Read Tase Naga YOHAN 10 Bible Online

YOHAN 10 - Tase Naga bible

YOHAN 10

¹Yesu rueq, “Ngaz rueq nuimshiq muex vsuing jungx kuq ix, khelbuenx ruk mungx nuex kaluix maq nyuip muq maq, ruk htauk maq kvlek nyuip jix waz kuex vguiuq waz rvtueq.

²Kaluix maq nyuip jix waz kuex khelbuenx remc jix waz rvtueq.

³Kaluix bvmc jix waz rueq muinz piq muex kaluix kuex daz kuq yaq, khelbuenx hez rueq muinz piq thuic bomc kuex tay thenc yaq, piq rueq muinz khelbuenx htenc kuex vmuingc gvl vtueq ruk phic nuex shvlx tvdung laq yaq.

⁴Khelbuenx htenc kuex gvl tvdung lot vtueq khelbuenx kung max nuex kaz tuex, khelbuenx phungc rueq muinz piq thuic bomc kuex tay tvtsuingc vtueq piq yix nuex phvnx yaq.

⁵Khelbuenx htenc rueq miq vganc yix nuex phvnx shuex rvmuq, miq vganc kvjaz kuex tuiuz muq rvtueq vyuz dvyx rvwvnc tuex,” ngoz tueq jungx tueq.

⁶Yesu rueq bomc tv-ngvlc maq tsuingshiq muex jungx kuq tueq, yuq muinz vpiq rueq jungx yaq lvmz kuex tsuingshiq rueq tvrv-phvlc tuiuz muq.

⁷Kvkhoc rvtueq Yesu rueq jungx yek tueq, “Ngaz rueq nuimshiq muex vsuing jungx kuq ix, ngaz kuex khelbuenx htenc nyuip juing kaluix rvtauk.

⁸Ngvy max nuex kay jix hez kuex vguiuq rvtueq, khelbuenx kung rueq muinz tsuingshiq kvjaz kuex tay muq.

⁹Ngaz kuex kaluix lvmx rvtauk, kvruex kaluix lvmx maq nyuip jix waz kuex palc daungc wvnc rvhumc tuex, vdungc muinz vnyuip muinz mvy yaq phuiuz svy juing muinz humc shuex.

¹⁰Vguiuq jix kuex vguiuq muex, vthvy muex nuiyc tvbac gay muex ngoz tueq kaz tuex, ngaz kuex tsuingshiq rullungx tvraungx wvnc tvkoc nuiyc rullungx kuex hunghtaungx laz mlvp wvnc shueq ngoz tueq vkaz rvtauk.

¹¹“Ngaz kuex khelbuenx remc jix miq hvlx rvtauk, khelbuenx remc jix miq hvlx rueq khelbuenx hez tvkoc piq thuiuzthuic kuy gay khvmc lot shuex.

¹²Vshap vruex kolix waz kuex khelbuenx taungjix waz rvmuq, vtaungjix waz rvmuq ningkhvnc nuex shoalx kaz yaq kuex khiz ruiux yuq, khelbuenx htenc kuex gay shec ruiux piq vyuz rvwvnc tuex, shoalx rueq muinz khelbuenx htenc kuex tvpanc yurc vtueq kauk gay tsuiyc shuex.

¹³Kvruex waz kuex vshap vruez kolix ningkhvnc nuex khelbuenx tvkoc yvmx muinz tvmaung muq maq yuz wvnc tuex.

¹⁴Ngaz kuex khelbuenx remc jix miq hvlx rvtauk; Iwaz rueq ngaz tuiuz yaq, ngaz rueq muinz Iwaz tuiuz vshaungx, kvkhoc ngvy khelbuenx hez kvmuinz ngaz rueq tuiuz vshaungx, ngvy khelbuenx kung rueq muinz ngaz tuiuz yaq, khelbuenx hez tvkoc nuex ngvy thuiuzthuic kuq gay lot shaungx.

¹⁶Vruex ruk mungx vyuq nyuip muq vganc khelbuenx htenc muinz ngaz rueq lvp tauk, kvruex htenc kvmuinz ngaz rueq shvlx wvnc shaungx, tsuingshiq rueq ngvy kvjaz tay shuex, kvkhoc rvtueq khelbuenx hez muinz phungc shiz dvyx yaungx tuex, khelbuenx remc jix waz muinz washiz dvyx rvtueq.

¹⁷“Ngaz rueq rullungx mlvp wvnc shueq ngoz tueq ngvy thuiuzthuic kuex lekuq gay tauk ningkhvnc nuex, Iwaz rueq ngaz lungwawx yaq.

¹⁸Ngvy thuiuzthuic kuex uraq muinz lvmz gay lot shuex rvmuq. Ngvy thuinz maq vkuq gay rvtueq. Vlekuy gay vkhangx nuiyc vtvyez lvmc wvnc vkhangx ngaz rueq lvp tauk. Kvkhoc shuimc tvkoc Iwaz rueq ngaz muex nvr phuex,” ngoz tueq.

¹⁹Kvkhoc jungc kuy ningkhvnc nuex miq htenc kuex thuinz rungx raz muq yaungx wvnc tueq.

²⁰Tsuingshiq phungc wawc miq paunghvlc rueq, “Vpiq kuex htaungc kvpumz vtueq vngaz rvkaz! Vpiq kvjaz kuex yvmx ngoz tueq lac tay vshuinx?” ngoz tueq.

²¹Yuq muinz vganc jix rueq, “Htaungc kvpumz jix miq washiz rueq kvkhoc kvjaz kuex jungx lot muq! Htaungc kvpumz jix waz rueq yvmx khoc maq lac muik mawz jix htenc muik kuex tvkhic tvhvlc kuq lot shvnx?” ngoz tueq.

²²Kvruex baunglaung Yerusalem nuex Shomc Yuimx Waungc Moalx httuiuc wvnc tueq, kvkaq kuex raunglawc yac shex rvtueq.

²³Yesu kuex Shomc Yuimx wawc Solomon rankanx nuex khuemx yaq rvtueq.

²⁴Kvkaq miq htenc rueq vpiq kuex tvroz tuimx vtueq, “Mnoz rueq mtanc khvnc nuex httuiuc laz lac nuiyshiq thuinz tvmvruz raung kuy dvnc vphux, mnoz kuex vsuing Mesia doc ngoz ruiux lec nuiyshiq muex rvkhauk laz jungx kuq koq,” ngoz wuez tueq.

²⁵Yesu rueq, “Nuimshiq muex ngaz rueq vjungc kuy wuez shex, yuq muinz nuimshiq kvmx muit, Iwaz vrangx vpangx maq ngaz rueq shuimx vshaungx yauk shuimc htenc rueq ngvy lvmz hakhix khvmc kuq yaq;

²⁶yuq muinz nuimshiq kuex ngvy khelbuenx htenc rvmuq ningkhvnc nuex kvmx wuez muit.

²⁷Ngvy khelbuenx htenc rueq ngvy kvjaz tay yaq; ngaz rueq muinz tsuingshiq tuiuz yaq ningkhvnc nuex tsuingshiq rueq muinz ngvy yix nuex phvnx yaq.

²⁸Tsuingshiq muex ngaz rueq pattup rullungx kuq tauk ningkhvnc nuex tsuingshiq kuex mkaq muinz vthueyc rvhumc tuex rvmuq. Ngvy yauk wawc tsuingshiq kuex uraq muinz nyvlc lot muq.

²⁹Tsuingshiq kuex ngvy yauk nuex lekuy jix waz Iwaz kuex phvnx ruip saz htauk nuex vyungx rvtueq, kvkhoc rvtueq tsuingshiq kuex Iwaz yauk wawc uraq muinz nyvlc wvnc lot muq.

³⁰Ngaz nuiyc Iwaz kuex vshiz dvyx rvtiq,” ngoz tueq.

³¹Kvkaq miq htenc rueq vpiq kuex tuip muex lung tsenz yek wuez tueq.

³²Yesu rueq tsuingshiq muex, “Ngaz rueq shuimc tvkoc Iwaz rueq ngaz muex kuq phuex vhvlx yauk shuimc paunghvlc kuex nuimshiq htumc nuex ngaz rueq shuimx wvnc tauk; kvruex yauk shuimc htenc kvwawc mruex phvnx ningkhvnc nuex lac ngaz kuex lung maq tuip gay dvnc vphuinx?” ngoz tueq wiz tueq.

³³Tsuingshiq rueq, “Vhvlx yauk shuimc phvnshiz shiz mnoz rueq shuimc ningkhvnc nuex nuiyshiq rueq mnoz tuip dvnc vphix rvmuq! Mnoz kuex mungkawx miqsaz rvhvt maq, Tishox ngoz tueq kv-ngoc vtuiux lvmz kuex Tishox muex yomnamc kvjaz jungx vshuiux ningkhvnc nuex lung maq tuip gay dvnc vphix!” ngoz tueq.

³⁴Yesu rueq, “Nuimshiq Tvrac luik nuex Tishox rueq, ‘Nuimshiq kuex tishox htenc rvtuit,’ ngoz tueq jungx shec tueq rvmuq haz?.

³⁵Tishox rueq vpiq bomjungc kuq shec tueq miqsaz htenc ngoc tishox htenc ngoz tueq muingc tueq ningkhvnc nuex, Rumvrc luik nuex jungx shec tueq kvjaz htenc kuex mkaq muinz rvkhauk laz rvtueq naungshiq rueq tuiuz wuez vshix.

³⁶Ngaz kuex Iwaz rueq thvl vtueq mungkawx vyuq tvkaz phuex. Kvkhoc rvtueq ngaz kuex Tishox Saz rvtauk ngoz tueq kvjungc phaungx tueq, ngaz rueq Tishox muex yomnamc kvjaz kvjak yaq ngoz tueq yvmx khoc lac nuimshiq rueq ngoz lot vshuinx?

³⁷Ngaz muex Iwaz rueq tvshuimc roc yaq yauk shuimc htenc kuex ngaz rueq shuimx mauk ngoz ruiux yuq ngaz muex nauk kvmx vkueq.

³⁸Yuq muinz ngaz rueq shuimx vshaungx ngoz ruiux yuq kuex, ngaz muex kvmx muit ngoz ruiux yuq muinz ngvy yauk shuimc muex kvmx kuinz; kvkhoc ngoz ruiux jix Iwaz kuex ngaz rulc, ngaz muinz Iwaz rulc httax vtaungx lvmx kuex nuimshiq rueq tuiuz wvnc shuinx,” ngoz tueq.

³⁹Kvkaq tsuingshiq rueq vpiq kuex lvp tvkoc hunglaungx wuez yek tueq, yuq muinz vpiq kuex tsuingshiq lez gay shec ruiux dung kaz wvnc tueq.

⁴⁰Vpiq kuex Yohan rueq vphaungc nuex yuix luip kuq tueq baung Yodan Ruilx kvkox ral nuex kaz wvnc vtueq httax tueq.

⁴¹Kvkaq vpiq kox nuex miq paunghvlc kaz wuez vtueq, “Yohan rueq vwangc juing romzyac yvmx muinz tvkhic muq doc; yuq muinz vruex waz lvmz Yohan rueq jungx wvnc tueq htenc kuex rvkhauk laz rvtueq,” ngoz wuez tueq.

⁴²Kvkhoc rvtueq kvruex baung wawc miq paunghvlc vpiq muex kvmx wvnc wuez tueq.