miqsaz htenc htumc nuex yauk hoal vtueq, “Vruex waz thueyc tuex lvmx kuex ngvy htauk nuex tvdaungc juing rvmuq, nuimshiq htauk nuex dvyx rvtuex!” ngoz kuq tueq.

²⁵Nuk miqsaz lotlaz rueq, “Vpiq thueyc tuex kvruex kuex nuiyshiq nuiyc nuiyshiq suiuz vsaz khux htauk nuex mkvdaungc kueq,” ngoz tueq tvralc tueq.

²⁶Kvruex kaq Pilat rueq Barnaba kuex tvdung kuq ruiux Yesu kuex huyhut thvt vtueq yaukjuinc bulx nuex but thvy gay tvkoc tvshuk kuq gay tueq.

²⁷Kvkaq Pilat nolaungx bix rueq Yesu kuex mungx walaungx waz hoc nuex shvlx wvnc vtueq, nolaungx daungx shiz kuex vpiq tvroz nuex rvtuimx kaz tueq.

²⁸Tsuinghez rueq vpiq khvy kuex puk gay ruiux vshawx khvy htumc kuex tvkhelc kuq tueq.

²⁹Kvruex yimaq tsuinghez rueq shuiuq maq vway khux phuk vshiz kuex tvbuz kuq tueq, vpiq yaukkeq kox nuex lakphuec kawz vshiz tvshuimc tueq. Kvmaq raz tueq tsuinghez kuex vpiq khaungkac nuex bumx wuez vtueq, “Yuda hez muex Hokhvmx waz lex, rullungx luz wvnc kuiuz!” ngoz tueq shummarc wuez tueq.

³⁰Tsuinghez rueq vpiq kuex htoz maq htoz ruiux lakphuec kawz lvmz vtueq vkhux poz nuex wung tueq.

³¹Tsuinghez rueq vpiq kuex kvkhoc guirguenc lot yix khvyshawx htumc kuex puk gay ruiux vpiq svmhung kuex tvsvmc kuq yek tueq. Kvruex yimaq vpiq kuex yaukjuinc bulx nuex but gay tvkoc shvlx wvnc tueq.

³²Tsuingshiq kvtenc kaz wvnc yaq nuex, tsuinghez rueq Kirene miqsaz Simon muingc yaq miq washiz humc vtueq, Yesu yaukjuinc bulx kuex tvpic muex piq kuex laungc maq shvlx wvnc tueq.

³³Golgotha ngoz yaq, “Khurawz luimx,” muingc yaq baung nuex tsuinghez httuiuc kaz tueq nuex,

³⁴tsuingshiq rueq vkhuip tix maq vshot svpiq tix kuex vpiq muex kuq tueq, yuq muinz vpiq rueq talx vtueq nuingx muq doc httvr gay tueq.

³⁵Tsuingshiq rueq vpiq kuex yaukjuinc bulx nuex but gay lot yix, vpiq svmhung kuex hangchac[8] toc maq rv-phvlc wuez tueq.

³⁶Tsuingshiq kuex kvyuq ngaungc vtueq bvmc wuez tueq.

³⁷Vpiq muex mvrax tvgurc luik kuex vpiq khux htauk nuex, “Vruex waz kuex Yuda hez Hokhvmx Yesu rvtueq,” ngoz tueq wuiyq taq tueq.

³⁸Kvruex kaq vguiuq wanueyc muinz vpiq rulc roc nuex yaukkeq kox nuex washiz yaukphvrx kox nuex washiz yaukjuinc bulx nuex but thvt gay naungx tueq.

³⁹Lvmx maq lvy kaz lvy waung jix rueq muinz vpiq yomnamc ngoz tueq, tsuingshiq tuk kuex nguk wuez ruiux selc tsek ngoz tueq:

⁴⁰“Shomc Yuimx kuex httak gay vtueq raungnuiyq thuimx nuex dvyx guirx gay yek shaungx ngoc jix waz lex! Tishox Saz doc ngoz ruiux kuex mshauk gvnz kvpalc wvnc kuiuz! Yaukjuinc bulx kvwawc svt kaz kuiuz!” ngoz wuez tueq.

⁴¹Shomc walaungx bix, Tvrac tvluingc waz hez nuiyc walaungx bix rueq muinz kvkhoc jvnc tvlilawx selc tsek tueq.

⁴²“Vpiq rueq miq vganc kuex palc wvnc lot yaq, yuq muinz vpiq shauk gvnz kuex kvpalc wvnc lot muq ix! Vpiq kuex Israel Hokhvmx waz rvmuq haz? Yaukjuinc bulx kvwawc majuiuc svt kaz ruiux yuq nuiyshiq muinz kvmx khvmz tix!

⁴³Vpiq kuex Tishox muex tvluimc vtueq, ‘Ngaz kuex Tishox Saz rvtauk,’ ngoz tueq. Rvtueq, kvkhoc ngoz ruiux Tishox rueq vpiq kuex palc wvnc roc shuex haz, naungshiq rueq lawc ix!” ngoz wuez tueq.

⁴⁴Vpiq rulc vroc yaukjuinc bulx nuex vbut naungx vguiuq wanueyc rueq muinz kvkhoc jvnc tvlilawx shummarc naungx tueq.

⁴⁵Raungnuiyq shalhtungx maq raungyac shalhtaz thuimx nuex httuiuc laz mungkawx lotlaz nuex raungnyauk kaz tueq.

⁴⁶Raungyac shalhtaz thuimx tanc khvnc nuex Yesu kuex, “Eli, Eli, lema sabakthani?” ngoz tueq yunghvlc maq guyc tueq, kvruex kvjaz vlvmz kuex, “Ngvy Tishox waz lex, Ngvy Tishox waz lex, yvmx ngoz tueq lac mnoz rueq ngaz gay shec vphux?” ngoc rvtueq.

⁴⁷Kvruex hep kvyuq jvp jix miq wvyvmc rueq kvruex tay vtueq, “Vpiq rueq Elia gvl yaq!” ngoz tueq.

⁴⁸Kvkaq tsuinghez kvwawc washiz yuz kvlox vtueq yuix bulrix kuex vhix tix nuex thuimc ruiux mvy-o kawz nuex tvhungx vtueq vpiq muex tvnuingc tvkoc kuq koq tueq.

⁴⁹Yuq muinz wvyvmc rueq, “Kvkhoc lawx mruez kueq Elia kaz vtueq vpiq kuex palc kaz tuex wuez raz tvnx vlawc ruez ix!” ngoz tueq.

⁵⁰Yesu kuex laukshiz hulawx bomc yunghvlc maq guyc vtueq vthuiuz thuic pat wvnc tueq.

⁵¹Kvruex kaq Shomc Yuimx nuex khvyluiz phux vjuinx taq kuex raungkox vphaungc maq gaq kox vtvsuip nuex httuiuc laz kvjuirc kaz tueq. Gaqyung muinz mux tueq, lung rauk htenc muinz bunx khoz wvnc tueq,

⁵²luip ruiuz khux htenc muinz kvdaz wvnc vtueq vthueyc vruez wvnc jix Tishox miqsaz htenc muinz paunghvlc yuing kvtenc wvnc tueq.

⁵³Yesu yuing kvtenc wvnc tueq yix maq, kvruex hez kvmuinz luip mungx kvwawc dung wvnc vtueq, Vsawc Ghaqyungx nuex nyuip wvnc tueq ningkhvnc nuex miq paunghvlc rueq tsuingshiq kuex khiz tueq.

⁵⁴Kvkaq nolaungx yungx washiz nuiyc piq rulc vdvmz Yesu bvmc jix nolaungx bix kuex gaqyung mux wvnc tueq nuiyc vganc phvnx yaungx wvnc tueq htenc kuex khiz vtueq, tsuinghez hiyaz kawc yawc wuez tueq, “Vsuing vruex waz kuex Tishox Saz doc rvtueq!” ngoz tueq.

⁵⁵Galile mungx maq Yesu yix phvnc naungc jix nuiyc vpiq muex romc kuy jix yalxjuik rulx paunghvlc muinz kvruex baung kvyuq raz tueq vluz maq lawc wuez yaq.

⁵⁶Tsuinghez nuex Magdalene Mary, Yaku nuiyc Yosep nyuiuz Mary, Zebede taungnyuiuz tauk rvtueq.

⁵⁷Raungyac wvnc tueq nuex Arimathea ghaq wawc vmuingc Yosep ngoz yaq luiz waungx washiz httuiuc kaz tueq. Piq muinz Yesu kungjix washiz rvtueq.

⁵⁸Piq kuex Pilat kox nuex lvmx lvy kaz vtueq Yesu maungx kuex thoz kaz tueq. Pilat rueq muinz Yesu maungx kuex piq muex kuy tvkoc nvr tueq.

⁵⁹Kvkhoc rvtueq Yosep rueq kvruex lvmz wvnc vtueq ruiynyel khvymvnz maq vhvlx waq yop ruiux,

⁶⁰piq tvkoc lung rauk nuex vwvt guirx shec luip ruiuz khux vnyalx kvyuq htawc taq tueq. Kvruex yimaq lung kuiux dvmx yunghvlc maq luip kaluix kuex puingc shec ruiux kaz wvnc tueq.

⁶¹Magdalene Mary nuiyc vganc Mary kuex luip max kox rvtac phvt kvyuq ngaungc tueq.

⁶²Nvp yix Vguilc Raungnuiyq httuiuc wvnc tueq nuex shomc walaungx bix nuiyc Pharise nuk kuex Pilat kox nuex rvtuimx kaz vtueq,

⁶³“Jiyungx waz lex, vrot vkaq waz vpiq vtvraungx httax tueq jauz, ‘Ngaz kuex raungnuiyq thuimx yix maq yuing kvtenc wvnc yek taungx,’ ngoz tueq max thueyc kaz nuex vjungx shec kvjaz kuex nuiyshiq rueq rvwvl lvp vshix.

⁶⁴Kvkhoc ningkhvnc nuex luip kvruex raungnuiyq thuimx nuex httuiuc laz bvmc tvkoc vkhangx kuq koq, kvkhoc bvmc muq ngoz ruiux yuq vpiq sangac hez rueq vmaungx kuex guiuq wvnc ruiux raz tueq nuk miqsaz muex ngoc vpiq kuex vthueyc mungx wawc yuing kvtenc wvnc vtuex ngoz tueq tvrot ruiux yuq, vphaungc yaq wvnc tueq htauk kvyuq yix nuex yaq wvnc tuex lvmx kuex gvrc hvlc rvtuex,” ngoz tueq.

⁶⁵Pilat rueq, “Vbvmc jix daungx shiz kuex gvl vtueq luip kvruex vhvlx waq tvbvmc tvlawc shuinz,” ngoz tueq tsuinghez muex jungx tueq.

⁶⁶Kvkhoc rvtueq tsuinghez kuex luip kvyuq kaz vtueq lungkuiux nuex tvtsuingc juing seal tvkop ruiux raz tueq luip kuex vhvlx waq puingc tvhvlc vtueq vbvmc jix hez muex tvbvmc shec tueq.