Read Tase Naga YOHAN 1 Bible Online

YOHAN 1 - Tase Naga bible

YOHAN 1

¹Vphaungc vyaungc maq phuex Bomjungc httax tueq; kvruex Bomjungc kuex Tishox rulc vroc nuex httax yaq, vruex Bomjungc kuex Tishox rvtueq.

²Vphaungc vyaungc maq phuex Bomjungc kuex Tishox rulc vroc nuex httax tueq.

³Tishox rueq Bomjungc vmaq httax yaq lotlaz tvdung sung taq tueq; vtvdungc sungc vruez phvnx lotlaz kuex vpiq lomx muq maq vyaungx wvnc phvnx shiz muinz vguez.

⁴Bomjungc kuex rullungx thuiuzthuic pauk rvtueq, kvruex rullungx kuex miqsaz tvkoc vwuic rvtueq.

⁵Kvruex vwuic kuex raungnyauk mungx nuex wuix vtueq raungnyauk rueq raungwuic kuex mkaq muinz puingc lot muq.

⁶Tishox rueq Yohan ngoz yaq waz kuex vpiq kamx waz muex tvkaz tueq.

⁷Bomjungc kuex miq lotlaz rueq tay vtueq kvmluimx wvnc tvkoc kvruex waz rueq raungwuic lvmx kuex hakhix khvmc tvkoc httuiuc kaz tueq.

⁸Piq pumz kuex raungwuic muik shauk rvmuq, raungwuic lvmx kuex hakhix khvmc tvkoc vkaz dvyx rvtueq.

⁹Kvruex raungwuic kuex mungkawx vyuq httuiuc kaz vtueq miq ruip rawx htauk nuex tvwuic yaq raungwuic muik shauk rvtueq.

¹⁰Bomjungc kuex mungkawx nuex httax yaq, Tishox rueq mungkawx kuex bomjungc maq tvdung sung tueq, yuq muinz mungkawx rueq bomjungc kuex tuiuz wuez muq.

¹¹Vpiq kuex vghaq vraungx nuex httuiuc kaz tueq, yuq muinz vnuk vgaq phvnx rueq vpiq kuex lvp wvnc muq.

¹²Yuq muinz miq wvyvmc kuex vpiq muex kvmluimx vtueq lvp wvnc ningkhvnc nuex, vpiq rueq tsuingshiq kuex Tishox sahez muex yaungc wvnc vkhangx kuq tueq.

¹³Tsuingshiq kuex miqsaz htungx vlayx maq vjawx sahez yaungx wvnc tueq ikhoc Tishox sahez muex yaungx wvnc tueq rvmuq; Tishox vpiq pumz maq vsaz muex tvyaungc rvhumc jix hez dvyx rvtueq.

¹⁴Bomjungc kuex miqsaz gvnngvmx muex yaungx kaz vtueq, kejux nuiyc tsuingrux lvmx mvrc ruiux naungshiq rulc httax wvnc tueq. Naungshiq rueq vpiq ngauz vngax kuex khiz wvnc tiq, kvruex ngauz vngax kuex Vwaz kox wawc Vsaz vshiz lauklauk waz rueq lvp wvnc tueq lvmz rvtueq.

¹⁵Vpiq lvmx Yohan rueq jungx tueq kuex, “Ngvy yix nuex kaz yaq waz vpiq kuex ngaz max jawx nuex phuex vhttax waz ningkhvnc nuex, ngvy htauk nuex vyungx rvtueq, ngoz tueq ngaz rueq hakhix khvmc tauk waz kuex vruex waz vruex rvtueq,” ngoz tueq ramc jungx tueq.

¹⁶Vpiq kuex ruimrix kejux mvrc yaq waz rvtueq rulc rv-ngvlc vpiq rueq naungshiq wvyvmc muex ruimrix kejux kuy ningkhvnc nuex, htvp shiz maq htvp shiz lvp wvnc vshix rvtueq.

¹⁷Tishox rueq Moshe maq raz tueq Tvrac kuex kuq phuex, yuq muinz kejux nuiyc tsuingrux lvmx kuex Yesu Christu maq httuiuc kaz tueq.

¹⁸Tishox kuex uraq muinz mkaq muinz khiz muq. Vwaz hep nuex httaz jix, Tishox rvtueq Vsaz pumshiz waz rueq dvyx vpiq kuex tvkhic tueq.

¹⁹Yerusalem wawc vrangx vpangx lvp jix Yuda miqsaz htenc rueq shomc waz bix nuiyc Lewi miqsaz wvyvmc kuex Yohan kox nuex tvkaz vtueq, “Mnoz kuex ukhaq lac?” ngoz tueq tvwiz kaz tueq.

²⁰Kvkaq Yohan rueq, “Ngaz kuex Mesia rvmuq,” ngoz tueq kvduimx muq maq kvjungc tueq.

²¹Kvkaq tsuingshiq rueq, “Ngoz ruiux mnoz kuex ukhaq lac? Elia haz?” ngoz tueq wiz tueq, Yohan rueq, “Ngaz kuex rvmuq,” ngoz tueq tvralc tueq. Tsuingshiq rueq, “Mnoz kuex shvmmax haz?” ngoz tueq wiz yek tueq. “Ngaz kuex shvmmax muinz rvmuq,” ngoz tueq tvralc tueq.

²²Kvruex rvtueq tsuingshiq rueq, “Nuiyhez nvrc jix hez muex bomc tvralc phvnx shishiz kuex lvmc kuy wvnc juing rvtueq, mnoz shauk pumz kuex ukhaq lac kv-ngoc vtuiux?” ngoz tueq piq muex wiz tueq.

²³Yohan rueq, Esaia shvmmax rueq jungx tueq rulc rv-ngvlc: “Ngaz kuex ‘Taungjix tvkoc lvmx tvlanc wuez shuinz, ngoz tueq kumtsvy tvnx nuex guyc yaq waz rvtauk!’ ” ngoz tueq.

²⁴Kvruex kamx waz hez kuex Pharise nuk kox wawc rvtueq,

²⁵kvmaq tsuinghez rueq, “Mnoz kuex Mesia muinz rvmuq, Elia muinz rvmuq, shvmmax muinz rvmuq ngoz ruiux kuex yvmx ruemc lac yuix luip kuq vshuiux?” ngoz tueq Yohan muex wiz tueq.

²⁶Yohan rueq tsuingshiq muex, “Ngaz rueq yuix maq yuix luip dvyx kuq vphaungx. Yuq muinz nuimshiq hvlwvl nuex nuimshiq rueq tuiuz muit washiz jvp yaq.

²⁷Kvruex waz kuex ngvy yix nuex httuiuc kaz ruiux yuq, ngaz rueq vpiq yapaungc ruiuz dawc kuy doc muinz hungx mauk,” ngoz tueq tvralc tueq.

²⁸Vruex lvmz htenc lotlaz kuex Yohan rueq yuix luip kuq tueq Yodan Ruilx maq kvkox ral shaldungc kox wawc Bethany ghaq maq vyaungx wvnc rvtueq.

²⁹Raungnvp kvyix Yohan rueq piq kox nuex Yesu kaz yaq kuex khiz vtueq, “Mungkawx miqsaz mvrax gurc kuy gay jix waz Tishox Khelbuenx Saz rvtueq!

³⁰‘Miq washiz kuex ngvy yix nuex httuiuc kaz yaq, yuq muinz vpiq kuex ngvy htauk nuex vyungx rvtueq, yvmx khoc lac ngoz ruiux lec vpiq kuex ngaz max jawx nuex phuex vhttax shex waz rvtueq,’ ngoz tueq, ngaz rueq jungx tauk kuex vruex waz vruex rvtueq.

³¹Vpiq kuex ukhaq wuez rvtvnx ngaz rueq tuiuz mauk, yuq muinz vpiq kuex Israel miqsaz htenc rueq vpiq kuex tuiuz laz juing kvkhic tvkoc yuix maq yuix luip kuy muex ngaz httuiuc kaz tauk,” ngoz tueq.

³²Kvruex yimaq Yohan rueq, “Siyac kuex raungmungx maq hituiuc ikhoc svt kaz vtueq vpiq htauk nuex httax yaq.

³³Ngaz rueq vpiq kuex ukhaq wuez raz tvnx tuiuz mauk, yuq muinz ngaz muex yuix maq yuix luip kuy tvkoc nvrc tvkay jix waz Tishox rueq, ngaz muex jungx phuex kuex, ‘Siyac svt kaz vtueq miq washiz htauk nuex httax yaq kuex mnoz rueq khiz shuiux; vpiq kuex Vsawc Siyac maq yuix luip kuy jix waz rvtueq.’

³⁴Kvkhoc jungx tueq rulc rv-ngvlc yaungx wvnc tueq kuex ngaz rueq khiz tauk,” ngoz tueq. Kvmaq raz tueq Yohan rueq, “Ngaz rueq nuimshiq muex jungx kuq ix, vruex waz kuex Tishox Saz rvtueq,” ngoz tueq jungx tueq.

³⁵Raungnvp kvyix Yohan rulc piq sangac wanueyc vdvmz nuex jvp tueq,

³⁶Yesu kaz yaq kuex piq rueq khiz vtueq, “Tishox Khelbuenx Saz kuex lawc shuinz!” ngoz tueq.

³⁷Sangac wanueyc kuex piq rueq jungx tueq kvjaz tay vtueq Yesu yix nuex phvnx wvnc naungx tueq.

³⁸Yesu rueq yix kox nuex nyez lawc koq tueq tsuingnueyc rueq vpiq yix phvnx naungx yaq kuex khiz vtueq, “Nuimnueyc rueq yvmx lac thuiyx vshuinx?” ngoz tueq wiz tueq. Tsuingnueyc rueq, “Rabbi mnoz m-yuq lac httax vtuiux,” ngoz tueq wiz tueq. (Rabbi ngoz yaq kuex “Tvluingc waz” ngoc bomc rvtueq.)

³⁹Yesu rueq, “Kaz vtueq lawc kaz kuinz,” ngoz kuq tueq. Tsuingnueyc rueq phvnx laq naungx vtueq vpiq httax juing m-yuq lac kuex khiz kaz tueq; kvruex raungnuiyq nuiyqtuimc vpiq rulc dvyx guilc tueq. (Kvruex baunglaung kuex raungyac shalhtaz bvlic tvnx rvtueq.)

⁴⁰Yohan kvjaz tay vtueq Yesu yix nuex phvnx lvy jix wanueyc wawc washiz kuex, Simon Peter nox Andru rvtueq.

⁴¹Kvkaq yauk lox maq vphuz Simon rulc rvhumc vtueq, “Mesia rulc nvnueyc rvhumc tiq,” ngoz tueq. (Mesia ngoz yaq kuex Christu ngoc bomc rvtueq.)

⁴²Kvruex yimaq vphuz Simon kuex Yesu kox nuex shvlx wvnc tueq. Yesu rueq Simon kuex lawc vtueq, “Mnoz kuex Yohan saz Simon rvtoq, mmuingc Kepha ngoz tueq muingc juing,” ngoz tueq. (Kepha ngoz tueq kuex Peter ngoc bomc dvyx rvtueq, kvruex vlvmz kuex “lung” ngoc rvtueq.)

⁴³Raungnvp kvyix Yesu kuex Galile mungx nuex kay tvkoc dvnc tueq. Philip kuex khiz vtueq, “Ngvy yix nuex phvnx naungx koq,” ngoz tueq.

⁴⁴(Philip kuex Andru nuiyc Peter httaz yaq Betsaida ghaq jix rvtueq.)

⁴⁵Philip kuex Nathanael rulc rvhumc vtueq, “Moshe Tvrac luik nuex muinz, shvmmax luik nuex muinz tvhungx wuiyq shec tueq waz kuex nuiyshiq rueq humc tiq, vpiq kuex Yosep saz Nazaret jix Yesu rvtueq,” ngoz tueq piq muex jungx kuq tueq.

⁴⁶Nathanael rueq piq muex, “Nazaret ghaq wawc vhvlx phvnx phvnx shishiz dung lot yaq haz?” ngoz tueq wiz tueq. Philip rueq, “Lawc kaz loq nauz,” ngoz tueq tvralc tueq.

⁴⁷Nathanael kaz yaq kuex Yesu rueq khiz vtueq, “Kvyonc yuk thuinz vguez waz Israel miqsaz muik shauk waz kuex lawc shuinz!” ngoz tueq.

⁴⁸Nathanael rueq, “Mnoz rueq ngaz kuex yvmx khoc maq lac tuiuz vphux?” ngoz tueq wiz tueq. Yesu rueq, “Mnoz kuex Philip rueq max gvl shauk nuex phuiuq muiuq jungx yaz nuex httax toq ikaq phuex mnoz kuex ngaz rueq khiz phaungx,” ngoz tueq.

⁴⁹Kvkaq Nathanael rueq, “Tvluingc waz lex, mnoz kuex Tishox Saz rvtoq! Mnoz kuex Israel phvnx Hokhvmx waz rvtoq!” ngoz tueq tvralc tueq.

⁵⁰Yesu rueq, “Mnoz kuex ngaz rueq phuiuq muiuq jungx khung nuex khiz phaungx ngoc bomc kvmac dvyx haz mnoz kvmx vtuiux? Kvruex htauk nuex muinz yunghvlc yauk shuimc htenc kuex mnoz rueq khiz lvp shuiux!” ngoz tueq.

⁵¹Kvruex kaq vpiq rueq tsuingshiq muex, “Ngaz rueq nuimshiq muex vsuing jungx kuq ix, raungx kvdaz wvnc vtueq, Tishox raungkamx waz hez kuex Miq Saz htauk vyuq vduiz vsvt rvyaq kuex nuimshiq rueq khiz lvp shuinx,” ngoz tueq.