Read Tase Naga YOHAN 21 Bible Online

YOHAN 21 - Tase Naga bible

YOHAN 21

¹Kvruex yimaq Yesu kuex Tiberia jumx kawx maq vpiq sangac hez muex shvmx laukshiz kvkhic tueq. Kvruex lauk kvkhic tueq kuex vkhoc rvtueq.

²Simon Peter, (vpop ngoz tueq muingc yaq) Thoma, Galile mungx Kana ghaq wawc Nathanael, Zebede saz nuiyc Yesu sangac vganc wanueyc muinz vroc nuex rvtueq.

³Simon Peter rueq, “Ngaz ngaq khup kaz phaungx,” ngoz tueq vganc muex jungx tueq. Tsuinghez rueq, “Nuiyhez muinz kaz naungx phix,” ngoz tueq. Kvkhoc rvtueq tsuinghez kuex lix maq ngaq lvp gay kaz wvnc wuez tueq, yuq muinz kvruex raungwvrx ngaq vshiz muinz lvp muq doc.

⁴Raungnvp shalx dung wvnc yaq nuex Yesu yuix jumx kawx nuex jvp kaz tueq. Yuq muinz sangac hez rueq Yesu ngoz tueq tuiuz muq.

⁵Kvkaq Yesu rueq tsuinghez muex, “Yalx rox bix lex, nuimhez nuex phuiuz svy juing phvnx shishiz vhttax haz?” ngoz tueq wiz tueq. Tsuingshiq rueq, “Yvmx muinz vguez,” ngoz tueq tvralc tueq.

⁶Vpiq rueq, “Nuimhez jak kuex lix kvmaq vkeq kox kvyuq khup shuinz, ngoz ruiux lvp shuinx,” ngoz tueq jungx kuq tueq. Kvrulc rv-ngvlc tsuinghez rueq khup koq tueq ngaq paunghvlc lvp vtueq vhet muinz het lot muq rvtueq.

⁷Kvkaq Yesu rueq lungwawc hvlc kungjix waz kvraq Peter muex, “Taungjix khoc kvnauz,” ngoz tueq. Kvruex kvjaz kuex Simon Peter rueq tay vtueq, piq rueq vpuk taq khvy kuex vkhez nuex menc svmx ruiux yuix jumx mungx nuex dauk svt wvnc tueq. (Piq kuex sawkumx ningkhvnc nuex rvtueq.)

⁸Sangac bix vbez kuex yuix kawx maq mtanc luz muq tvlvmx rok bv-ngac tanc dvyx ningkhvnc nuex ngaq vmvrx jak kuex het vtueq lix maq taung nuex duiz waung tueq.

⁹Tsuingshiq kuex lix maq svt vtueq taung nuex httuiuc waung koq tueq, wvrkez muinz wvrkez htauk nuex vgaungc taq ngaq muinz, wanx muinz khiz wuez tueq.

¹⁰Kvkaq Yesu rueq tsuinghez muex, “Nuimhez rueq majuiuc vlvp ngaq kvwawc vbez lvmz wvnc luit,” ngoz tueq.

¹¹Simon Peter lix nuex duiz vtueq ngaq yungx jvnc kuiux 153 khup tueq jak kuex taungkawx nuex het tueq, kvjuc paung ruiux muinz jak kuex kvjuirc muq.

¹²Yesu rueq, “Waung vtueq phauk saq wuez shuinz,” ngoz tueq. Vpiq kuex Taungjix rvtueq kuex tsuinghez rueq tuiuz yaq ningkhvnc nuex sangac bix uraq muinz, “Mnoz ukhaq lac?” ngoz tueq wiz khvmc muq.

¹³Kvkhoc rvtueq Yesu kuex tsuinghez kox nuex kaz vtueq, wanx kuex lvmz ruiux tsuinghez muex phvlx kuq tueq, ngaq muinz kvkhoc phvlx kuq tueq.

¹⁴Vruex kuex Yesu thueyc vtueq yuing kvtenc wvnc yix, sangac bix muex lauk thuimx ngoc yaungc shvmx kvkhic tueq.

¹⁵Tsuinghez rueq phuiuz svy lot yix, Yesu rueq Simon Peter muex, “Yohan saz Simon lex, vruex hez rueq ngaz lungwawx yaq htauk nuex jvnc vtueq haz ngaz lungwawx vphux?” ngoz tueq wiz tueq. Peter rueq, “Taungjix lex, ngaz rueq mnoz lungwawx yaq kuex mnoz rueq tuiuz yaq,” ngoz tueq tvralc tueq. Yesu rueq, “Ngvy khelbuenx sahez kuex remx shuiuz,” ngoz tueq jungx tueq.

¹⁶Kvmaq lauknueyc ngoc yaungc Yesu rueq, “Yohan saz Simon, mnoz rueq ngaz lungwawx vphux haz?” ngoz tueq wiz tueq. Peter rueq, “Rvtueq, Taungjix lex, ngaz rueq mnoz lungwawx yaq kuex mnoz rueq tuiuz yaq,” ngoz tueq tvralc tueq. Yesu rueq, “Ngvy khelbuenx htenc kuex remx shuiuz,” ngoz tueq jungx tueq.

¹⁷Kvmaq lauk thuimx ngoc yaungc Yesu rueq, “Yohan saz Simon lex, mnoz rueq ngaz lungwawx vphux doc haz?” ngoz tueq wiz tueq. Peter kuex vthuinz bac vtueq, “Taungjix lex, mnoz rueq phvnx ruip saz tuiuz yaq, ngaz rueq mnoz lungwawx yaq lvmz kuex mnoz rueq tuiuz yaq!” ngoz tueq tvralc tueq. Yesu rueq, “Ngvy khelbuenx htenc kuex remx shuiuz.

¹⁸Mnoz muex ngaz rueq vsuing jungx kuq ix, mnoz yalxrox baunglaung nuex mkhez kvyuq keshuit shuit vtueq, kaz roc tuiux baung nuex kaz lvp tuiux, yuq muinz nyuiuz waz yaungx wvnc tuiux yuq, m-yauk nuiyc kuex tvlanc vtueq miq vshiz shiz rueq mnoz muex tvyoalc kuq ruiux, mnoz kaz roc muq baung nuex shvlx laq kv-phux,” ngoz tueq jungx tueq.

¹⁹(Kvkhoc jungx tueq kuex, Peter kuex yvmx khoc nuex thueyc tuex lvmz nuiyc Tishox ngauz vngax tvdung wvnc shuex lvmz kuex tvluz nuex jungx wvnc tueq rvtueq.) Kvkhoc jungc lot yix Yesu rueq Peter muex, “Ngvy yix nuex phvnx naungx koq!” ngoz tueq.

²⁰Peter rueq yix kox nuex nyez lawc koq tueq, Yesu rueq lungwawx yaq kungjix waz kuex khiz tueq, piq kuex raungyac dungc saq tueq nuex Yesu yapemc nuex kvnanc vtueq, “Taungjix lex, mnoz tvshuk lekuy gay jix waz kuex ukhaq lac rvtvnx?” ngoz tueq wiz jix waz phvnx naungx yaq kuex khiz tueq.

²¹Peter rueq kvruex waz kuex khiz vtueq, Yesu muex, “Taungjix lex, vruex waz kuex yvmx khoc lac yaungx tvnx?” ngoz tueq wiz tueq.

²²Yesu rueq, “Ngaz httuiuc kaz taungx nuex httuiuc laz piq kuex rullungx tvraungx tvhttaz roc ruiux muinz, mnoz muex yvmx lac seng tvnx? Mnoz kuex ngvy yix nuex phvnx koq!” ngoz tueq tvralc tueq.

²³Kvkhoc rvtueq kvruex kungjix waz kuex thueyc tuex rvmuq, ngoz tueq kvjaz kuex Yesu yix phvnc naungc jix kungjix htenc kox nuex nyvmc wvnc tueq. Yuq muinz Yesu rueq kvruex waz kuex thueyc muq ngoz tueq ngoc kvjaz rvmuq, “Ngaz httuiuc kaz taungx nuex httuiuc laz piq kuex rullungx tvraungx tvhttaz roc ruiux muinz, mnoz muex yvmx lac seng tvnx?” ngoz tueq vjungx dvyx rvtueq.

²⁴Vruex lvmx htenc kuex hakhix khvmc vtueq wuiyq shec jix waz kuex kvruex kungjix waz kvruex rvtueq. Piq rueq jungx tueq kvjaz kuex vlvmx rvtueq nuiyhez rueq tuiuz yaq.

²⁵Yesu rueq shuimx wvnc tueq yauk shuimc vganc paunghvlc doc vhttax. Kvruex htenc lvmz kuex phvnshiz maq phvnshiz wuiyq taq ruiux yuq, kvruex luik dvp htenc kuex mungkawx vyuq doc muinz banz muq rvtuex shvmx, ngoz tueq ngaz rueq tvmaung vshaungx.