Read Tase Naga YOHAN 6 Bible Online

YOHAN 6 - Tase Naga bible

YOHAN 6

¹Kvruex yimaq Yesu kuex Tiberia ngoz yaq Galile jumx kuex yanz wvnc tueq.

²Vthuiuz vsac jix htenc nuex vpiq rueq shuimx tueq vwangc juing htenc kuex tsuingshiq rueq khiz vtueq miq vkung vdaungx rueq vpiq yix nuex phvnx naungx tueq.

³Yesu kuex ghaqluimx vshiz nuex duiz woz vtueq vpiq sangac hez rulc vdvmz nuex ngaungc naungx tueq.

⁴Yuda miqsaz moalx rvtueq Tvlvy Wvnc Moalx httuiuc wvnc nanac shex rvtueq.

⁵Yesu rueq lawc koq tueq nuk miqsaz vkung vdaungx htenc vpiq kox nuex kaz yaq kuex khiz vtueq Philip muex, “Vruex hez vraq phuiuz svy juing kuex yvmx wawc rez kay juing lac?” ngoz tueq wiz tueq.

⁶(Vpiq rueq wiz tueq kuex Philip httoarc helc tvkoc rvtueq: vsuing yvmx khoc ruec juing lac kuex vpiq rueq tuiuz yaq rvtueq.)

⁷Philip rueq, “Miq vjuc vmac kuex kuimphox 200 maq ruiyx ruiux doc muinz hungx tuex rvmuq,” ngoz tueq tvralc tueq.

⁸Kvruex kaq vpiq sangac hez phungc wawc Simon Peter nox Andru rueq jungx tueq kuex,

⁹“Nosaz washiz kox nuex wanx bv-ngac rac ngaq vnueyc httax yaq. Yuq muinz miq vjuc phungc vmac kuex hungx tuex rvmuq,” ngoz tueq.

¹⁰Yesu rueq, “Miq htenc kuex tv-ngaungc wuez shuinz,” ngoz tueq. (Kvruex baung kvyuq renhttuingx ruix rvtueq.) Tsuingshiq lotlaz ngaungc wuez tueq; miqwaz rulx dvyx 5,000 tanc rvtueq.

¹¹Kvkaq Yesu rueq wanx kuex lvmz vtueq Tishox muex kejux vyungx ngoz kuq ruiux, ngaungc yaq jix htenc kvmac phvlx kuq tueq, ngaq kvmuinz kvrulc rv-ngvlc phvlx kuq tueq. Miq htenc rueq muinz phoay laz phauk saq tueq.

¹²Tsuingshiq lotlaz rueq phoay laz phuiuz svy lot yix, vpiq rueq vpiq sangac hez muex ngoc, “Phuiuz bung svy bung htenc kuex wawz kaz muq tvkoc vhvlx waq tvjomx tsenz shuinz,” ngoz tueq.

¹³Kvkhoc rvtueq tsuingshiq rueq tvjomx tsenz koq tueq wanx phux bv-ngac rac ngaq vnueyc wawc svy bung kuex boarx 12 mvrc laz rvtueq.

¹⁴Kvkhoc vpiq rueq tvkhic tueq vwangc juing romzyac kuex khic jix htenc rueq, “Vruex waz kuex mungkawx nuex httuiuc kaz tuex ngoz yaq shvmmax waz rvtueq!” ngoz tueq.

¹⁵Yesu kuex tsuingshiq rueq laungc maq shvlx wvnc vtueq hokhvmx muex tvyaungc shuex lvmz kuex helc vtueq, vpiq lauklauk dvyx ghaqluimx nuex kvhttuiyq yuz kaz tueq.

¹⁶Raungyac wvnc koq tueq Yesu sangac bix kuex Galile jumx nuex svt kaz wuez tueq.

¹⁷Lix htauk nuex ngaungc vtueq kvkox ral Kapernaum ghaq nuex rvp wvnc wuez tueq. Raungnyauk wvnc koq muinz Yesu kuex tsuingshiq kox nuex max httuiuc waung dvyx doc rvtueq.

¹⁸Kvruex kaq raunghtiq raungguil wvnc vtueq yuix daungx htenc dauk tueq.

¹⁹Sangac bix kuex kilometer 6 tanc rvp wvnc tueq nuex Yesu kuex yuix htauk maq khuemx wvnc vtueq, lix hep nuex httuiuc wvnc yaq kuex tsuinghez rueq khiz vtueq hiyaz kawc yawc wuez tueq.

²⁰Yesu rueq tsuinghez muex, “Nauk hiz kaz, ngaz rvtauk!” ngoz tueq.

²¹Kvkaq jix tsuinghez rueq vshuenc vruenc maq vpiq kuex lix nuex tv-ngaungc wvnc tueq, lix muinz kvkaq dvyx tsuinghez httuiuc juing baung nuex httuiuc waung tueq.

²²Raungnvp kvyix yuix jumx kvkox ral nuex httax wuez yaq nuk miqsaz htenc rueq kvruex yuq lix vshiz dvyx httax yaq kuex rvwvl lvp wuez tueq. Kvruex lix kvyuq Yesu ngaungc wvnc naungx muq vpiq sangac hez dvyx woz wvnc tueq kuex tuiuz wuez tueq.

²³Yuq muinz Tiberia wawc vkaz lix htenc kuex Taungjix rueq kejux vyungx ngoz ruiux, nuk miqsaz htenc muex wanx tv-phauk saq tueq baung kvyuq httuiuc kaz wuez tueq.

²⁴Nuk miqsaz htenc rueq kvruex baung kvyuq Yesu muinz, vpiq sangac hez muinz vguez shex kuex tuiuz vtueq, tsuinghez muinz lix htenc nuex ngaungc ruiux vpiq kuex thuiyc kay Kapernaum ghaq nuex kaz wvnc tueq.

²⁵Yuix jumx kvkox ral nuex Yesu kuex humc kaz vtueq, tsuinghez rueq, “Tvluingc waz lex, mnoz kuex vyuq mkaq lac httuiuc kaz tonx?” ngoz tueq wiz tueq.

²⁶Yesu rueq, “Ngaz rueq nuimshiq muex vsuing jungx kuq ix, nuimshiq rueq ngaz thuiyx vphuinx lvmx kuex ngaz rueq tvkhic phaungx romzyac vlvmz kuex tuiuz vtueq thuiyx vphuinx rvmuq, wanx phauk saq vtueq phoay kv-phuinx tueq jix thuiyx vphuinx, ngoz tueq tvralc tueq.

²⁷Vbac vnvmx kay juing phvnx phuiuz vsvy tvkoc nauk hunglaungx kaz, kvruex tvraung, pattup rullungx tvlvp wvnc yaq bac muq nvmx muq phuiuz vsvy tvkoc hunglaungx wuez kuinz. Kvruex kuex Miq Saz rueq nuimshiq muex kuy juing phuiuz svy rvtueq, yvmx khoc lac ngoz ruiux lec Vwaz Tishox rueq vpiq muex ngauz vngax tvduic kuy wuez rvtueq,” ngoz tueq tvralc tueq.

²⁸Kvkhoc rvtueq tsuinghez rueq, “Tishox rueq nuiyshiq tvshuimc roc yaq lvmz kuex shuimc tvkoc nuiyshiq rueq yvmx khoc shuimc juing lac?” ngoz tueq vpiq muex wiz tueq.

²⁹Yesu rueq, “Tishox thuinroc lvmx ngoz yaq kuex vpiq rueq vtvkaz waz muex kvmluimx juing ngoc rvtueq,” ngoz tueq tvralc tueq.

³⁰Tsuingshiq rueq, “Mnoz muex nuiyshiq kvmluimx wvnc tvkoc vwangc juing romzyac yvmx lac tvkhic kuq phux? Mnoz rueq yvmx yauk lac shuimx shuiux?

³¹Rumvrc luik nuex, ‘Tsuingshiq rueq phuiuz svy tvkoc raungmungx wawc wanx kuex tvdvy kuq shuiuz,’ ngoz tueq wuiyq shec tueq rulc rv-ngvlc, naungshiq jix vwaz tamx rueq muinz kumtsvy tvnx maq Manna wanx phauk saq tueq,” ngoz tueq.

³²Yesu rueq, “Ngaz rueq nuimshiq muex vsuing jungx kuq ix, nuimshiq muex raungmungx maq wanx tvdvy kuy jix waz kuex Moshe rvmuq, Iwaz rueq juez raungmungx wawc wanx muik shauk nuimshiq muex kuq kv-phuinx.

³³Yvmx khoc lac ngoz ruiux lec Tishox rueq kuq yaq wanx ngoz yaq kuex raungmungx maq svt kaz vtueq, mungkawx miqsaz muex rullungx kuy kay jix waz ngoc rvtueq,” ngoz tueq jungx tueq.

³⁴Tsuingshiq rueq vpiq muex, “Taungjix lex, wanx kvruex nuiyshiq muex mkaq muinz kuq hvt rvkoq,” ngoz tueq thoz tueq.

³⁵Yesu rueq, “Ngaz kuex rullungx wanx rvtauk, ngvy kox nuex kay jix waz kuex mkaq muinz rvmc svy rvhumc tuex rvmuq; ngaz muex kvmluimx jix waz kuex mkaq muinz khvmx svy rvhumc tuex rvmuq.

³⁶Yuq muinz nuimshiq rueq ngaz khiz vphuinx rvhvt maq ngaz muex kvmluimx muit, ngoz tueq ngaz rueq nuimshiq muex jungx vphaungx.

³⁷Iwaz rueq ngaz muex kuq phuex lotlaz kuex ngvy kox nuex kaz wuez ruex. Ngvy kox nuex kay jix waz kuex ngaz rueq yurc gay shaungx rvmuq.

³⁸Yvmx khoc lac ngoz ruiux lec raungmungx maq ngaz kaz tauk kuex ngvy thuinroc shuimc kay tvkoc kaz tauk rvmuq, ngvy tvkay jix waz vpiq thuinroc shuimc tvkoc vkaz rvtauk.

³⁹Ngvy tvkay jix waz thuinroc lvmx kuex vpiq rueq ngaz muex lekuq shec phuex lotlaz kuex vshiz muinz moz maq kaz muq maq, vtvsuip raungnuiyq nuex yuing kvtenc wvnc juing lvmx rvtueq.

⁴⁰Yvmx khoc lac ngoz ruiux lec Iwaz thuinroc lvmx kuex, Vsaz kuex khiz vtueq kvmluimx wvnc jix lotlaz muex pattup rullungx lvp wvnc tvkoc lvmx rvtueq. Ngaz rueq muinz vtvsuip raungnuiyq nuex tsuingshiq kuex tvyuing tvtenc wvnc shaungx,” ngoz tueq jungx kuq tueq.

⁴¹Yesu rueq, “Ngaz kuex raungmungx wawc vsvt kaz wanx rvtauk,” ngoz tueq ngoc ningkhvnc nuex miq htenc kuex thuirthux wuez tueq.

⁴²Kvkhoc rvtueq tsuingshiq rueq, “Vruex waz kuex Yosep saz Yesu rvmuq haz? Vnyuiuz vwaz kuex naungshiq rueq tuiuz yaq. Kvkhoc rvyruiux, majuiuc vpiq rueq ngaz kuex raungmungx maq vsvt kaz ngoz tueq ngoz yaq nguinx?” ngoz tueq.

⁴³Yesu rueq, “Nuimshiq vdvmz dvmz nauk thuirthux kaz.

⁴⁴Ngvy tvkay jix waz Iwaz rueq piq kuex ngvy kox nuex ruip rux kuq muq ngoz ruiux kuex ukhaq muinz ngvy kox nuex kaz lot muq; httuiuc kay jix waz kuex vtvsuip raungnuiyq ngaz rueq tvyuing tvtenc wvnc shaungx.

⁴⁵Shvmmax bix luik htenc nuex, ‘Miq ruip rawx kuex Tishox rueq tvluingc kuy lvp wvnc wuez shuex,’ ngoz tueq wuiyq shec tueq. Kvkhoc rvtueq Iwaz rueq vjungx kvjaz kuex tay vtueq, vpiq kox wawc tvluingc lvy rvhumc jix htenc kuex ngvy kox nuex kaz wuez yaq.

⁴⁶Vkhoc ngaz rueq jungx vphaungx kuex Vwaz khic jix miq washiz shiz vhttax ngoz tueq ngoc rvmuq, Tishox kox wawc httuiuc kay jix waz vpiq washiz rueq dvyx Vwaz kuex khiz tueq.

⁴⁷Nuimshiq muex ngaz rueq vsuing jungx kuq ix, kvmluimx jix waz kuex pattup rullungx lvp wvnc shuex.

⁴⁸Ngaz kuex rullungx wanx rvtauk.

⁴⁹Nuimshiq jix vwaz rueq kumtsvy tvnx maq Manna wanx phauk saq wvnc wuez tueq, yuq muinz vthueyc kay wuez shex.

⁵⁰Yuq muinz vruex wanx kuex raungmungx wawc vsvt kaz wanx rvtueq, kvruex phuiuz svy jix kuex thueyc tuex rvmuq.

⁵¹Ngaz kuex raungmungx wawc vsvt kaz vtvraungx wanx rvtauk. Kvruex wanx kuex phuiuz svy jix ukhaq yuq muinz pattup tvraungx httax tuex. Ngaz rueq kuy juing wanx kuex mungkawx miqsaz rullungx tvraungx tvkoc kuq shaungx ngvy ngvmx rvtueq,” ngoz tueq jungx kuq tueq.

⁵²Kvkaq tsuingshiq rueq, “Vruex waz vraq yvmx khoc maq lac vpiq ngvmx kuex naungshiq muex kuq phauk phvnx?” ngoz tueq vdvmz dvmz rvkhawc lvlc, rvwiz soz wuez tueq.

⁵³Yesu rueq, “Ngaz rueq nuimshiq muex vsuing jungx kuq ix, Miq Saz vruex ngvmx nuiyc vpiq tvguiy nuingx muit ngoz ruiux kuex nuimshiq htauk nuex rullungx thuiuzthuic vguez.

⁵⁴Ngvy ngvmx phuiuz jix waz nuiyc ngvy tvguiy nuingc jix waz kuex pattup rullungx lvp shuex. Ngaz rueq muinz piq kuex vtvsuip raungnuiyq nuex tvyuing tvtenc wvnc shaungx.

⁵⁵Yvmx khoc lac ngoz ruiux lec ngvy ngvmx kuex vphuiuz vsvy juing muik shauk rvtueq, kvmaq ngvy tvguiy muinz vnuingc juing muik shauk rvtueq.

⁵⁶Ngvy ngvmx phauk vtueq ngvy tvguiy nuingc jix waz kuex ngaz rulc httax yaq, ngaz muinz piq rulc httax vtaungx.

⁵⁷Vtvraungx httaz yaq Vwaz rueq ngaz tvkaz phuex, ngaz muinz Vwaz ningkhvnc nuex rullungx tvraungx vtaungx rulc rv-ngvlc, ngvy ngvmx phuiuz jix waz muinz ngvy ningkhvnc nuex rullungx tvraungx wvnc tuex.

⁵⁸Vruex kuex raungmungx wawc vsvt kaz wanx rvtueq, nuimshiq jix vwaz rueq phauk saq wvnc tueq wanx ikhoc rvmuq. Vruex wanx phuiuz svy jix waz kuex pattup rullungx tvraungx httax tuex,” ngoz tueq jungx kuq tueq.

⁵⁹Yesu rueq Kapernaum ghaq wawc vjux thoz yuimx nuex tvluing tueq nuex vjungx kuq kvjaz rvtueq.

⁶⁰Vpiq yix phvnc jix miq paunghvlc rueq kvruex kvjaz kuex tay vtueq, “Vruex tvluing kuq yaq kvjaz kuex gvrc hvlc rvtueq. Uraq lac phvnx lot shvnx?” ngoz wuez tueq.

⁶¹Kvkhoc kungjix bix kvbot nyvnx yaq kvjaz kuex Yesu rueq tuiuz ningkhvnc nuex, “Vruex kvjaz vmac nuimshiq thuinz haz bac yaq nguinx?

⁶²Mkhoc shoc maq Miq Saz vruex vpiq httaz juing nuex duiz wvnc tuex kuex khiz ruiux yuq, nuimshiq rueq yvmx khoc lac tvmaung shuinx?

⁶³Rullungx tvraungx yaq kuex Tishox Siyac rueq rvtueq; Ngaz rueq nuimshiq muex jungx kuq vphaungx kvjaz htenc kuex rullungx tvraungx lot yaq Siyac nuex seng yaq.

⁶⁴Yuq muinz nuimshiq phungc wawc wvyvmc kuex kvmluimx muit,” ngoz tueq. (Mruex jix lac kvmluimx muq rvtvnx kvmuinz, vpiq kuex ralx yauk nuex tvshuk kuy gay jix waz kvmuinz Yesu rueq kungkhux nuex phuex tuiuz yaq.)

⁶⁵Kvkhoc rvtueq vpiq rueq, “Vkhoc ningkhvnc nuex Vwaz rueq vkhangx kuq muq ngoz ruiux kuex, ukhaq muinz ngvy kox nuex kaz lot muit ngoz tueq nuimshiq muex ngaz rueq vjungc kuy wuez shex,” ngoz tueq.

⁶⁶Kvruex lvmz ningkhvnc nuex vyix phvnc jix miq paunghvlc yek waung wuez vtueq, vpiq kox nuex mkaq muinz yek kaz muq shuex.

⁶⁷Kvkhoc rvtueq Yesu rueq sangac waz rokshiz rac wanueyc muex, “Nuimhez muinz vyek wvnc roc haz?” ngoz tueq wiz tueq.

⁶⁸Simon Peter rueq, “Taungjix lex, nuiyshiq kuex ukhaq kox nuex lac waung tix? Mnoz rueq pattup rullungx kuq yaq bomjungc lvp vshuiux.

⁶⁹Mnoz kuex Tishox kox maq vhttuiuc kaz Vsawc Washiz rvtoq kuex nuiyshiq kvmluimx wvnc vtueq tuiuz wvnc tiq shex,” ngoz tueq.

⁷⁰Yesu rueq, “Nuimhez waz rokshiz rac vnueyc kuex ngaz rueq thvl taq shec phaungx rvmuq haz? Yuq muinz nuimshiq phungc wawc washiz kuex htaungc rvtueq,” ngoz tueq jungx kuq tueq.

⁷¹Vpiq rueq kvkhoc jungx tueq kuex, Simon Iskarut saz Yuda nuex tvhungx vtueq vjungx rvtueq. Yvmx khoc lac ngoz ruiux lec kvruex waz kuex sangac waz rokshiz rac wanueyc phungc wawc washiz rvtueq, yuq muinz vpiq kuex tvshuk kuy gay kvmungx jix waz rvtueq.