Read Tase Naga KAMX 11 Bible Online

KAMX 11 - Tase Naga bible

KAMX 11

¹Pungnuk miqsaz htenc rueq muinz Tishox bomjungc lvp wvnc tueq lvmz kuex kamx waz hez nuiyc Yuda mungx wawc kvmluimx jix phunox bix htenc rueq tay wvnc lvp wuez tueq.

²Peter kuex Yerusalem ghaq nuex httuiuc waung tueq nuex Pungnuk miqsaz muex vhttoar gvnc vhtungx kuy raungc raq jix kuex Peter rulc rvjungc phvnc rvkhawc lvlc wuez tueq.

³Tsuingshiq rueq, “Mnoz kuex vhttoar gvnc vhtungx phvnx muq Pungnuk miqsaz htenc kox nuex khuemx shamx kaz vtueq, tsuingshiq rulc roc nuex phauk saq vshuiux nyix!” ngoz tueq.

⁴Kvkhoc ningkhvnc nuex Peter rueq yaungx wvnc tueq lvmz htenc kuex vphaungc maq tvsuip nuex httuiuc laz tvsuing jungx tueq kuex:

⁵“Ngaz Joppa ghaq maq vjux thoz tauk nuex romzyac maq khiz tauk. Khvy phux ikhoc yunghvlc vshiz kuex vshuk bvlic maq shuimx vtueq raungmungx wawc tvsvt tvdvy tueq hup svmx phvnx shiz ngvy hep nuex dvy kaz tueq kuex khiz tauk.

⁶Kvruex ngaz rueq vhvlx waq lawc tvtsuingc koq tueq, vhuk bvlic phvnx nyvmx saz ngvmx saz htenc, vwuk maq khuemx yaq phvnx yungsuiuz yawxsaz htenc nuiyc wushawx htenc kuex ngaz rueq khiz tauk.

⁷Kvruex yimaq ngaz muex, ‘Peter lex, kvtenc kuiuz; thvt vtueq phauk shuiuz!’ ngoz tueq thuic bomc kuex ngaz rueq tay tauk.

⁸Yuq muinz ngaz rueq, ‘Taungjix lex, kvkhoc kuex rvmuq! Vshuy vshac phvnx nuiyc sawc muq phvnx kuex mkaq muinz phauk saq mauk,’ ngoz tueq jungx tauk.

⁹Raungmungx wawc lauk shiz hulawx thuic bomc tay yek tauk, ‘Tishox rueq vsawc ngoz yaq phvnx kuex mnoz rueq vshuy vshac ngoz tueq ngoc mvy muq,’ ngoz tueq jungx tueq.

¹⁰Kvkhoc lauk thuimx yaungx tueq yix maq, hup svmx lotlaz kuex raungmungx nuex tvyez lvmz wvnc tueq.

¹¹Kvruex kaq Kesarea ghaq maq ngvy kox nuex vtvkaz miq wathuimx kuex ngaz httax taungx yuimx nuex httuiuc kaz ruex rvtueq.

¹²Siyac rueq tsuinghez rulc vdvmz nuex kay naungc tvkoc ngaz muex jungx phuex. Joppa ghaq wawc kvmluimx jix phunox bix waz tvruk muinz nuiyhez rulc vroc nuex kaz naungx ruex, nuiyhez lotlaz Koneliu yuimx nuex duiz tiq.

¹³Kvkaq piq rueq vyuimx nuex raungkamx waz jvp kaz vtueq, ‘Joppa ghaq nuex miq tvkaz ruiux Simon Peter ngoz yaq waz kuex tvgvl kaz kuiuz;

¹⁴piq rueq mnoz muinz m-yuimx wuinz htenc muex muinz palc daungc wvnc lvmx lvp juing bomjungc kuex jungphvnx kuq kv-phux,’ ngoz tueq jungx kaz tueq kvjaz kuex nuiyhez muex tvtay jungx kuq phuex.

¹⁵Kvkaq ngaz rueq bomc dauz vtueq jungx phaungc wvnc koq tueq, Vsawc Siyac kuex kungkhux nuex nuiyhez htauk nuex httuiuc kaz tueq ikhoc, tsuingshiq htauk nuex muinz httuiuc kaz tueq.

¹⁶Kvkaq jix, ‘Yohan rueq kuex yuix maq yuix luip kuq tueq, yuq muinz nuimshiq rueq Vsawc Siyac maq yuix luip lvmz shuinx,’ ngoz tueq Taungjix rueq vjungx kvjaz kuex ngaz rueq rvwvl lvp tauk.

¹⁷Tishox rueq Taungjix Yesu Christu muex kvmluimx jix naungshiq muex kuq phuex kejux yauk noalc kuex Pungnuk miqsaz muex muinz rv-ngvlc dvyx kuq tueq lvmz kuex raungraung kvkhic yaq. Kvkhoc ngoz ruiux kuex ngaz rueq Tishox muex yvmx khoc lac tuingshaung lot shaungx!” ngoz tueq jungx tueq.

¹⁸Kvruex kvjaz kuex tay vtueq tsuingshiq rueq mvrax tvgurc kvjaz kuex jungphvnx muq shex, “Tishox rueq Pungnuk miqsaz muex muinz thuinz kvlayc vtueq, rullungx tvraungx lvp wvnc juing vkhangx kuq tueq nyix!” ngoz tueq jungx ruiux Tishox muex tvtsvmc kvmc tueq.

¹⁹Yesu muex kvmluimx jix htenc kuex Stephen thvt gay tueq baunglaung vkuilc vdaz juing dung vtueq guirguenc wvnc ningkhvnc nuex baung ruip saz nuex panx yanx wvnc tueq, tsuingshiq wvyvmc kuex Phoenikia, Kupru nuiyc Antiok ghaq nuex httuiuc laz kaz vtueq, Yuda miqsaz muex dvyx bomjungc jungx kuq tueq.

²⁰Yuq muinz tsuingshiq phungc nuex Yesu muex kvmluimx jix Kupru nuiyc Kirene mungx jix wvyvmc lomx tueq, tsuingshiq kuex Antiok ghaq nuex httuiuc kaz vtueq Pungnuk miqsaz htenc muex muinz Yesu lvmz Thuix Thaungx Vhvlx bomjungc kuex jungphvnx kuq tueq.

²¹Taungjix luimc vkawc kuex tsuingshiq nuex httax vtueq miq paunghvlc kvmluimx wvnc ruiux Taungjix kox nuex kvroz wvnc wuez tueq.

²²Kvruex thaungc kuex Yerusalem wawc phungc miqsaz rueq tay vtueq, Barnaba kuex Antiok ghaq nuex tvkaz tueq.

²³Piq httuiuc kaz tueq nuex miq htenc muex Tishox rueq yvmx khoc lac ruimrix kuq yaq nguinx kuex khiz vtueq, piq kuex vkoz vkez maq Taungjix nuex thuinz vmungx lotlaz maq tvmtuing httax tvkoc lotlaz muex honc tvsvmz jungx kuq tueq.

²⁴Barnaba kuex miqhvlx washiz rvtueq, Vsawc Siyac maq muinz, kvmluimx thuinz nuex muinz mvrc yaq waz rvtueq, miq paunghvlc Taungjix kox nuex shvlx wvnc tueq.

²⁵Kvruex yimaq Barnaba kuex Sholu thuiyc kay ngoz tueq Tarsu ghaq nuex kaz wvnc tueq.

²⁶Piq rulc rvhumc vtueq Antiok ghaq nuex shvlx wvnc tueq, tsuingnueyc kuex wawc shiz tup phungc miqsaz rulc vdvmz nuex rvtuimx vtueq, miq paunghvlc muex tvluing kuq tueq. Kvmaq kvmluimx miqsaz htenc kuex Christan miqsaz ngoz tueq muingc kuex Antiok ghaq maq phaungc tueq.

²⁷Kvruex baunglaung shvmmax bix wvyvmc kuex Yerusalem maq Antiok nuex kaz wuez tueq.

²⁸Tsuingshiq phungc kvwawc vmuingc Agabu ngoz yaq waz kuex jvp vtueq ghaq lotlaz nuex thuimkux yunghvlc httuiuc tuex lvmz Siyac luimc vkawc maq tvluz nuex jungx tueq. (Kvruex kuex honoc Klaudiu pat nuex yaungx wvnc tueq.)

²⁹Sangac bix rueq muinz miqmac rueq lvp luz tueq htauk kvwawc Yuda mungx nuex httax yaq phungc miqsaz phunox bix muex yauk noalc hic kuy muex raz tsaz wuez tueq.

³⁰Kvrulc rv-ngvlc tsuingshiq rueq shuimx lvmz vtueq kuimphox kuex Barnaba nuiyc Sholu yauk maq Yerusalem ghaq wawc phungc walaungx bix kox nuex tvgurc kuq tueq.