Read Tase Naga YOHAN 3 Bible Online

YOHAN 3 - Tase Naga bible

YOHAN 3

¹Pharise nuk wawc vmuingc Nikodemu ngoz yaq Yuda miqsaz vyungx vlaungx washiz vhttax rvtueq.

²Kvruex waz kuex raungnyauk nuex Yesu kox nuex kaz vtueq, “Rabbi lex, mnoz kuex Tishox rueq vtvkaz tvluingc waz vshiz rvtoq lvmx kuex nuiyshiq rueq tuiuz lvp vshix. Mnoz rueq vwangc juing romzyac htenc tvkhic vshuiux htenc kuex Tishox lomx muq ngoz ruiux uraq muinz shuimx lot muq,” ngoz tueq vpiq muex jungx tueq.

³Yesu rueq, “Ngaz rueq mnoz muex vsuing jungx kuq ix, vjawc rvhumc yek muq waz ukhaq yuq muinz Tishox Mungtan kuex khiz lvp shuex rvmuq,” ngoz tueq tvralc tueq.

⁴Nikodemu rueq, “Rullungx miq laungx shex kuex yvmx khoc kvjawc yek juing lac? Vnyuiuz wuk mungx nuex nyuip waung yek vtueq, lauk nueyc jawc rvhumc yek juing haz!” ngoz tueq wiz tueq.

⁵Yesu rueq, “Ngaz rueq mnoz muex vsuing jungx kuq ix, yuix nuiyc Siyac maq vjawx rvmuq ngoz ruiux kuex ukhaq muinz Tishox Mungtan nuex nyuip lvp muq.

⁶Gvnngvmx maq vjawx kuex gvnngvmx rvtueq, Siyac maq vjawx kuex siyac rvtueq.

⁷Vjawc rvhumc yek juing ngoz tueq ngaz rueq jungx vphaungx kvmac nauk wangc kaz.

⁸Raungguil kuex miqmac guil roc tuex kox nuex guil yaq, raungguil tvruingc kuex tay ruiux muinz, mruex kox maq guil vtueq, mkox nuex lac kaz wvnc vtvnx kuex tuiuz miq. Siyac maq jawc jix waz muinz kvrulc rv-ngvlc dvyx rvtueq,” ngoz tueq tvralc tueq.

⁹Nikodemu rueq, “Vhtenc vruex kuex yvmx khoc maq lac yaungx wvnc tvnx?” ngoz tueq wiz tueq.

¹⁰Yesu rueq, “Mnoz kuex Israel miqsaz htenc muex tvluingc kuy jix vyungx washiz rvtoq rvhvt maq, vruex phvnx htenc kuex mnoz rueq tuiuz muq ix?

¹¹Ngaz rueq mnoz muex vsuing jungx kuq ix, nuiyshiq kuex miqmac rueq tuiuz vshix lvmz kuex jungx vshix nuiyc nuiyshiq rueq khiz vshix phvnx htenc kuex hakhix khvmc vshix, yuq muinz nuimshiq vshiz raung rueq muinz lvp wvnc muit.

¹²Mungkawx nuex seng yaq lvmx htenc kuex ngaz rueq tvkhic kuq phaungx nuex nuimshiq kvmx muik ngoz ruiux kuex, raungmungx nuex seng yaq lvmx htenc tvkhic kuq ruiux yuq, yvmx khoc maq lac nuimshiq kvmx tuinx?

¹³Raungmungx maq vsvt kaz Miq Saz vruex maq lvy vtueq ukhaq muinz raungmungx nuex httuiuc wuez muq doc.”

¹⁴Moshe rueq kumtsvy tvnx maq nvyrvyx puiuc yac kuex tsomz tueq ikhoc,

¹⁵vpiq muex kvmluimx jix htenc rueq pattup rullungx lvp wvnc laz Miq Saz vruex muinz vtsomz gay rvhumc tuex.

¹⁶Yvmx khoc lac ngoz ruiux lec Tishox rueq vpiq Saz muex kvmluimx jix htenc kuex batac momaq kay rvhumc muq maq pattup rullungx mlvp wvnc shueq ngoz tueq, vpiq Saz vshiz lauk lauk kuex kuy gay nuex httuiuc laz mungkawx kuex pinhtumc lungwawx tueq.

¹⁷Tishox rueq vpiq Saz mungkawx nuex tvkaz tueq kuex mungkawx miqsaz muex khac phoc kuy kay tvkoc rvmuq, vpiq maq palc daungc wvnc rvhumc tvkoc tvkaz tueq.

¹⁸Vsaz muex kvmluimx jix waz kuex vphoc rvhumc muq, kvmluimx muq jix waz kuex Tishox Saz pumshiz waz muex kvmluimx muq ningkhvnc nuex majuiuc doc muinz vphoc rvhumc yaq.

¹⁹Vphoc rvhumc yaq lvmx kuex vkhoc rvtueq; raungwuic kuex mungkawx nuex httuiuc kaz tueq, yuq muinz miqsaz kengx vlayx honc vbac ningkhvnc nuex, tsuingshiq rueq raungwuic htauk nuex jvnc vtueq raungnyauk kuex lungwawx wuez yaq.

²⁰Yvmx khoc lac ngoz ruiux honc vbac yauk shuimc jix ukhaq yuq muinz, raungwuic kuex shuiuc pac vtueq miqmac honc vbac kuex kvkhic kay muex hiz ningkhvnc nuex, raungwuic nuex kvnvp wuez muq.

²¹Yuq muinz tsuingrux lvmx phvnc jix kuex miqmac rueq shuimx kaz yaq yauk shuimc htenc kuex Tishox thuinroc rulc rv-ngvlc yaungx yaq lvmx mkhiz wvnc shueq ngoz tueq raungwuic nuex kvnvp wuez yaq, ngoz tueq.

²²Kvruex yimaq Yesu kuex vpiq sangac bix rulc vdvmz nuex Yuda mungx wawc miqghaq htenc nuex khuemx kaz ruiux, tsuinghez rulc vdvmz guilc vtueq yuix luip kuq tueq.

²³Yohan rueq muinz Salim ghaq hep Enun nuex yuix paunghvlc httax yaq ningkhvnc nuex, kvruex yuq yuix luip kuq tueq. Miq htenc muinz piq kox nuex kaz vtueq yuix luip lvmz wuez tueq.

²⁴(Kvruex kaq Yohan kuex khoktep nuex max shauk dvyx doc.)

²⁵Yohan sangac wvyvmc kuex yuix luip lvmc lvmx nuex seng vtueq Yuda miqsaz washiz rulc rvkhawc lvlc tueq.

²⁶Kvkhoc rvtueq tsuingshiq kuex Yohan kox nuex kaz vtueq, “Tvluingc waz lex, Yodan ruilx shaldungc kox nuex mnoz rulc vdvmz httaz yoalx mnoz rueq hakhix khvmc toq waz kuex rvwvl lvp vshuiux haz? Majuiuc vpiq rueq yuix luip kuq yaq, miq htenc muinz vpiq kox nuex kaz yaq!” ngoz tueq piq muex jungx tueq.

²⁷Yohan rueq, “Tishox rueq vkuq rvmuq ngoz ruiux kuex miq rueq yvmx muinz lvp wvnc shuex rvmuq.

²⁸‘Ngaz kuex Mesia rvmauk, vpiq max nuex vtvkaz waz dvyx rvtauk,’ ngoz tueq ngaz rueq jungx vphaungx, nuimshiq pumz kuex ngvy hakhix rvtuit.

²⁹Nyuiuz nyalx lvp jix waz kuex waz nyalx waz rvtueq. Waz nyalx waz piq kungjix waz kuex tvyoalc yoalx maq waz nyalx waz kvjaz tay yaq, piq kuex waz nyalx waz kvjaz tay lvp vtueq pinhtumc kokez yaq. Kvkhoc ngaz muinz thuinz nuex mvrc laz kokez vtaungx.

³⁰Vpiq kuex pinhtumc vyungc vloayc rvwvnc tuex, ngaz kuex vruinc rvwvnc taungx,” ngoz tueq.

³¹Raungx maq httuiuc kay jix waz kuex lotlaz htauk nuex vyungx pinhtumc waz rvtueq. Ghaq wawc vdung waz kuex ghaq nuex seng yaq rvtueq ghaq lvmx dvyx jungphvnx thenc yaq, yuq muinz raungmungx maq httuiuc kay jix waz kuex lotlaz htauk nuex rvtueq.

³²Vpiq kuex vpiq rueq khiz tueq, tay tueq lvmz htenc kuex hakhix khvmc yaq, yuq muinz vpiq bomjungc kuex uraq muinz lvp wvnc muq.

³³Vpiq bomjungc lvp wvnc jix waz kuex Tishox kuex tsuingrux rvtueq, ngoz tueq hakhix khvmc jix waz rvtueq.

³⁴Tishox rueq vtvkaz waz rueq Tishox bomjungc kuex jungphvnx kuq yaq, yvmx khoc lac ngoz ruiux lec Tishox vpiq rueq vtvkaz waz muex Siyac kuex mvrc laz kuq tueq.

³⁵Vwaz rueq Vsaz kuex lungwawx vtueq vpiq luimc vkawc phvnx ruip saz kuex vpiq muex lekuq tueq.

³⁶Vsaz muex kvmluimx jix waz kuex pattup rullungx lvp wvnc tueq. Vsaz kvjaz tay muq waz kuex rullungx tvraungx lvmx lvp wvnc shuex rvmuq, Tishox thuinkhvy murx kuex gurc jix rvtueq.