Read Tase Naga LUKA 4 Bible Online

LUKA 4 - Tase Naga bible

LUKA 4

¹Yesu kuex Vsawc Siyac mvrc vtueq Yodan ruilx maq yek waung tueq nuex Siyac rueq kumtsvy tvnx nuex shvlx wvnc vtueq,

²raungx 40 tup Htaungc rueq laulawc rvhumc tueq. Kvruex baunglaung vpiq rueq yvmx muinz phauk saq muq, kvruex yimaq vpiq kuex rvmc thuiuz rvhumc tueq.

³Kvruex kaq htaungc rueq, “Mnoz kuex Tishox Saz doc rvtoq ngoz ruiux kuex lung vruex wanx muex yaungx kuiuz ngoz shuiuz,” ngoz tueq.

⁴Yuq muinz Yesu rueq, “Rumvrc luik nuex vkhoc wuiyq shec tueq, ‘Miq tvraungx yaq kuex wanx rueq dvyx tvraungx yaq rvmuq,’” ngoz tueq tvralc tueq.

⁵Kvkaq htaungc rueq vpiq kuex shvlx wvnc vtueq mungkawx mungtan lotlaz kuex rvmak laz tvkhic tueq.

⁶“Vruex luimc vkawc lotlaz nuiyc tsak vnyvmx lotlaz kuex ngaz rueq mnoz muex kuq phaungx, vhtenc vruex kuex ngvy yauk nuex vlekuy wuez shex ningkhvnc nuex ngaz rueq kuq roc shaungx waz muex kuq lot shaungx.

⁷Ngvy max vyuq mnoz rueq ngaz muex nawk palx ruiux yuq kuex, kvruex lotlaz mnoz muex kuq phaungx,” ngoz tueq jungx tueq.

⁸Yesu rueq, “Taungjix m-Tishox muex mnoz rueq nawk palx lvp shuiux, vpiq muex dvyx shuimx lvp kuq shuiux ngoz tueq Rumvrc luik nuex wuiyq shec tueq,” ngoz tueq tvralc tueq.

⁹Kvmaq htaungc rueq vpiq kuex Yerusalem ghaq nuex shvlx wvnc vtueq Shomc Yuimx wux khux pungx nuex tvjvp ruiux, “Mnoz kuex Tishox Saz doc ngoz ruiux lec vruex maq ghaq kvyuq dauk kuiuz.

¹⁰Yvmx khoc lac ngoz ruiux lec Rumvrc luik nuex, ‘Mnoz tvkhup wungx kuy tvkoc Tishox rueq vpiq raungkamx waz hez nvr tvkaz shuex,’ ngoz tueq.

¹¹Kvmaq, ‘M-yaz kuex lung nuex htuiuz kaz muq juing raungkamx bix rueq yauk maq mnoz kuex tenz wvnc kv-phux,’ ngoz tueq muinz httax yaq,” ngoz tueq.

¹²Yesu rueq, “‘Mnoz rueq Taungjix m-Tishox muex taruiyx mvy muq,’ ngoz tueq Rumvrc luik nuex wuiyq shec tueq,” ngoz tueq tvralc tueq.

¹³Htaungc rueq taruiyx juing lvmx htenc maq taruiyx lot vtueq, vpiq kox maq dung kaz wvnc vtueq vshauk puq httax tueq.

¹⁴Kvruex yimaq Yesu kuex Vsawc Siyac hungc vlaungc vmvrx maq Galile mungx nuex yek waung tueq. Vpiq thaungc kuex baung ruip saz nuex nyvmc wvnc tueq.

¹⁵Vpiq rueq vjux thoz yuimx htenc nuex tvluing kuq koq tueq miq lotlaz rueq vpiq muex tvtsvmc kvmc wuez tueq.

¹⁶Kvkaq Yesu kuex vpiq peluz wvnc tueq Nazaret ghaq nuex httuiuc waung tueq, Vguilc Raungnuiyq vpiq kuex htungx httax yaq rulc rv-ngvlc vjux thoz yuimx nuex kaz vtueq, Rumvrc luik wvlc muex jvp koq tueq,

¹⁷shvmmax Esaia luik tul kuex vpiq muex kuq tueq. Luik tul kuex jalc lawc koq tueq vkhoc wuiyq shec tueq kuex humc tueq:

¹⁸“Taungjix Siyac kuex ngvy htauk nuex svt kaz ruex; htemc saz jix muex thuix thaungx vhvlx jungc kuy tvkoc vpiq rueq ngaz muex vpuiz tix maq nyvt kuq phuex. Khvrc buinc rvhumc jix htenc tvdung wvnc shuex lvmz nuiyc, muik mawz jix htenc rueq muik khiz wvnc shuex lvmz jungphvnc kuy tvkoc muinz; tuinghtuing rvhumc jix htenc palc wvnc shuex lvmz muinz;

¹⁹Taungjix rueq vpiq miqsaz htenc palc wvnc tvkoc vkhing httuiuc wvnc yaq lvmx kuex jungphvnc kuy tvkoc ngaz tvkaz phuex,” ngoz tueq.

²⁰Yesu rueq luik yauk kuex tul vtueq vjux thoz yuimx bvmc jix waz muex yez kuq ruiux ngaungc tueq. Vjux thoz yuimx nuex httax yaq miq lotlaz rueq vpiq kuex tvtsuingc lawc tueq.

²¹Vpiq rueq, “Vruex Rumvrc luik pvl nuex httax yaq htenc kuex nuimshiq rueq tay wvnc tuit rulc rv-ngvlc majuiuc raungnuiyq shex hungx waung vtuex,” ngoz tueq tsuinghez muex jungx phaungc tueq.

²²Tsuingshiq lotlaz rueq vpiq lvmz kuex tvtsvmc kvmc rvjungc phvnc wuez tueq nuiyc vpiq nuix wawc dung yaq kejux kvjaz ningkhvnc nuex vwangc raz tueq, “Vruex waz kuex Yosep saz rvmuq haz?” ngoz tueq rvjungc wuez tueq.

²³Vpiq rueq, “Nuimshiq rueq ngaz muex, ‘Phumz shuimc jix waz lex, mshauk m-gvnz kuex tvhvlc shuiuz nauz,’ ngoz tueq jungx ruiux yaq bomc tvguip maq ngaz muex ngoz phuinx. Kapernaum ghaq nuex mnoz rueq shuimx wvnc toq ngoz tueq nuiyshiq rueq tay lvp vshix yauk shuimc htenc kuex miqmac ghaq nuex muinz shuimx tvkhic shuiuz ngoz tueq ngaz muex nuimshiq rueq ngoz phuinx,” ngoz tueq tsuingshiq muex jungx tueq.

²⁴Kvmaq vpiq rueq, “Ngaz rueq nuimshiq muex vsuing jungx kuq ix, mruex jix shvmmax rueq muinz miqmac ghaq maq malc wvnc rvhumc muq.

²⁵“Ngaz rueq jungx ix tay shuinz: Elia pat nuex Israel mungx nuex wawc thuimx rac yapix lex tvruk raungyunx muq raungx ranx wvnc ruiux, kvruex mungx nuex rvmc yunghvlc dung wvnc vtueq Israel nuex mvntix nyuiuz tamx paunghvlc httax tueq.

²⁶Yuq muinz Israel mungx wawc tsuingshiq vshiz raung kox nuex muinz Elia kuex tvkaz muq doc. Sidon mungx Zarephat ghaq nuex httax yaq mvntix nyuiuz kox nuex dvyx tvkaz tueq.

²⁷Shvmmax Elisha pat nuex muinz Israel phvnx miqsaz vshungx kop jix miq paunghvlc httax tueq rvhvt maq ukhaq muex muinz tvhvlc kuq muq doc, Siria mungx wawc Naaman ngoz yaq waz muex kvdvyx tvhvlc kuq tueq.”

²⁸Vjux thoz yuimx nuex httax yaq hez rueq kvruex kvjaz kuex tay vtueq tsuingc thuinkhaq wuez tueq.

²⁹Tsuingshiq kvtenc ruingx jvp vtueq Yesu kuex rauk maq tvdvy gay tvkoc kekhux kanx nuex shvlx wvnc tueq.

³⁰Yuq muinz vpiq kuex miq phungc mungx kvmaq khuemx kaz wvnc tueq.

³¹Kvkaq Yesu kuex Galile mungx Kapernaum ghaq nuex httuiuc kaz tueq, Vguilc Raungnuiyq vpiq rueq tsuingshiq muex tvluing kuq tueq.

³²Vpiq rueq tvluing jungphvnx kuq wvnc tueq kvmac tsuingshiq lotlaz vkawc yawc rvwuez tueq, yvmx khoc lac ngoz ruiux lec vpiq kuex vrangx vpangx vhttax maq kvjak tueq.

³³Kvkaq vjux thoz yuimx nuex sawc muq htaungc kvpumz jix miq washiz httax yaq; kvruex waz kuex yunghvlc maq guyc vtueq,

³⁴“Huiyx! Nazaret waz Yesu lex, mnoz kuex nuiyshiq rulc yvmx lac seng tvnx? Nuiyshiq kuex tvbac gay tvkoc haz kaz ruiux? Mnoz ukhaq lac rvtonx nuiyshiq rueq tuiuz yaq, mnoz kuex Tishox vsawc miq waz rvtoq!” ngoz tueq.

³⁵Yesu rueq, “Kuiyqshuik rvkuiuz, piq kox wawc dung wvnc kuiuz!” ngoz tueq httonx tueq. Kvkhoc rvtueq htaungc rueq kvruex waz kuex tsuinghez phungc mungx nuex tvrul gay ruiux, tv-phiz shuz muq maq kvruex waz kox wawc dung wvnc tueq.

³⁶Miq htenc kuex vwangc rvwuez vtueq, “Vruex kvjaz kuex yvmx khoc ngoc lac rvtvnx? Vrangx vpangx maq nuiyc luimc vkawc maq htaungc htenc muex nvr koq tueq tsuinghez dung wvnc wuez tueq,” ngoz tueq tsuinghez vdvmz dvmz rvjungc wuez tueq.

³⁷Kvkaq Yesu thaungc kuex baung ruip saz nuex nyvmc wvnc tueq.

³⁸Yesu kuex vjux thoz yuimx wawc kvtenc wvnc vtueq Simon yuimx nuex duiz waung tueq, Simon nguiy kuex thuiuz hvlc rvtueq, kvkhoc rvtueq tsuinghez rueq Yesu muex tvtay jungx kaz tueq.

³⁹Vpiq kuex yalxjuik nyuiuz woalc yaq hep nuex kaz vtueq jvp ruiux, vthuiuz kuex hvlx kaz kuiuz ngoz tueq nvr kuq tueq, piq thuiuz dungc hvlx kaq tueq, kvkaq dvyx kvtenc vtueq tsuinghez muex joalc moalc kuq tueq.

⁴⁰Raungyac kox shalx nyuip wvnc yaq nuex vthuiuz vsac jix nuiyc suk-ric jvrkanx thuiuz jix lotlaz Yesu kox nuex shvlx wvnc tueq. Kvkaq vpiq rueq tsuingshiq washiz maq washiz htauk nuex vpiq yauk tvdaungc vtueq tvhvlc kuq tueq.

⁴¹Htaungc htenc rueq muinz, “Mnoz kuex Tishox Saz rvtoq!” ngoz tueq kvjaz yunghvlc maq guyc vtueq miqmac kvpumz yaq jix gvnz wawc dung wvnc wuez tueq. Vpiq rueq htaungc htenc guyc sez yaq kuex tvbomc muq tvkoc tvwanc svl tueq. Yvmx khoc lac ngoz ruiux lec vpiq kuex Mesia ngoz tueq tsuingshiq rueq tuiuz yaq ningkhvnc nuex rvtueq.

⁴²Raungwuic wvnc koq tueq Yesu kuex kvtenc wvnc vtueq suinglix yaq baungshiz nuex kaz wvnc tueq. Miq htenc rueq vpiq kuex thuiyx wuez tueq, kvkaq vpiq kuex humc vtueq tsuingshiq kox wawc woz wvnc muq tvkoc tvwanc wuez tueq.

⁴³Yuq muinz vpiq rueq tsuingshiq muex, “Miq ghaq vbez nuex muinz Tishox Mungtan lvmx Thuix Thaungx Vhvlx kuex ngaz rueq tvluingc kuy juing rvtueq. Kvkhoc tvluingc kuy tvkoc Tishox rueq ngaz nvr tvkaz phuex,” ngoz tueq tsuingshiq muex jungx tueq.

⁴⁴Kvkhoc rvtueq wvmungx tuimx wawc vjux thoz yuimx htenc nuex vpiq rueq jungphvnx tvluing kuq tueq.