Read Tase Naga YOHAN 13 Bible Online

YOHAN 13 - Tase Naga bible

YOHAN 13

¹Majuiuc kuex Tvlvy Wvnc Moalx max phaungc shauk kungkhux raungnuiyq rvtueq. Yesu kuex vruex mungkawx vwawc dung wvnc vtueq, Vwaz kox nuex waungc wvnc vkhing httuiuc wvnc tueq kuex tuiuz tueq. Vpiq rueq mungkawx nuex httax yaq vpiq miq htenc kuex mkaq muinz lungwawx yaq rvtueq, vtvsuip nuex httuiuc laz tsuingshiq kuex lungwawx tueq.

²Yesu nuiyc vpiq sangac hez kuex raungyac dungc svy saq wuez tueq. Yesu kuex tvshuk lekuy gay tvkoc htaungc rueq Simon saz Yuda Iskarut thuinz vmungx nuex kvmungx htawc kuq tueq.

³Yesu kuex Vwaz rueq vpiq muex luimc vkawc tsuiyc laz kuq tueq kvmuinz; vpiq kuex Tishox kox maq kaz vtueq, Tishox kox nuex yek waungc yek juing kvmuinz tuiuz yaq.

⁴Kvkhoc rvtueq vpiq kuex humpanx wawc kvtenc jvp vtueq, vpiq svmhung hungyungx kuex puk gay ruiux phajet lvmz vtueq vkhez nuex shuit tueq.

⁵Kvruex yimaq panx yungx nuex yuix htawc vtueq sangac bix yaz kuex hoal kuq ruiux, vkhez wawc phajet kvmaq tuit kuq tueq.

⁶Simon Peter kox nuex httuiuc koq tueq kvruex waz rueq, “Taungjix lex, mnoz rueq ngvy yaz hoalc kuy haz dvnc vphux?” ngoz tueq wiz tueq.

⁷Yesu rueq, “Ngaz rueq shuimx vshaungx kuex majuiuc mnoz rueq tuiuz muq, yuq muinz yix maq jix mnoz rueq tuiuz wvnc shuiux,” ngoz tueq tvralc tueq.

⁸Peter rueq, “Ngvy yaz kuex mnoz rueq mkaq muinz nauk hoal kuq vkueq!” ngoz tueq. Yesu rueq, “Ngaz rueq m-yaz hoal kuq mauk ngoz ruiux, mnoz kuex ngaz muex seng muq shex,” ngoz tueq ngoz kuq tueq.

⁹Kvkaq Simon Peter rueq, “Taungjix lex, ngvy yaz dvyx rvmuq! Ngvy yauk nuiyc ngvy khux muinz hoal kuq koq!” ngoz tueq.

¹⁰Yesu rueq, “Yuix rvhoalc lot yoalx waz kuex wvgvnz pumz vsawc shec ningkhvnc nuex yaz maq lvy vtueq gvnz vganc kuex hoalc rax muq. Nuimshiq muinz washiz maq lvy vtueq lotlaz kuex vsawc jvnc rvtuit,” ngoz tueq.

¹¹(Yesu rueq vpiq lekuy gay jix waz kuex ukhaq lac rvtvnx vpiq rueq tuiuz yaq; kvkhoc rvtueq “Washiz maq lvy vtueq nuimshiq lotlaz kuex vsawc jvnc rvtuit,” ngoz kuq tueq.)

¹²Yesu rueq tsuingshiq yaz htenc kuex hoalc kuy lot yix, vpiq svmhung hungyungx kuex lvmz svmx ruiux, humpanx hep nuex ngaungc yek tueq. Vpiq rueq, “Nuimshiq muex ngaz rueq shuimx kuq vphaungx lvmz kuex nuimshiq rueq tuiuz vshuinx haz?

¹³Nuimshiq rueq ngaz ngoc Tvluingc waz ngoz tueq muinz, Taungjix ngoz tueq muinz ngoz vphuinx, nuimshiq rueq kvkhoc ngoz vshuinx kuex vlvmx nuimshiq rueq gvl vphuinx kuex rvkhauk laz rvtueq.

¹⁴Ngaz kuex nuimshiq Taungjix nuiyc Tvluingc waz muinz ngaz rvtauk, kvkhoc rvhvt maq nuimshiq yaz htenc kuex hoal kuq vphaungx. Nuimshiq vdvmz dvmz muinz yaz hoal kuq wuez shuinz.

¹⁵Nuimshiq muex ngaz rueq shuimx kuq phaungx kvkhoc nuimshiq rueq muinz mphvnx shueq ngoz tueq ngaz rueq nuimshiq tvkoc shuimc layx kay layx tvkhic vphaungx rvtueq.

¹⁶Ngaz rueq nuimshiq muex vsuing jungx kuq ix, dax waz kuex jiyungx waz htauk nuex vyungx rvmuq, kamx waz muinz piq nvrc jix waz htauk nuex vyungx rvmuq.

¹⁷Majuiuc nuimshiq rueq vruex tsuingrux lvmx kuex tuiuz vshuinx ningkhvnc nuex, kvruex phvnx ruiux yuq nuimshiq thuinhvlc httax yaq.

¹⁸“Ngaz rueq ngoz vshaungx kuex nuimshiq lotlaz ngoc rvmuq, ngaz rueq vthvl taq hez kuex ngaz rueq tuiuz yaq. Yuq muinz Rumvrc luik nuex, ‘Ngvy rulc dungc svy jix waz rueq piq yaz htuimx maq ngaz kuex huip gay phuex,’ ngoz tueq wuiyq shec tueq kuex hungx wvnc tvkoc rvtueq.

¹⁹Kvkhoc yaungx wvnc tuex nuex, ‘Ngaz kuex Ngaz ngoz vshaungx waz rvtauk,’ lvmz kuex nuimshiq kvmluimx wvnc tvkoc ngoz tueq, kvruex lvmx max yaungx wvnc shauk nuex majuiuc ngaz rueq nuimshiq muex jungx kuq vphaungx.

²⁰Ngaz rueq nuimshiq muex vsuing jungx kuq ix, ngaz rueq tvkaz shaungx waz kvruex lvp wvnc jix waz kuex ngvy lvp jix waz rvtueq, ngvy lvp jix waz muinz ngvy tvkay jix waz kuex lvp tvy rvtueq,” ngoz tueq.

²¹Yesu rueq kvkhoc jungphvnc kuy lot yix, vpiq thuinz nuex pinhtumc kuilc daz rvhumc vtueq, “Ngaz rueq nuimshiq muex vsuing jungx kuq ix: nuimshiq phungc wawc washiz rueq ngaz tvshuk lekuq gay phuex,” ngoz tueq tv-phuk tvraungx jungx kuq tueq.

²²Sangac bix kuex ukhaq nuex tvhungx vtueq vngoz lac kuex hangc lot muq ningkhvnc nuex, vdvmz dvmz rvlawc wuez tueq.

²³Yesu rueq lungwawc hvlc kungjix washiz kuex Yesu hep nuex ngaungc yaq.

²⁴Simon Peter rueq, “Vpiq rueq ukhaq nuex tvhungx vtueq lac jungx yaq nguinx wiz shuiuz,” ngoz tueq muik tvyuip maq nvr tueq.

²⁵Kvkaq sangac waz kuex Yesu hep nuex kvnvp kaz vtueq, “Taungjix lex, mruex jix waz lac rvtvnx?” ngoz tueq wiz tueq.

²⁶Yesu rueq, “Ngaz rueq wanx nuix shiz kuex wvyshuiuz khaqwanc nuex thuimc vtueq kuq shaungx waz kvruex rvtueq,” ngoz tueq. Kvkaq Simon Iskarut saz Yuda muex kuq tueq.

²⁷Yuda rueq wanx kvruex tsenc phuiuz rac dvyx, Satan kuex piq nuex nyuip wvnc tueq. Kvkhoc rvtueq Yesu rueq, “Mnoz rueq shuimc juing yauk shuimc kuex htat htat shuimx shuiuz,” ngoz kuq tueq.

²⁸Yesu rueq piq muex kvkhoc jungx tueq kvjaz kuex humpanx tvroz nuex ngaungc jix bix rueq tuiuz muq.

²⁹Yuda kuex kuimphox khak shuimc jix waz ningkhvnc nuex moalx nuex shuimc muex Yesu rueq phvnx shishiz tvruiyx kaz tueq shvmx; rvmuq ngoz ruiux kuex htemc saz jix muex phvnx shishiz tvkuy kay dvnc yaq shvmx, ngoz tueq sangac wvyvmc rueq tvmaung wuez tueq.

³⁰Yuda rueq wanx nuix shiz tsenz phauk ruiux, kvkaq lvmx lvy dvyx kvtenc damz kaz wvnc tueq. Kvkaq kuex raungnyauk shec rvtueq.

³¹Yuda kvtenc kay yix maq Yesu rueq, “Miq Saz vruex kuex majuiuc ngauz vngax dung yaq; Tishox muinz Miq Saz htauk maq ngauz vngax dung yaq.

³²Tishox ngauz vngax kuex Miq Saz vruex htauk vmaq dung wvnc ruiux yuq, Tishox vpiq rueq Miq Saz vruex mac ngauz vngax kuex kvkaq lvmx lvy tvdung kuq shuex.

³³Isaz tamx lex, ngaz kuex nuimshiq rulc roc nuex hvlwvl shiz saz dvyx shex httax naungx phaungx. Nuimshiq rueq ngaz thuiyx wuez phuinx, ‘Ngaz waung wvnc taungx kvyuq nuimshiq rueq phvnx wvnc lot muit,’ ngoz tueq Yuda miqsaz vrangx vpangx vhttax jix htenc muex jungx wvnc tauk rulc rv-ngvlc nuimshiq muex muinz ngaz rueq majuiuc jungx kuq vphaungx.

³⁴‘Vdvmz dvmz rvlungwawc wuez kuinz,’ ngoz tueq tvrac vnyalx kuex ngaz rueq nuimshiq muex kuq vphaungx. Ngaz rueq nuimshiq lungwawx phaungx kvkhoc nuimshiq muinz vdvmz dvmz rvlungwawc wuez kuinz.

³⁵Nuimshiq vdvmz dvmz lungwawc thuinz httax wuez ruiux, nuimshiq kuex ngvy sangac htenc rvtuit kuex nuimshiq lotlaz rueq tuiuz wvnc wuez shuinx,” ngoz tueq.

³⁶Simon Peter rueq, “Taungjix lex, mnoz mnuex waungc wvnc lac dvnc vshuiux?” ngoz tueq wiz tueq. Yesu rueq, “Ngaz waung wvnc taungx kvyuq majuiuc mnoz rueq phvnx wvnc lot muq, yix maq jix phvnx wvnc shuiux,” ngoz tueq tvralc tueq.

³⁷Peter rueq, “Taungjix lex, yvmx ngoz tueq lac majuiuc ngaz rueq m-yix nuex phvnx wvnc lot mauk? Mnoz tvkoc vthueyc khvmc muex ngaz tvyoalc yoalx httax vtaungx!” ngoz tueq.

³⁸Yesu rueq, “Mnoz kuex vsuing ngvy tvkoc thueyc khvmc kuy muex tvyoalc yoalx doc haz? Ngaz rueq vsuing mnoz muex jungx kuq ix, wuz max wvrc nuex mnoz rueq ngaz ngoc tuiuz mauk ngoz tueq lauk thuimx kvduimx kaz tuiux,” ngoz tueq piq muex tvralc tueq.