Read Tase Naga MARKU 15 Bible Online

MARKU 15 - Tase Naga bible

MARKU 15

¹Raungnvp jauz maq shomc walaungx bix, walaungx bix, Tvrac tvluingc waz hez nuiyc Suingdaungx Muingdaungx jix lotlaz kuex htat htat rvjungc phvnc tueq. Tsuingshiq rueq Yesu kuex khvrc ruiux, het shvlx wvnc vtueq, Pilat yauk nuex tvshuk lekuq tueq.

²Pilat rueq, “Mnoz kuex Yuda miqsaz muex hokhvmx doc haz rvtonx?” ngoz tueq wiz tueq. Yesu rueq, “Mnoz rueq jungx vshuiux kvkhoc rvtueq,” ngoz tueq tvralc tueq.

³Shomc walaungx bix rueq Yesu muex mvrax paunghvlc tvgurc wuez tueq,

⁴kvkhoc rvtueq Pilat rueq lauk shiz hulawx vpiq muex wiz tueq, “Mnoz rueq yvmx muinz tvralc muq haz? Tsuingshiq rueq mnoz muex tvgurc yaq lotlaz kuex tay shuiuz!” ngoz tueq.

⁵Yesu rueq bomc poshiz muinz tvralc muq rvkoq tueq Pilat kuex vwangc rvtueq.

⁶Pilat rueq Tvlvy Wvnc Moalx ruip rawx nuex mungx miqsaz rueq thoz yaq khoktep miqsaz wawc washiz kuex tvdungc kuy htungx httax yaq.

⁷Kvruex baunglaung rvmulc rvtsvlc raz tueq miq thvy jix hez rulc vdvmz khoktep nuex vshauk gay wawc vmuingc Baraba ngoz yaq washiz lomx tueq.

⁸Kvkaq miq vkung vdaungx rvtuimx vtueq moalx baunglaung yac dauk ikhoc htungx httax yaq rulc rv-ngvlc shuimc kuy muex Pilat kox wawc thoz tueq.

⁹Pilat rueq, “Yuda hokhvmx waz kuex ngaz rueq httvr kuq ruiux yuq nuimshiq rueq roc shuinx haz?” ngoz tueq tsuingshiq muex wiz tueq.

¹⁰Yvmx khoc lac ngoz ruiux lec shomc walaungx bix rueq tsuingc khelric svy thuiuz muex Yesu kuex piq yauk nuex tvshuk lekuq gay tueq lvmx kuex piq rueq vhvlx waq tuiuz yaq.

¹¹Yuq muinz shomc walaungx bix rueq tsuingshiq tvkoc Baraba kuex httvrc kuy tvkoc ngoz tueq nuk miqsaz htenc kuex tvrec rak tueq.

¹²Pilat rueq lauk shiz hulawx, “Ngoz ruiux yuq kuex, Yuda miqsaz muex hokhvmx waz ngoz tueq nuimshiq rueq ngoz vshuinx waz kuex ngaz rueq yvmx khoc ruez ruiux lac nuimshiq rueq roc shuinx?” ngoz tueq wiz tueq.

¹³Tsuingshiq rueq, “Yauk juinc bulx nuex but thvt gay shuinz!” ngoz tueq ramc yek wuez tueq.

¹⁴Yuq muinz Pilat rueq, “Vpiq rueq honc bac mvrax yvmx lac shuimx gay tvnx?” ngoz tueq wiz tueq. Tsuingshiq kuex hungc maq guyc vtueq, “Yauk juinc bulx nuex but thvt gay shuiuz!” ngoz tueq ramc wuez tueq.

¹⁵Pilat rueq nuk miqsaz htenc thuinz tvhvlc muex ngoz tueq, tsuingshiq tvkoc Baraba kuex httvr kuq gay ruiux Yesu kuex huyhut thvt vtueq yauk juinc bulx nuex thvy gay tvkoc lekuq gay tueq.

¹⁶Kvkaq nolaungx bix rueq Yesu kuex Pretori ngoz yaq mungx walaungx waz wangx mungx nuex shvlx wvnc vtueq, nolaungx bix lotlaz tvtuimx gvl tueq.

¹⁷Tsuingshiq rueq khvyshawx htumc kuex tvsvmc ruiux shuiuq khux phuk tvhungx vtueq vpiq muex tvbuz tueq.

¹⁸Kvruex yimaq tsuingshiq rueq: “Yuda miqsaz muex Hokhvmx waz rullungx mluz kueq!” ngoz tueq shummarc tvtsanc nganc tueq.

¹⁹Tsuingshiq rueq vpiq khux nuex lak phuic kawx maq wung vtueq vpiq kuex htoz maq htoz ruiux, kuix tsvrung bumx wuez vtueq nawk wuez tueq.

²⁰Vpiq kuex guirguenz lot yix maq, tsuingshiq rueq tvsvmc tueq khvyshawx htumc kuex put gay ruiux vpiq khvy kuex tvsvmc yek tueq. Kvruex yimaq vpiq kuex yauk juinc bulx nuex but gay muex tsuingshiq rueq tvdung shvlx wvnc tueq.

²¹Lvmx maq tsuingshiq rueq Kirene mungx miqsaz, Alesander nuiyc Rufu muex vwaz, Simon ngoz yaq waz rulc rvhumc vtueq nolaungx bix rueq piq muex laungc maq Yesu yauk juinc bulx kuex tvpic tueq.

²²Tsuingshiq rueq Golgotha ngoz yaq baung kvyuq Yesu kuex shvlx wvnc tueq. (Golgotha ngoz yaq vlvmz kuex Khurawz luimx baung ngoc rvtueq.)

²³Kvruex baung kvmaq tsuingshiq rueq murra ngoz yaq nuiyc svpiq tix kuex shot vtueq Yesu muex tvnuingc tvkoc hung wuez tueq, yuq muinz vpiq rueq nuingx muq.

²⁴Kvruex yimaq tsuingshiq rueq vpiq kuex yauk juinc bulx nuex but gay ruiux, vpiq khvy htenc kuex tsuinghez wawc mruex jix waz rueq lac lvp aungx yaq nguinx kuex hangchac[14] toc maq rv-phvlc wuez tueq.

²⁵Yesu yauk juinc bulx nuex but gay tueq vkhing kuex raungnvp shalhtaz tvkuiuz nuex rvtueq.

²⁶Vpiq mvrax tvkhic luik kuex: “Yuda miqsaz Hokhvmx,” ngoz tueq yauk juinc bulx htauk nuex tvkop tueq.

²⁷Vpiq rulc vdvmz nuex dakuc waz nueyc muinz yauk keq kox nuex washiz yauk phvrx kox nuex washiz tsuingshiq rueq yauk juinc bulx nuex but gay tueq.

²⁸(Kvkhoc lvmz kuex, tvrac yanc gay jix htenc muingc wvlc nuex vpiq tauk wvl naungx tueq ngoz tueq wuiyq shec tueq kvjaz kuex mhungx wvnc kueq ngoz tueq yaungx wvnc tueq.)[15]

²⁹Lvmx maq lvy kaz lvy waung jix htenc rueq muinz tuk nguk vtueq, “Aha! Shomc Yuimx kuex httak gay ruiux raungnuiyq thuimx nuex guirx lot shaungx ngoc jix waz lex!

³⁰Majuiuc yauk juinc bulx wawc svt kaz vtueq mshauk m-gvnz kuex kvpalc wvnc kuiuz!” ngoz tueq shummarc wuez tueq.

³¹Kvrulc rv-ngvlc shomc walaungx bix nuiyc Tvrac tvluingc waz hez rueq muinz shummarc vtueq, “Miq vganc kuex vpiq rueq palc wvnc tueq, yuq muinz vpiq shauk pumz kuex kvpalc wvnc lot muq ix!

³²Israel hokhvmx Mesia kuex yauk juinc bulx wawc svt kaz yaq kuex naunghez rueq lawc ix, naungshiq rueq kvruex khiz ruiux yuq jix vpiq muex kvmluimx wuez tix,” ngoz tueq vdvmz dvmz rvjungc wuez tueq. Vpiq rulc vdvmz nuex but gay rvhumc jix wanueyc rueq muinz Yesu muex shummarc wuez tueq.

³³Raungnuiyq shalhtungx maq raz tueq raungyac shalhtaz thuimx nuex httuiuc laz mungkawx lotlaz nuex raungnyauk suip nyauk kaz tueq.

³⁴Raungyac shalhtaz thuimx nuex Yesu rueq, “Eloi Eloi lema sabakthani?” ngoz tueq guyc tueq. Kvruex vlvmz kuex, “Ngvy Tishox lex, ngvy Tishox lex, yvmx ngoz tueq lac ngaz kuex gay shec vphux?” ngoc rvtueq.

³⁵Kvruex hep nuex jvp jix miq wvyvmc rueq kvruex tay vtueq, “Tay tvtsuingc shuinz vpiq rueq Elia gvl yaq!” ngoz tueq.

³⁶Tsuinghez wawc miq washiz kuex yuz vtueq svpiq vhix tix kuex yuix photwot tuimx nuex thuimc ruiux may-o kawz nuex tvkop tueq. Kvruex yimaq Yesu nuix bar nuex htawc kuq vtueq, “Vlox bvmc lawc ix Elia kaz vtueq vpiq kuex yauk juinc bulx wawc tvsvt shuex wuez! Naungshiq rueq lawc ix!” ngoz tueq.

³⁷Yesu kuex yunghvlc maq guyc vtueq pat wvnc tueq.

³⁸Kvkaq Shomc Yuimx nuex khvy vjuinx taq kuex raungx kox maq ghaq nuex httuiuc laz kholak kvjuirc khoz kaz tueq.

³⁹Yauk juinc bulx max kox nuex jvp yaq nolaungx yungx waz rueq Yesu mkhoc lac thueyc wvnc tvnx kuex khiz vtueq, “Vruex waz kuex vsuing Tishox Saz doc khoc vnauz rvtvnx!” ngoz tueq.

⁴⁰Yalxjuik rulx wvyvmc rueq muinz vyal maq lawc wuez tueq. Tsuinghez kuex Magdalene Mary, vnox Yaku nuiyc Yosep nyuiuz Mary nuiyc Salome rvtueq.

⁴¹Tsuingshiq kuex vpiq Galile mungx nuex httax tueq jauz Yesu yix nuex phvnx vtueq shuimc lvmc kuy jix hez rvtueq. Yerusalem nuex vpiq rulc vdvmz waungc naungc jix yalxjuik rulx vganc paunghvlc muinz kvyuq vhttax rvtueq.

⁴²Kvruex kaq raungyac wvnc koq tueq, Arimathea ghaq jix Yosep ngoz yaq waz kuex httuiuc kaz tueq. Piq kuex mungx Suingdaungx Muingdaungx nuex lomx yaq, miq rueq tvtsanc nganc nuiyc wvmuingc jungc miq vshiz rvtueq, Tishox mungtan wawc rac yaq kuex thuinz tvluimc jix waz rvtueq.

⁴³Majuiuc Vguilc Raungnuiyq maq kvkhux raungnuiyq ngoz yaq, tvyoalc moalc raungnuiyq ningkhvnc nuex Yosep kuex Pilat htumc nuex khvmc thuinz maq nyuip woz vtueq Yesu maungx kuex thoz tueq.

⁴⁴Yesu kuex vthueyc kay wuez shex thaungc tay vtueq Pilat kuex vkawc yawc rvtueq. Piq rueq nolaungx yungx waz kuex gvl vtueq, Yesu kuex thueyc kaz shex doc haz ngoz tueq wiz tueq.

⁴⁵Nolaungx yungx waz rueq jungx tvtay tueq kuex tay yix maq, Pilat rueq Yosep muex maungx lvmc mvy yaq shex lvmz jungx tueq.

⁴⁶Yosep rueq ruiynyel khvymvnz ruiyx wvnc vtueq, maungx kuex tvsvt lvmz ruiux, khvymvnz maq vhvlx waq yop lot yix, lung vwvt luip khurx nuex htawc tueq.

⁴⁷Magdalene Mary nuiyc Yosep nyuiuz Mary rueq maungx vhtawc taq baung kuex khiz yaq rvtueq.