Read Tase Naga LUKA 5 Bible Online

LUKA 5 - Tase Naga bible

LUKA 5

¹Raungnuiyq shiz Yesu kuex Genesaret jumx kawx nuex jvp yaq nuex, miq htenc kuex Tishox bomjungc tay kay ngoz tueq miq htenc kuex vpiq kox nuex rv-phungc mvrc kaz tueq.

²Kvkaq vpiq rueq yuix kawx nuex vbuinc taq lix vnueyc kuex khiz tueq, ngaq khup jix nuk kuex limungx wawc svt kaz vtueq miqmac jak kuex hoal wuez tueq.

³Yesu kuex Simon limungx kvyuq duiz waung vtueq taungkawx httoarc wawc yuix mungx nuex phuinshiz saz tvhttot tvkoc jungx tueq. Yesu kuex limungx nuex ngaungc vtueq nuk miqsaz htenc kvmac tvluing kuq tueq.

⁴Vpiq rueq kvjaz jungc lot yix, Simon muex ngoc, “Yuix vthuiuz baung kvyuq lix kuex phuinshiz tvhttot vtueq ngaq lvp tvkoc nuimshiq jak kuex tvdvy shuinz,” ngoz tueq jungx tueq.

⁵Simon rueq, “Taungjix lex, nuiyshiq rueq raungwvrx wvrsez khup tiq rvhvt maq ngaq vshiz muinz lvp miq, yuq muinz mkvjaz ningkhvnc nuex ngaz rueq khup phaungx,” ngoz tueq tvralc tueq.

⁶Kvkhoc tsuinghez rueq tvdvy khup koq tueq, ngaq phungc shiz khup lvp vtueq jak doc muinz kvjuirc kaz khvmkhvmz rvtueq.

⁷Kvkhoc rvtueq tsuingshiq rueq kungjix bix vbez lix kuex yauk maq yvp gvl tueq, tsuingshiq muinz kaz wuez vtueq lix vnueyc rac nuex ngaq mvrc laz htawc koq tueq lix kuex suingx wvnc khvmkhvmz rvtueq.

⁸Kvruex Simon Peter rueq khiz vtueq Yesu yaz phaungx nuex bumx ruiux, “Taungjix lex, ngvy kox wawc kvyenc wvnc kuiuz!” Ngaz kuex mvrax vhttax miqsaz rvtauk! ngoz tueq.

⁹Simon nuiyc piq rulc roc nuex ngaq khup naungc jix htenc kuex ngaq paunghvlc lvp ningkhvnc nuex vwangc rvwuez tueq.

¹⁰Simon rulc ngaq lvp naungc jix Zebede saz nueyc Yaku nuiyc Yohan muinz wangc wuez tueq. Yesu rueq Simon muex, “Nauk hiz kaz majuiuc vmaq phaungc vtueq miq khup jix muex yaungx tuiux,” ngoz tueq jungx kuq tueq.

¹¹Tsuingshiq rueq lix htenc kuex taungkawx nuex buinc taq shec ruiux, httax yaq hup svmx htenc muinz gay shec vtueq vpiq yix nuex phvnx wvnc naungx tueq.

¹²Laukshiz Yesu kuex miq ghaqyungx ghaqshiz nuex httax tueq, kvruex ghaqyungx kvyuq gvnpumz vshungx miq washiz vhttax rvtueq. Kvruex waz kvraq Yesu kuex khiz vtueq bumx nawk ruiux, “Taungjix lex, mthuinz roc ngoz ruiux kuex ngaz vruex tvsawc kuq lot phux!” ngoz tueq thoz tueq.

¹³Yesu rueq vyauk tenz vtueq kvruex waz gvnz nuex tuingc ruiux, “Ngaz rueq tay kuq roc vphaungx sawc wvnc kuiuz!” ngoz tueq. Kvkaq dvyx vshungx waz kuex hvlx wvnc tueq.

¹⁴Kvkaq Yesu rueq, “Vruex lvmz kuex ukhaq muex muinz nauk tvtay jungx kaz shomc waz kox nuex tvpvnz juit kaz vtueq mshauk pumz kuex tvlawc kaz kuiuz; kvruex yimaq mnoz hvlx wvnc toq lvmz kuex miq ruip rawx htumc nuex hakhix yaungc tvkoc Moshe rueq nvr tueq rulc rv-ngvlc shomc nawk kuy shomc kuq kaz kuiuz,” ngoz tueq jungx kuq tueq.

¹⁵Yuq muinz Yesu thaungc kuex baung ruip saz nuex thaungbaungx wvnc ningkhvnc nuex nuk miqsaz htenc kuex bomjungc tay kay nuiyc tsuingshiq vthuiuz vsac htenc kuex hvlc kay tvkoc rvtuimx kaz tueq.

¹⁶Yuq muinz Yesu kuex htungx httax yaq rulc rv-ngvlc yaruix rumz nuex kaz vtueq vjux thoz kaz tueq.

¹⁷Raungnuiyq shiz Yesu rueq tvluing kuq yaq nuex Galile mungx tvroz nuiyc Yuda mungx hong ghaq ruip saz wawc muinz Yerusalem ghaq maq vkaz Pharise nuk nuiyc Tvrac tvluingc waz hez htenc kuex vpiq hep nuex ngaungc kaz tueq. Vthuiuz vsac jix tvhvlc kuy tvkoc Taungjix luimc vkawc kuex Yesu htauk nuex httax tueq.

¹⁸Miq wvyvmc rueq gvnmaungx miq washiz kuex khvy tuimx rulc vdvmz pix wvnc tueq. Kvruex vthuiuz waz kuex yuimx mungx nuex pix wvnc vtueq Yesu khaungkac nuex tvbumc wvnc tvkoc hunglaungx wuez tueq.

¹⁹Yuq muinz miq mvrc kaz koq tueq mkhoc maq muinz tv-nyuip pix wvnc lot muq ningkhvnc nuex yuimx wux khux nuex duiz woz vtueq, wux khux tvpuc ruiux vthuiuz waz kuex khvy tuimx rulc vdvmz miq phungc mungx kvyuq Yesu khaungkac nuex tvsvt tvdvy kuq tueq.

²⁰Yesu rueq tsuingshiq kvmluimx thuinz httax yaq kuex khiz vtueq gvnmaungx waz muex, “Miq waz lex, mmvrax htenc kuex dawc kuq gay vphaungx,” ngoz tueq.

²¹Tvrac tvluingc waz hez nuiyc Pharise nuk rueq, “Vruex waz kuex yvmx khoc miq lac vpiq rueq Tishox muex yomnamc kvjaz kvjak yaq! Tishox maq lvy vtueq uraq lac mvrax dawc kuq lot yaq nguinx!” ngoz tueq tvmaung wuez tueq.

²²Tsuingshiq rueq kvkhoc tvmaung yaq lvmx kuex Yesu rueq tuiuz ningkhvnc nuex, “Nuimshiq rueq yvmx ngoz tueq lac kvkhoc tvmaung vshuinx?

²³‘Mmvrax dawc kuq gay vphaungx,’ ngoc kvjaz shuex vyoalx, rvmuq ngoz ruiux ‘Kvtenc vtueq khuemx wvnc kuiuz,’ ngoz tueq jungc lac yoalx yaq nguinx?

²⁴Miq Saz vruex kuex ghaq htauk wawc mvrax dawc kuy tvkoc vrangx vpangx vhttax lvmx kuex nuimshiq muex ngaz rueq hakhix tvkhic vphaungx,” ngoz tueq vhtaq maq vjungx gvnmaungx waz muex, “Mnoz muex ngaz rueq jungx kuq ix, kvtenc kuiuz mkhvy tuimx kuex pix vtueq m-yuimx nuex waung wvnc kuiuz!” ngoz kuq tueq.

²⁵Kvkaq dvyx kvruex waz kuex miq htumc nuex kvtenc wvnc vtueq piq woalchuing khvy tuimx kuex pix wvnc ruiux Tishox kejux kuex tvtsvmc yaq lvmx maq vyuimx nuex waung wvnc tueq.

²⁶Miq lotlaz kuex pinhtumc wangc wuez vtueq, “Vwangc juing kuex naungshiq rueq majuiuc raungnuiyq khiz wvnc tiq!” ngoz tueq Tishox muex tvtsvmc kvmc wuez tueq!

²⁷Kvruex yimaq Yesu kaz wvnc vtueq Lewi ngoz yaq muinghic jix waz kuex rungx nuex vngaungc khiz vtueq, Yesu rueq, “Ngvy yix nuex phvnx koq,” ngoz tueq.

²⁸Lewi rueq httax yaq htenc kuex gay shec ruiux kvtenc damz vpiq yix nuex phvnx wvnc naungx tueq.

²⁹Kvkaq Lewi rueq piq yuimx nuex Yesu muex tv-phuiuz svy tvkoc moalx yungx vshiz tvhungx tueq, wuinz waz htenc kvmaq muinghic jix nuk nuiyc miq vganc muinz paunghvlc vhttax rvtueq.

³⁰Pharise nuk nuiyc Tvrac tvluingc waz hez wvyvmc rueq Yesu sangac bix muex, “Yvmx ngoz tueq lac nuimshiq kuex muinghic jix nuiyc vtvdux vruex gay miq rulc vdvmz nuex phauk saq vshuinx?” ngoz tueq wiz tueq.

³¹Yesu rueq tvralc tueq, “Phumz shuimc jix ngoz yaq kuex miqhvlx jix tvkoc rax muq, vthuiuz vsac jix tvkoc dvyx rax yaq.

³²Ngaz kuex tsuingrux miqsaz thuinz tvlayc vtueq gvlc wvnc tvkoc vkaz rvmuq, vtvdux vruex jix htenc thuinz layc wvnc tvkoc gvlc kay vkaz rvtauk,” ngoz tueq jungx tueq.

³³Miq wvyvmc rueq Yesu muex, “Yohan sangac bix nuiyc Pharise nuk sangac bix rueq phuiuz svy mamc vtueq vjux thoz yauk lox lox thoz yaq. Yuq muinz msangac hez rueq kuex yvmx ngoz tueq lac phauk saq laq shvnx,” ngoz tueq jungx tueq.

³⁴Yesu rueq tsuingshiq muex, “Miqlvmc moalx nuex waz nyalx waz vhttax wawwawx moalx wuinz htenc muex phuiuz svy tvmamc mvy yaq haz?” ngoz tueq.

³⁵Yuq muinz, “Waz nyalx waz kuex tsuingshiq kox wawc tv-phvlc shvlx wvnc juing raungnuiyq httuiuc wvnc tuex, kvkaq jix tsuingshiq rueq phuiuz svy mamc wuez shuex,” ngoz tueq tsuingshiq muex jungx tueq.

³⁶Yesu rueq tsuingshiq muex bomc tv-ngvlc maq jungx kuq tueq, “Khvymvnz vnyalx wawc phushiz juir vtueq khvy vjez nuex tvkop tvdamx jix kuex ukhaq muinz vguez, kvkhoc tvdamx ruiux yuq kuex khvymvnz vnyalx phux tvbac gay dvyx muinz rvmuq, khvymvnz vkez nuiyc khvymvnz vnyalx kuex rv-ngvlc muq rvtuex.

³⁷Kvrulc rv-ngvlc svpiq tix vnyalx kuex zaungbumx juix vkez nuex htawc tvy jix kuex ukhaq muinz vguez, kvkhoc htawc ruiux yuq kuex zaungbumx juix kuex phuk khoz wvnc vtueq svpiq tix muinz yvlx wvnc tuex, zaungbumx juix muinz bac kaz tuex.

³⁸Kvkhoc rvtueq svpiq tix vnyalx kuex zaungbumx juix vnyalx nuex dvyx htawc yaq!

³⁹Svpiq tix vkez nuingc jix waz rueq svpiq tix vnyalx kuex nuingx roc muq. ‘Vkez kvdvyx vnuingc muex vhvlx,’ ngoz tueq jungx yaq,” ngoz tueq.