Read Tase Naga YOHAN 7 Bible Online

YOHAN 7 - Tase Naga bible

YOHAN 7

¹Kvruex yimaq Yesu kuex Galile mungx nuex khuemx kaz tueq. Yuda miqsaz vrangx vpangx vhttax jix hez rueq vpiq thvy gay muex ngoz tueq dvnc lvy ningkhvnc nuex vpiq kuex Yuda mungx nuex khuemx kaz roc muq.

²Kvruex kaq Yuda miqsaz Bulax Tap Moalx httuiuc wvnc yaq shex rvtueq.

³Kvkhoc rvtueq Yesu vpiq nox hez rueq, “Mnoz rueq shuimx vshuiux yauk shuimc kuex m-yix phvnc jix hez rueq mkhiz shueq, vruex maq kaz wvnc vtueq Yuda mungx nuex kaz kuiuz.

⁴Muingc dungc roc jix waz ukhaq yuq muinz piq rueq shuimx yaq yvmx phvnx yauk shuimc yuq muinz kvhttuiyq kvpuiuc maq shuimx muq. Mnoz rueq vwangc juing yauk shuimc shuimx vshuiux ngoz ruiux kuex, mlvmz mungkawx wvtaungx muex tvtuiuz shuiuz!” ngoz tueq vpiq muex ngoz kuq tueq.

⁵(Vnox tamx doc muinz vpiq muex kvmx muq.)

⁶Yesu rueq tsuingshiq muex, “Ngvy vkhing kuex max httuiuc doc, nuimshiq vkhing kuex mruex kaq muinz httax yaq.

⁷Mungkawx rueq nuimshiq kuex shuiuc pac lot muq; ngaz muex dvyx shuiuc pac yaq. Kvkhoc shuiuc pac yaq lvmx kuex tsuingshiq mvrax ngaz rueq tvkhic kuy ningkhvnc nuex rvtueq.

⁸Moalx kvyuq nuimhez kaz wuez kuinz, ngaz kuex ngvy vkhing max httuiuc dvyx doc ningkhvnc nuex moalx nuex kaz mauk,” ngoz tueq tvralc tueq.

⁹Kvkhoc jungc lot yix, vpiq kuex Galile nuex dvyx httax tueq.

¹⁰Vnox tamx kuex moalx nuex kay wvnc yix, Yesu kuex kvkhic kvhongc muq vyumx maq kaz wvnc tueq.

¹¹Yuda miqsaz vrangx vpangx vhttax jix hez rueq moalx nuex vpiq kuex thuiyx vtueq, “Iruex waz iruex m-yuq lac?” ngoz tueq wisoz wuez tueq.

¹²Nuk miqsaz htenc muinz vpiq nuex seng vtueq pinhtumc rvshuip shoyx wuez tueq. Miq wvyvmc rueq, “Vpiq kuex miq hvlx rvtueq,” ngoz tueq, wvyvmc rueq, “Rvmuq, nuk miqsaz muex lvmx tvmawc jix waz rvtueq,” ngoz tueq rv-ngoc wuez tueq.

¹³Yuq muinz tsuingshiq kuex Yuda miqsaz vrangx vpangx vhttax jix muex hiz ningkhvnc nuex, uraq muinz vpiq lvmz raungx nuex dauz laz rvjungc muq.

¹⁴Moalx wvyvmc tanc khvnc nuex Yesu kuex Shomc Yuimx nuex kaz vtueq bomjungc tvluing kuq yaq.

¹⁵Yuda miqsaz vrangx vpangx vhttax jix hez kuex kawc yawc vtueq, “Vruex waz kuex yvmx jongx nuex muinz training tvluing muq doc rvyruiux yvmx wawc lac tuiuz thenc yaq nguinx?” ngoz tueq.

¹⁶Yesu rueq, “Ngaz rueq tvluing kuq vphaungx kuex ngvy kvjaz rvmuq, ngvy tvkay jix waz kvjaz rvtueq.

¹⁷Tishox thuinroc lvmx phvnc roc jix waz kuex ngaz rueq tvluing vshaungx vruex kuex Tishox kox wawc shuex, ngvy vrangx vpangx maq vjungx kvjaz lac rvtvnx lvmz kuex tv-phvlc tuiuz lot shuex.

¹⁸Miqmac vrangx vpangx thuinz maq jungc jix waz kuex miqmac ngauz vngax tvdungc roc jix waz rvtueq. Yuq muinz vpiq tvkay jix waz ngauz vngax thuiyc jix waz kuex kenrix rix waz rvtueq, vpiq nuex vrot vkaq yvmx muinz vguez.

¹⁹Moshe rueq nuimshiq muex Tvrac kuq shec tueq rvmuq haz? Yuq muinz nuimshiq washiz rueq muinz kvruex Tvrac kuex phvnx muit. Ngvy thvy gay tvkoc yvmx ngoz tueq lac thuiyx vphuinx?” ngoz tueq tvralc tueq.

²⁰Kvkaq nuk miqsaz htenc rueq, “Mnoz nuex htaungc kvpumz kaz! Uraq lac mnoz thvy tvkoc hunglaungx yaq nguinx?” ngoz tueq tvralc tueq.

²¹Yesu rueq, “Ngaz rueq vwangc juing phvnx shiz shuimx phaungx tueq nuimshiq lotlaz kawc yawc wuez tuit.

²²Moshe rueq nuimshiq saz miqwaz saz hez muex vhttoar gvnc tvkoc jungx shec tueq. Kvkhoc rvtueq nuimshiq rueq Vguilc Raungnuiyq vhttoar gvnz kuq vshuinx. (Rvkhauk laz vhttoar gvnc vhtungx phaungc jix kuex Moshe rvmuq, nuimshiq jix vwaz tamx rvtueq.)

²³Moshe Tvrac kuex bac kaz muq tvkoc Vguilc Raungnuiyq nuimshiq rueq vhttoar gvnz kuq vshuinx rvyruiux, Vguilc Raungnuiyq ngaz rueq miq washiz muex tvhvlc kuq phaungx tueq, yvmx ngoz tueq lac ngaz muex khaq bac wuez vtuinx?

²⁴Htvlx phawc thvl vtueq kuex nauk phox kuq kaz; vtsuing vrux maq phox kuq shuinz,” ngoz kuq tueq.

²⁵Yerusalem ghaq jix wvyvmc rueq, “Vruex waz kuex vrangx vpangx vhttax jix bix rueq vthvy gay muex thuiyx yaq waz rvmuq haz?

²⁶Lawc shuinz! Vpiq rueq raungshuex raung jungphvnx tvluing kuq yaq, miq washiz raung rueq muinz vpiq muex tuingshaung kuq lot muq! Vruex waz kuex Mesia rvtueq lvmx kuex tsuingshiq rueq rvkhauk laz doc haz tuiuz tvnx?

²⁷Yuq muinz vruex waz kuex m-wawc lac rvtvnx naungshiq rueq tuiuz vshix, Mesia httuiuc kaz tuex yuq vpiq mruex wawc vkaz lac kuex uraq muinz tuiuz muq,” ngoz wuez tueq.

²⁸Yesu rueq Shomc Yuimx mungx nuex kvjaz tvyungc vtueq tvluing kuq yaq baunglaung, “Nuimshiq rueq ngaz kuex vsuing haz tuiuz vphuinx, ngaz mmaq vkaz lac rvtauk nguinx nuimshiq rueq tuiuz vshuinx haz? Ngaz kuex ngvy vrangx vpangx maq vkaz rvmuq. Ngvy tvkay jix waz kuex tsuingrux rvtueq. Vpiq kuex nuimshiq rueq tuiuz muit,

²⁹yuq muinz ngaz kuex vpiq kox maq vkaz rvtauk nuiyc vpiq rueq ngaz tvkaz phuex ningkhvnc nuex ngaz rueq vpiq kuex tuiuz vshaungx,” ngoz tueq ramc jungx tueq.

³⁰Kvkaq tsuingshiq rueq vpiq lvp tvkoc kvmungx wuez tueq, yuq muinz vpiq vkhing max httuiuc ningkhvnc nuex uraq muinz vpiq kuex lvp lot muq.

³¹Nuk miqsaz vkung vdaungx phungc kvwawc vpiq muex kvmluimx wvnc jix muinz paunghvlc httax wvnc tueq, “Mesia httuiuc kaz ruiux yuq kuex vruex waz vraq tvkhic yaq htauk nuex muinz jvnc vtueq vwangc juing romzyac haz tvkhic shvnx?” ngoz tueq rvjungc wuez tueq.

³²Nuk miqsaz htenc rvshuip shoyx yaq kvjaz kuex Pharise nuk rueq tay tueq, kvkhoc rvtueq tsuinghez nuiyc shomc walaungx bix kuex vpiq lvp tvkoc nolaungx bix wvyvmc tvkaz tueq.

³³Yesu rueq, “Ngaz kuex nuimshiq rulc hvlwvl shiz saz httax naungx ruiux, ngvy tvkay jix waz kox nuex waung wvnc taungx.

³⁴Kvkaq nuimshiq rueq ngaz kuex thuiyx phuinx, yuq muinz nuimshiq rueq ngaz kuex humc phuinx rvmuq, yvmx khoc lac ngoz ruiux lec ngaz httax taungx kvyuq nuimshiq httuiuc lot muit,” ngoz kuq tueq.

³⁵Yuda miqsaz vrangx vpangx vhttax jix hez rueq, “Naungshiq rueq humc miq juing vpiq kuex m-yuq lac kaz wvnc tvnx? Naungshiq miq htenc rv-phvlc nyvnc httax yaq Greek ghaq nuex kaz wvnc vtueq, Greek miqsaz htenc muex tvluingc kuy kay lac raz tvnx?

³⁶Vpiq rueq, nuimshiq rueq ngaz thuiyx ruiux muinz humc phuinx rvmuq, ngaz httax taungx baung nuex muinz nuimshiq woz lot muit, ngoz tueq kvjaz yvmx khoc lac raz tvnx?” ngoz tueq vdvmz dvmz rvjungc wuez tueq.

³⁷Kvkaq moalx vtvsuip raungnuiyq nuiyc vkhek moalx raungnuiyq nuex Yesu jvp vtueq, “Khvmsvy jix waz kuex ngvy kox nuex kaz vtueq nuingx wuez shuinz.

³⁸Rumvrc luik nuex jungx tueq rulc rv-ngvlc, ‘Ngaz muex kvmluimx jix waz thuinz vmungx maq rullungx tvraungx yuix ruilx htenc kaz tuex,’” ngoz tueq yunghvlc maq ramc tueq.

³⁹Yesu rueq kvkhoc jungx wvnc tueq kuex vpiq muex kvmluimx jix htenc rueq yix maq lvp wvnc shuex Siyac ngoc rvtueq. Yvmx khoc lac ngoz ruiux lec Yesu kuex ngauz vngax max tvsomc raungc kuq dvyx doc ningkhvnc nuex Siyac kuex kuq muq shauk doc rvtueq.

⁴⁰Nuk miqsaz phungc wawc miq wvyvmc rueq kvkhoc ramc yaq kvjaz kuex tay vtueq, “Vruex waz kuex vsuing shvmmax doc rvtueq!” ngoz tueq.

⁴¹Wvyvmc rueq, “Vpiq kuex Mesia doc rvtueq!” ngoz tueq. Yuq muinz vbez rueq, “Mesia kuex Galile mungx wawc httuiuc kaz tuex rvmuq!

⁴²Mesia kuex Dawid Hokhvmx waruiuz wawc rvtuex ngoz tueq muinz, Dawid httaz juing Betlehem ghaq wawc dung tuex ngoz tueq muinz Rumvrc luik nuex jungx shec tueq,” ngoz tueq.

⁴³Kvkhoc rvtueq Yesu ningkhvnc nuex nuk miqsaz htenc thuinz raz muq yaungx wvnc wuez tueq.

⁴⁴Miq wvyvmc rueq vpiq lvp tvkoc dvnc wuez tueq, yuq muinz vpiq kuex uraq muinz lvp khvmc muq.

⁴⁵Vbvmc jix nolaungx bix kuex shomc walaungx bix nuiyc Pharise nuk kox nuex yek waung koq tueq tsuingshiq rueq, “Yvmx ngoz tueq lac vpiq lvp vtueq shvlx wvnc muit?” ngoz tueq wiz tueq.

⁴⁶Nolaungx bix rueq, “Vpiq rueq tvluing yaq kvkhoc tvluingc jix ukhaq muinz httax muq!” ngoz tueq tvralc tueq.

⁴⁷Pharise nuk rueq tsuingshiq muex, “Nuimshiq muinz vpiq rueq tvshonx yaq kuex rvhumc vtuinx ix?

⁴⁸Naungshiq vrangx vpangx vhttax jix nuiyc Pharise nuk htenc wawc washiz raung vpiq muex kvmluimx jix vhttax haz?

⁴⁹Vruex nuk miqsaz htenc kuex Moshe Tvrac tuiuz muq ningkhvnc nuex Tishox mvnhttonc gurc jix hez rvtueq,” ngoz tueq tsuinghez muex jungx tueq.

⁵⁰Pharise nuk wawc kungkhux nuex Yesu kox nuex kaz tueq Nikodemu muinz lomx tueq.

⁵¹Piq rueq, “Naungshiq Tvrac rulc rv-ngvlc ngoz ruiux, naungshiq rueq miq washiz kuex piq yvmx mvrax lac yaq gay tvnx lvmx kuex wisoz muinz vguez, mvrax tvgurc kuy rvhumc jix waz kvmac tvjungc tvbomc vkhangx muinz kuq miq maq htvp htaz gay mvy muq,” ngoz tueq jungx tueq.

⁵²Tsuingshiq rueq, “Mnoz muinz Galile mungx jix haz? Rumvrc luik nuex lawc shuiux, Galile mungx wawc mruex jix shvmmax muinz dung muq kuex mnoz rueq khiz shuiux,” ngoz tueq tvralc tueq.