Read Tase Naga YOHAN 12 Bible Online

YOHAN 12 - Tase Naga bible

YOHAN 12

¹Tvlvy Wvnc Moalx httuiuc muex raungx tvruk ngoc yaungc nuex vmaungx wawc tvyuing tueq Lazaru httaz juing Bethany ghaq nuex Yesu kaz tueq.

²Tsuingshiq rueq vpiq muex raungyac dungc tvsaq vtueq, Mahta rueq phuiuz vsvy tvkuiux raz kuq tueq; vpiq rulc humpanx nuex vroc phauk saq yaq phungc kvyuq Lazaru muinz lomx tueq.

³Kvruex kaq Mary rueq pinhtumc htawz tsanc hvlc phvnx nadu vhomc tix khvnthuimx tanc maq Yesu yaz nuex nyvt kuq ruiux, piq khux mul maq tuit kuq tueq. Nadu vhomc tix thuingc kuex wvyuimx tuimx nuex homc thuingx wvnc tueq.

⁴Yesu sangac bix phungc wawc washiz rvtueq Yuda Iskarut rueq vkhoc ngoz tueq,

⁵“Nadu tix vruex kuex kuimphox shac thuimx nuex shaung vtueq htemc saz jix muex phvlx kuq muq rvtvnx?” ngoz tueq. Piq kuex yix maq Yesu lekuy gay jix waz rvtueq.

⁶Piq rueq kvkhoc ngoz tueq kuex htemc saz jix muex menjenc vtueq vjungx rvmuq, piq kuex vguiuq vrot jix waz ningkhvnc nuex rvtueq, piq kuex kuimphox khak wic jix waz ningkhvnc nuex kuimphox htenc kuex guiuq vtueq shuimc jix waz rvtueq.

⁷Yuq muinz Yesu rueq, “Kvruex nyuiuz kuex nauk tvruing raung kaz! Ngaz luip gay phuex raungnuiyq tvkoc piq rueq tvhungx taq tueq.

⁸Htemc saz jix kuex nuimshiq rulc vdvmz nuex mkaq muinz httax naungx yaq, yuq muinz ngaz kuex nuimshiq rulc mkaq muinz httax naungx phaungx rvmuq,” ngoz tueq.

⁹Bethany ghaq nuex Yesu httuiuc kaz tueq kuex tay vtueq, miq vkung vdaungx htenc kuex kvruex ghaq kvyuq httuiuc kaz tueq, tsuingshiq kuex Yesu kox nuex kay dvyx rvmuq, vpiq rueq vmaungx wawc vtvyuing waz Lazaru muinz khic roc vtueq kaz wuez tueq.

¹⁰Kvkhoc ningkhvnc nuex shomc walaungx bix rueq Lazaru thvy gay tvkoc tvnz tueq,

¹¹yvmx khoc lac ngoz ruiux lec Lazaru piq ningkhvnc nuex Yuda miqsaz paunghvlc rueq tsuinghez kuex gay shec ruiux, Yesu muex kvmluimx wvnc ningkhvnc nuex rvtueq.

¹²Raungnvp kvyix moalx nuex httuiuc kay jix miq vkung vdaungx htenc rueq Yerusalem nuex Yesu kaz yaq kuex tay vtueq,

¹³pam yauk laungx tuz htenc shuimx ruiux kaz wvnc vtueq, “Tishox ngauz vngax kuex tvtsvmc kvmc wuez shuinz! Taungjix muingc maq httuiuc kay jix Israel Hokhvmx waz kuex thuinz mhvlx kueq!” ngoz tueq guyc ruiux malc laz wuez tueq.

¹⁴Kvkaq Yesu kuex loze saz vshiz humc vtueq ngaungc tueq, Rumvrc luik nuex,

¹⁵“Zion ghaqyungx nauk hiz kaz! Lawc shuiuz mhokhvmx waz kuex loze saz htauk nuex ngaungc vtueq httuiuc kaz yaq,” ngoz tueq wuiyq shec tueq rulc rv-ngvlc rvtueq.

¹⁶Vpiq sangac hez rueq kvruex lvmz kuex kungkhux nuex tuiuz muq; yuq muinz Yesu rueq ngauz vngax lvp wvnc tueq nuex jix, vpiq nuex tvhungx vtueq Rumvrc luik nuex jungx shec tueq kvkhoc tsuingshiq rueq ruez wvnc tueq lvmz kuex rvwvl lvp tueq.

¹⁷Yesu rueq Lazaru kuex luip mungx wawc gvl vtueq vthueyc kay wuez wawc tvyuing tvtenc wvnc tueq nuex, vpiq rulc vdvmz httax yaq nuk miqsaz htenc rueq yaungx wvnc lvmx kuex hakhix khvmc jungx wuez tueq.

¹⁸Kvruex ningkhvnc nuex nuk miqsaz htenc rueq vpiq kuex humc kaz wuez tueq, yvmx khoc lac ngoz ruiux lec tsuingshiq kuex vpiq rueq shuimx wvnc tueq vwangc juing lvmx htenc tay wvnc tueq shex rvtueq.

¹⁹Pharise nuk rvjungc tueq kuex, “Naungshiq rueq lotlaungc miq shex! Lawc shuinz, mungkawx lotlaz rueq vpiq yix nuex phvnx laq wuez vshuex!” ngoz tueq.

²⁰Moalx baunglaung nawk palx kay tvkoc Yerusalem nuex kaz yaq miq phungc kvyuq Greek miqsaz wvyvmc lomx tueq.

²¹Tsuingshiq kuex (Galile mungx wawc Betsaida ghaq jix) Philip kox nuex kaz vtueq, “Walaungx waz lex, nuiyshiq rueq Yesu khiz roc vshix,” ngoz tueq jungx tueq.

²²Philip rueq Andru kox nuex kaz vtueq kvruex lvmz kuex tvtay jungx kaz tueq. Kvkaq tsuingnueyc rueq Yesu muex tvtay jungx kaz tueq.

²³Yesu rueq, “Miq Saz vruex ngauz vngax dungc wvnc vkhing httuiuc wvnc yaq shex.

²⁴Nuimshiq muex ngaz rueq vsuing jungx kuq ix, tsvmz ruiy ruiyshiz kuex ghaq nuex dvy vtueq thueyc kaz muq ngoz ruiux kuex kvruex ruiy kvdvyx rvtuex. Yuq muinz thueyc kaz ruiux jix vthuey vngoz paunghvlc thuey ngoz lvp tuex.

²⁵Miqmac rullungx lungwawx jix waz kuex miqmac rullungx momaq sumx wvnc tuex, mungkawx vyuq miqmac rullungx shuiuc pac gay jix waz kuex pattup rullungx tvkhup wungx wvnc shuex.

²⁶Ngvy yauk shuimc vruex gurc pic jix ukhaq yuq muinz, ngvy yix nuex phvnx naungx vtueq ngaz httax taungx kvyuq ngvy nvrc waz muinz httax tuex. Iwaz rueq ngvy yauk shuimc kuy jix ukhaq muex muinz tvtsanc nganc kuq shuex.

²⁷“Majuiuc ngaz kuex thuinz vmungx nuex kuilc daz rvhumc vtaungx, ngaz rueq yvmx khoc jungx juing lac? ‘Iwaz lex, ngaz kuilc daz rvhumc vtaungx baunglaung vwawc tvdung wvnc koq,’ ngoz tueq ngoc juing haz? Yuq muinz ngaz kuex vkhoc kuilc daz rvhumc tvkoc httuiuc kaz tauk rvtueq.

²⁸Iwaz lex, mmuingc kuex ngauz vngax tvdung shuiuz!” ngoz tueq. Kvkaq raungmungx wawc thuic bomc vshiz kuex, “Ngvy muingc kuex ngauz vngax tvdung wvnc tauk, laukshiz hulawx tvdung yek shaungx,” ngoz tueq.

²⁹Kvruex baung kvyuq jvp yaq jix miq htenc rueq kvruex thuic bomc kuex tay vtueq, “Raungmuk yaq,” ngoz tueq, wvyvmc rueq, “Vpiq muex raungkamx waz rueq kvjaz jungx yaq!” ngoz tueq.

³⁰Yesu rueq, “Vruex thuic bomc kvjak yaq kuex ngvy tvkoc rvmuq, nuimshiq tvkoc rvtueq, ngoz tueq tsuinghez muex jungx kuq tueq.

³¹Vruex mungkawx kuex majuiuc doc muinz vphoc rvhumc vtuex; majuiuc mungkawx vruex guimz lawc jix waz kuex yuz phic nuex tuip gay rvhumc tuex.

³²Ngaz kuex ghaq vmaq tsomz gay rvhumc taungx nuex, miq lotlaz kuex ngvy kox nuex het wvnc shaungx,” ngoz tueq.

³³(Kvkhoc jungx tueq kuex vpiq yvmx khoc maq lac vthueyc khvmc shvmx lvmx vyac khawx maq tvkhic vtueq jungx tueq.)

³⁴Kvkaq nuk miqsaz htenc rueq, “Mesia kuex pattup rullungx tvraungx httax tuex, ngoz tueq naungshiq Tvrac luik nuex jungx shec tueq. Kvkhoc rvyruiux mnoz rueq, Mesia kuex vtsomz gay rvhumc tuex, ngoz tueq yvmx khoc lac ngoz vshuiux? Miq Saz ngoz shuiux waz kuex ukhaq lac rvtvnx?” ngoz tueq tvralc wuez tueq.

³⁵Yesu rueq muinz, “Raungwuic vruex kuex nuimshiq rulc yauk lox saz dvyx httax tuex, nuimshiq kuex raungnyauk rueq tungc wvnc muq tvkoc, raungwuic vhttax baunglaung khuemx wuez kuinz. Raungnyauk nuex khuemc jix waz kuex miqmac mnuex wuez kaz yaq nguinx tuiuz muq.

³⁶Kvkhoc rvtueq raungwuic vhttax baunglaung raungwuic kvmac kvmx wuez kuinz, kvkhoc ngoz ruiux yuq jix nuimshiq kuex raungwuic suiuz vsaz hez muex yaungx wuez tuinx,” ngoz tueq. Kvkhoc Yesu rueq jungc lot yix, vpiq kuex dung kaz wvnc vtueq vpiq shauk pumz kuex tsuingshiq kox kvwawc kvpuiuc kaz tueq.

³⁷Tsuingshiq htumc nuex vwangc juing romzyac vtanc khvnc tvkhic kuq koq muinz tsuingshiq kuex vpiq muex kvmx wuez muq.

³⁸Vruex kuex shvmmax Esaia rueq, “Taungjix lex, nuiyshiq bomjungc vmac ukhaq lac kvmx tvnx? Taungjix luimc vkawc kuex ukhaq muex lac tvkhic kuq tonx?” ngoz tueq kvjaz kuex tvhungx rvtueq.

³⁹Kvkhoc rvtueq tsuingshiq kuex kvmluimx muq, yvmx khoc lac ngoz ruiux lec Esaia rueq jungx tueq kuex:

⁴⁰“Tsuingshiq muik htenc maq khiz lot ruiux tsuingshiq thuinz vmungx maq tuiuz lot ruiux doc muinz tsuingshiq kuex miqmac vthuiuz vsac mac vtsac hvlc kay tvkoc thuinz kvlayc wvnc wuez tuex. Kvkhoc rvtueq tsuingshiq muik kuex tvmawz kuq gay ruiux, thuinz vmungx kuex puingc kuq gay tauk ngoz tueq Tishox rueq jungx tueq,” ngoz tueq jungx tueq rulc rv-ngvlc tsuingshiq kvmluimx wuez muq.

⁴¹Esaia rueq Yesu ngauz vngax kuex khic lvp ningkhvnc nuex vpiq lvmz kuex vkhoc jungx wvnc tueq rvtueq.

⁴²Kvkaq Yuda miqsaz vrangx vpangx vhttax jix htenc paunghvlc Yesu muex kvmluimx wvnc wuez tueq, yuq muinz Pharise nuk rueq vjux thoz yuimx wawc yurc gay muex hiz wuez vtueq miqmac kvmluimx lvmx kuex raungx nuex dauz laz kvjungc wuez muq.

⁴³Tsuingshiq kuex Tishox rueq tvtsvmc kvmc kuy htauk nuex, miq rueq tvtsvmc kvmc kuy kuex pinhtumc raungc raq yaq.

⁴⁴Yesu rueq ramc vtueq jungx tueq kuex, “Ngaz muex kvmluimx jix waz kuex ngaz muex dvyx kvmluimx rvmuq, ngvy tvkay jix waz muex muinz kvmluimx yaq rvtueq.

⁴⁵Ngvy khic jix waz rueq ngaz dvyx khiz yaq rvmuq, ngvy tvkay jix waz muinz khiz yaq.

⁴⁶Ngaz muex kvmluimx jix htenc kuex raungnyauk mungx nuex httax muq mruez kueq ngoz tueq raungwuic muex yaungx ruiux, ngaz kuex mungkawx vyuq httuiuc kaz tauk.

⁴⁷Ngvy bomjungc kuex tay ruiux kvruex phvnx muq waz ukhaq yuq muinz ngaz rueq phox shaungx rvmuq. Mungkawx kuex phoc tvkoc ngaz kaz tauk rvmuq, kvruex palc wvnc tvkoc juex kaz tauk nguinx.

⁴⁸Ngaz kuex tvdux gay ruiux nuiyc ngvy bomjungc tsenz wvnc muq waz kuex phoc jix vganc washiz httax yaq; ngvy rueq jungx vshaungx bomjungc maq vtvsuip raungnuiyq kvruex waz muex phox kuq shuex.

⁴⁹Vruex lvmz kuex vsuing rvtueq, yvmx khoc lac ngoz ruiux lec ngaz rueq ngvy vrangx vpangx maq jungphvnx vshaungx rvmuq, ngaz rueq yvmx jungphvnc tvluingc juing lac kuex, ngvy tvkay jix waz Iwaz rueq nvr yaq.

⁵⁰Vpiq rueq nvrc yaq kvjaz kuex pattup rullungx thuiuzthuic kuq lot yaq kuex ngaz rueq tuiuz yaq, kvkhoc rvtueq ngaz rueq jungx vshaungx kuex Iwaz rueq nvr yaq rulc rv-ngvlc ngaz rueq jungx vshaungx,” ngoz tueq.