Read Tase Naga KAMX 18 Bible Online

KAMX 18 - Tase Naga bible

KAMX 18

¹Kvruex yimaq Polu kuex Ahten ghaq maq kvtenc kaz wvnc vtueq Korinhtu ghaq nuex httuiuc kaz tueq.

²Kvruex baunglaung Yuda miqsaz htenc Roma ghaqyungx wawc dungc wvnc tvkoc Honoc waz Klaudiu rueq nvrc ningkhvnc nuex, Pontu mungx jix Yuda miqsaz vmuingc Agula ngoz yaq waz kuex vtaungx nyuiuz Priskila tsuingnueyc Italy mungx maq vhttuiuc kaz mtanc max httax nuex dvyx, Polu kuex tsuingnueyc rulc rvhumc vtueq tsuingnueyc kox nuex duiz woz tueq.

³Tsuingshiq kuex Polu kvkhoc ngvmx khuix shuimc jix rvtueq, kvkhoc rvtueq Polu kuex tsuingshiq rulc vroc nuex httax ruiux yauk shuimx naungx tueq.

⁴Yuda miqsaz nuiyc Greek miqsaz htenc kuex kvmluimx wvnc tvkoc Vguilc Raungnuiyq ruip rawx vjux thoz yuimx nuex jungphvnx kuq ruiux shuex.

⁵Sila nuiyc Timothy muinz Makedonia mungx maq httuiuc kaz tueq nuex, Polu kuex bomjungc jungphvnc kuy yauk shuimc kvdvyx shuimx vtueq, Yesu kuex Mesia rvtueq lvmz Yuda miqsaz htenc muex hakhix khvmc kuq yaq.

⁶Kvkaq tsuingshiq rueq piq kuex khawc lvlc ngoc ngac lvy ningkhvnc nuex Polu rueq vsvmhung wawc bokkhuyx kuex nuiuc ruiux vkhoc ngoz tueq, “Nuimshiq batac rvhumc wvnc ruiux kuex nuimshiq mvrax dvyx rvtueq, ngvy mvrax kuex rvmuq! Majuiuc vmaq kuex Pungnuk miqsaz kox nuex shex kaz wvnc taungx,” ngoz tueq jungx tueq.

⁷Kvruex yimaq tsuingshiq phungc wawc dung wvnc vtueq, Tishox muex nawk palx jix Titiu Justu ngoz yaq Yuda miqsaz rvmuq waz yuimx nuex duiz kaz tueq. Kvruex yuimx kuex vjux thoz yuimx hep nuex rvtueq.

⁸Vjux thoz yuimx lawc jix walaungx waz Krispu nuiyc vyuimx wuinz lotlaz muinz Taungjix muex kvmluimx jix miq rvtueq, Vganc Korinhtu ghaq wuinz paunghvlc rueq muinz bomjungc kuex tay vtueq kvmluimx wvnc ruiux yuix luip lvmz wuez tueq.

⁹Raungwvrx shiz Polu rueq siyac maq khiz tueq nuex Taungjix rueq piq muex jungx kuq tueq kuex, “Nauk hiz kaz, mnoz rueq jungx vshuiux kvjaz kvmuinz nauk httvr kaz,

¹⁰yvmx khoc lac ngoz ruiux lec ngaz mnoz rulc roc nuex httax vtaungx. Mnoz muex uraq muinz vgvrx vtsvrx tvhttuiuc kuq kv-phux rvmuq, vruex ghaq vwawc miq paunghvlc kuex ngvy miq htenc rvtueq,” ngoz tueq jungx kuq tueq.

¹¹Kvkhoc rvtueq Polu kuex kvruex ghaq kvyuq wawc shiz rac yapix lex tvruk httax vtueq Tishox bomjungc tvluing kuq tueq.

¹²Gallio kuex Akaia mungx nuex mungx walaungx yaungx tueq nuex, Yuda miqsaz htenc rvtuimx ruiux Polu kuex lvp vtueq tvrac rungx nuex het shvlx wvnc tueq.

¹³Tsuingshiq rueq, “Vruex waz vraq tvrac kuex phvnx muq maq, Tishox muex nawk palx kuy tvkoc miq htenc kuex shunshvlx tvshonx bawx yaq!” ngoz tueq.

¹⁴Polu rueq tvralc tvkoc dvnc yaq nuex Gallio rueq, “Yuda miqsaz htenc lex, vruex mvrax kuex vbac vtac mvrax, rvmuq ngoz ruiux vyaq vrax yauk shuimc rvtueq ngoz ruiux yuq kuex nuimshiq rueq tvgurc vshuinx mvrax kuex ngaz rueq thuinz tvluz vtueq tay kuq phaungx.

¹⁵Yuq muinz vruex khac kuex rvbomc rv-nyamc nuex shuimx yaq bomc poz htenc, vmuingc htenc nuiyc nuimshiq tvrac nuex seng vtueq rvkhawc lvlc mvrax tvgurc khac dvyx ningkhvnc nuex, nuimshiq lawx rvjungc phvnc wuez kuinz. Kvkhoc khuec vkhac tvkoc nuex ngaz phoc waz yaungx vtaungx rvmuq!” ngoz tueq Yuda miqsaz htenc muex ngoz tueq.

¹⁶Piq rueq tsuingshiq kuex khac phoc juing rungx yuimx wawc yurc gay tueq.

¹⁷Tsuingshiq rueq vjux thoz yuimx lawc jix walaungx waz Sosthene kuex lvp wvnc vtueq phoc waz rungx yuimx kalc maq wung tueq, kvkhoc wung koq muinz Gallio rueq yvmx muinz bvlvmc lawc kuq muq.

¹⁸Polu kuex Korinhtu ghaq nuex raungnuiyq paunghvlc httax shec tueq. Kvruex yimaq kvmluimx jix htenc muex gvnhttuingc ngoz kuq ruiux, Priskila nuiyc Akula rulc roc nuex lix maq Suria mungx nuex kaz wvnc tueq. Kenkerea ghaq maq max kvtenc wvnc nuex piq bomkhvrc vtaq vhttax ningkhvnc nuex vkhux sulx tueq.

¹⁹Ephesu nuex httuiuc kaz vtueq Polu rueq Priskila nuiyc Akula kuex ghaqyungx nuex tayx ishec ruiux, piq kuex vjux thoz yuimx nuex nyuip wvnc vtueq Yuda miqsaz htenc rulc rvjungc phvnc tueq.

²⁰Miq htenc rueq tsuingshiq rulc loayc hvlc httaz tvkoc tvwanc koq muinz piq kuex thauk muq.

²¹“Tishox thuinroc httax ruiux yuq nuimshiq kox nuex ngaz yek waung yek raungx,” ngoz tueq jungx kuy lot yix, Ephesu maq lix maq kaz wvnc tueq.

²²Piq kuex Kesarea nuex httuiuc vtueq lix maq svt kay yix, Yerusalem nuex waung wvnc vtueq phungc miqsaz hez rulc gvnhttuingc ngoz tueq kvjak shec ruiux, Antiok nuex kaz wvnc tueq.

²³Kvruex ghaq nuex vshauk puq httax shec ruiux, Galatia mungx nuiyc Prigia mungx nuex httuiuc kaz vtueq, kvmluimx jix htenc kuex tvtsuir tv-phaungx kuq tueq.

²⁴Alesander ghaq jix vmuingc Apollo ngoz yaq Yuda miqsaz washiz kuex Ephesu ghaq nuex httuiuc kaz tueq. Piq kuex vjungc vphvnc thenc hvlc nuiyc Rumvrc luik muinz thenc hvlc waz rvtueq.

²⁵Taungjix lvmx phvnc tvluing ruiux pinhtumc vthuinz nuex raungc raq vtueq, Yesu lvmx kuex vlvmz rvkhauk laz tvluing jungphvnx kuq tueq. Yuq muinz Yohan rueq yuix luip kuq tueq lvmx dvyx piq rueq tuiuz yaq.

²⁶Piq rueq vjux thoz yuimx nuex vthuinz vtharc yunghvlc maq jungx kuq tueq. Piq rueq jungphvnx yaq lvmx kuex Priskila nuiyc Akula rueq tay vtueq yuimx nuex gvl wvnc ruiux, Tishox lvmx phvnc kuex rvkhauk laz tvluing jungphvnx kuq tueq.

²⁷Piq kuex Akaia mungx nuex kay roc ningkhvnc nuex Ephesu ghaq wawc kvmluimx jix miqsaz htenc rueq piq tvkoc Akaia ghaq wawc phungc miqsaz muex luik wuiyq vtueq, piq kuex vhvlx waq malc wvnc tvkoc tvtay tueq. Piq kuex Akaia nuex httuiuc kaz vtueq, Tishox kejux maq kvmluimx wvnc tueq jix htenc muex paunghvlc romc kuq tueq.

²⁸Yvmx khoc lac ngoz ruiux lec piq kuex nuk waz htumc nuex rvjungc phvnc ruiux tuex nuex Rumvrc luik wawc tvkhic vtueq, Yesu kuex Mesia rvtueq lvmz Yuda miqsaz htenc muex rvkhauk laz jungphvnc kuy khvmc yaq rvtueq.